ཐོར་ཤོར་གྱི་ལོ་ཟླ།
གཏམ་རྒྱུད་ཀྱི་དགོངས་དོན་ཆེ་རུ་ཕྱིན་པ་ནས
ངས་རང་གི་བྲང་སྙིང་ལ་བྱ་རྒོད་འབབ་པར་རེ་སྒུག་བྱས
ངའི་བརྩེ་འདང་ལ་ལྕགས་མཁར་བསྐོར་མཁས་ཀྱི་བདག་མོ་ཞིག
མ་གཞི་ནས་ངའི་ལུས་སེམས་ལ་ཐིམས་ནས་ཡུན་རིང་འགོར་འདུག
ཕ་གི་ནི་འབྲོང་དང་ཤྭ་རྐྱང་འཚོ་བའི་བྱང་ཐང་ངམ
ཡང་ན་སྤྱང་ལྟོགས་ཀྱི་ངུ་འབོད་རི་ལ་ཟུག་པའི་མྱ་ངམ་ཐང་སྟེ
ང་ཚོའི་སེམས་ཁོང་ལ་ཁ་བ་བབས་པའི་ཕམ་ཉེས་ཀྱི་ལོ་ཟླ་ཡིན
ད་ལྟ རས་པ་ཚོ་ཐག་རིང་དུ་སོང་ནས་ཕྱིར་ལོག་རྒྱུ་མི་འདུག་ལ
ནང་གུང་སྒོ་མོ་རྡུང་མཁན་དེ་ཡང་རྨི་ལམ་གྱི་གས་སྲུབས་ཤིག་ལ་འཛུལ་ནས་གདའ
འཆི་བ་འཆི་བ་ཟེར་ཞོར་དངངས་སྐྲག་སྐྱེས་བཞིན་པའི་མི་རྣམས་ཡང
ད་ནི་ཁ་སྦུབ་ཏུ་ཉལ་ནས་སྔུར་བ་ལྗིད་མོ་ཞིག་འཐེན་བཞིན་འདུག
ནམ་རྒྱུན་ང་ལ་སྨོན་འདུན་སློང་མཁས་ཀྱི་བྱེའུ་དེ་འཕུར་སོང
ནམ་རྒྱུན་ང་ལ་དོགས་པ་སློང་མཁས་ཀྱི་རླུང་བུ་དེ་ཡལ་སོང
ཅིས་ཀྱང་འགྲོ་དགོས་པའི་བརྡ་ལ་རི་ཚོགས་ཀྱི་མགོ་བོ་ཀྲོག་ཀྲོག་བྱེད
རི་ཀླུང་དེའི་གསང་རྒྱས་ངའི་སེམས་ཁོང་གི་སྒོ་མོ་ཕྱེས་པས
མཆོད་རྟེན་དེའི་གྲིབ་མས་ངའི་སེམས་ཁོང་གི་ར་རི་བཀྲུས་པས
ད་ནི་ང་ལ་གཉེས་གཤིན་གྱི་གཤོག་པ་ཆ་གཅིག་ཐོབ་འདུག
ད་ནི་ང་ལ་རྩྭ་ཐང་བཞིན་གྱི་ཡངས་པའི་བློ་རྒྱ་ཞིག་ཐོབ་འདུག
རྩོམ་ཁུངས། ༢༠༠༢ལོའི་གངས་རྒྱན་མེ་ཏོག