སྙན་ངག་རིང་མོ། དབུས་ལ་སོང་བའི་སྒྲུང་།༢
དང་པོ། དབུས་ལམ་རིང་མོ
༠
རྙིང་དྲག་ཏེ་ས་ཆེན་གྱི་རྨ་ཁ་ལྟ་བུའི
གཅོང་རོང་ཟབ་མོ་དང གྲངས་མེད་པའི་སྒང་གཞོང་རེ་རེ
ལོ་ན་དང་ཁྱིམ་གཞི་མི་གཅིག་པའི་དབུས་པ་ཚོས
ངལ་མི་སྲིད་པའི
ཡིད་ཀྱི་གོམ་པ་གང་རེ་གང་རེས་གཞལ་གྱིན་འདུག
གཡུལ་འཁྲུག་དང་དམར་གསོད་ཀྱི་འཇིགས་པ་ཐེབས་དྲག་ནས
ཁྲག་དྲོན་ལྷོག་ལྷོག་བརྡོལ་བ་ལྟ་བུའི
གངས་རིའི་གཏམ་རྒྱུད་ཀྱི་གཙང་བོ་རེ་རེར་ཡང
དབུས་པ་ཚོ ཤུགས་ཀྱིས་བརྒལ་གྱིན་འདུག
སྐབས་འདི་ནི
མ་ཡུམ་གྱི་ཕྱག་ནང་གི་བརྩེ་བ་ངོམས་འདྲའི
མཛེས་སྡུག་དང སྒྱུ་འཕྲུལ་གྱི་དཔྱིད་མགོ་ཞིག་ཡིན་ལ
དབུས་པ་ཚོས
ས་སྲོད་རེ་རེའི་ཁ་ནང་དུ་བསང་མེ་སྦར་གྱིན
ཞོགས་པ་རེ་རེའི་ཐོང་ཀ་རུ་སྨོན་ཚིག་འབུལ་གྱིན
གནམ་མཐའི་ཉི་མ་བཞིན་འཚེར་བའི
ཐག་རིང་གི ལྷ་དང་རྡོ་བས་གྲུབ་པའི་ཉི་མ་ལྷ་སའི་ཕྱོགས་སུ
སྐྱ་ཟད་སྔོ་སྡུག་གི་དུས་སུ
མཚེར་ས་གསར་བར་སྤོ་བའི་རུ་སྡེ་ཞིག་དང་འདྲ་བར
རེ་བ་ཆེན་པོས མཚམས་མེད་པར་བསྐྱོད་ཀྱིན་འདུག
༡
བཙན་པོའི་དུས་སུ མཐའ་འདུལ་ཡང་འདུལ་ལ
ཐབས་ཇུས་དང་དྲག་པོའི་མཚོན་ཆ་ཁྱེར་སའི་ལམ་བུ་འདི་ནས
མགར་གྱིས རང་གི་ཚེ་ཕྱེད་ཀྱི་ཟུངས་ཁྲག
ཉི་འོད་བཞིན་དྲོད་ལམ་མེར་བཀྲམ་སའི་གནས་འདི་ནས
ད་ལྟ ས་སྲོད་ཀྱི་སྒལ་བ་ནག་པོའི་སྟེང་ནུར་གྱིན་པའི
དབུས་པ་དག་ལས
ལོ་རྒྱུས་ཀྱི་ཡིག་འབྲུ་ཕུན་སུམ་ཚོགས་པའི་སྙན་ངག་ཅིག
མཐོང་མི་ཐུབ་ལ དེ་ལས་ཀྱང
མི་དང་རི་དྭགས་ཀྱི་ཁྲག་དྲོན་འཐོར་མ་མྱོང་བའི
རྩྭ་ས་གཙང་མ་ཞིག
ཆུ་བོ་ཁྲི་ཕྲག་གིས་བཀྲུས་ཀྱང་མི་རྙེད་མི་ཐུབ
བྱང་གི་ས་མཚམས་འདི་དུར་ས་བཞིན་སྟོང་བར་གྱུར་བ་ནས
དཔའ་བོའི་གཤིས་རྒྱུད་ལྟར
སྲ་ཞིང་མཁྲེགས་པའི་གྲི་མདུང་དག་བཙའ་ཡིས་ཟིན་པ་ནས
མེད་མུག་གི་སྤྲང་ཁུག་ནས
རང་གི་རྨ་ཁ་རང་གིས་བལྡག་ཉིན་ནས
མཆི་མས་བརླན་པའི་འཇིག་རྟེན་གྱི་མིག་མཐའ་དཔྱངས་པ
ཆུང་དུས་ཀྱི་རྩེད་ར་དྲན་པ་ལྟར་གྱི
