གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

འཁྲུལ་སྣང་།

2017-11-09 11:18:39 ཏ་ཏ། ཀློག་གྲངས། མཆན ཡོད།


ཉི་འོད་འཇམ་པོས་བཀྲ་ཤིས་ཀྱི་ལུས་ལ་སྨྲ་མི་ཤེས་པའི་བདེ་སྐྱིད་ཀྱི་ཚོར་སྣང་སྟེར། དེ་དུས། བཀྲ་ཤིས་སྔ་དྲོའི་དུས་ཚོད་བཅུའི་སྟེང་ཡར་ལངས་ནས་སྒོ་རུ་འབུད་སྐབས་རེད། ནམ་ཟླ་དགུན་ཁ་དེར། བཀྲ་ཤིས་སྡོད་པའི་གྲོང་རྡལ་ལ་མཚོན་ན་ཉི་འོད་འདི་འདྲའི་འཇམ་པོ་ཞིག་བྱུང་མྱོང་མེད་པ་འདྲ། ཁ་སང་། ས་རྡུལ་འདྲེས་པའི་ཙག་རླུང་གིས་འགྱིག་ཁུག་གི་གད་སྙིགས་ཁུར་ཏེ་གྲོང་རྡལ་གྱི་སྲང་ལམ་གང་སར་འཕུར་ཞིང་མིག་ཟུང་ཕྱེ་དཀའ་བར་གྱུར་མོད། དེ་རིང་གི་མཁའ་དབུགས་ནི་དབྱར་ཁ་སླེབ་པ་བཞིན། བཀྲ་ཤིས་ཀྱིས་ཚི་ལེན་དཔུང་རྗེན་ཞིག་གྱོན་ནས་ལག་པ་གཉིས་ནམ་མཁའ་རུ་གཡུག་གིན་ཐད་ཀར་མདུན་ཐད་དུ་བཞག་པའི་གད་སྙིགས་སྒམ་དེ་གཟས་ནས་སོང་། གད་སྙིགས་གང་སར་གཏོར་ཡོད་པར་མ་ཟད། གཅིན་སྐྱག་གིས་ཁྱབ་འདུག་པའི་སྲང་གྱོག་གི་གྲུ་ཟུར་དེར་བཀྲ་ཤིས་ཀྱིས་བདེ་སྣང་ངང་གཅིན་བཏང་། ཉི་འོད་ལམ་ལམ་ཁྲོད་གཅིན་གཏོང་དུས་ལུས་ཡོངས་ལ་བདེ་སྣང་གིས་ཁྱབ།

ཉི་འོད་ཁྲོད་བཀྲ་ཤིས་ཀྱི་ངོ་གདོང་དཀར་ལམ་ལམ་བྱེད་ཅིང་མིག་ཟུང་ནག་ཀྲིག་ཀྲིག་བྱེད། གཟུགས་རིང་ཐུང་འོས་ཤིང་འཚམས། ཉི་འོད་ཁྲོད་ཁོས་དེ་ལྟར་གཅིན་གཏོང་བཞིན་པའི་སྐབས་སུ་བུ་མོ་ཞིག་གིས་མེ་མདའ་ཞིག་གད་སྙིགས་སྒམ་དུ་གཡུག་པ་མཐོང་། ཁོའི་སེམས་ལ་འཚུབ་ཆ་སྐྱེས། ལོ་འདི་གར་རྒྱལ་ཁབ་ཀྱིས་མེ་མདའ་བཀག་འགོག་བྱས་ཡོད་པས། མེ་མདའ་བརྙན་འཕྲིན་ལས་མ་གཏོགས་མཐོང་མི་ཐུབ་པའི་དུས་སུ། ཉིན་དཀར་བུ་མོ་ཞིག་གིས་འདི་ལྟར་གད་སྙིགས་སྒམ་དུ་འཕེན་སྲིད་དམ། བུ་མོ་དེའི་ལྭ་བ་ཁྲག་གིས་དམར་པོར་བསྒྱུར་འདུག མོས་མེ་མདའ་དེ་སྤྱད་ནས་ས་འདི་དང་ཐག་མི་རིང་བའི་གནས་ཤིག་ཏུ་མི་ཞིག་བསད་པ་རེད་སྙམ། ཁོས་རང་ཉིད་ཀྱི་ཕྱོགས་བཞི་ལ་བལྟས་པ་ན། སྲང་གྱོག་དེར་མི་གཞན་ཞིག་མཐོང་རྒྱུ་མེད་པས། ཁོ་ལྷག་ཏུ་འཚབ་འཚུབ་དུ་གྱུར་ཞིང་མགྱོགས་མྱུར་ངང་སྲང་གྱོག་དེ་ལས་འབྲལ་བར་བརྩམས།

