གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

དུས་བཞི་དང་ཨ་མའི་སེམས་ཁྲལ།

2010-06-05 00:52:00 ཤེའུ་ཀུན་དཔལ། ཀློག་གྲངས། མཆན ཡོད།

བྱེའུ་ཡི་གསུང་དབྱངས་ངང༌།
ཁམ་བུའི་མེ་ཏོག་གི་མཛེས་སྡུག་ཁྲོད།
དཔྱིད་ཀྱི་གོམ་པ་མི་ཡུལ་དུ་སྤོས་བྱུང༌།
དཔྱིད་ཀ་དེ་ལྟར་བསླེབས་ཚེ།
ཨ་མས་རྟོགས་སད་ཀྱི་སླེ་བོ་ཁུར་ཏེ།
ཨ་ཕ་དང་མཉམ་དུ་ཞིང་ཁར་ཐོན།
ཞིང་ཁ།  ཨ་མའི་དགོས་འདོད་ཀྱི་ནོར་བུ་ལེན་ས།
ཞིང་ཁ།   ཨ་མའི་རྨི་ལམ་དུ་འཁོར་བའི་ཤམ་བྷ་ལ།
ཐོང་གཤོལ་དང་ཨ་ཕའི་ཞབས་རྗེས་སྲུང་གིན།
རེ་བའི་འབྲུ་སོན་རེ་རེ་རྔུལ་ཆུ་དང་ལྷན་དུ་བསྲེས།
རྩམ་རྡོག་དང་ཇ་ཐང་གི་འདུ་འགོད་ཁྲོད།
ཉིན་གུང་གི་ཟས་སྐལ་ལ་རོལ་ཅིང༌།
འདི་ལོའི་དཔྱིད་ལུད་ཀྱི་རིན་གོང་བར་ནས།
ཨ་མའི་སེམས་པར་སྐྱོ་སྣང་གི་གྲང་རླུང་གཡུགས།
མེ་ཏོག་གི་ལང་ཚོ་རྒྱས།  ཕྱེ་ལེབ་ཀྱིས་གཤོག་འགྱུར་ངོམ།
བཀྲག་མདངས་རྒྱས་པའི་དུས་ཚིགས་དེའི་མཁའ་དབུགས་ཁྲོད།
ཨ་མ།   སྙེ་རླབས་ཀྱིས་སྐྱོམས་པའི་ཞིང་ཁ་ན་ཡོད།
རྐང་རྗེན་དུ་རྩྭ་ངན་གྱི་མགོ་བོ་བྲེག་ཅིང༌།
འོད་ཐིག་འཁུར་བའི་རྔུལ་ཆུའི་རྡོག་པོ།
དཔྲལ་བའི་ཡུར་ཁ་བརྒལ་ཏེ་ལྗང་ལོའི་རྩ་བར་བརླན།
སྔོ་ཐང་ཐིང་གི་ཞིང་ཁའི་བྲང་ཁ་ནས།
སྙེ་རླབས་ཀྱི་ལང་ཚོ་མཛེས་སྡུག་གིས་གཡོ་དུས།
ཨ་མས་གླུ་ཆུང་སྙན་མོ་ཞིག་མགྲིན་སྒོ་ནས་གཏོར་གྱིན།
ཨ་ཕའི་གདོང་ལ་དགོད་ཁ་ཡང་ཡང་སློང༌།
ཕྱི་དྲོ་ཞིག་ལ་བརྙན་འཕྲིན་གྱི་གནམ་གཤིས་སྔོན་བརྡ་ལས།
དབྱར་སྨད་ན་ཐན་པ་ཡོད་ལུགས་བསྒྲགས་དུས།
ཨ་མའི་ངོ་གདོང༌།   ཨ་མའི་སེམས་པ།
བྱེ་སྟོང་གི་ལོ་མ་བཞིན་རྙིད་སོང༌།

ཁམ་སྡོང་གི་འབྲས་བུ་ས་གཞིར་བསྩལ་ཅིང༌།
སྡོང་རྒན་གྱི་འབྲས་བུ་རླུང་གིས་རྐུ་དུས།
ཨ་མའི་སེམས་ལ་འཚུབ་ཤ་ཡང་ཡང་ལངས།
སེར་མདོག་གིས་བརྒྱན་པའི་དུས་ཚིགས་འདིར།
ཨ་མས་རེ་སྒུག་གི་ལྷན་པ་ཅི་ཙམ་བརྩེགས་ཡོད་ཨང༌།
ཞོགས་པར་ཉི་ཐིག་མགོ་རུ་དཀྲིས་ནས་ཞིང་ཁར་ཆས་ཤིང་
སྙེ་མའི་མངལ་ན་སྦྲུམ་པའི་འབྲུ་རྡོག་རེ་རེ་མཐོང་དུས།
ལུས་སྟེང་གི་ངལ་བ་ཡང་སིལ་བུར་འཐོར་འགྲོ།
མཚན་མོ་དེར་གློ་བུར་གློག་འཁྱུག    འབྲུག་སྒྲའང་ལྡིར་བྱུང༌།
རྒྱུན་ལྡན་མིན་པའི་དྲག་ཆར་དེས་རི་ལུང་དཀྲོགས་སོང༌།
རྨི་ལམ་གྱི་སྣེ་ཆད་པའི་ཨ་མས།
མལ་ནས་ཙོག་པུར་ཕྲེང་རྡོག་ཤེད་ཀྱིས་བགྲང་གིན།
མུག་མུག་གིས་མ་ཎི་མཁའ་མཐར་བཅུག
ས་གཞིར་ངོ་མདོག་ཉམས་ཤིང༌།
སྡོང་རྒན་གྱིས་སྐྱོ་གླུ་རླུང་ལ་བསྐུར་དུས།
གྲང་ངར་གྱི་དཔུང་ཚོགས་ངར་མས།
ཨ་མའི་བརྡོལ་རལ་གྱི་ལྷམ་ཆུང་ལ་བཙན་འཛུལ་ཡང་ཡང་བྱས།
ཁ་བ་སྐྲ་ལོ་བཞིན་ངོ་གདོང་ན་གཡུག་དུས།
ཚ་བོ་དག་ཐབ་ཚང་དུ་རུབ་ཅིང༌།
ཨོང་བའི་མེ་ལྕེ་ལྷབ་ལྷབ་ཏུ་སྦར་ཞོར།
རྩམ་ཐུག་ཞིམ་པོ་ལྷོག་ལྷོག་ཏུ་བསྐོལ་བྱུང༌།
འོན་ཀྱང་སྟོན་མཇུག་ཏུ་བོར་བའི་གླང་རྒན་སེར་ཐོས།
ཨ་མའི་རྩམ་ཐུག་གི་བྲོ་བ་ཡོད་ཚད་བརྐུས་ཤིང༌།
འབྲུ་ཁང་ནང་གཉིད་པའི་སྒྱེ་མོ་སྟོང་བས།
ཨ་མའི་བྲང་གཞུང་དུ་ཁ་བ་གཏོར་བྱུང་ངོ༌།།

རྩོམ་ཁུངས། ༢༠༠༩ལོའིི་སྦྲང་ཆར་དེབ་དང་པོ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།