གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྐྱོ་བ།༼ ཞར་བཀོད་གཅིག་ཡོད ༽

2016-01-30 11:46:36 རྡོ།༼ རྨ་ཆུ ༽ ཀློག་གྲངས། མཆན ཡོད།


འཇིག་རྟེན་འདི་མྱ་ངམ་ཐང་ཞིག་ཡིན་ནམ

ང་ཡི་སྒེའུ་ཁུང་ལས་མཆེད་པའི་འོད་དེ་འཁྱག་པ་ལ

ཕྱི་རོལ་གྱི་མུན་པ་མེ་ལོང་དུ་ཟུག་སྟེ
གཟུགས་ཀྱི་ཕུང་བོ་ཞིག་ཡོར་ཡོར་སྒུལ

ང་རང་ཁེར་ཧྲེང་ངང་རི་མོ་དེར་འདྲེས་དུས
ལྷིང་འཇགས་ཀྱི་མཚན་མོ་ཕར་ལ་ཡོལ་ཟིན

ད་ལྟ་འུར་ཟིང་དང་ཟོལ་རྫུ
འཕྱ་དམོད  ང་རྒྱལ་ཙམ་གྱིས་གང་བའི་སྲིད་པ་འདི
ཤིན་ཏུ་ཆུང་ཞིང་དེ་ལ་ནམ་མཁའ་ཞེས་མཛུབ་མོ་གཏད་ས་མེད

ས་གཞི་ཁོ་ན་རང་ཉིད་ཀྱི་རྐང་འོག་ལ་བཅུག་ནས
རི་ཆུ་ནགས་གསུམ་གྱི་ཁྲོད་དུ་རྐང་རྗེས་ཕབ

རྐང་རྗེས་རེ་རེའང་བྱེའུ་ཞིག་དང་འདྲ་བར
གཤོག་པ་གཞན་གྱིས་བཅད་འདུག

                           ཆང་འདི། 

ཆར་བ་ཆུང་ཆུང་འདི
ཁྱེད་ཀྱི་རང་ཉིད་ཀྱི་མིག་ཆུ་ལ་འཁྲུལ་ངེས་སམ

ངས་ཆང་འདི་འཐུང་བཞིན་བསམ་བློ་དེ་ལྟར་བཏང་བ་ཡིན

མུན་པ་ནི་ལྕགས་རི་མཁྲེགས་པོ་ཞིག་དང་འདྲ་བར
བདག་གི་ཡིད་སེམས་ཀྱི་གཏིང་དང
ཁྱེད་ཀྱི་འཚོ་བ་ཡི་ཕུག་སོགས་བསྐོར་བར་བྱ་དུས
སྲང་ལམ་གྱི་ཁྱི་ཕྲུག་དེ་གློ་བུར་དུ་ཤི་འགྲོའམ

མེ་ལོང་ནི་རྡུལ་གྱི་ཕོ་བྲང་ནག་པོ་ཞིག་དང་འདྲ་འདུག
རླུང་གི་མདུན་ཐད་ན་གཡོ་ཞིང་གཡོ
ངས་དེ་ཡི་སྒེའུ་ཁུང་སྤྱད་ནས་རང་གི་ཕ་ཡུལ་ལ་བལྟས་མོད
བལྟས་ཀྱིན་བལྟས་ཀྱིན་ངས་ཆང་འདི་སྟོབས་ཀྱིས་འཐུང་འདོད

གལ་ཏེ  ང་བཟི་སོང་ན
ཁྱེད་ཀྱིས་བདག་ལ་གནས་ཚང་ལྟ་བུའི་སྐད་ཆ་ཅི་ཡང་བཤད་མི་དགོས
ང་དྲང་ཐད་ཀྱི་རོལ་དབྱངས་ཁང་དེར་བུད་འགྲོ

དེ་ནས་ངས་མུ་མཐུད་དུ་ཆང་འཐུང་རྒྱུ་མིན་མོད
ང་རང་མྱོང་བྱ་གཞན་ཞིག་གིས་བཟི་བར་བྱ་ངེས


                                                                                     རྩོམ་སྒྲིག་པ། དབང་མོ།

            

                                                                              (མཆོད་མེའི་པར་དབང་གཞན་གྱིས་དགོལ་མི་རུང)



རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།