སྲང་གྱོག་དེ་ལས་འབྲལ་བར་ཁོ་ལ་གདམས་ཀ་གཉིས་ཡོད་དེ། གཅིག་ནི་ཕྱིར་རང་ཁྱིམ་ལ་བགྲོད་པའི་སྐས་ཐེམ་དག་ལས་ཡར་བཞི་ཐོག་ཏུ་འཛེག་དགོས་པ་དང་། གཉིས་ནི་སྲང་གྱོག་ལས་བྲལ་ཏེ་སྲང་ཆེན་དུ་ཞུགས་དགོས་པ་དེ་ཡིན། ཁོས་གདམས་ཀ་གཉིས་ལས་ཕྱི་མ་གདམས། རྒྱུ་མཚན་སྲང་ཆེན་ལ་གོམ་པ་དྲུག་ཙམ་གྱིས་ཞུགས་ཐུབ་པར་མ་ཟད། མི་ཚོགས་ཀྱི་རླབས་རྒྱུན་དུ་ཞུགས་ན་བདེ་འཇགས་ཡིན་སྲིད་སྙམ།

ཡིན་ན་ཡང་། གོམ་པ་དྲུག་ཙམ་མདུན་ལ་སྤོ་རྒྱུ་ནི་ཇི་འདྲའི་དཀའ་ཁག་ལྡན་པ་ཞིག་ཡིན་པ་བཀྲ་ཤིས་རང་ཉིད་མ་གཏོགས་གཞན་གྱིས་རྟོགས་མི་སྲིད། ཁོས་ཏག་ཏག་གོམ་པ་གསུམ་མདུན་དུ་སྤོས་མ་ཐག  བུ་མོ་དེས་འཛུམ་མདངས་མེ་ཏོག་འདྲ་བ་ཞིག་སྟོན་བཞིན་ཁོའི་མདུན་བླངས་ནས་བཀག་བྱུང་།

བུ་མོ་དེར་བལྟས་མ་ཐག་བརླན་ཞིང་གཤེར་བའི་གདོང་དང་ལྡེམ་ཞིང་འཕྱོར་བའི་གཟུགས། བྲང་ན་འབུར་བའི་མྱོས་བུམ་སོགས་ལས་རྒྱུས་མེད་ཀྱི་བུ་མོ་དེའི་མཛེས་པ་ལྟ་བས་ཆོག་མི་ཤེས་ཤིང་། བྱིས་པའི་མདངས་དང་ལྡན་པའི་འཇམ་གཉེན་གྱི་ཚོར་བས་ལུས་པོ་གཡོག་སོང་།

“ཁྱོད་བདེ་མོ་ཡིན་ནམ།”

བུ་མོ་དེས། ཁོའི་དཔུང་བར་འཇུ་ཙམ་བྱས་ནས་གྲལ་འགྲིག་པའི་སོ་འཕྲེང་ལས་སྐད་ཆ་དེ་འཐོར་བྱུང་པས། ཁོའི་སེམས་ལ་བདེ་སྣང་གི་ཚོར་བ་སྟུག་པོ་ཞིག་ཁྱབ་བྱུང་།

“ཁྱོད་སུ་ཡིན་ནམ།”

སྐད་ཅིག་དེར། བཀྲ་ཤིས་ལ་སྐྲག་སྣང་སྐྱེ་བ་དང་ལྷན་ཅིག་ཆགས་སེམས་ཞིག་ཀྱང་སྐྱེས་བྱུང་མོད། བུ་མོ་དེས་མདུན་བཀག་ནས་གཏོང་རྩིས་མེད་པས། ཁོ་ལ་སྐྲག་སྣང་སྔོན་ལས་ཀྱང་ལྡབ་འགྱུར་གྱིས་སྐྱེས།

“དེས་ན། ཁྱོད་ཅིའི་ཕྱིར་འབྲོ་བ་ཡིན།”

བུ་མོ་དེས་དེ་ལྟར་བཤད་བཞིན་རུམ་ཁུག་ལས་རྣོ་གྲི་ཆུང་ཆུང་ཞིག་བཏོན་ནས་བཀྲ་ཤིས་ཀྱི་སྐེ་རྩའི་དྲང་ཐད་དུ་གཡུག བཀྲ་ཤིས་ཀྱིས་མོས་ནམ་མཁའ་ནས་ཕྱར་ཡོང་བའི་ལག་མགོ་ནས་བཟུང་སྟེ་ཤུགས་ཀྱིས་དཀྱུ་ཐེངས་ཤིག་གིས་རྣོ་གྲི་ཚུར་འཕྲོག ཡིན་ན་ཡང་། བུད་མེད་དེས་ཟས་བལྡད་པའི་ཚུལ་ཙམ་བསྟན་པས་ཁ་ནང་ནས་ཁྲག་དམར་བརྡོལ་བཞིན་དེ་མ་ཐག་དབུགས་ཆད། དེ་ནི་ཀྲུང་གོའི་དམག་འཁྲུག་གློག་བརྙན་ནང་རྒྱུན་དུ་མཐོང་བའི་གསང་མྱུལ་བ་ཚོས་རང་སྲོག་གཅོད་ཚུལ་དང་འདྲ།

