གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྙན་ངག་པ།

2010-06-16 00:28:00 གཉའ་གོང་ལྷ་བྷེ། ཀློག་གྲངས། མཆན ཡོད།

སྙག་ངག་པ               མི་ཡུལ་གྱི་རླབས་ཆེ་བའི་སྐྱོ་གདུང་འཁུར་ནས
ཁྱེད་རང་གང་དུ་བགྲོད         རྒྱང་རིང་ན་རི་རབ་མཐོན་པོའི་རྩེ་མོ
མཁའ་མཐའ་ན           ས་ཆེན་གྱི་གདོང་འབག་བཀྲུ་བྱེད       སྤྲིན་པ
ད་དུང་མཚོ་གཏིང་ནའང    གྱ་གྱུའི་ལམ་ཕྲན་དང་སྲོག་ཆགས་ཀྱི་སྐད་རིགས་ཡོད
སྙན་ངག་པ     ཁྱེད་གང་ལ་བགྲོད
དབུ་སྐྲ་རིང་བོས་རླུང་ཁ་ན་སུ་ཞིག་གི་ཉམ་ང་དང
བདེན་ལུགས      གཞས་ཆུང་ལྟར་དབྱངས་ལ་གྱེར

སྙན་ངག་པ     ཁྱེད་ཀྱི་རྒྱབ་གཟུགས་ལ་འཁོར་བའི
བྲག་ཆའི་མཚོ་མོའི་འཇིངས་སུ          ཚུལ་འཆོས་དང་མངོན་ལྐོག
འདོད་ཡོན་དང་ཁྱིམ་གཞིས་མེད་པའི་སྡོམ་ཚིག་སྐྱེས
སྙན་ངག་པ          ཡོད་ཚད་བདེན་ནམ
ཁྱེད་ཀྱིས་འཇིག་རྟེན་གཞན་ཞིག་གི་དྲོད་སྣང་འཚོལ་ལམ
ཁྱེད་ཀྱིས་རྟོག་ལྗོངས་གཞན་ཞིག་གི་རི་ཁྱིམ་དང་ས་ཞིང་འདེབས་སམ
ལྭ་རྐྱང་སྲབ་མོ་ཞིག་ལས་མེད་པས      གངས་འདབས་ན་གྲང་རླུང་ཡོད
སྙན་ངག་པ      ཁྱེད་ཀྱིས་འཇིག་རྟེན་གཞན་ཞིག་གི་སྒོ་འཕར་དང
སྒོ་འཕར་དེ་རླུང་གིས་སྐྱོམས་པའི་ངང་ཚུལ་མཐོང་བྱུང་ངམ
ཡོད་ཚད་བསྐྱུར་ཏེ་འདི་ལྟར་བཞུད་དོན་ཅི    སྙན་ངག་པ

སྙན་ངག་པ      ཁྱེད་ནི་ཉི་མའི་བུ་ཆུང་རེད
སྙན་ངག་པ     ཁྱེད་ནི་ཟླ་བའི་གདུང་གྲོགས་རེད
སྙན་ངག་པ    ཁྱེད་ནི་སྐྱ་རེངས་ཀྱི་ཕོ་ཉ་རེད

སྙན་ངག་པ    ཉིན་བྱེད་ཀྱི་འོད་སྣང་དེ་ལྟར་འཐུ་དོན་ཅི
ཆར་ཟིམ་གྱི་ངོ་བོ་དེ་ལྟར་རུམ་དོན་ཅི
གངས་ཆབ་ཀྱི་ཉིང་བཅུད་དེ་ལྟར་བསྣམས་དོན་ཅི
ཁྱེད་རང་མུན་ནག་གི་སྙིང་ཁམས་ནས་འགྲེང་རྒྱུ་ཡིན་ནམ
ཁྱེད་ཀྱིས་སྐྱ་ཐིང་ཐིང་གི་སྤང་གཞུང་ལྟེབས་རྒྱུ་ཡིན་ནམ
ཁྱེད་རང་བྱེ་ཐང་གི་སྐོམ་གདུང་ལ་འཛུལ་རྒྱུ་ཡིན་ནམ

སྙན་ངག་པ     ཁྱེད་ཀྱིས་དེ་ལྟ་བུའི་རི་རབ་དང་ས་ཆེན
ད་དུང       སྨྲེ་ངག་གི་འཇིག་རྟེན་ཧྲིལ་བོ་འདི་ཐེག་གམ

སྙན་ངག་པ    ཁྱེད་ནི་གངས་རི་དང་མཉམ་དུ་སྐྱེས་སྟོབས་འབར་ཞིང
ཁྱེད་ནི་རྨ་འབྲུ་ཟུང་གི་བཞུར་རྒྱུན་གྱི་ཉིང་བཅུད་རེད
སྙན་ངག་པ     འདབ་ཆགས་ལྗང་ཁུ་དེའི་གཤོག་རྡེབ་ཀྱིས
ཁྱེད་ལ           རི་ཐང་དང་དུས་ཚིགས་ཀྱི་དབྱེ་བ་མེད་པར
མཛེས་སྡུག་གི་མེ་ཏོག་དང་མེ་ཏོག་གི་གང་བུ་མང་པོ་བཀྲམ

སྙན་ངག་པ    སྨིག་སྤྲིན་གྱི་འདུ་འགོད་དང
སྨག་རུམ་གྱི་ལྐོག་གཡོའི་གསང་གཏམ་ཐན་ཐུན
མི་ཡུལ་ནས་ཟད་དུས་ཤིག་ལ    ཁྱོད་རང་ཕྱིར་ཕེབས་སམ

སྙན་ངག་པ    ཐང་ཆད་རྒྱུ་མེད་པའི་གངས་འདབ་ཀྱི་ཡུལ་གྱར་བ
ཁྱོད་ལ་ན་ཚོད་ལས་བརྒལ་བའི་སྨྲ་ར་སྐྱེས་བཞིན་འདུག  

རྩོམ་ཁུངས། ༢༠༠༢ལོའི་གངས་རྒྱན་མེ་ཏོག་དེབ་བཞི་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།