བྱོལ་སོང་གི་སྐེ་དྲིལ་ལས་གྲགས་པའི་སྐད་སྒྲ།
རྟག་ཏུ་ཚིམ་པ་མེད་པའི་རོལ་དབྱངས་གཅིག་པུ་དེ་ཡིན།
ཕ་བཟང་གི་བུ།
ཆུང་ནས་ས་ནག་དང་འཛིང་ལ།
མ་བཟང་གི་བུ་མོ།
ནམ་ཡང་བལ་དཀར་དང་འཐབ་དགོས།
གྲངས་མེད་ཀྱི་བྱིས་པའི་ཚོགས་ནི།
དམར་ཧྲེང་དུ་འདམ་བག་རྫི་བཞིན།
སྣ་ལྔ་བྱིས་པའི་སེམས་ཁམས།
ཀྱག་ཀྱོག་གི་གཟུགས་སུ་བརྐོ།
སྐྲ་དཀར་གྱི་རྒན་རྒོན་གཉིས།
ལོ་ཟླའི་ཁུར་པོས་རབ་ཏུ་མནན་ཅིང༌།
བརྩེ་དུང་གི་གཏམ་གླེང་ཡོངས་སུ་ཟད་ནས།
སིམ་སིམ་དུ་རང་རང་གི་མ་ཎི་འདྲེན་བཞིན།
རྒྱུན་རིང་བདག་ཏུ་མེད་པའི་ཉི་འོད་ལ།
གཅེས་སྤྲས་ལྷག་པར་བྱེད།
དྲིན་ཅན་སྐྱེད་མའི་གོམ་སྟབས།
དཀའ་སྡུག་གི་འཚོ་བས་ཕྲོགས་པས།
འགྱིང་ཉམས་དང་བྲལ་ཞིང་འཚབ་འཚབ་ཀྱི་ལང་དུ་ཤོར།
དབེན་ཞིང་འཇམ་པའི་མཚན་མོའི་བདེ་བ།
གསལ་ཞིང་མཐོ་བའི་ཁྱི་སྐད་ཀྱིས་བཅོམ།
མི་ཚང་མས།
"ཁྱི་ངན་སྐར་མར་རྨུག"ཟེར་བ་ལས།
ཐག་རིང་རི་བོའི་རྒྱབ་ནས་གྲགས་པའི།
ལྷང་ལྷང་གི་སྐད་སྒྲ་དེ།
རྨོངས་པ་ཁྱི་ཡིས་ཚོར་བ།
ཧ་ལམ་སུས་ཀྱང་མ་ཤེས།
 

རྩོམ་ཁུངས།