གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལྗོན་པ་དང་ཚང་མལ། ད་དུང་སྒོ་ང་། (ཞར་བཀོད་གཅིག)

2009-12-18 10:10:00 བྱ་མདོ་རབ་རྒྱས། ཀློག་གྲངས། མཆན ཡོད།

ལམ་འགྲམ་ན། གནའ་བོའི་ལྗོན་པ་ཞིག་ཡོད།

མི་ལོ་བརྒྱ་ཕྲག་མང་བོ་འགོར་སོང་ནའང་།

ལྗོན་པ་དེའི་མགོ་རྔ་བར་གསུམ་ནས།

ད་ལྟ་ད་དུང་། ལྗང་མདོག་གི

ཡལ་ག་དང་ལོ་མ་གསར་བ་རྣམས་འབུ་བཞིན་གདའ།

 

ལྗོན་པ་དེ། བདག་གི་སྨོན་འདུན་ཡིན།

སྨོན་འདུན་གྱི་ལྗོན་པ་དེའི་རྩེ་མོ་ན།

དྲོད་འཇམ་གྱི་ཚང་ལམ་ཞིག་ཡོད་ཅིང་།

ཚང་ནང་ན། བྱ་རྒོད་ཀྱི་སྒོ་ང་སྤུན་དྲུག་ཡོད

 

སྒོ་ངའི་ནང་རོལ་ནི།

མཐིང་མདོག་གི་ནམ་མཁའ་ལྟ་བུའི་གདུགས་དང་།

ཁྱོན་ཡངས་ཀྱི་དོག་མོ་ལྟ་བུའི་གདན་ཞིག་ཡིན་ལ།

གདུགས་འོག་གི་གདན་སྟེང་ན་ནམ་ཡང་།

སྟོད་མངའ་རིས་སྐོར་གསུམ་ཡོད།

བར་དབུས་གཙང་རུ་བཞིན་ཡོད།

སྨད་མདོ་ཁམས་སྒང་དྲུག་ཡོད།

བར་བར་ན་ད་དུང་རྨ་ཆུ་ཡོད།

དྭངས་གཙང་གི་ཡར་ཀླུང་གཙང་བོ་ལྷུང་ལྷུང་འབབ།

 

ལམ་འགྲམ་ན། གནའ་བོའི་ལྗོན་པ་ཞིག་ཡོད།

ལྗོན་རྩེ་ན་དྲོད་འཇམ་གྱི་ཚང་མལ་ཞིག་ཡོད།

ཚང་ནང་ན་བྱ་རྒོད་ཀྱི་སྒོ་ང་སྤུན་དྲུག་ཡོད།

ཕྱི་རོལ་གྱི་ཆར་རླུང་ཇི་ལྟར་རྩུབ་ན་ཡང་།

ལྗོན་པ་མ་འགྱེལ་ན་ཚང་མལ་མི་འཇོག

ཚང་མལ་མ་ཞིག་ན་སྒོ་ང་མི་འཐོར།

ཨོ། ཚང་མལ་མ་ཞིག་ན་སྒོ་ང་མི་འཐོར།

 

ཁྱོད་ཀྱི་ཁ་བརྡ།

ས་སྲོད་དེར། གློག་འདྲ་བའི་སྐར་མ་དེའི་འོག་ནས།

ཁྱོད་ཀྱིས་དལ་ལྷོད་ལྷོད་ངང་།

མཁའ་མཐར་འཐེན་པའི་ལམ་བུ་དེའི་ཕ་རོལ་ན་ཡོད་པའི་བདེ་སྐྱིད་ཅིག་དང་

གཏམ་རྒྱུད་ཅིག་གི་བརྒྱུད་རིམ་གླེང་མགོ་བརྩམས།

 

དེའི་ཚེ་ཁྱེད་ཀྱི་ཞལ་ནས།

བདག་གི་སེམས་ཁོང་དུ་ཐོག་མར་དྭངས་གཙང་གི་ཆུ་བོ་ལྟར་བཞུར་ནས་བྱུང་ཞིང་།

དེར་མཐུད་ནས། འོད་འཚེར་བའི་སྐར་མ་སྐོར་ཞིག་དང་།

གསེར་མདོག་གི་ཀོ་གྲུ་ཆུང་ཆུང་ཞིག་ཀྱང་དལ་གྱིས་བྱུང་ལ།

མཇུག་མཐར། ཁྱེད་རང་ཀྱང་དངོས་སུ་ཕེབས་ནས་བྱུང་།

 

དེ་ནས་བཟུང་། ངའི་སེམས་ཁོང་འདི་ན་ནམ་ཡང་།

དྭངས་གཙང་གི་མཚོ་མོ་ཞིག་འཁྱིལ་ནས་ཡོད་ལ།

མཚོ་སྟེང་ན། འོད་འཚེར་བའི་སྐར་མ་མང་བོ་འཐོར་ནས་ཡོད་དོ།།

སྐར་མའི་གསེབ་ན། གསེར་མདོག་གི་ཀོ་གྲུ་ཆུང་ཆུང་ཞིག་ཀྱང་ཡོད་ལ།

གྲུ་ནང་དུ་ནམ་ཡང་། ང་དང་ཁྱེད་ཁོ་ན་ཞུགས་ཏེ།

མཛེས་སྡུག་གི་གླིང་ཕྲན་ཞིག་སྙེག་གིན་ཡོད།

 

རྩོམ་ཁུངས། ༢༠༠༣ལོའི་སྦྲང་ཆར།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།