ཡོད་ཚད་གཉིད་དུ་ཤོར་བའི་མཚན་མོ།
             མུན་ནག་གི་དུས་རབས་ནི།
             ངའི་འཐབ་འཛིང་གི་དུས་རབས་ཡིན།
            
             གཉིད་དུ་ཤོར་བའི་ཁང་ཁྱིམ།
             གཉིད་དུ་ཤོར་བའི་ས་ཞིང༌།
             གཉིད་དུ་ཤོར་བའི་ཁྱིམ་བདག
             སྒོ་ཁྱི་ངའི་ལས་འགན་ཅི་འདྲའི་ལྩི་ཨང༌།

             རྐུན་ཇག་གི་འཇབ་རྒོལ་དང༌།
             རང་བྱུང་གི་གནོད་འཚེ།
             ད་དུང་ཁྱིམ་བདག་གི་བཀའ་དྲིན་ཡོད་ཚད།
             མུན་ནག་གི་འཇིག་རྟེན་དུ་དལ་བུར་འཕྱོ་དུས།
             ང་གཉིད་ཐབས་བྲལ།
             ད་ནི་ངའི་རིག་པ་ལྕགས་སྐུད་ལྟར་སྒྲིམ་པའི་དུས་ལ་བབས།

             འོན་ཀྱང་ང་གཅིག་པུ་སད་མི་འདོད།
             རང་གཅིག་པུ་སད་ཚེ།
             ང་ཅི་འདྲའི་ཁེར་རྐྱང་དང་འཇིགས་སྐྲག་ཆེ་ཨང༌།
             ང་ཁོར་ཡུག་དང་མཉམ་དུ་སད་འདོད།
             ལྟོས་དང༌།
             སྟག་འབྲོང་སྔ་མོ་ནས་སད་དེ་ལ་རྒྱ་རྩོད།
             འཕར་སྤྱང་སྔ་མོ་ནས་སད་དེ་རྒྱལ་ཕམ་འབྱེད།
             ཝ་ཚོགས་སྔ་མོ་ནས་སད་དེ་གོ་སྐབས་སྒུག
             མཆེ་སྡེར་རྣོན་པོའི་ཚོགས་འདིར་ཅི་འདྲའི་གཟི་བརྗིད་ལྡན་ཨང༌།

             ཐང་དཀར་སྔ་མོ་ནས་སད་དེ་ནམ་འཕར་གཅོད།
             རྨ་བྱ་སྔ་མོ་ནས་སད་དེ་མཛེས་སྡུག་ངོམ།
             ཅོ་ཀ་སྔ་མོ་ནས་སད་དེ་གྲེ་འགྱུར་སྒྲོག
             མཁའ་འགྲོ་དཀར་མོའི་ཁྱུ་འདིར་ཅི་འདྲའི་གཤེར་བག་ལྡན་ཨང༌།

            ཡིན་ན་ཡང༌།   འུ་ཚང་གི་མགོ་ཁང་ཁྱིམ་ད་དུང་མ་སད།
            མདོ་ས་གཞི་ད་དུང་མ་སད།
            བར་ཁྱིམ་བདག་ཀྱང་ད་དུང་མ་སད།

            འོད་སྣང་མེད།   བགྲོད་ལམ་མེད།   བསམ་བློ་མེད།
            ངལ་རྩོལ་མེད་ཅིང་སྨྲ་བའང་མེད་པའི་མཚན་མོ།
            ཡོད་ཚད་གཉིད་དུ་ཤོར་པའི་དུས་ནི།
            ཅི་འདྲའི་འཇིགས་སྐྲག་གི་དུས་ཤིག་ཨང༌།

            ཡིན་ཀྱང་ང་སྔར་བཞིན་གཉིད་ཐབས་བྲལ།
            མུན་པ་འདི་ཡལ་རག་བར་དུ།
            ནམ་རིང་འདི་གསལ་རག་བར་དུ།               
            ང་ནི་ཁྱིམ་ཀྱི་སྒོ་སྲུང་ཉན་དགོས་ཤིང༌།
            མཇུག་མཐའི་སྐྱ་རེངས་ཀྱི་དུས་ན།
            ལྷང་ལྷང་གི་འབོད་སྐད་ཅིག་གིས།
            རང་ཁྱིམ་གྲུ་བཞི་འདི་གཉིད་ལས་དཀྲོགས་དགོས་ཨང༌།
                         
