གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

གཡུ་ཐོག་ཟམ་པ།(ཞར་བཀོད་གསུམ་ཡོད)

2018-06-13 11:12:12 གསར་བུ།(བོད་ལྗོངས་སློབ་ཆེན) ཀློག་གྲངས། མཆན ཡོད།


སྔོ་ཐིང་ཐིང་གི་ཡི་གེའི་ནང་དུ།
ཆུ་བོ་མེད་པའི་ཟམ་པ་ཞིག་གཉིད་ལ་ཡུར་འདུག
སྨུག་སིང་སིང་གི་ཐམ་གའི་སྟེང་དུ།
མི་མེད་པའི་ཟམ་པ་ཞིག་ཁེར་རྐྱང་དུ་ལུས་འདུག

གནའ་ཤུལ་ཟེར་བའི་ཐ་སྙད་རགས་པ་ཞིག
རྡོ་བའི་ཕྱི་གོས་གཡོགས་ནས་ལམ་ཟུར་གྱི་མགྲོན་པོར་སྒུག
སེར་ག་ཤོར་བའི་གཏམ་རྒྱུད་ཀྱི་ཕྱི་ཤུན་དག
ཚོང་རྫས་ཀྱི་གསེང་དུ་བཅུག་སྟེ་ཕྱི་ཐུམ་བརྒྱབ།

ཕྱི་ནང་གི་རྩིག་པའི་ཁ་མདོག་འགྱུར་དུས།
དབུས་ལམ་རིང་མོ་ལ་ཕུ་ཐག་མེད་ཅིང་།
ཤིང་སྒྲོམ་གི་གཡས་གཡོན་གང་སར།
དམར་ཧྲེང་ཧྲེང་གི་ངོ་གདོང་ཁྱུ་ཞིག་ལུས་འདུག
ནག་ཐིབ་ཐིབ་ཀྱི་ཕྲེང་བའི་རྡོག་པོ་སྤུངས་འདུག

སྙིང་པོ་རྡུལ་ཙམ་ཡང་མེད་པའི་ཁང་པ།
ལམ་ལུགས་དམར་སྨུག་ཅིག་གི་འོག་ཏུ།
སྟོང་བསམ་གྱི་ཤོག་བུ་ལ་ལྕིབས་ཏེ་ལྡིང་བྱུང་།

རིན་ཐང་ཆ་ཙམ་ཡང་བྲལ་བའི་མུ་ཏིག་རྫུན་མ།
ཁ་ངོ་དྲེགས་པ་ཅན་གྱི་མཐུ་འོག་ཏུ།
ཧམ་ཤེད་ཀྱི་བདུད་རླུང་དང་མཉམ་དུ་གཡོས་བྱུང་།

བསླུ་བྲིད་ཀྱིས་བཀུག་པའི་མཛེས་པ་དེ་དག
མིག་ལ་གཟན་པའི་སྐད་ཆའི་ཕུང་པོ་ཞིག་ཡིན་ན།
སྦུབས་སུ་འཁྱིལ་བའི་གློག་སྒྲོན་གྱི་ལྟད་མོ།
ཉན་རིན་གང་ཡང་མེད་པའི་ཁྲ་རྒྱན་ནག་པོ་དེ་ཡིན།

ཟམ་སྣེའི་རྡོ་རིང་གི་འགྲམ་དུ་འཁྱར་དུས།
གྲོང་པའི་རྒན་པོ་དག་ལ་ཀླད་པ་མི་འདུག
ཡུལ་སྐོར་བ་ཞིག་ལ་རྒྱང་ཤེལ་མི་འདུག
མུན་པ་འགེམ་གྱིན་འགེམ་གྱིན།
སྟ་རེ་མགོ་ཐོག་ཏུ་བཞག་སྟེ་ལམ་དུ་ཆད་སོང་།

