དུས་རབས་ཀྱི་ཚ་རླབས་གོ་ལ་ཧྲིལ་བོ་ཅན་དུ་འགྱུར་བའི་གནས་བབས་འདིར་གཞིག་ན་མི་སུ་ཡིན་རུང་རང་རང་གི་འཚོ་གནས་འདིའི་བདེན་དོན་ནམ་དེ་ལ་བརྩོན་ལེན་བྱེད་པའི་འོས་འགན་ཞིག་ཡོད་ལ།  དེ་ནི་ང་ཚོའི་མི་རེ་རེ་ལས་གྲུབ་པའི་སྤྱི་ཚོགས་ཞེས་པ་འདིས་བསྐྱེད་པའི་གཟུར་མེད་ཀྱི་ཆོད་ཉིད་ཅིག་རེད་འདུག     སྤྱིར་མི་སུ་ཞིག་ཡིན་ཡང་་གཞན་དང་བློ་ཁ་མི་མཐུན་པའམ་ཕན་ཚུན་ལ་གནོད་པའི་ཉེས་པ་ཐན་ཐུན་རེ་བསག་ངེས་ལ།          དེ་ཡང་ཧོ་ལ་སི་ལགས་ཀྱིས་འཇིག་རྟེན་ནི་མ་གཞི་ནས་ནག་ཉེས་ཀྱིས་གྲུབ་པ་ཡིན་ཡང་།  ནག་ཉེས་ནག་ཉེས་ཡིན་པ་འདྲ་བོར་སྣང་ནའང་ནག་ཉེས་ལ་ལྕི་ཡང་གི་ཁྱད་པར་ཡོད་ཟེར་བ་ནང་བཞིན།  ང་ཚོ་ཚང་མས་ནག་ཉེས་བསག་པ་དང་ནག་ཉེས་གཏོར་བའི་རིམས་པ་འདི་ལས་ད་གཟོད་སྤྱི་ཚོགས་འདིའི་བདེན་དྲང་སྲང་ལ་འཇལ་དགོས་པ་ལོས་ཡིན།   དེ་བས་ནག་ཉེས་ཞེས་པ་འདིའི་ངོ་བོར་གཞིག་ན་དང་ཐོག་ཆུང་ས་གང་རུང་ལ་བློམིག་གི་ཟུར་མདའ་འཕེན་རྒྱུ་ནི་ཧ་ཅང་ཤེས་དགོས་ས་ཞིག་རེད་འདུག   སྐབས་འདིར་བདག་གིས་མི་རིགས་ཞེས་པ་འདིར་དོན་བྱ་རླབས་ཆེན་ཞིག་དང་ལ་རྒྱ་ཞེས་པའི་ཀི་རིང་གྲགས་ཆེ་བ་ཞིག་མི་བསྒྲག་པར་རང་གི་དངོས་དོན་ལས་རེག་པའི་མཐོང་ཐོས་ཅི་རིགས་ཤིག་སེམས་འབྲེལ་ཟབ་པའི་གྲོགས་པོ་ཚོ་དང་ལྷག་དོན་དུས་རབས་ཀྱི་འགྲོ་ལམ་མཐུན་པའི་སློབ་ཆེན་པ་ཚོའི་སྙན་ལ་བཤམས་འདོད།  དེ་ཡང་མི་ཞིག་ལ་སྐྱོ་གདུང་ཆེ་དུས་ཁ་ན་སྙིང་གཏམ་མོད་པའི་དཔེ་ལྟར།   ང་ལ་ནམ་ཡང་སྐྱོ་བ་སུད་སུད་ཅིག་གིས་གཡོག་འདུག་ཅེས་བརྗོདཚེ་སུ་ཞིག་གིས་ང་ལ་འདྲི་ཚིག་འདྲ་ཞིག་འདེབས་ངོས་ཏེ།    