བརྩེ་དུང་གི་དབང་གིས།
སྟོང་ལོ་བཅུ་གཉིས་ལོའི་ཟླ་བཅུ་གཉིས་པའི་ཚེས་གཉིས་ཉིན།མཚོ་སྔོན་མགོ་ལོག་གཅིག་སྒྲིལ་རྫོང་སོག་རུ་ཡུལ་ཚོ་རུ་གློ་རྡེག་ཏུ་མི་གཉིས་ཤི་བའི་དོན་རྐྱེན་བྱུང་། གཏམ་ངན་དེ་ཐོས་སྐབས་ང་རང་གཞུང་ལས་ཁང་དུ་ལས་ཀར་བྲེལ་བཞིན་པའི་སྒང་ཡིན། སྐབས་ཐོག་ཏུ་ང་རང་ཡིད་ཆེས་པའང་བྱུང་མེད། རྒྱུ་མཚན་ཧ་ཅང་སླ་སྟེ།གནས་འདི་རུ་ཡར་སྔོན་གང་དུའང་མི་ཤི་རྟ་འགྱེལ་ལྟ་བུའི་དོན་རྐྱེན་བྱུང་བ་གོ་མྱོང་མེད་ཁར།གཏམ་ངན་གང་དེའི་བདེན་རྫུན་དང་བྱུང་རྐྱེན་ཡང་ཁོ་བོར་མཚོན་ན་རྦད་དེ་ཆ་མེད་ཅིག་ཡིན་པས་རེད།ཡིནའང་།འཚུབ་ཆ་ལངས་བའི་མདུན་གྱི་ལས་གྲོགས་གསར་བུ་དེ་བལྟས་ཚེ་དོན་དག་གང་ཞིག་བྱུང་བར་ཡིད་མི་ཆེས་རང་ཆེས་ལྟ་བུའི་རྣམ་འགྱུར་ཅིག་མཐོང་ཡོང་།སྐབས་དེར་ཧྲུའུ་ཅི་དང་ཚོ་དཔོན་གཉིས་ཀ་སྔ་མོ་ནས་གཞུང་དོན་དུ་འདུར་ཚར་བས་ལས་ཁུངས་སུ་མེད།ལས་གྲོགས་གཞན་པ་ཚང་མ་རབ་རིབ་མག་མོག་ཅིག་རེད། ང་རང་ལྷག་ཏུ་རབ་རིབ་མག་མོག་ཅིག་རེད། ཁ་པར་དུ་བལྟས་ཚེ་ཕྱི་དྲོའི་ཆུ་ཚོད་གསུམ་དང་སྐར་མ་བཅོ་ལྔའི་མཚམས་སུ་སླེབས་འདུག
དོན་རྐྱེན་དེ་ཧ་ཅང་གློ་བུར་ཡིན་པས་ཡིན་ནམ། རེ་ཞིག་ང་རང་ཧད་དེ་ལུས་སོང་ཡོད་པ་འདྲ། ཡང་ན་དེ་ཡང་མ་ཡིན་དེ།དོན་རྐྱེན་ནི་གློ་རྡེག་གློ་རྡེག་ཏུ་བྱུང་ཆོག་པ་དེ་ཡིན་པས།ང་རང་འཚུབ་ཆ་ཙམ་ཡང་ལངས་མེད་པ་འདྲ། གང་ལྟར་བསམ་གཞིག་ལང་ལོང་དེ་ལས་སད་དུས། ལས་གྲོགས་གསར་བུ་དེས་ཧྲུའུ་ཅི་དང་ཚོ་དཔོན་ལ་ཁ་པར་གཏོང་གིན་འདུག ཁ་པར་གཏོང་ཞོར་དུ་ཡར་འདུར་མར་འདུར་བྱེད་ཀི་འདུག ཁ་པར་གཏོང་ཚར་རྗེས།ཁོས་ངེད་གཉིས་འགྲོགས་ནས་དོན་རྐྱེན་བྱུང་ཡུལ་དངོས་ལ་འགྲོ་དགོས་ཟེར་བས། ང་རང་དངངས་སྐྲག་འདྲེས་མའི་ངང་ཁོའི་རྗེས་སུ་དེད་པ་ཡིན།