གཡུ་ཐོག་ཟམ་པ་གཡུ་ཡི་ཐིག་ལེ་མིན།
ཟམ་པའི་ངོགས་ཀྱི་ཁང་ཆུང་གསེར་གྱི་པུར་སྒམ་མིན།

                          ༢༠༡༨-༥-༡༨

                        གློག་བརྙན་ནག་པོ།
                      

ལམ་ཁུག་གི་མེ་ལོང་ནི་འགྲིམ་འགྲུལ་གྱི་ཡོ་བྱད།
དེའི་ནང་དུ་འདོད་རྔམས་དང་གཡོ་སྒྱུ་འཁྱིལ་ཡོད།
ཡིན་ནའང་།   འུ་ཐུག་པའི་རྣམ་ཐར་ཞིག་ལས།
བྱེའུ་ཡིས་མཆུ་ཏོ་སྣུན་ནས་རང་ཉིད་བཙལ་དུས།
མེ་ལོང་གི་ངོས་སུ་རང་ཉིད་ཀྱི་གཟུགས་བརྙན་ལས་ཅི་ཡང་འཆར་རྒྱུ་མ་བྱུང་།

བྱེའུ་ངུ་སྐད་དང་སྡུག་ཡུས་ཀྱི་བར་ན།
ངལ་བ་བཅུད་དུ་བསྒོམ་པའི་ཡ་ལན།
སུ་ཚང་ལ་བཤད་འདོད་པའི་མིག་ཆུ་ཡིན་ནམ།
ན་ཟུག་རྒྱགས་ལ་འཛིན་པའི་ལག་བརྡ།
སུ་ཞིག་ལ་འབུལ་འདོད་པའི་གླེན་རྟགས་ཡིན་ནམ།
གང་ལྟར།  མེ་ལོང་གི་མདུན་དུ་བྱེའུའི་གཤོག་པ་ལས་ལྷག་མི་འདུག

སྟོང་ལོ་བཅོ་བརྒྱད་ལོའི་མཚན་མོ་ག་གེ་མོ་ཞིག་འདས་རྗེས།
རྒྱང་ཐག་ཤིན་ཏུ་ནས་རིང་བའི་ཞོགས་པ་ཞིག་ལ།
བྱེའུ་ཤི་ནས་རྣམ་ཤེས་གར་སོང་མི་འདུག
གྲོང་ཁྱེརXXཡི་གྲོང་དཔོནXX
བྱིའུ་ཤི་བའི་རོ་ལ་བལྟས་ནས་དགོད་ཀྱི་འདུག

                ༢༩༡༨-༥-༡༩

                      མི།

སེམས་ལ་འཇིག་རྟེན་བརྩིགས་ཏེ།
སྨྲ་ལྕེ་ལ་བདུད་པ་ཐེབ།

རྐང་པ་གཉིས་པོ་ཐག་པས་བཀྱིགས་ཏེ།
ཁྲག་གིས་འཚོས་པའི་དཀར་ཟས་སྙིང་གི་རྒྱན་ལ་བཏགས།

དུས་ཚོད་ཀྱི་སྐྱ་ལམ་སྟེང་དུ།
སྒྱུ་མའི་རང་རྣམ་སྣ་ཚོགས་བྲིས་ཤིང་།
རང་ཉིད་ཀྱི་རྨུ་ཐག་གཞན་ལག་ཏུ་བཅོལ།

                  ༢༠༡༨-༦-༤

                      ནག་ནག་འདྲ་བའི་མཚན་མོ་འོད་ཀྱིས་ཁེངས།

དྲན་པ་རླུང་ཁྲོད་དུ་སྤུངས་རྗེས།
སྐར་ཕྲན་ཁ་ཤས་མགྲིན་པ་རུ་ཉར་ནས།
ཁོག་པའི་གཏིང་གི་ཟུར་མིག་མངར་མོ་དེ་འཚོལ་བར་སོང་།

ལམ་ཟུར་དུ་བཞད་པའི་རྡོ་ཡི་མེ་ཏོག
རྐང་པའི་རྩེ་མོ་ལ་ཟུག་སྟེ།
འགྲུལ་བཞུད་ཀྱི་མུན་པ་ལ་བར་ཆད་ཡང་ཡང་བཟོས།

སྒོར་ཐིག་ཕྲ་མོ་དེ་གའི་ནང་དུ།
ཡ་ལན་གྱི་རྔུར་སྒྲ་ཨེན་ཙམ་ཡང་མེད་དུས།
ཁྱེད་ཀྱི་མཚན་མོ་ང་ཡི་པང་དུ་ཡིབ།

              ༢༠༡༨-༦-༩མཚན་གྱི༡:༤༠


རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།