གསུམ་པ། ཉི་མ་ལྷ་ས།

དུས་ཚོད་ཀྱི་བདེན་པ་དང

ཚེ་སྲོག་གི་མེ་ལྕེ་མཆི་མ་འདྲ་བོའི་ཆེད་དུ

ངེད་ཅག   བཙོན་ར་ནས་ཡུལ་ལ་ལོག་པ་འདྲ་བར

དབུས་ལ་ཡོང

དཔའ་བོའི་གཏམ་རྒྱུད་རྗེས་ཀྱི

གཅོམ་ཆུང་གི་ལྷ་ས  ལྐོག་གཡོའི་ལྷ་ས

འཇིགས་སྐྲག་དང་དོགས་ཟོན་གྱི་ལྷ་ས

ཆང་དང  བརྩེ་བ་སམ་སིམ་གྱི་ལྷ་ས

འདར་སིག་སིག་གི

མ་ཡིན་ཡིན་མདོག་གི

འགྲེལ་བཤད་ཁ་ཤས་ཁྲོད་རུལ་གྱིན་པའི

ཨར་འདམ་གྱིས་བཟོས་པའི

དུས་ཁྲོད་ཅིག་གི་སྙིང་ཀར་འགྱིང་བའི་ལྷ་ས་ལགས

                                              -དབུས་པའི་གཏམ།

                 ༡

རང་ཉིད་བོར་ཟིན་པའི   སྐབས་འདིར

པོ་ཏ་ལ་ནི

སུ་ཞིག་གི་ཁ་གཏད་ན་པུས་ཚུགས་སུ་སྡོད་པའི

བྲང་ཁ་སྟོང་བ་དེ་ཡིན་ནམ

ཉི་འོད་ཀྱི་མགྲིན་པ་འགག་རྗེས་ཀྱི

ལོ་ངོ་སྟོང་གི

ཕ་བོང་ཁེར་རྐྱང་ཞིག་གི

སྐྱོ་ངལ་སྲ་མོ་དེ་ཡིན

ཡང་ན  ལྷ་སའི་མཆོད་རྐོང་དུ་བླུགས་པའི

སེར་ཧང་ཧང་གི

མར་ཁུ་ཐིགས་པ་གཅིག་པོ་འདི

སྟོང་བའི་སྙིང་ཀ་ན་སྐམ་ལ་ཉེ་བ་ལས

གཞན  སྦར་མཁན་ཞིག་མི་འདུག

དོན་ངོ་མར

ངས   རང་ཉིད་གསོག་གསོག་པའི

མིག་ཆུ་ཉུངདྲག་ཏེ

པོ་ཏ་ལའི་ནག་ཐིགས་གཅིག་ཀྱང་འཁྲུ་མི་ཐུབ་ལ

དེ་ལས་ཀྱང

པོ་ཏ་ལའི་ལག་ནང་གི་རང་ཉིད

ནད་ཡམས་ཤིག་ཡིན་པའང་ཤེས་ཀྱི་མི་འདུག

༢

ལོ་རྒྱུས་ནི་སུ་ཞིག་གི་སྙིང་ཀའི

གཟིམ་ཚར་བའི་མར་མེ་ནག་ཐིང་ཐིང་དེ་ཡིན་ནམ

སྟོད་ཀྱི         ཉི་མ་ལྷ་ས་ལགས

སྙིང་བོ་མེད་པའི་སྙན་ངག་ཅིག་གི་ཡིག་ཕྲེང་དང་འདྲ་བའི

ལྷ་སའི་སྲམ་ལམ་དག་བརྒལ་ན

ངས   སྤྲང་ཁུག་ཁུར་བའི

བོད་ཡིག་གི་རྒན་པོ་གྱོལ་བོ་ཞིག་མཐོང་ལ

དེ་དང་ལྷན་དུ

རང་ཉིད་ཀྱི་བྲང་ཁ་ན་འགོས་ནད་ཅིག་ལྟར་ཆགས་པའི

ཐ་སྙད་ཁ་ཤས   འདང་བརྒྱག་གི་ལག་མཐིལ་ཏུ

འདར་ལྕུག་ལྕུག་ངང་འཐོར་འོངས

ལག་པའི་ནང་དུ་ལག་པ་བཞག་དུས

སེམས་པ

ཤེས་མེད་ངང་འཕྲོག་འགྲོ་བའི་འཚམས་འདྲི

དོགས་ཟོན་གྱི་སྣེ་མོ་ན་ཟེགས་ཀྱིན་པའི

བརྩེ་བ་དང

རུས་པའི་གསེབ་ཀྱི་སྐམ་གྱིན་པའི་ཁྲག་ཐིགས

དམར་དྲི   གཡེམ་དྲི  ཆང་དྲི

རླུང་གི་སྣ་ཁུང་བསུམས་རྗེས་ཀྱི

ལྷ་སའི་དྲི་མ་དག

ངས   རང་ཉིད་མ་བསད་པར

ལྷ་སའི་སྐམ་རུལ་གྱི་སྲང་ལམ་དག་བརྒལ་དཀའ་འདུག

༣

མཚན་མོ་ནི་ཉི་མའི་བྲང་ཁ་ནས་བཞུར་བའི