ཁྱོད་རང་བུ་མོ་ཞིག་གིས་དམ་ལ་བཏགས་ཡོད་ཚོད་རེད། སེམས་མི་སྐྱིད་ན་ཆང་ཁང་དུ་འགྲོ   ཚོ་བ་ལ་སྤྲོ་སྣང་མེད་ན་འཚོ་གནས་ལ་སྙིང་བོ་ཅི་ཡོད་ཟེར།  དོན་ངོ་མ་བཤད་ན་འཇིག་རྟེན་པ་ཡོད་ཚད་ཚོ་གནས་ཀྱི་ཕྱིར་དུ་ཡོང་པ་བདེན་དོན་རེད་ལ།  འཚོ་གནས་ལ་སྤྲོ་སྣང་མེད་ན་སྙིང་བོམེད་པ་ཡང་བདེན་རེད།  འོན་ཀྱང་ཅི་ཞིག་ལ་ཚོ་གནས་ཀྱི་བདེན་དོན་དང་འཚོ་གནས་ཀྱི་སྤྲོ་སེམས་ཟེར་རམ།
   བདག་གིས་བསམ་ན་འཚོ་གནས་ཀྱི་འགན་འགན་འཁྲི་མེད་པའི་འཚོ་གནས་ནི་ཧ་ཅང་དགོད་བྲོ་བ་ཞིག་རེད །འཚོ་གནས་ཀྱི་འདུ་ཤེས་ནོར་བའི་སྤྲོ་སྣང་ནི་དེ་བས་ཀྱང་ཞེ་མེར་བ་ཞིག་ཅི་ལ་མིན།དོན་དུ་ང་ཚོ་འཚོ་གནས་སུ་ཞུགས་པའི་ན་གཞོན་ཏག་ཏག་ཡིན་ཡང་།  འཚོ་གནས་ཀྱི་བདེན་དྲང་དང་སྤྲོ་སྣང་རྟོགས་མཁན་ག་ཙམ་མཆིས།མདོར་ན་ང་ཚོ་དེ་ལྟ་བུའི་ཤེས་རྩལ་དང་འཇོན་ཐང་མེད་སོང་བ་གཏན་ནས་མ་ཡིན་ལ། ང་ཚོའི་ཀླད་པའི་ནང་དངོས་དོན་ལ་དཔྱོད་པའི་རྩ་ལམ་ཞིག་འགག་སོང་བའི་ལན་ཡིན་པ་རེད་སྙམ། ཞོགས་གཞན་ཞིག་ནས་ང་ཚའི་སློབ་ཆེན་ཡིན་ཟེར་མཁན་མང་པོ་ཞིག་གི་སྣང་ངོ་ན་རང་ཉིད་ཟེར་བ་ཞིག་དངོས་གནས་མེད་པ་འདྲ། སྐུ་ཞབས་ཞོགས་དུང་ལགས་ཀྱིས་སློབ་ཆེན་པ་རྣམས་མཐར་ཕྱིན་ལ་ཉེ་བ་ན། ཁོ་ཚོས་འབྲེལ་ཡོད་ཀྱི་འགྲོ་ལུགས་མཐའ་དག་བསྒྲུབས་ཚར།  ཁོ་ཚོར་མཚོན་ན་བྱ་བ་ཞིག་ཅི་རེག་གམ་སྙམ་པའི་སེམས་ཁུར་ལས་གཞན།  མཇུག་མཐའི་དོན་བྱ་ཉག་གཅིག་ནི་མལ་ཐུལ་དང་མལ་སྟན་བསྒྲིལ་ཏེ་རང་རང་སོ་སོའི་གནས་སུ་བགྲོད་འགྲོ་བ་དེ་རེད།གོ་ཐོས་ལྟར་ན།  དུས་དེར་སློབ་མ་ལ་ལས་མི་ལོ་བཞི་ནས་ལྔའི་བར་སྦྱངས་ཤིང་བལྟས་པའི་སློབ་གཞི་དང་ཟུར་ལྟའི་དཔེ་ཆ་ཚང་མ་གཅིག་ཀྱང་མ་ལུས་པར་ཤོག་ཧྲུལ་ཉོ་མཁན་ལ་བཙོང་སྐད།  