གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རང་རྩོམ《ལོག་རྟོག་ཕྱིར་ཟློག》དང་འབྲེལ་བའི་གཏམ་ཐུང་།

2015-02-04 11:41:43 མགོ་ལོག་རབ་ལྡན། ཀློག་གྲངས། མཆན ཡོད།

动.jpg
 ཤེས་རབ་ཀྱི་སྒྲོན་མེ་ཐོད་ལ་བཏེགས་ཤིང་། ཐོས་བརྩོན་གྱི་གཤོག་ཟུང་མཁའ་ལ་བརྐྱངས་ཏེ། གནས་དང་གནས་མིན་ལ་དཔྱོད་པའི་བགྱི་བ་དང་དུ་ལེན་ཞོར་གནའ་དེང་གི་ཤེས་བྱའི་དབྱིངས་རུམ་ནས་བདེན་དོན་གྱི་སྙིང་པོ་འཚོལ་བའི་ཀློག་པ་པོ་རྣམ་པ་ལགས།
  ད་ཐེངས། རང་གིས་སློབ་སྦྱོང་གི་ཞ་ཞོར་དུ་བྲིས་པའི་༼ལོག་རྟོག་ཕྱིར་ཟློག་༽ཅེས་པའི་ལེགས་སྐྱེས་ཆུང་ཆུང་འདི་དང་སྦྲགས་ཏེ་ཁྱེད་ཅག་དང་མཇལ་བ་འདི་བསོད་ནམས་ལེགས་པའི་ལས་སྐལ་ཞིག་དང་། ཡིད་སེམས་དགའ་བའི་དྲོད་ཐིག་ཅིག་ཏུ་བརླམས་ཡོད།
  སྤྱིར། དུས་རབས་ཉེར་གཅིག་གི་དཀྱོགས་མཚམས་འདི་རུ་བསམ་གཞིག་སྣ་མང་གི་མེ་ཏོག་བཞད། ལྟ་བ་འདྲ་མིན་གྱི་ཚ་རླབས་འཕྱུར། དྲན་ཚོར་མོད་པོ་ཡི་ཡོ་ལང་མཆེད། ཤེས་རིག་སྣ་ཚོགས་པའི་ལམ་བུ་དེད་དེ། འཚོ་གནས་ཀྱི་སྙིང་པོ། མི་ཚེ་ཡི་རིན་ཐང་། ལྟ་གྲུབ་ཀྱི་ངོ་བོ། འཇིག་རྟེན་གྱི་ཆགས་འཇིག འཁོར་འདས་ཀྱི་གཤིས་ལུགས་སོགས་ཆོས་དང་ཚན་རིག་གི་བརྗོད་དོན་གྲངས་མང་བ་ཞིག་ལ་དྲང་ལྡོག་ཅི་རིགས་ནས་དཔྱད་པ་གཏོང་མཁན་དང་མྱོང་ཚོར་འབྲི་མཁན། ལྟ་ཚུལ་གླེང་མཁན་ཤིན་ཏུ་མང་དྲགས་པས། བྲེལ་འཚུབ་ཀྱི་ལས་དོན་མང་ཞིང་། དམིགས་བསལ་གྱི་དུས་ཚོད་གང་ཡང་མ་རྙེད་པར་ཁོམ་དུས་བྲིས་ཤིང་མི་ཁོམ་དུས་བསྐྱུར་ཏེ་ད་ཆར་ཡོངས་སུ་གྲུབ་པའི་དེབ་ཆུང་འདིར་རིན་ཐང་ཆེར་མེད་ཤས་ཆེ།
  འོན་ཏེ། འདི་ནི་རས་རྐྱང་གི་དྲོད་ལ་འཁྲི་ཞིང་། ཆུ་རྐྱང་གི་བཅུད་ལ་རེ་བའི་སློབ་སྦྱོང་མཁན་དཀྱུས་མ་ཞིག་གི་ཤེས་ཡོན་གྱི་གོམ་ཁ་དལ་གྱིས་སྤོ་སྟངས་དང་། དཀའ་གནད་ཀྱི་གཏིང་མཐའ་རིམ་གྱིས་གཞལ་ཚུལ་ཙམ་ཞིག་ཡིན་པ་ལས། ཚད་མཐོ་ཞིང་། རྔམས་མཐུག་པའི་རིགས་ལམ་གྱི་རྒྱགས་ཕྱེ་གྱ་ནོམ་པ་ཞིག་དང་། བློ་སྐྱེད་ཀྱི་ནུས་པ་མཐའ་ཡས་པ་ཞིག་ཡོད་པར་གུས་པོས་ཀྱང་སེམས་ཀྱིན་མེད།