ཐག་རིང་གི་ཉི་མ་ལྷ་ས་དྲན་མཁན་གྱི་དབུས་པ་དག་ལས
དེང་མའི དཀའ་སྡུག་གི་ཅི་ཞིག
རང་གི་ལུས་སྟེང་ནས་རྔུལ་ཆུ་བཞིན་འགྲིལ་ཏེ
ཚར་གྱིན་པ་ཚོར་མཁན་ཞིག རྙེད་པར་དཀའ་ཨང
༢
ཐོག་མའི་དུས་ནས
སྔོ་སིང་སིང་གི་ཁུགས་ནས་ཤི་རོ་ཞིག་ལྟར་འཇགས་པའི
ཆར་དང ཉི་ཟེར་གྱིས་ཡང་ཡང་ཕྱིས་པའི་ནམ་མཁའ
རླུང་དང་གློག་ཞགས་མཚམས་མེད་པར་འཁྲུག་སའི
མུན་པའི་བཀབ་རུང
དུས་ཀྱི་མཆི་མ་ལྟ་བུའི་སྐར་མ་ཁྲ་ལམ་མེར་བཀྲ་སའི་ནམ་མཁའ
མེས་པོའི་དུས་ནས་ཐང་ལ་ལྷུང་མ་མྱོང་བའི
དབུས་ལ་འཐེན་པའི ནམ་མཁའ་འདིའི་འོག་ན
དེང་མའི་མཁས་མཛངས་ཀྱི་ཕྲག་པ་གནམ་ལ་ཟུག་པའི
རི་རབ་ཅི་འདྲ་ཞིག་དང
ལོ་རྒྱུས་ཀྱི་འཁྱག་པ་དབུ་ལ་བསྣབས་པའི་རི་རབ་ཅི་འདྲ་ཞིག
བཤིག་ཟིན་པའི་མཁར་གྱང་ཞིག་གི
སྲ་མཁྲེགས་ལྟ་བུའི་རྡོ་དང་གཡའ་མའི་གསེབ་ན
འགྲེང་ནས་ཡོད་དམ
ཡང་ན གཟབ་ནན་གྱི་སོ་བ་ཞིག་ལྟར
དུས་ཀྱི་དཀྱོགས་མཚམས་རེ་རེ་ན་རྒྱང་མིག་བརྐྱངས་ནས་ཡོད
སུ་ཞིག་གི མཛེས་སྡུག་གི་ཁུར་བོ་ལྗིད་དྲག་པའི
དབུས་ལམ་འདི་ན
སྐོམ་དྲག་པའི ས་སྟོང་ལུང་སྟོང་མང་བོ་ཞིག
མཚོན་ཆས་སྟོང་བའི་དམག་མི་བཞིན
ཅི་འདྲའི་ཉམ་ཐག་ཨང
༣
ལོ་ངོ་གྲངས་མེད་ཀྱི ཉི་མ་ཁེར་རྐྱང་ནི
ནམ་མཁའ་སྔོན་པོའི་མིག་ཆུ་ཐིགས་པ་གཅིག
བརྩེ་བ་ཟབ་དྲག་པས
མུན་པ་ལྟ་བུའི་མིག་ཟུང་ནག་པོ་ཞིག་ནམ་ཡང་བཙུམ་མི་སྲིད་མོད
འོན་ཀྱང རྡོ་རྗེ་ལྟ་བུའི་མེས་པོ་དེ
ད་ལྟ དབུས་ལམ་རིང་མོ་འདིའི
ལོ་རྒྱུས་ཀྱི་མཛེས་པ་ཡོད་ཚད་བུད་ཤིང་ལྟར་བསྲེགས་རྗེས་ཀྱི
སོལ་བ་ལྟ་བུའི་ས་ནག་གི་གསེབ་ན་ཡོད་དམ
སྟོང་བ་ལས་ཀྱང
དབུལ་དྲག་པའི་རླུང་བུ་ལྡོམ་པོ་ཚོའི་སྤར་ནང་ན་ཡོད
ད་ལྟ ངས་རང་གི་འདང་བརྒྱག་གི་ཕྲག་པར
དམྱལ་བའི་སྡུག་བསྔལ་ལས་ལྕི་བའི
རྡོ་གསེབ་ལྕགས་གསེབ་ཀྱི་བརྩེ་བའི་མཆི་མ་ཁུར་ཡོད
ཉིན་གྱི་རྨ་ཁ་ན་འབར་གྱིན་པའི་ཞེ་སྡང་དང
མཚན་གྱི་བྲང་ཁོག་ན་འདར་གྱིན་པའི་འཇིགས་པ་ཁུར་ཡོད
དོན་ངོ་མར དབུས་ལམ་ནི
