བཤེར་འཚོལ།
སྲང་ལམ་ནས་མི་ཞིག་ལ་སྒུག་པ།(སྙན་ཚོམས)
༡ མ་རྙེད་པའི་ཚོར་བ།
རླུང་བུ་ཅི་ཙམ་འདར་ཡང
ང་ལ་འཁྱག་སྣང་མི་འདུག
མཚན་མོ་འདིའི་སྲང་ལམ་བར་ནས
ངས་ཁྱོད་རང་གཅིག་པོར་བསྒུག་ཡོད
སྙིང་ཉེ མཚན་མོ་འདི་ཅི་ཙམ་འཁྱག་ཀྱང
ཁྱོད་ཀྱིས་ནང་སེམས་ཀྱིས་ང་རང་སྲོ་ཡོད་པ་ཚོར་ན
ངས་འཁྱག་སྣང་ཟེར་བའི་ཚོར་བ་དེ་བཙལ་རུང་མ་རྙེད
སྐར་མ་བརྒྱ་དང་ཉི་ཤུར
ངས་ཁྱོད་རང་སྲང་ལམ་ནས་བསྒུག་བཞག
དེ་ནི་ཅི་ཡང་མིན་དེ
ངས་ཁྱོད་རང་ཉིན་ཞག་སྟོང་དང་དགུར་བརྒྱར
ཁེར་རྐྱང་གི་ན་ཟུག་གྱོན་ནས་བསྒུགས་མྱོང
༢ སྲང་ལམ་གྱི་སྙན་ངག་པ།
སྙན་ངག་པ་ཞིག་གིས
མཚན་མོའི་སྲང་ལམ་དུ
སྙིང་ཉེ་བའི་རང་གི་མཛའ་མོར་བསྒུག་འདུག
ཁོ་ལ་སྐྱོ་སྣང་མི་འདུག་ཟེར
བརྩེ་དུང་གི་མེ་ལྕེ་རེ་རེས
ཁོ་དང་ཁོའི་མཛའ་མོ་བསྲོས་ཡོད
༣ འཇིག་རྟེན་གྱི་རྒྱ་ཁྱོན།
འཇིག་རྟེན་འདི་རྒྱ་ཆེ་ལ་རྒྱ་ཡང་ཆུང
འཇིག་རྟེན་འདི་རྒྱ་ཆེ་བས
ང་ཡིས་ཁྱོད་རང་ཅི་ཙམ་བཙལ་རུང
འུ་གཉིས་དུས་ཚོད་གཅིག་གི་ནང་དུའང
འཕྲད་ཐབས་མི་འདུག
ཡང་ན འཇིག་རྟེན་འདི་རྒྱ་ཆུང་བས
འུ་གཉིས་སྐད་ཅིག་གིས
མེ་སྟག་བཞིན་འཕྲད་པར་བྱས་ཏེ
མི་ཚེ་རིང་མོ་ཞིག་ཀྱང་མཉམ་གཅོད་བྱ་དགོས་བྱུང
འཇིག་རྟེན་འདི་རྒྱ་ཆེ་ལ་རྒྱ་ཡང་ཆུང
འཇིག་རྟེན་འདི་རྒྱ་ཆེ་བས
ངས་ཉིན་ཞག་སྟོང་དང་དགུ་བརྒྱར
ཁྱོད་དང་འཕྲད་པར་སྒུག་དགོས་བྱུང་མྱོང
འཇིག་རྟེན་འདི་རྒྱ་ཆུང་བས
འུ་གཉིས་སྐར་འབྲུ་བཞིན
ཁྱོད་ཀྱི་ཕོར་བའི་ནང་དུ་གསོན་པར་བྱས་ཏེ
མི་ཚེ་རིང་མོ་ཞིག་ཀྱང་མཉམ་གཅོད་བྱ་དགོས་བྱུང
༢༠༢༢-༣-༡༥མཚན་མོར།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།