བལྟས་ཚོད་དུ། ཡོམ་ཡོམ་འགུལ་གྱིན་པའི་མི་ཚོགས་མདུན་གྱི་ཁང་མིག་དེའི་གདོང་ལའང་སྐྱོ་ཉམས་ཁོ་ན་ཤར་འདུག དེ་ནི་འཁྲུལ་བ་ཡིན་ནམ། དངངས་སྐྲག་ཡིན་ནམ། ཡང་ན་དོན་རྐྱེན་བྱུང་ཡུལ་དངོས་ཀྱི་ངོ་གདོང་ནི་དེ་འདྲ་ཁོ་ན་ཡིན་སོང་།
འགའ་རེས་བཤད་ན།ཁང་ཆུང་དེ་རུ་བེམ་པོ་གཉིས་འདུག་ཟེར།བཟའ་ཟླ་གཉིས་ཀ་རེད་ཟེར།ཕལ་ཆེར་རྒྱ་གཉིས་ཡིན་པ་འདྲ་ཟེར། ལ་ལས་བཤད་ན། དེ་གཉིས་སྤུན་མཆེད་རེད་ཟེར། ཕ་ཡུལ་རྔ་བ་རེད་ཟེར། ཁང་ཆུང་དེ་རུ་འཕྲུལ་རྟ་ཞིག་གསོ་བྱེད་ཀྱིན་ཡོད་པ་རེད་ཟེར། ཁ་ཤས་ཀྱིས། མི་གཅིག་མ་གཏོགས་མི་འདུག་ཟེར།མི་ཚོགས་ཀྱིས་དེ་ལྟར་སྐད་ཆའི་ཁར་སྐད་ཆ་སྣོན་ཞོར་སྒོ་མོ་གཏན་པའི་ཁང་མིག་དེ་སྲུང་ནས་འདུག
ཁང་མིག་དེ་ནི་བདག་གི་གྲོགས་པོ་ཚང་ཞིག་གིས་རེད། ཉིན་འགའི་སྔོན་དུ་ཁོ་ཚང་གི་ཁང་མིག་དེ་གཞན་ལ་གླ་རྒྱུ་ཡིན་རབས་གོ་མྱོང་ཡང་།རྗེས་མར་སུ་ཞིག་གིས་གླས་པ་གོ་མ་བྱུང་།གང་ལྟར་ད་ལྟ་དོན་རྐྱེན་མི་ལེགས་པ་དེ་ཁོ་ཚང་གི་སྟེང་ལ་ལྷུང་འདུག་པ་མཐོང་བས།ང་རང་ཆེད་དུ་གྲོགས་པོའི་སར་སོང་ནས་གནས་ཚུལ་རྒྱུས་ལོན་བྱས་པ་གཤམ་ལྟར།ཟླ་བཅུ་གཅིག་པའི་ཚེས་བཅུ་དྲུག་ཉིན།ཕ་ཡུལ་སི་ཁྲོན་རྔ་བ་ནས་ཡིན་པའི་གསར་བུ་གཉིས་ཡོང་སྟེ་ཁོ་ཚང་གི་ཁང་མིག་དེ་གླས་པ་དང་།དེ་རུ་འཕྲུལ་རྟ་ཞིག་གསོ་བྱེད་རྒྱུ་ཡིན་པ་གྲོས་ཆོད་བྱུང་བ་རེད་ཟེར།ཡིནའང་།ཉིན་འགའི་སྔོན་དུ་གསར་བུ་ཆུང་ཤོས་ཏེ་ཕྱིར་ཕ་ཡུལ་དུ་ལོགས་སོང་བ་འདྲ་སྟེ་གསར་བུ་ཆེ་ཤོས་དེ་གཅིག་པུ་རེད་ལ།རྒྱུ་རྐྱེན་གང་ཡིན་མ་ཤེས་པར་དེ་རིང་ཕྱི་དྲོར་ད་དུང་ཞིག་གསོ་ཁང་དེའི་སྒོ་གཏན་འདུག་པ་མཐོང་བས།གསར་བུ་དེ་དང་འབྲེལ་ཡོད་མི་སྣ་<ཁོ་ནི་འདིར་ཁང་བ་གླས་དེ་རིང་བོར་འགོར་ཡོད་པའི་རྔ་བ་ཞིག་ཡིན>ཞིག་གིས་ཁང་མིག་དེའི་སྒོ་མོ་བཙན་གྱིས་གཏོར་དེ་བལྟས་བས་ད་གཟོད་གནས་ཚུལ་དེ་ཧ་གོ་བ་རེད་ཟེར།
འབྲེལ་ཡོད་མི་སྣས་ལན་བཏབ་པ་གཤམ་ལྟར།ཏག་ཏག་དགོང་མོ་དེར་གསར་བུ་དེ་གཅིག་པུ་ཡིན་པ་མ་ཟད།ཁོ་ཚང་ནས་ནུབ་ཇ་འཐུང་ཡོད་འདུག་ལ།ད་དུང་ཁོ་ཚོས་ཁ་བརྡ་ཡུན་རིང་གློད་པས་ཆུ་ཚོད་གསུམ་ལྷག་ཀྱི་རྗེས་སུ་མི་དེ་ཉལ་དུ་ཕྱིན་ཡོད་པ་དང་།དེ་རིང་ཕྱི་དྲོར་སླེབས་ཀྱང་ཚོང་སྒོ་འབྱེད་རྒྱུ་མི་འདུག་པས་ཁོ་རང་སེམས་འཚབ་ཏེ་བལྟ་རུ་ཕྱིན་པ་ན་ཡ་ང་བའི་གནས་ཚུལ་དེ་ཤེས་རྟོག་བྱུང་བ་རེད་ཟེར།སྐབས་དེར་ཁྱིམ་དུ་དྲི་མ་རྫོབ་པོ་ཞིག་གིས་ཡོངས་སུ་ཁྱབ་འདུག་ཟེར།ཁོས་དེ་མུར་སྨན་པར་འབྲེལ་གཏུགས་བྱས་ཏེ་བལྟ་རུ་བཅུག་སྐབས།རྩུབ་ཏུ་མི་གཞན་པ་ཞིག་ཀྱང་འགྱེལ་འདུག་པ་མཐོང་།མི་དེ་གཉིས་ཀ་གཤིབ་དེ་མལ་ཁྲིའི་སྟེང་ནས་དབུགས་ཆད་ཡོད་པ་དང་ནང་ཟྭ་དམ་པོར་བརྒྱབ་ཡོད་པར་བལྟས་ན་འཕྲོག་བཅོམ་སོགས་གང་ཡང་མིན་པ་གསལ་བོ་རེད་ཟེར།
སྐབས་དེར་ང་རང་འཇིགས་སྐྲག་ཆེས་སྐྱེ་ས་ནི་ངོས་མི་ཟིན་པས་མི་དེ་རེད། མི་དེ་སུ་ཡིན་མ་ཤེས་པས་ཡིན་ཤེས་ཆེ་སྟེ།འབྲེལ་བ་ཡོད་མེད་ཀྱི་མི་ཚོགས་མང་པོའི་འཚང་ཁའང་ཇེ་རྒོད་རེད།ཡིན་ནའང་།ད་ལྟ་ཁང་མིག་དེའི་སྒོ་མོ་སྤྱི་བདེ་མི་སྣས་སྲུང་ཟིན་པས་ཇི་ལྟར་བྱ།