བཀྲ་ཤིས་ཚུལ་དེར་ཧད་སོང་། ཡིན་ཡང་། ཁོས་རང་སྲོག་ཀྱང་སྐབས་འདིར་འཆོར་ལ་ཉེ་བའི་སྐྲག་སྣང་གིས་ཁྱབ་སྟེ། གོམ་གང་མདུན་ལ་སྤོ་དུས། སྐྱེས་པ་ཞིག་དང་སྔོན་གྱི་བུ་མོ་དེ་དང་འདྲ་བ་ཞིག་གིས་རོལ་རྩེད་རལ་གྲི་ཞིག་ལག་ལ་འཆང་བཞིན་ཁོའི་རྒྱབ་ནས་ཐོན་ཞིང་མདུན་བཀག

སྐབས་དེར། བཀྲ་ཤིས་མདུན་གྱི་སྲང་ཆེན་ལ་ཐོན་པར་གོམ་པ་གཉིས་མ་གཏོགས་མེད་ཅིང་། དེ་ལས་མི་ཚོགས་ཡར་གཤར་མར་གཤར་བྱེད་པ་མཐོང་ཐུབ་ལ། མི་ཚོགས་ལས་མི་གཅིག་གིས་ཀྱང་བཀྲ་ཤིས་ཡོང་བའི་སྲང་གྱོག་དེར་མིག་ཟུར་ཙམ་ཡང་མི་བྱེད། བཀྲ་ཤིས་ཀྱིས་རང་ཉིད་སྐྱོབས་པའི་མི་ཞིག་ལ་རེ་ཞིང་སྒུག  ཐ་ན་ཁོས་ཨག་རིང་ཞིག་བཏོན་པའང་སྲང་ཆེན་གྱི་འཛེར་སྒྲ་སྣ་ཚོགས་ཀྱིས་མགོ་བསྣན་པ་བཞིན་ནུས་པ་ཅི་ཡང་མི་འདུག

བུ་མོ་དེས་རོལ་རྩེད་རལ་གྲི་ནམ་མཁར་ཕྱར་ཞིང་ཁོའི་སྐེ་རྩར་གཟས་ནས་གཡུག་བྱུང། ཁོས་སྔོན་གྱི་བུད་མེད་དེའི་རྣོ་གྲི་གཡུག་ཐེངས་ཤིག་གིས་སྟབས་ལེགས་ཏེ་བུ་མོ་དེའི་སྐེ་རྩ་དུམ་བུ་གཉིས་སུ་བཏང་།  སྐྱེས་པ་དེས་ཁ་པར་ལས་བུད་མེད་གཉིས་བསད་ཚུལ་གཞན་ཞིག་ལ་བརྗོད་ཅིང་རོགས་དམག་མང་པོ་དགོས་ཚུལ་བཤད་ཀྱིན་འདུག

བཀྲ་ཤིས་འཚབ་འཚུབ་ངང་མཆོང་ཐེངས་ཤིག་གིས་སྲང་ཆེན་ལ་ཐོན་ཞིང་། མི་ཚོགས་ལས་ཇི་ལྟར་བྲོས་ནའང་མི་འགས་རྗེས་ན་བདའ་ཡོང་གིན་འདུག ཁོ་རང་ཐབས་ཟད་དེ། ལམ་འགྲམ་དུ་མི་སྐྱེལ་རླངས་འཁོར་ཞིག་བཀག་རྗེས་གྲོང་རྡལ་དང་ཁ་བྲལ། གྲོང་རྡལ་དང་ཁ་བྲལ་ནས་ཡུན་རིང་སོང་ཡང་བཀྲ་ཤིས་ཀྱི་སྙིང་ཆུང་སྟིག་སྟིག་ལྡིང་བཞིན་ཡོད།

དེ་རིང་བྱུང་བའི་དོན་རྐྱེན་ནི་བཀྲ་ཤིས་ལ་མཚོན་ན་བསམ་ཡུལ་ལས་འདས། ཁོ་དུས་ཚོད་བཅུའི་སྟེང་ཡར་ལངས་ཏེ་བཞི་ཐོག་ནས་སྐས་ཐེམ་གྱི་རིམ་པ་བརྩི་བཞིན་གཅིག་ཐོག་ལ་བབས་ཤིང་།  ཐད་ཀར་སྒོར་བུད་དེ་མདུན་ཀྱི་གད་སྙིགས་གཏོར་བའི་སྲང་གྱོག་ཏུ་གཅིན་འདོར་དུས། ལག་དམར་ཞིག་དང་འདྲ་བའི་བུ་མོ་ཞིག་གིས་གད་སྙིགས་སྒམ་དུ་མེ་མདའ་འཕེན་པ་མཐོང་། མོས་བཀྲ་ཤིས་གསོད་པར་བརྩམས་པས་བཀྲ་ཤིས་ཀྱིས་མོའི་ལག་གི་རྣོ་གྲི་འཕྲོག་མ་ཐག་རང་ཤི་བརྒྱབ། རྗེས་ནས་སྐྱེས་པ་ཞིག་དང་བུ་མོ་ཞིག་ཐོན་ཏེ། བུ་མོ་དེས་ཁོ་རང་གསོད་པར་རྩོམ་དུས་ཁོ་སྐྲག་མ་འདར་གྱིས་ཤི་ཟིན་པའི་བུ་མོ་དེའི་རྣོ་གྲི་གཡུག་ཐེངས་ཤིག་གིས་བུ་མོ་གཞན་དེའི་སྐེ་རྩ་བྲེགས། ཁྲག་དམར་ལྷོག་ལྷོག་བཞུར་བཞིན་བུ་མོ་དེའང་ཤི།  སྐྱེས་པ་དེས་ཁ་པར་ལས་མི་མང་པོ་ཞིག་བོས་ཏེ་ཁོ་གསོད་དགོས་ཟེར།

འདི་དག་ཡོད་ཚད། བཀྲ་ཤིས་ལ་མཚོན་ན་སྐད་ཅིག་ཙམ་ལས་བསམ་བློ་གཏོང་ཁོམ་རྩ་བ་ནས་མེད། བཀྲ་ཤིས་ས་སྟོང་ཞིག་ཏུ་རླངས་འཁོར་ལས་འབབ་དུས། རྗེས་ན་ད་བཟོད་རླངས་འཁོར་གྲངས་མེད་པ་ཞིག་ཡོང་གིན་པ་མཐོང་། དངོས་གནས་བསམ་བློ་གཏོང་ཁོམ་རྩ་བ་ནས་མེད་པར། ཁོ་རང་ལམ་མེད་པའི་རི་གཟར་གྱི་ངོས་སུ་འབྲོ་ཅི་ཐུབ་བྱས། རྗེས་ཀྱི་རླངས་འཁོར་དག་ལས་ཀྱང་མི་མང་པོ་ཞིག་སར་བབས་ཏེ་ཁོའི་རྗེས་སུ་རྒྱུག་གིན་འདུག ངང་ཚུལ་དེ་ནི་འཇར་འགོག་དམག་འཁྲུག་གི་གློག་བརྙན་དག་ལས་བྱུང་བའི་དམག་མིའི་གྲངས་ཀ་ལྟར་བརྗིད་ཉམས་ཀྱིས་ཁོའི་རྗེས་རྒྱུག་གིན་འདུག མྱུར་ཏུ་ཟུངས་ཤིག་ཅེས་པའི་སྐད་འབོད་ཀྱིས་རི་ལུང་ཁྱབ།

བཀྲ་ཤིས་ཀྱི་སྙིང་ཆུང་སྟིག་སྟིག  གེ་སར་སྒྲུང་ལས་ཁྲོ་ཐུང་ཟེར་བའི་མི་སྣ་བཞིན་ཕྱི་ཁུང་ཞིག་ཏུ་འཛུལ། ཁོ་རང་ཕྱི་ཁུང་གི་སྟོད་དུ་ཐོན་དུས་ས་སྟེང་ན་རྒྱུག་པའི་མི་དག་གི་གོམ་སྒྲ་གསལ་བོ་ཐོས་པར་མ་ཟད། ཁུང་བུའི་ངོས་སུ་ས་རྡུལ་མར་ཟགས་ཡོང་། ཇི་འདྲའི་མི་མང་པོ་ཞིག་གིས་ཁོ་རང་བདའ་བཞིན་འདུག་ཨང་། ཁུང་བུའི་སྟེང་ནས་ས་རྡུལ་མར་བཞུར་དྲགས་ཏེ་ཁུང་བུའི་ཀླད་དུ་ཨུ་ཁུང་ཆུང་ཆུང་ཞིག་བཏོད་བྱུང་། ཕྱི་ཁུང་གི་ཀླད་དུ་སྤོ་བའི་མི་དག་གི་རྐང་བ་གཉིས་ཀྱང་མཐོང་ཐུབ་ཀྱིན་འདུག

“ ས་འོག་ཏུ་ཡོད་ན་ཡང་རྙེད་ཐབས་བྱེད་དགོས།”