དཔེ་ཆ་ཤོག་ཧྲུལ་དུ་བཙོངས་པའི་དོན་ཕྲན་ཚེགདེས་ཡང་སྙིང་ཅི་ཞིག་མཚོན་ནམ་ཟེར།   དོན་ངོ་མར་དཔེ་ཆ་ཤོག་ཧྲུལ་ཉོ་མཁན་ལ་བཙོང་བའི་དུས་ལ་སླེབས་མེད་པའི་སློབ་གླིང་གི་སློབ་མ་འགའ་ཤས་ཤིག་གིས་གྲུ་ཟུར་གང་རུང་ཞིག་ན་ས་རྡུལ་དང་གད་སྙིགས་ཁྲོད་ལ་འཐིམས་པའི་བསླབ་གཞི་དེ་དག་ཀྱང་ནམ་ཞིག་དུད་ཆང་གི་སློབ་ཡོན་དུ་བཙོང་རྩིས་ཡོད་དམ།   ཡང་ན་དཔེ་ཆ་ནི་ལག་ལེན་དང་བར་ཐག་ཆེ་རུ་སོང་བའི་གཞུང་ལུགས་ཤིག་རེད་སྙམ་པའི་འདུ་ཤེས་འཁྲྭལ་མེད་ཅིག་སྐྱེས་སོང་བ་ཡིན་ནམ། འདི་ནི་ང་ཚོའི་མི་རིགས་འདིའི་བདེ་སྡུག་དང་འབྱུང་འགྱུར་ཕྲག་ལ་བབས་ཡོད་པའི་སློབ་ཆེན་པ་མང་དག་ཅིག་གི་ལག་ལེན་བྱེད་སྟངས་དང་གོམས་ལུགས་གསར་བ་ཞིག་རེད།   ཡང་དགོས་ང་ཚོས་ཅི་ཞིག་ལ་འཚོ་གནས་ཀྱི་འགན་འཁྲི་དང་གང་ཞིག་ལ་འཚོ་གནས་ཀྱི་སྤྲོ་སྣང་ཟེར་བ་མ་ཤེས་པའི་རྨོངས་གཤིས་ཤིག་ཨེ་རེད། ང་ཚའོའི་སློབ་བུ་ཁ་ཤས་ཤིག་རི་མཐོ་ལུང་སུལ་ན་ཡོད་པའི་ཕྱུགས་རྫི་ཚོ་དང་ཞིང་ཁ་ཡུར་ཁ་ན་མཆིས་པའི་ཞིང་བ་ཚོ་ལའང་མི་དོ་བར་སྣང་།  ཁོ་ཚོས་ཅིས་ཀྱང་རང་རང་སྔུན་གྱི་དོན་བྱ་ཙག་ཙིག་ལ་བརྩོན་ལེན་བྱེད་པ་བདེན་དཔང་ནུས། དུ་དུང་ལག་ལེན་དངོས་ཀྱི་སྟེང་ཁོ་ཚོ་ལ་ང་ཚོ་ལས་དང་བླངས་ཀྱི་མིག་ཤེས་དང་ལས་དོན་གང་ལའང་འགན་ཁུར་གྱི་འདུ་ཤེས་ཧ་ཅང་ཆེ་བར་སྣང་བར་སེམས། གང་ལྟར་ལས་དོན་གང་ལ་འཇུག་འདོད་ཀྱི་སྙིང་སྟོབས་མཆིས་ཀྱང་རྩ་བ་དང་ཡལ་ག་བོར་བའི་ལག་ལེན་དང་འདུ་ཤེས་ནི་ཤིན་ཏུ་འཕངས་དགོས་པ་ཞིག་མ་ཡིན་ནམ།།
 

རྩོམ་ཁུངས། ངེད་དྲ་བ།