མི་ལོ་གསུམ་ཙམ་ལ་འབྲེལ་འདྲིས་དང་ངོ་ཐུག་མ་བྱུང་བའི་མི་བུ་ཞིག་ཕྱིར་དྲན་བྱས་ན།དེ་ནི་སློབ་འབྲིང་སྐབས་ཀྱི་བདག་གི་མ་ཡུམ་སློབ་གྲྭའི་སྒོ་སྲུང་བ་རྒན་པོ་དེ་ཡིན་འདུག
  གཟུགས་གཞི་ཐུང་ལ་ངོ་བོ་ནག་ཅིང་།གདོང་གི་ཡ་ཐོད་དུ་སྐྱ་ཐིག་འཁྱོག་པོ་འགའ་བཏིངས་པ་ལྟ་བུའི་རྒས་གཉེར་ཞིག་མངོན་ཡོད།དེ་དག་ནི་ཕྱིའི་བག་ཆགས་ཙམ་ཞིག་སྟེ།ཁོའི་གྲུང་ཤ་དོད་པའི་མིག་ཟུང་དེ་གཉིས་དང་བཅོས་མ་མིན་པའི་འཛུམ་བག་དེས་རྟག་ཏུ་དགེ་སློབ་ཆིག་སྟོང་ཙམ་ལ་སྣང་བརྙན་བཟང་པོ་ཞིག་འཇོག་བཞིན་ཡོད།
ཡིན་ནའང་།ལས་གནས་ལ་འཇུག་པའི་སྐབས་སུ་ཁོ་རང་ཧ་ཅང་ནན་ཏནགྱི་མི་ཞིག་སྟེ།རྒྱ་སྒོའི་མདུན་སར་ཁོས་ཐོབ་གོ་ས་དང་རྒྱུ་འབྱོར་བའི་ཆེ་ཆུང་།གཉེན་ཉེ་དུ་གང་ལའང་མི་བལྟ་བར་དྲང་བདེན་དང་ཀུན་ཕན་གྱི་རྩ་དོན་གཞིར་བཟུང་ནས་མི་རྣམས་ཕར་འགྲོ་ཚུར་འོང་བྱེད་དུ་འཇུག་ཀིན་ཡོད།  དེང་སྐབས་ཀྱི་མི་རྣམས་བྱ་བ་ནན་ཏན་གྱིས་སྒྲུབ་མཁན་ཅན་ལ་སྡང་བ་ནི་དངོས་དོན་གྱི་གནས་ཚུལ་ཞིག་སྟེ།ཁོའི་དྲང་བདེན་གྱི་བྱ་སྤྱོད་དེས་སེམས་དཀྱེལ་དོགས་པའི་སློབ་གྲྭའི་ཕྱི་ནང་གི་སྐྱེས་པོ་མང་པོར་སུན་སྣང་ངམ་ཁོང་ཁྲོ་ཅི་རིགས་སྦྱིན་བྱུང་།ཁོ་བོའང་དེ་ལས་མ་འདས་ར་དེ་ལ་མི་དགའ་བའི་རྣམ་འགྱུར་སྣ་ཚོགས་བསྟན་མྱོང་། མི་ལ་འརོགས་ཡུན་རིང་ན།།མི་ངོ་ངོ་མ་ཟིན་ཡོང་།།ཞེས་པ་ལྟར།འདས་པའི་ལོ་ངོ་དྲུག་གི་སློབ་འབྲིང་གི་འཚོ་བའི་ཁྲོད།ཁོས་རང་ཉིད་ཀྱི་དྲང་བདེན་གྱི་བྱ་གཞག་དེར་འགྱུར་བག་གཏན་ནས་བྱུང་དུ་མ་བཅུག་པར་རྒྱུན་བསྐྱངས་འོང་པས།དུས་དེ་ནས་བཟུང་།ངས་ཁོ་ལ་ཟུར་མིག་གཞན་ཞིག་གིས་བལྟ་དགོས་བྱུང་ཞིང་།ལྷག་པར་དུ་ང་རང་མཐོ་རྒྱུགས་ལ་ཞུགས་པའི་ལོ་དེར་ཁོས་ང་ལ་སློབ་སྦྱོང་བྱེད་དགོས་ཚུལ་དང་སྤོབས་པ་བསྐྱེད་དགོས་ཚུལ་སོགས་ཁ་ཏ་ཅི་རིགས་བྱས་པས།ངས་རང་དབང་མེད་པར་སེམས་གཏིང་ནས་ཁོ་ལ་བཁུར་བསྟི་བྱེད་དགོས་བྱུང་། སློབ་ཆེན་འགྲིམས་པ་ནས་བཟུང།ངས་ཁོ་ཐེངས་གཅིག་ལའང་མཐོང་མ་བྱུང།འོན་ཀྱང་།ཁོའི་དྲང་བདེན་གྱི་སྣང་བརྙན་དང་ཞུམ་མེད་ཀྱི་འགན་འཁྲིའི་འདུ་ཤེས་དེས་དུས་ནམ་ཡང་ངའི་འགྲོ་འདུག་འཆག་ཉལ་ལ་སྐུལ་ལྕག་ཟབ་མོ་གཏོང་ཀིན་འདུག  སྒོ་སྲུང་བ།ཆེས་སྤྱིར་བཏང་གི་ལས་གནས་ཤིག་ནས།ཆེས་རྣམ་དག་གི་བྱ་བ་སྒྲུབ་མཁན་དེ་ཡིན་འདུག

རྩོམ་ཁུངས། ངེད་དྲ་བ།