སྟོང་འཇགས་ཀྱི་མཚན་མོ་དེར

འཇམ་ཐང་ངེར་ལུས་པའི་ཁང་མིག་ཆུང་ཆུང་འདིར

ཐ་མག་ལ་བསམ་གཞིགས་བཅོལ་བའི་མི་སེམས་གྲངས་མེད་ཅིག

ཟླ་བ་གཞོན་ནུའི་འགྱུར་ཁུག་གི་ཀློང་ན་འཇགས་ཤིང་འཕྱུར

ཤེལ་ཀོང་དུ་འཁྱིལ་བའི་ཝུ་རག་ལ་དྲང་གཏམ་བསྙོན་ཚེ

བཞུད་ཟིན་པའི་མིག་ཟུང་ད་དུང་ཤེལ་ཀོང་དུ་ལྷག་གེར་བཞད

ཆག་གྲུམ་ཤོར་བའི་གཏམ་རྒྱུད་ཐར་ཐོར

ཨ་རག་དགའ་མས་ཡང་བསྐྱར་སེམས་ཁོངས་སུ་བསྒྲིགས

དུངས་ཞེན་གྱི་བརྩེ་བས་མི་འབྲལ་དམ་དུ་བཅིངས་ཤིང

དགའ་སྡུག་ཡུག་ཏུ་འབྲེལ་བའི་འཚོ་བ་ལ་གཏན་དུ་ཆགས

བཀྲ་མི་ཤིས་པ་ཞིག་གི་བརྗོད་དོན་སྟེང་ནས་ང་ཚོས་ཅི་བྱེད

སྟོང་བསམ་གྱི་ལོ་དང་ཟླ་བ

བརྗོད་དཀའ་བའི་གསང་བ་ཇི་སྙེད

ད་ལྟ་ཀློག་བཞིན་པའི་འདོད་གཏམ་སྣ་ཚོགས

སྐྱུག་བྲོ་བའི་གླེགས་བམ་གྲངས་མེད་ཅིག་བརྩམས་ཟིན

ཚོགས་བསགས་ཀྱི་ལྕི་ཡང་སྙོམས་པའི་ཕ་རོལ་ན

ལས་འབྲས་ལ་རེ་སྒུག་བགྱིད་པའི་ཚུར་རོལ་ན

གསར་རྙིང་གི་འཐབ་རྩོད་དེས

ཟང་ཟིང་གི་ཡུལ་ཁམས་ཤིག་དཀྲིགས་ཤིང་བསྣུབས

རྩོམ་ཁུངས། རྨ་ཆུའི་སྙན་ངག