  ༼དཔྱད་གཏམ་ཕྲན་བུ༽
         སྙན་རྩོམ་འདི་བཀླགས་རྗེས་ང་ལ་ཚོར་སྣང་ཁྱད་མཚར་ཞིག་བྱུང་བ་ནི་སྒོ་ཁྱི་ལ་ལར་ལས་འགན་དེ་འདྲ་ལྩི་མོ་ཞིག་ཡོད་པ་དེ་རེད།
         སྙན་རྩོམ་འདིར་བབ་ཆགས་པའི་ཐ་སྙད་དང༌།   རྒྱུན་ཆགས་པའི་ཚིག་སྦྱོར་སྤྱད་ཡོད་ལ།   སྟབས་བདེ་བའི་བརྒྱུད་རིམ་ལས་སྒྲུབ་ཁག་པའི་
ལས་འགན་དེ་གནས་ལུགས་དང་སྦྱར་ཏེ་ཤར་མར་བྲིས་ཡོད་པ་ནི་སྙན་རྩོམ་འདིའི་ཁྱད་ཆོས་རེད།  ངས་བལྟས་ན།   རྒྱུན་དུ་ལས་དབང་ཞེས་པའི་ཐ་
སྙད་འདི་ཉམ་ཐག་གི་སྟེང་དུ་བཀོལ་པའི་བཟོ་ལྟ་ཞིག་འདུག་ཀྱང༌།   <<སྒོ་ཁྱིའི་ལས་དབང>>ལས་བྱུང་བའི་སྒོ་ཁྱི་དེ་ཉམ་ཐག་གི་གནས་སུ་ལྷུང་
མེད།  རྒྱུ་མཚན་ནི།    “སྒོ་ཁྱི”འདི“གཉིད་”དང“སད”གཉིས་ལས་སད་ཀྱི་ཕྱོགས་སུ་གནས་ཡོད་ལ།    ལྷང་ལྷང་གི་འབ་སྐད་ཀྱིས་རང་ཁྱིམ་གྲུ་
བཞི་གཉིད་ལས་དཀྲོགས་པ་དེ་ཁོའི་ལས་འགན་ཡིན་པས་སོ།།
      སྔོན་ཆད་སྒོ་ཁྱིའི་ལས་དབང་སྐོར་གྱི་རྩོམ་ཡིག་འགའ་མཐོང་བ་ནི།   གཙོ་བོ་སྒོ་ཁྱི་དང་བདག་པོའི་བར་གྱི་འབྲེལ་བ་མཚོན་ཡོད་དེ།   སྒོ་ཁྱི་དེ་
སྐེ་ལྕགས་ཐག་གིས་ཇི་ལྟར་མནར་ཚུལ་སོགས་བྲན་གྱི་སྨྲེ་སྔགས་ལས་གཉིད་མ་སད་པའི་ཁང་ཁྱིམ་གཉིད་ལས་དཀྲོགས་པའི་བདག་པོའི་བསམ་པ་དེ་ཡེ་
ནས་མི་མཐོང༌། དེ་བས<<སྒོ་ཁྱིའི་ལས་དབང>>འདི་རྩོམ་པ་པོའི་བསམ་བློ་གཏོང་སྟངས་ཐད་ནས་སྔོན་མ་དག་ལས་བརྒལ་ཡོད་པ་མཐོང་ཐུབ་ཅིང༌།     
“གཉིད”དང“སད”ཀྱི་བར་མཚམས་དེ་ཕྱོགས་མང་བོ་ནས་ཞིབ་འབྲི་བྱས་ཡོད་པས་ཀློག་མཁན་ལ་བསམ་པའི་མཐོངས་ཡངས་པོ་ཞིག་ཕྱེ་ཡོད།
                       (དཔྱད་གཏམ་པ་ཚེ་རྒྱལ་ཡིན)
           
              
 

རྩོམ་ཁུངས།