རིམ་བཞིན་འབྲེལ་ཡོད་མི་སྣ་དང་འབྲེལ་ཡོད་ལས་ཁུངས་བཅས་ཀྱིས་རྩད་གཅོད་བྱུང་ལྟར་ན། ༡ མི་གཞན་པ་དེ་ནི་སི་ཁྲོན་རྔ་བའི་བུད་མེད་ཅིག་ཡིན་པ་དང་།རྔ་བ་རྫོང་གི་སྲང་མགོའི་ཁྱིམ་ཆས་བཙོང་སའི་ཚོང་ཁང་ཞིག་གི་སྦྱིན་བདག་ཡིན་པ་ཤེས་རྟོག་བྱུང་བ་མ་ཟད།ཚེས་གཅིག་ཉིན་གྱི་ཉིན་གུང་བུད་མེད་དེས་སི་ཁྲོན་རྔ་བ་ན་ཚོང་ཁང་དངོས་སུ་སྲུང་ཡོད་པ་འབྲེལ་ཡོད་མི་སྣས་ཁག་ཐག་བྱུང་། དེ་བས་ཏག་ཏག་མཚན་མོ་དེར་བུད་མེད་དེ་ས་འདིར་ཐོན་པ་ཁག་ཐག་བྱུང་། ༢ བུད་མེད་དེ་གསར་དུ་རང་ལོ་བཅུ་རུ་སོན་པའི་རང་གི་བུ་མོའི་ཕ་དང་གཉེན་འཐོར་བྱུང་བས་ད་སྐབས་རྒྱ་ལྡོམ་ཞིག་དམག་པ་བཞག་ཡོད་པ་སོགས་གསལ་བོར་ཤེས།
༣ འདས་པོ་དེ་ནི་རང་ལོ་སོ་གཅིག་ཡིན་པ་དང་།བཟའ་ཟླ་དང་བུ་ཕྲུག་གཉིས་བཅས་ཡོད་པ། ༤ མལ་ས་རུ་འདས་མོ་ལུས་རྗེན་ཡིན་པ་དང་།འདས་པོའི་ནང་ལྭ་མ་གཏོགས་གྱོན་མེད་པ། ༦འདས་མོར་ཕྲག་ཁུག་གཉིས་ཡོད་པ་དང་གཅིག་ནི་མདོག་སེར་པོ་ཅན་གྱི་མོ་ཁུག་ཅིག་དང་།གཅིག་ནི་མདོག་ནག་པོ་ཅན་གྱི་ཕོ་ཁུག་ཅིག ༧མོ་ཁུག་རུ་སྒོར་སྟོང་ཚོ་བདུན་དང་ཕོ་ཁུག་རུ་རང་གི་ནུ་མོའི་ཁྱིམ་ཐོ་བཅས་རང་གི་ཅ་ལག་འགའ་ཞིག་ཡོད་པ། ༨ཤི་རྐྱེན་མཚན་མོ་དེར་སྒུལ་ཤུགས་ཀྱི་སྒོ་མ་གཏན་པར་ཁྱིམ་ནས་བཀོད་སྤྱོད་བྱས་ཡོད་པ་དང་ལྕག་ཐབ་ཏུ་རྡོ་སོལ་འབུད་ཡོད་པ་སོགས་གཏན་ཁེལ་བྱུང་།
མཐའ་སྡོམ་མམ་རང་གི་སྐད་ཆ། མ་གཞི་གནས་ཚུལ་འདི་ནི་དངོས་བྱུང་དོན་དག་ཅིག་དང་དམིགས་བསལ་དོན་དག་ཅིག་ཡིན་པས་ཟིན་ཐུང་འདིའི་མཇུག་སྐྱོངས་དགོས་བྱུང་རེད་མོད། རྐྱེན་གང་རུང་ཞིག་གི་དབང་གིས་འདྲ་པར་སོགས་ལག་སོན་མ་བྱུང་བ་དགོངས་དག་ཞུ། དེ་མིན་ཟིན་ཐུང་འདི་ཀློག་དང་ཀློག་བཞིན་པའི་གྲོགས་པོ་གྲོགས་མོ་ཡོངས་ཀྱིས་གནས་ཚུལ་འདི་གང་སར་སྒྲོག་འདོན་དང་གནས་ཚུལ་འདི་རིགས་ཇི་ལྟར་སྔོན་འགོག་བྱེད་པ་སོགས་ཀྱི་ཤེས་བྱ་བརྒྱུད་སྤྲོད་བྱེད་པར་གལ་འགངས་ཆེ།