རང་ཁྱིམ་དྲོན་མོ་དུས་ཚོད་ཀྱི་ཀློང་ཆེན་པོར་རུ་སྤར་རྗེས་ཀྱི
མེ་རོ་རུམ་པའི་ཐབ་ཀ་ཁེར་འདུག་ཅིག
༤
ཆར་བའི་མིག་ཆུ་དང
རླུང་བུའི་སྐྲག་འདར་གྱི་དབུས་ན
རང་གི་སྙིང་ཀར་རང་ཉིད་ཙོག་པ་ལྟ་བུའི
ཧ་ཅང་ལྗིད་ལ སྐྱོ་གདུང་གི་རྐྱེན་གྱིས་ཡར་ལངས་མ་མྱོང་བའི
མེས་པོའི་མཆོད་པ་ལྟ་བུའི་གངས་རིའི་ཕྲེང་བ
ཡུམ་གྱི་བརྩེ་བ་ལྟར་སྐམ་མ་མྱོང་ལ
ཡབ་ཀྱི་བྲང་ཁ་ལྟ་བུའི ས་གཞི་ན
མིག་ཆུའི་ཐིགས་པ་ལྟར་སུས་ཀྱང་འཕྱི་མི་ཐུབ་པའི
མཚེའུ་དང་མཚེའུ་ཚོམ་བུ
སྡུག་བསྔལ་གྱི་ཁུ་སིམ་མེའི་སྣང་བ་དེ
རང་ཉིད་མཆོད་མེ་ལྟར་བསྒྲོན་པའི་མི་སྐོར་ཞིག་གིས
ཁྱོད་ཀྱི་སྒལ་གཞུང་ནས
ཇི་ལྟར་འཚོལ་དགོས བདག་གི་དབུས་ལམ་ཡ
ཐག་རིང་དག ལྕགས་མཁར་ཞིག་ལྟར
བདག་གི་མི་ཚེའི་མཐའ་འཁོར་ན་སྲ་མཁྲེགས་ཀྱིས་གྲུབ་པས
ངས རང་ཉིད་ཀྱི་ལུས་སྟེང་གི་ན་ཟུག་དང་འདྲ་བའི
དབུས་ལམ་འདིའི་སྒྲ་མི་འདུག་པའི་འཁུན་སྒྲ་ཡོད་ཚད
ཁྲག་གི་ཚ་དྲོད་ཀྱིས་བཞུ་གྱིན
ལོ་ངོ་ཅི་འདྲ་མང་བོ་ཞིག་ལ
ནམ་མཁར་ལག་པ་སྟོང་བ་བསེད་པའི་དབུས་ལམ་འདི
རང་གི བྲང་ཁའི་ནོར་བུ་འཇོག་སའི་བང་མཛོད་དུ་གཏོང་ངེས
༥
དོན་ངོ་མར དབུས་ལམ་འདི
འཐོབ་མ་མྱོང་བ་ཅི་འདྲ་མང་བོ་ཞིག་བྲང་ཁར་སྦྱར་སའི
རེ་སྒུག་གི་ས་སྟོང་ལུང་སྟོང་ཞིག་ཨང
ཡིད་ཀྱི་སྦྲ་གུར་དང
དེང་མའི མཁས་མཛངས་ཀྱི་མཚོན་ཆ་མང་པོ་ཞིག
དུས་ཚོད་ཀྱི་དུར་སར་བསྐྱལ་སའི་ས་སྟོང་ལུང་སྟོན་ཞིག་ཨང
ཡོད་ཚད་ལོ་རྒྱུས་ཀྱི་ཇག་པས་ཁྱེར་ཚར་བའི
ས་སྟོང་ལུང་སྟོང་འདི་ནས
ད་ལྟ ངས་ཤི་ཚར་བའི་བདེན་དོན་གྱི
རུས་པའང་མི་མཐོང་བ་ཅི་རེད
ཉི་འོད་ཀྱི་ཟབ་ས་ལས་ཀྱང་ཚ་དྲོད་འབར་བའི
དཔའ་བོའི་ཁྲག་ཐིགས་ཀྱི་མེ་སྟག་ཙམ་ཡང་མི་མཐོང་བ་ཅི་རེད
མཛེས་སྡུག་གི་གཏམ་རྒྱུད་ཡོད་ཚད
ས་སྟོང་ལུང་སྟོང་དུ་གྱུར་བའི་གནས་འདི་ནི
ད་ལྟ ཟ་འཐུང་གི་ཁུར་བོ་ཙམ་ལས་མེད་པའི
མི་མང་བོ་ཞིག
འདང་བརྒྱག་གི་གོམ་པ་གང་རེ་རེ་སྤོ་སའི་དབུས་ལམ་རེད
རྩོམ་ཁུངས། ངེད་དྲ་བ།