སུས་ཀྱང་བཤད་མ་མྱོང་བའི་གཏམ་རྒྱུད་མང་བོ་ཞིག་འདི་ན་སྦས་ཡོད།
སུས་ཀྱང་དྲུབས་མ་མྱོང་བའི་རྩྭ་ཐང་གི་ཐང་ག་མཛེས་བོ་ཞིག་འདི་ན་བཤམས་ཡོད།
སུས་ཀྱང་སྨྱུག་རྩེས་ཟིན་མ་མྱོང་བའི་སྙན་ངག་གསར་བ་ཞིག་འདི་ན་འཐོར་ཡོད་
སུས་ཀྱང་ལྷད་བརྒྱབ་མ་མྱོང་བའི་མི་གཤིས་ལེགས་པོ་ཞིག་འདི་ན་དར་ཡོད།
—གནས་འདི་རུ་ཤོག་དང༌།
སྒྱུ་རྩལ་གྱི་གདོད་མའི་གཤིས་དེ་འཚོལ་འདོད་ན།

སེམས་ངལ་གྱི་མུན་པ་སེལ་བའི་ཉི་མ་གསལ་བོ་ཞིག་འདི་ན་ཤར་ཡོད།
རྩ་ལམ་གྱི་འགགས་པ་བསངས་པའི་མཁའ་དབུགས་དྭངས་མོ་ཞིག་འདི་ན་རྒྱས་ཡོད།
ཐམ་ཐོམ་གྱི་སྣང་བ་སད་པའི་དྲི་བསུང་དགའ་བོ་ཞིག་འདི་ན་འཐུལ་ཡོད།
རྙོང་ཟིང་གི་ཐོས་འཛིན་གསོ་བའི་ཆུ་སྒྲ་སྙན་མོ་ཞིག་འདི་ན་འཁོར་ཡོད།
—གནས་འདི་རུ་ཤོག་དང༌།
རང་བྱུང་གི་དབེན་པ་དེ་འཚོལ་འདོད་ན།
གནས་འདི་ཡི་མི་རྣམས་ནི་མེ་ཏོག་དང་བསྡེབས་ནས་སྐྱེ་བཞིན་ཡོད་
གནས་འདི་ཡི་གླུ་སྒྲ་ནི་ཆུ་ཀླུང་དང་འདྲེས་ནས་བཞུར་གྱིན་ཡོད།
གནས་འདི་ཡི་མི་རྣམས་ལ།
ཁ་ན་ཡིད་ཆེས་ཀྱི་ངག་ཚིག་མེད་ལ།
སྙིང་ན་མྱ་ངན་གྱི་རྗེས་ཤུལ་ཡང་མེད།
—གནས་འདི་རུ་ཤོག་དང༌།
ཕུགས་བསམ་གྱི་ཁོར་ཡུག་དེ་འཚོལ་འདོད་ན།
གསོན་ན་གཞིས་ཚང་འདི་རུ་བཅའ།
ཤི་ན་དུར་ས་འདི་རུ་འདེབས།
དེ་ནི་གནས་འདིའི་མི་རྣམས་ཀྱི་མ་བཅོས་པའི་སྙན་ངག་རེད།
ཤི་བའི་ཐོད་རུས་དེ་ཐང་ལ་འགྲིལ་ཞིང༌། ས་རུ་འཐིམ་ཡང༌།
སྤོབས་པའི་རྣམ་ཤེས་དེ་ཐང་དཀར་རྒོད་པོ་ཞིག་ལ་བཅིབས་ནས།
ཨ་སྔོན་མཐོན་པོའི་དབྱིངས་རུམ་དེ་བརྟོལ་ནས་འཆོར་འགྲོ།
དེ་ནི་གནས་འདིའི་མི་རྣམས་ཀྱི་མ་བཅོས་པའི་གཤིས་རྒྱུད་རེད།
—གནས་འདི་རུ་ཤོག་དང༌།
མི་ཚེ་ཡི་རིན་ཐང་དེ་འཚོལ་འདོད་ན།

གཞན་གྱི་བློ་ངོར་ཅི་འཆར་བདག་ལ་མ་ངེས་མོད།
བདག་ནི་གནས་འདི་ལ་ཤིན་ཏུ་ཟབ་པའི་ཡིད་ཆེས་དང་བརྩེ་བ་ཡོད།
བདག་ནི་གནས་འདི་རུ་སྐྱེས་པར་རྟག་ཏུ་ངའོ་སྙམ།
བདག་གིས་དབུགས་ཀྱི་ཐ་མའི་རྒྱུ་བ་ཕྲན་བུ་དེའང་་
གནས་འདི་ནས་གཏོང་རྩིས་ཡིན།
གྲོགས་པོ་ལགས།
ས་ཆེན་པོ་འདི་ལེབ་ཀྱིས་ཆོད་ཀྱང༌།
དོན་ཟབ་མོ་ཞིག་མཚམས་ཀྱིས་དབྱེས་ཡོད།
—གནས་འདི་རུ་ཤོག་དང༌།
བདེན་རྫུན་གྱི་ཁོ་ཐག་དེ་འཚོལ་འདོད་ན།
 

རྩོམ་ཁུངས།