བརྩེ་དུང་གི་དབང་གིས།
གལ་ཏེ་ཤ་རུས་ཀྱང་གཞོམ་པར་བྱེད་པའི་སེམས་ཀྱི་བརྩེ་བ་དེ་མེད་ན
ང་རང་ལ་ལུང་བརྒལ་ནས་ཁྱོད་སར་ཡོང་དོན་མི་འདུག
གལ་ཏེ་ལུས་སེམས་གཞོམ་པར་བྱེད་པའི་དགུན་གྱི་གྲང་ངར་དེ་མེད་ན
ངས་རང་གི་ཚེ་སྲོག་ཀྱང་ལྕག་ཐབ་ལ་ཕུལ་དགོས་མི་འདུག
ལྷག་དོན
ལྷག་དོན་མནར་གཅོད་ལྟ་བུའི་མུན་པ་དེ་མེད་ན
ངས་རང་གི་རྣམ་ཤེས་དེ་སྒུལ་ཤུགས་ལ་བསྐུར་དོན་མེད་ཀ
བརྩེ་དུང་གི་དབང་གིས
ད་གཟོད་ང་རང་དཀའ་ལས་འདི་དག་ལ་དགའ་བོ་བྱུང་སོང
ལོ་ཟླའི་ཁུགས་པ་རུ་ང་ལ་རྩེད་གྲོགས་གྲངས་མེད་ཡོད
སེམས་ཀྱི་ཁུགས་སོ་རུ་ང་ལ་དྲན་རྒྱུ་ཁྱོད་ལས་མེད
རྫུན་རེད་འདོད་ན
ཁྱོད་ཀྱིས་མལ་སའི་ནང་དུ་གཟིགས་དང་
རྣམ་ཤེས་འཕུར་ཤུལ་གྱི་ང་རང་ད་དུང་གན་རྐྱལ་དུ་ཉལ་ཡོད
ཞིབ་ཏུ་ལྟོས་དང་
ང་རང་སྔར་བཞིན་ལུས་རྗེན་ཡིན
རྣམ་རྟོག་སྐྱེ་མི་དགོས
དེ་བས་ཁྱོད་ཀྱིས་ང་ལ་ཇི་དགར་སྤྱོད་རོགས
སེར་སྣ་བྱེད་མི་དགོས
ཁྱེད་ཀྱི་སླད་དུ་ངས་ཀྱང་རང་ལ་སེར་སྣ་བྱས་མྱོང་མེད
འདོད་པ་ཚིམས་རྗེས
ཁྱོད་རང་སར་མ་བབས་ཀྱང་ཆོག
གལ་ཏེ་ནམ་ལངས་བྱུང་ཡང
ཁྱོད་ཀྱིས་ང་ལ་གོན་པ་སྐོན་མི་དགོས
ཚེ་ཐོག་འདི་རུ
ཕྱི་ཐག་གླེང་ཁོམ་མ་བྱུང་ཡང
བརྩེ་དུང་གི་དབང་གིས
ང་རང་གཏན་ཏུ་ལུས་རྗེན་དུ་ཉལ་འདོད
དེ་བས་ཁྱོད་ཀྱི་རུམ་ཁ་མི་བསུམ་རོགས
༢༠༡༢ལོའི༡༢ཚེས༣ཉིན་ཕ་ཡུལ་ནས།
རྩོམ་ཁུངས། ངེད་དྲ་བ།