དུས་ཚོད་ཀྱིས་རྨེག་མེད་དུ་གཏོང་བཞིན་པའི་ང་ཚོ།
སྡོང་ལོ་དེ་རྒྱང་རིང་དུ་འཕུར་སོང
སྤྲིན་པ་དེ་ཐག་རིང་དུ་བཞུད་སོང
ཡིན་ནའང འཇའ་ཚོན་དེ་གཅིག་པུ་ང་ཚོའི་གམ་དུ་དལ་ཅག་གེར་བསྡད་འདུག
ང་ཚོའི་མིག་ཟུང་གིས་དེའི་མཛེས་སྡུག་འཐུང་བཞིན་རང་ཉིད་བརྗེད་འདུག
སྐབས་དེར ཉི་ཟེར་གྱིས་ཀྱང་རང་ཉིད་ཀྱི་ནག་ཉེས་མཐོང་སྟེ་འགྱོད་བཤགས་བྱེད་མོད
དུས་ཚོད་ཀྱིས་དེ་དག་ལ་ཁ་ཡ་ཁྱོན་ནས་མི་བྱེད་པར“ཐག་ཐག”དགོད་ཀྱིན་འདུག
སྙན་ངག་གི་ཕོ་བྲང་ན་འདར་བའི་སྒྱུ་འཕྲུལ་གྱི་ཐ་སྙད་གྲངས་མེད
བསམ་བློའི་མངའ་ཐང་ན་འཁོར་བའི་སྤྲང་བོ་དེའི་ཨམ་ཕྲག་ལས་འཐོར་གྱིན་འདུག
དུས་མཚུངས་སུ འགྲུལ་བཞུད་པ་མང་པོ་ཞིག་ཀྱང་ནོར་བུའི་གླིང་ཕྲན་དེར་བགྲོད་འགོ་རྩོམ
ཡན་ནའང ཁོ་ཚོས་དུས་ཚོད་ཀྱི“མདའ་རྩེ”རང་ཉིད་ཀྱི་སྙིང་ཁར་གཏད་འདུག་པ་ཅུང་ཙམ་ཡང་ཚོར་གྱིན་མི་འདུག
ཉིན་མཚན་གྱི་གོ་རིམ་འཆོལ་བའི་འཁྲུག་རྩོད་དེར་ཐེངས་མང་རོལ་རྗེས
གཉིད་དང་ཟ་མར་གོམས་པའི“མི་རབས་གསུམ་པའི”ཁྲོད་ཀྱི་སྐྱེ་བོ་ཁ་ཤས་ཀྱིས
རང་ཉིད་ཀྱི་རྣམ་ཤེས་གངས་རི་བཞིན་པ་མཐོང་བྱུང
མཇུག་མཐར དུས་ཚོད་ཀྱི “རྡོག་སྒྲ”ཡལ་ཤུལ་དུ་ལྟད་མོ་སྐྱིད་པོ་ཞིག་སྣང་བ་ནི
ཁྲག་གི་རྐང་རྗེས་རེ་རེས“འཆི་བ”ཞེས་པའི་ཡིག་འབྲུ་ཆེན་པོ་གཉིས་གྲུབ་འདུག་པ་དེའོ
རྩོམ་ཁུངས། ༢༠༠༤ལོའི་གངས་རྒྱན་མེ་ཏོག་དེབ་གཉིས་པ།