བཀྲ་ཤིས་ཀྱི་སྙིང་ཆུང་སྟིག་སྟིག  ཕྱི་ཁུང་ཀླད་ཀྱི་ཨུ་ཁུང་ཇེ་ཆེ་ནས་ཇེ་ཆེར་གྱུར།  བཀྲ་ཤིས་ཀྱིས་དེ་ལས་གསལ་བོར་མཐོང་ཐུབ།   ཁོ་རང་འཚོལ་བའི་མི་དག་གི་ལོ་བཅོ་བརྒྱད་དུ་སྣང་། གྲངས་ཀ་རི་བོའི་ངོས་ཡོངས་སུ་ནག་ཡོར་ཡོར་བྱེད་པས་ཚོད་དཔག་བྱེད་དཀའ། བཀྲ་ཤིས་ཀྱིས་ཁུ་ཚུར་ལྟ་བུའི་ཨུ་ཁུང་ལས་མིག་ཟུང་ཕྱི་རོལ་ལ་བགྲད་ནས་བསྡད། ངོ་མཚར་བ་ནི་མི་དེ་དག་གི་གཟུགས་རིང་ཚུལ་དང་ལུས་སྟེང་དུ་ཤ་རྒྱས་ཡོད་མེད་གཅིག་མཚུངས་ཡིན་པར་མ་ཟད། དེ་དག་ནི་ཚ་ཚ་དཔར་བ་བཞིན་དབང་བོ་ལྔ་དང་ལུས་ལ་ཁྱད་པར་གཅིག་ཀྱང་མེད་པས། ཕན་ཚུན་བར་དབྱེ་བ་མི་འདུག་ལ། མིག་ཟུང་གིས་ཕར་ཚུར་ལ་བལྟ་དུས་ཚང་མས་ཕྱོགས་གཅིག་ལ་བལྟ་བཞིན་འདུག

བཀྲ་ཤིས་ཀྱིས་མི་དེ་དག་ནི་འཕྲུལ་ཆས་ཀྱིས་ཐོན་སྐྱེད་བྱས་པར་སྙམ། མི་དེ་དག་གི་ཕྱི་ལུས་ལ་ཁྱད་པར་ཅི་ཡང་མེད་མོད། དོན་དངོས་ཀྱི་མི་དང་ཁྱད་པར་ཅི་ཞིག་ཡོད་པའང་ཚོར་དཀའ། མི་དེ་དག་གི་ལྭ་བ་ཧ་ཅང་གཙང་དག་ཡིན་པར་མ་ཟད། ཤ་མདངས་བྱིས་པ་ཞིག་དང་འདྲ། བཀྲ་ཤིས་ཀྱི་སྙིང་ཆུང་སྟིག་སྟིག་ལྡིང་བཞིན་ཁོ་རང་བདའ་ཡོང་བའི་མི་དེ་དག་གི་ལང་ཚོ་ལ་ཡིད་སྨོན་ཡང་སྐྱེས།

བཀྲ་ཤིས་ཧ་ཅང་རྒས་ཏེ་སྐྲ་ཉག་གཅིག་ཀྱང་ལྷག་མེད་ལ། ངོ་གདོང་གཉེར་མས་ཁེབས་ཡོད། ཁོས་ད་ལྟའི་བར་དུ་མི་ཞིག་ལ་གནོད་པའི་ལས་གང་ཡང་བགྱིས་མ་མྱོང་བར་མ་ཟད། ལོ་ལྔ་བཅུའི་ནང་དུ་མི་བསད་དེ་རང་ཉིད་ལ་གཞན་གྱིས་བདའ་འདེད་བྱེད་དགོས་པ་བློ་ཡུལ་དུའང་ཤར་མ་མྱོང་། རང་ཉིད་དུས་ཚོད་བཅུའི་སྟེང་ནས་ཡར་ལངས་པ་ལ་བློ་འགྱོད་སྐྱེས། རང་ཉིད་ཉལ་ནས་མི་སྡོད་པར་སྲང་གྱོག་དེར་གཅིན་འདོར་དུ་ཡོང་བར་དེ་ལས་ཀྱང་བློ་འགྱོད་སྐྱེས། མཇུག་མཐར་རང་ཉིད་ཀྱི་མིག་ཟུང་གིས་བུ་མོ་ཞིག་གིས་མེ་མདའ་གད་སྙིགས་སྒམ་དུ་འཕེན་པ་མཐོང་མེད་ཚེ་དོན་རྐྱེན་གང་ཡང་བྱུང་མེད་ཅེས་རང་གི་མིག་ལ་འཁང་ར་བྱས།