སྡུག་བསྔལ་ཐིགས་པ་གཅིག

མཚན་མོ་འདིར  ང་རང

རང་གི་སེམས་པ་ལྟར་ཁ་ཤོ་སྣ་རུལ་ཏུ་གྱུར་བའི

ལྷ་སའི་གྱང་ར་རྙིང་བ་ཞིག་ན་ཡོད

ཕ་ཡུལ་ནས་རང་ཁྱིམ་མ་མཐོང་བའི

མིག་ཟུང་འདིས  དོ་ནུབ་ཡང

ཡུན་རིང་ལ་དྲན་པའི་ལྷ་སའི་དེ་དག་མཐོང་གི་མི་འདུག

མཚན་མོ་འདིའི་རྒྱབ་ཏུ

སྐུང་མཁན་གཞན་ཞིག་ཡོད་དམ

རལ་གྲི་ལྟ་བུའི་ཅི་ཞིག་གིས

བདག་གི་གློ་སྙིང་གི་གྲུབ་ཆ་འདྲ་བའི

ལྷ་སའི་ཕྱོགས་རེ་རེ་གསོད་ཀྱི་མེད་དམ

སྐབས་འདིར  རྨ་ཁ་ལྟ་བུའི་གློག་ཞགས་ཤིག་འཁྱུག་ནས

ཧོ་རིང་ལྟ་བུའི་འབྲུག་སྒྲ་ཞིག་གྲགས་ན

མིག་ཆུ་ལྟ་བུའི་ཆར་བ་ཞིག་བབས་ན

ངས   རང་ཉིད་ནི་སྐྱོ་གཞས་ཚན་པ་ཞིག་ཏུ་བཏང་ནས

དབེན་སིམ་སིམ་གྱི

འདར་སིག་སིག་གི

ལྷ་སའི་མཁའ་དབྱིངས་སུ་གཏོང་ཐུབ་བམ

༤

སྐྱོ་གདུང་གི་ལག་མཐིལ་ན་འབུ་ནག་ཅིག་ལྟར་འགུལ་བའི

ཉམ་ཆུང་གི  ནུས་མེད་ཀྱི

སྤྲང་ཁུག་ཀྱང་བོར་བའི་ང་རང

ད་ལྟ     རྨ་ཁ་ལྟ་བུའི་ཁྱོད་ཀྱི་སྲམ་ལམ་ན་ཡོད

མི་ཚོགས་ནི 

དུས་ཚོད་ཀྱི་བདེན་པ་བརླག་བྱེད་ཀྱི

རྩེད་རྡེའུ་རེ་རེ་དང་འདྲ་ལ

ངའི་ཁོག་གི

བཞུ་མི་ཐུབ་པའི་སྐྲན་རྡོ་རེ་རེ་ཡང་ཅི་ལ་མིན

ང་ཡིས་སྙིང་ཉེ་བའི  ང་རང

གསོད་བྱེད་ཀྱི     གསོན་བྱེད་ཀྱི་ཉི་མ་ལྷ་ལགས

ངོ་གདོང་དང་སྐད་རིགས་དུ་མའི་ཁ་གཏད་ནས

འཕྲུལ་ཆས་དང་འུར་ཟིང་མང་བོའི་བར་གསེབ་ནས

ངས    ཁྱེད་རང

རང་གི་མཆི་མས་བཀྲུསཔའི་ཉི་མ་ལྷ་ས་ཡིན་པ

ངོས་ཀྱང་ཟིན་དཀའ

ཨར་འདམ་གྱི་སྲ་མཁྲེགས་བར་ནས

ཆུ་ཐིགས་ཤིག་ལྟར

རང་ཉིད་ཤོར་དང་འཆོར་གྱིན་པའི་ཉི་མ་ལྷ་ས་ལགས

༥

དོན་ངོ་མར   ལྷ་ས་ནི

དེང་མའི་མཛེས་སྡུག་གི་སྙིང་བོ

གློག་འོད་ཀྱིས་བསྲེགས་ཚར་བའི་མཚན་མོ་ཕྱེད་ཀ་ཞིག་རེད

དོན་ངོ་མར  ལྷ་ས་ནི

རོ་སྒམ་ཉོ་མ་ཐུབ་པར་ལུས་པའི

བདག་གི      བེམ་རོ་འདང་ཆེན་དེ་ཡིན

ངས    རང་ཉིད་ལས་ཀྱང་རྒས་གཉེར་གྱིས་ཟིན་པའི

ལྷ་ས་བསམ་ན

འཁུན་སྒྲ་མེད་ལ་མིག་ཆུ་མེད་པའི

ལྷ་སའི་རྡོ་བ་དག་ལ་ལྕགས་ཀྱིས་ཐེངས་གཅིག་བྲབ་ན་འདོད་ལ

ལྷ་སའི་ས་ནག་གསེབ་ཀྱི་འབར་མི་ཚར་བའི

ཁྲག་ཐིགས་ལྟ་བུའི་མེ་ལྕེ་དག་གིས

ཉམ་ཆུང་གི  ནུས་མེད་ཀྱི་རང་ཉིད་བསྲེག་ནའང་འདོད་བྱུང

བོར་བརླག་གི་གས་སྲུབས་ཏུ

འཐིམ་དང་འཐིམ་གྱིན་པའི་ལྷ་ས་ལགས

རྩོམ་ཁུངས། ངེད་དྲ་བ།