གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བྲེལ་ཟིང་གིས་འདར་བ་དེ།

2015-11-04 15:16:22 ཆར་ཐིགས། ཀློག་གྲངས། མཆན ཡོད།


མུན་ནག་གི་སྐྲ་གསེང་ལ་འཚོ་བ་བཅས་པའི་སྲོག་ཆགས
བྱང་རླུང་གིས་འདེད་བཞིན  རྨི་ལམ་འཐོར
ཤ་རུས་ཀྱི་ལྷུ་ལག་ལ་སྐྱོན་ཤོར

གད་གདར་མ་བྱས་པའི་བྲང་གཞུང་ནི
ཁང་བ་ནག་རྡིབ་ཅིག་ཡིན
གཏམ་རྒྱུད་དམར་ནག་གི་མཁའ་དབུགས་ཁྱབ་ཡོད

སྒོ་ཕྱུགས་ཀྱི་སྔངས་འདར་ཐོས་རྗེས
འཚོ་གཞིས་ཀྱི་སྦྲ་སྒོ་ནུབ་ཁར་གཏད

གང་ལྟར ཅི་བྱས་ཀྱང
ཁྱེད་ཀྱི་མ་འོངས་པ་ནི་མཚན་མོ་ཞིག
མཚན་མོ་དེ་ཤ་ཚ་ཞིང་སྙིང་གཟེར་སྤྱད་ཅིག

བྲེལ་བ་མ་སྔ  བྲེལ་མ་ཐུ
མདུན་ལྗོངས་ཀྱི་ལམ་ཕྲན་ཡང
མུན་ནག་གི་ཟབ་སར་གཟས་འདུག

སྤྲིན་པ་ནག་པོས་མཇུག་མ་ཐུར་ལ་བསྣར་དུས
རི་ཆུ་ནགས་གསུམ་གྱིས་མཆུ་བསུམ་བཞིན་འདར
ས་སྲོད་ཅིག་རྫོགས་དུས གྲུ་ཟུར་ཞིག་ག་རེ་བྱུང་ཡོད

                                      ༢༠༡༥-༡༡-༣

 

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།