བཀྲ་ཤིས་ཀྱིས་མི་དེ་དག་ལ་བལྟས་བསྡད་ཀྱང་མི་དེ་དག་ས་དེ་དང་ཁ་འབྲལ་བའི་འདུན་པ་མེད་པར་མ་ཟད། རང་རང་སར་སྡོང་བོ་བཞིན་ཀེར་ནས་བསྡད་བྱུང་། འགུལ་རྒྱུ་ཙམ་ཡང་མེད་པར་བསྡད་བྱུང་།  བཀྲ་ཤིས་ཀྱིས་ཨི་ཁུང་ལས་ཕྱི་རོལ་གྱི་གནས་ཚུལ་མིག་གིས་མཐོང་ཐུབ་ཀྱང་སེམས་ཁམས་བདེ་ལ་འབབ་ཐབས་བྲལ། འདི་འདྲའི་མི་མང་པོ་ཞིག་གིས་ཁོ་རང་འཚོལ་བཞིན་འདུག  ཁོ་དེ་རིང་ཐར་ཡང་སང་ཉིན་ཐར་མི་ཐུབ་པ་དང་། སང་ཉིན་ཐར་ཡང་གནང་ཉིན་ཐར་མི་ཐུབ་བསམ་བཞིན་མི་ཚེ་འདིར་ཕྱིར་འདང་ཞིག་བརྒྱབ།  མི་ཚེ་ནི་སྐད་ཅིག་ཙམ་རེད། ལོ་ལྔ་བཅུའི་བར་དུ་རང་ཉིད་གསོན་བྱེད་ཀྱི་ཟ་འཐུང་ཙམ་ལ་བརྩོན་འགྲུས་བྱས་པ་ལས། དཀར་བོ་ཆོས་སྒྲུབ་མ་མྱོང་ལ། ནག་པོ་ངན་ལས་ཀྱང་འདི་ཟེར་བ་ཞིག་དྲན་ཡུལ་ན་མེད། ཁོ་ལ་དགྲ་བོ་དང་གྲོགས་པོའང་མེད།

འདི་ལྟར་འཆི་དགོས་པ་ལས་དབང་དུ་བསམ།

སྐབས་འདིར། ཉེན་རྟོག་པའི་རླངས་འཁོར་གྱི་ཉེན་བརྡ་གྲགས་བྱུང་། བཀྲ་ཤིས་ཕྱིར་དྲན་ལས་བསླངས་ཏེ་ཨུ་ཁུང་གི་ཕྱི་རོལ་དུ་བལྟས། ཉེན་རྟོག་པ་ཞིག་གིས་སྐད་གསེང་མཐོན་པོས་བཤད་རྒྱུར། “མི་གསོད་ཀྱི་ལག་དམར་འདི་ཧ་ཅང་གཡོ་སྒྱུ་ཅན་ཞིག་རེད། ཁྱོད་ཚོས་ས་འདིར་བདའ་ཡོང་བས། ཁོ་རང་འགབ་ཀྱི་བྲག་དང་ཆུ་ལ་ལྕེབས་ན་མ་གཏོགས་ས་ལག་མཐིལ་འདྲ་བ་འདི་ལས་ཕྱིར་འགྲོ་བའི་གོ་སྐབས་ཤིག་མེད། ཁྱོད་ཚོས་ལྟ་རྟོག་ནན་མོ་བྱོས་དང་། ངེད་སྤྱི་བདེ་ལས་ཁུངས་ཀྱིས་ཁྱོད་ཅག་ལ་རམ་འདེགས་བྱེད་ཅི་ཐུབ་བྱེད་ངེས།”

ཡུན་གྱིས་ས་རུབ་ཀྱིན་འདུག  བཀྲ་ཤིས་ཀྱི་ལུས་པོ་མི་དེ་དག་གི་ལུས་པོ་ལྟ་བུ་ཞིག་ཏུ་གྱུར། ཁོ་ཕྱི་ཁུང་ལས་བུད་དེ་མི་དེ་དག་གི་གྲས་སུ་སོང་ཡང་བཀྲ་ཤིས་ཡིན་པ་སུས་ཀྱང་མ་ཤེས། མི་དེ་དག་གི་གཟུགས་རིང་ཐུང་དང་། དབང་བོ་ལྔའི་དབྱིབས་གཅིག་མཚུངས་ཡིན་པར་མ་ཟད། བྱིས་པའི་ཤ་མདངས་ནི་འཇམ་ཞིང་མཉེན། བཀྲ་ཤིས་ཀྱིས་གལ་སྲིད་རང་ཉིད་འདི་ལྟ་བུའི་མི་ཞིག་ཡིན་ན། འཇིག་རྟེན་འདིའི་བུ་མོ་དག་མེ་ཏོག་འཐུ་འཐུ་བྱས་ཡོད་སྙམ། ཡིན་ན་ཡང་། ཁོ་ཚོའི་མིག་ཟུང་དུ་ཞེ་སྡང་གི་འོད་འཕྲོ་བཞིན་ལག་ཏུ་མེ་མདའ་དང་རལ་གྲི་མཐོང་མ་མྱོང་པ་སྣ་ཚོགས་ཐོགས་འདུག་པས། ཁོ་ཚོའི་གསེང་ལས་བྲལ་ཏེ་གྲོགས་པོ་ཞིག་ལ་སྐྱབས་བཅོལ་དུ་མི་འགྲོ་ཀ་མེད་བྱུང་། གྲོགས་པོའི་སར་ཐོན་མ་ཐག་ཁོའི་གཟུགས་ཕྱིར་བཀྲ་ཤིས་ཀྱི་གཟུགས་ལ་འགྱུར། དེ་མ་ཐག་མི་ཚོགས་ཀྱིས་སླར་ཡང་བཀྲ་ཤིས་བཙལ་ནས་ཐོན་བྱུང་།

