གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཟླ་བ་ཟེར་བའི་བུ་མོ་ཞིག་ཀྱང་བུད་སོང་།

2015-11-13 10:09:34 ཐོ་ཡོར།༼ དཀར་མཛེས ༽ ཀློག་གྲངས། མཆན ཡོད།


ཉིན་ཞིག་ང་རང་འཕྱོངས་རྒྱས་སུ་སོང་བ་ཡིན
འཕྱོངས་རྒྱས་ཟླ་བ་སྒྲོལ་མ་ཟེར་བའི་བུ་མོ་ཞིག་དང་འཕྲད་བྱུང
ཁོ་མོས་དཀར་འཇམ་གྱི་ལག་པས་མིག་ཆུ་འཕྱི་ཞོར
རྨི་ལམ་ལས་ཁྱེད་རང་ང་ཡི་ཆེད་དུ་རྒྱང་རིང་ཞིག་ལ་བུད་སོང་ཟེར
བུ་མོ་དེས་མིག་ཕུར་ཚུགས་སུ་བཏབ་ནས་ང་ལ་བལྟས་པས
མདང་ནུབ་སྒྲོན་པའི་ལ་སྒྲོན་དེ་ཁྱེད་ཀྱི་སྤྱན་གྱི་གཟིགས་ཕྱོགས་ཨེ་ཡིན་སྙམ
ལྕང་གླིང་གསེབ་ནས་བྱིའུ་སྐད་གྲགས་པ་ན་ཁོ་མོས་ཧ་ཅང་གཟབ་ནན་ངང
སྐྱེ་བ་འདི་ལ་ཁྱེད་ཀྱིས་ང་ལ་ཁྲེལ་མེད་བྱེད་དོན་ཅི་ཡིན་ཟེར
སྤྲིན་པའི་ནང་གི་ཆར་ཆུ་ནི་ཁྱེད་ཀྱི་ངག་ལས་ཟླ་བ་སྒོར་སྒོར་ཞིག་ཏུ་གྱུར
ཟླ་བཞི་བའི་ནང་གི་ཞེན་ཆགས་དོད་པའི་ཟླ་བ་ཞིག་ཏུ་གྱུར
རླུང་བུ་ཤུར་ཤུར་ལྡང་ངས་ཁོ་མའི་སེམས་སྒྲར་ཉན་ནས་ཟླ་བ་ལ་སྙན་ངག་ཅིག་གྱེར་བ་ཡིན
སྐར་ཚོགས་ནི་ཟླ་བའི་མིག་ཆུ་ཡིན་ནམ་ང་ཡི་སྙན་ངག་ཡིན
མཚན་མོ་དེར་འཕྱོངས་རྒྱས་ནི་མི་མེད་ལུང་སྟོང་ཞིག་རེད
ང་རང་བུ་མོ་དེའི་གམ་དུ་བསྡད་ནས་རྨ་ཆུ་ཞེས་པའི་ཆུ་བོ་ཞིག་ཡོད་རབས་བཤད
ཆུ་བོ་དེ་ནི་ངས་ཁྱེད་ལ་བྲིས་པའི་བརྩེ་འཕྲིན་ཡིན་ཞེས་བཤད་མྱོང
ད་ལྟ རྨ་ཆུར་དར་ཆགས་ནས་གང་ལ་བཞུར་བའང་མཐོང་ཐབས་མི་འདུག

དེ་རྗེས་སུ་ཟླ་བ་སྒྲོལ་མ་ཟེར་བའི་བུ་མོ་ཞིག་བུད་སོང་བ་ངའི་རྨི་ལམ་དུ་རྨིས་པ་ཡིན་ནམ
ང་ཡོད་སར་ཁོ་མོས་རྒྱང་རིང་ནས་བསྐུར་ཡོང་བའི་འཕྲིན་ཡིག་ཅིག་འབྱོར་འདུག
མདང་ནུབ་མཚན་གང་བོར་འཕྲིན་ཡིག་དེའི་ནང་དུ་ཅིག་བཤད་ཡོད་སྙམ་ནས་གཉིད་པ་ཡིན
འཕྲིན་ཡིག་དེའི་ནང་དུ་མཚོན་དོན་མི་གསལ་བའི་རི་མོ་ཞིག་འདུག
རི་མོ་དེའི་ཆེད་དུ་ང་རང་དབུས་ལ་ཡང་བསྐྱར་འགྲོ་དགོས་བསམ
ནམ་ལངས་པ་ན་ང་རང་དབུས་ལ་སོང་བའི་གནས་ལུགས་གང་ཡང་རྙེད་ཐབས་མི་འདུག
ང་རང་འཕྱོངས་རྒྱས་ཟེར་བའི་ས་ཆ་ཞིག་ཏུ་སོང་མྱོང་བ་སུ་དང་གང་གིས་མི་ཤེས
ང་རང་གིས་ཀྱང་མི་ཤེས

             2015.6.6.མཚན་མོར་གསེར་ཐང་ནས། 

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།