“ངས་མི་བསད་པས། ཅི་ཞིག་བྱེད། ནག་ཚོགས་ཀྱིས་ང་བདའ་ནས་ཡོང་བཞིན་འདུག”

བཀྲ་ཤིས་ཀྱི་གྲོགས་པོ་དེར་འཚུབ་ཆ་མེད་པའི་སྒོ་ནས“སྐྱོན་མེད། ངའི་རྗེས་སུ་ཤོག”ཟེར།

གྲོགས་པོ་བྲོས་ན་ཧ་ཅང་མགྱོགས་པས། ཁོ་གཉིས་སྒང་མགོ་ཞིག་བརྒལ་ཏེ་གྲོང་ཁྱེར་ཞིག་ཏུ་འབྱོར་མོད། རྗེས་སུ་མི་ཚོགས་ཀྱིས་ད་དུང་བདའ་ཡོང་གིན་འདུག

གྲོགས་པོ་དེར། དལ་བྲེལ་མེད་པར“སྐྱོན་མེད། མགྱོགས་པར་ཕྲོས”ཟེར་བས། ཁོ་གཉིས་ཀྱིས་སྔར་ལས་ཀྱང་ཤུགས་བསྣན་ཏེ་བྲོས། གྲོང་ཁྱེར་དེའི་ཁང་པའི་ཆེ་ཆུང་དང་དབྱིབས་ཡོད་ཚད་གཅིག་མཚུངས་རེད། བཀྲ་ཤིས་ཀྱིས་དབྱེ་འབྱེད་ཀྱི་ཁ་ཕྱོགས་མི་ཤེས་མོད། བཀྲ་ཤིས་ཀྱི་གྲོགས་པོ་དེས་ལམ་གཅིག་ཀྱང་མི་ནོར་བར་ཁང་པ་ཞིག་ལ་འཛུལ། ཁང་པ་དེར་ཡུན་རིང་ལ་མི་བསྡད་མ་མྱོང་བས་ཁང་བའི་མཁའ་དབྱིངས་སུ་སྡོམ་གྱི་དྲ་རྒྱ་གང་སར་འཐེན་འདུག  ཁོ་གཉིས་ཁང་བའི་གྲུ་ཟུར་ཞིག་ཏུ་སར་བསྡད་པ་ན་མགོ་ཐོག་ཏུ་ས་རྡུལ་ཟགས་ཡོང་།

གྲོགས་པོ་དེས“ཁོ་ཚོས་ཇི་ལྟར་བཙལ་ཡང་རྙེད་མི་སྲིད། གྲོང་ཁྱེར་འདིའི་ཁང་པ་དག་གི་དབྱིབས་གཅིག་མཚུངས་ཡིན་ཞིང་། སྲང་ལམ་གྱི་ཡི་གེ་དག་ཀྱང་གཅིག་ཡིན་པས། མི་སུ་ཡིན་ཡང་ས་འདིར་ཐོན་རྗེས་ཐོག་ཁང་གཅིག་ལ་ཉིན་འགར་བསྐོར་བ་བྱེད་ངེས”ཟེར།

འོན་ཏེ། སྐབས་དེར་སྒོ་ཤུགས་ཀྱིས་རྡུང་བྱུང་བས། ཁང་བ་རུ་ས་རྡུལ་འཕྱུར་བྱུང་ལ། ཡུན་ཙམ་གྱིས་སྒོ་བཅག་སྟེ་མི་ཚོགས་ནང་དུ་ལྡིང་བྱུང་། ས་རྡུལ་སྔར་ལས་ཀྱང་འཚུབ།

ཁང་པ་དེའི་ནང་ན། ཁོ་ཚོ་དང་འདྲ་བའི་མི་གཉིས་ལས་མི་འདུག

ཁོ་ཚོ་ཧ་ལས་ཏེ། “འདི་ཅི་ཞིག་རེད”ཟེར།

མི་དེ་གཉིས་ཀྱིས་ཀྱང་ཕྱིར“འདི་ཅི་ཞིག་རེད”ཟེར།

ཁོ་གཉིས་མི་དེ་དག་དང་མཉམ་དུ་བཀྲ་ཤིས་འཚོལ་དུ་སོང་། རིམ་གྱིས་ཁོས་རང་ཉིད་བཀྲ་ཤིས་ཡིན་པ་གཏིང་བརྗེད་དུ་གྱུར་ཞིང“བཀྲ་ཤིས་གསོད་དགོས”ཅེས་འུར་རྒྱག་བཞིན་ཁོ་དང་ལུས་ལ་ཁྱད་པར་མེད་པའི་མི་དག་དང་ལྷན་དུ་རྒྱུག་གིན་འདུག སྐབས་ཤིག་དེ་དག་གི་གྲས་སུ་ལག་ལ་སྟ་རེ་ཐོགས་པའི་མི་ཞིག་གིས་བཀྲ་ཤིས་ཀྱི་གཉའ་ནས་བཟུང་སྟེ“འཚོལ་མི་དགོས། བཀྲ་ཤིས་འདི་རེད”ཟེར།

སྟ་རེ་དེ་འཁྱག་སབ་སིབ་ངང་བཀྲ་ཤིས་ཀྱི་མགོ་རུ་ཕོག བཀྲ་ཤིས་ཨག་སྒྲ་རིང་བོ་ཞིག་དང་ལྷན་དུ་ཕྱིར་སད།

བཀྲ་ཤིས་གད་སྙིགས་སྒམ་གྱི་མཐའ་རུ་ཀེར་རེར་འགྲེང་འདུག་ལ།   གྲིབ་གཟུགས་ནག་པོ་ཞིག་ཁོའི་ལུས་སྟེང་ནས་ཕར་བརྒལ་འདུག  ཁོས་ཡར་ལྟ་མར་ལྟ་ཞིག་བྱས་རྗེས། འཚབ་འཚུབ་ངང་མདུན་གྱི་ཐོག་ཁང་དུ་འཛུལ།  ཁོས་རང་ཁྱིམ་གྱི་སྒོ་མོ་ཤུགས་ཀྱིས་རྡུང་། གྲགས་འགུལ་མི་འདུག  སྔར་ལས་ཀྱང་ཤུགས་ཀྱིས་རྡུང་། སྔར་ལྟར་གྲགས་འགུལ་མི་འདུག  ཁོ་ཀླད་དམར་བཞིན་ངའི་ཕོ་བ་ལྟོགས་བྱུང་ཞེས་ཀི་འདེབས་བཞིན་སྒོ་ཤུགས་ཀྱིས་རྡུང་། གོང་འོག་ཐམས་ཅད་ཀྱི་རུ་སྐོར་དག་འདུས་ནས་ཡ་མཚར་བའི་མིག་ཟུང་བཀྲ་ཤིས་ཀྱི་སྟེང་དུ་འཕངས།

འོན་ཀྱང་། ཐོག་ཁང་དེར་སྡོད་པའི་མི་ཐམས་ཅད་ཀྱིས་བཀྲ་ཤིས་ནི་ཀླད་རྩ་མི་ཚང་བའི་མི་ཞིག་རེད་ཟེར་ནས། 110ལ་ཁ་པར་བཏང་སྟེ་འཛིན་དུ་བཅུག  འོན་ཏེ། བཀྲ་ཤིས་ཀྱི་གྲིབ་མ་ལྟ་བུའི་ཚིལ་དང་སྣུམ་གྱིས་ཟིན་པའི་ལྭ་བ་དེ་ཤུལ་དུ་བསྐྱུར་འདུག  མི་རྣམས་ཀྱིས་བཀྲ་ཤིས་ཀྱི་ཤུལ་དུ“མི་གན་ལ་ཡུལ་ཟེར་བ་ཞིག་ཡོད་དམ། གང་ལྟར། མི་ལྡོམ་དེ་རྒྱུན་དུ་ང་ཚོའི་ཐོག་ཁང་གི་བར་ཁྱམས་སུ་ཉལ་བས་གཅིན་དྲིའང་འཐུལ་འོང་། ངོ་རྫོགས་རྒྱུ་དེ། དམྱལ་བར་འཕེན་རྒྱུ་དེ། ད་ཕྱིར་ཡོང་མེད་པའི་སྨོན་ལམ”ཟེར།

110གི་རླངས་འཁོར་དེ། བཀྲ་ཤིས་ཀྱི་ཆེད་སྤྱོད་རླངས་འཁོར་དུ་གྱུར། མངགས་གཏོང་ཁང་གི་གྲུ་ཟུར་རེ་རེའང་སྐར་ལྔའི་མགྲོན་ཁང་ཞིག་ལྟར་བཀྲ་ཤིས་ཀྱི་སེམས་ལ་སྤྲོ་བ་འདྲེན། བཀྲ་ཤིས་ཀྱི་རི་མོ་ལྟ་བུའི་སེམས་ཀྱི་འཕྲུལ་སྣང་ཁོ་ན་ནི་ད་བཟོད་ཁོ་རང་མི་ཡུལ་ནས་གསོན་པོར་སྡོད་པའི་རྒྱུ་རྐྱེན་ཉག་ཅིག་གོ།


རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།