  དེ་བས། སྙིང་ཉེ་བའི་ཀློག་པ་པོ་རྣམས་ཀྱི་འདོད་བློ་ཚིམ་པའི་མཆོད་སྤྲིན་དང་། དགའ་སྤྲོ་འཕེལ་བའི་རྒྱུ་རྐྱེན་ཞིག་ཏུ་གྱུར་ཡང་རུང་ལ་མ་གྱུར་ཡང་བླ་སྟེ།
  གང་ལྟར། རང་ཉིད་དགའ་ཞིང་དད་པའི་རིག་གཞུང་གང་ཞིག་ལ་བཅངས་བའི་འདུ་ཤེས་ཀྱི་སྣང་བ་མཆེད་སྟངས་ཤིག་གམ། བསམ་གཞིག་གི་རྦ་རླབས་འཕྱོ་སྟངས་ཤིག་ཡིན་པས། འགྲིག་དང་མི་འགྲིག་པའི་ཆ་ཅི་བདོག་ན་རང་འགན་རང་གིས་ལེན་པའི་ལས་སུ་ཞུགས་པ་ལས། ཁ་གཡར་ས་དང་ཁག་འགེལ་ས་ཅི་ཡང་མེད།
དེབ་འདི་འབྲི་བའི་དམིགས་ཡུལ་ཉག་གཅིག་ནི།
  ཉེ་སྔོན་བོད་ཡུལ་ནས་ཐོན་པའི་རྩོམ་དེབ་སྐད་གྲགས་ཅུང་ཙམ་ཆེ་ཞིང་། ལྗིད་ཚད་ཀྱང་མི་དམན་པར་སོན་པ་རྣམས་ལས། རྣོ་དབལ་ཟིལ་གསུམ་གྱི་ངར་ཤུགས་ལྡན་འདུག་ཅེས་ས་འུར་རྡོ་འུར་བྱེད་བཞིན་པའི་དགག་སྒྲུབ་རྩོམ་ཡིག་སྟེ། ཚ་བ་མདའ་སྨྱུག་གིས་བྲིས་པའི་༼ལོག་རྟོགས་སྙིང་སྟོབས༽་ཞེས་པའི་དེབ་ཀྱི་བརྗོད་དོན་གྱི་ཆ་ལ། གཟུ་བོའི་མིག་གིས་བལྟས། དྲང་པོའི་བློ་ཡིས་གཞལ། ལུང་རིགས་དཔུང་དུ་བཞག་སྟེ། འཐེན་ཁྱེར་དང་ཞེན་གོག་གིས་མ་བསླད་པར་བགྲོ་གླེང་ཞིག་གི་རྣམ་པའམ། བསམ་ཚུལ་ཞིག་གི་ངོ་བོའི་སྟེང་ནས་ཁ་ཞིག་གྲག་འདོད་པ་དེ་ཡིན།
འོན་ཏེ། ཕྲན་གྱིས་ཁྱེད་ཅག་གི་མདུན་སར་བཏེགས་པའི་དེབ་ཆུང་འདི་ལ་༼ལོག་རྟོག་ཕྱིར་ཟློག་༽ཅེས་པའི་མིང་འདི་བཀོལ་ཚེ། རྣ་ལ་ཅུང་ཙམ་གཟན་ཞིང་། ཡིད་ལ་གནོད་མཁན་འགའ་རེ་ཡོད་སྲིད་ཀི་རེད། མ་ཟད་༼ལོག་རྟོགས་སྙིང་སྟོབས་༽ཀྱི་བརྒྱ་ཆའི་ལྔ་བཅུ་ཡན་ཆོད་ལ་ལན་ཕོག་ཨེ་འདུག་ཟེར་བའི་དྲི་ཚིག་བགོད་བྲོ་བ་འགའ་རེ་འཕངས་ནས་མིག་ཟུང་ཀེམ་ཀེམ་དུ་གཡོ་བཞིན། རྣ་བ་བླགས་ནས་ཉན་མཁན་དང་། རིག་པ་བསྒྲིམས་ཏེ་ཀློག་མཁན་ཆ་རེ་རྡོག་རེ་ཡོད་ཆོག་ཆོག་རེད། ཡིན་ཡང་། མི་སོ་སོའི་ཤེས་རབ་ཀྱི་ནུས་རྩལ་དང་ཤེས་རིག་གི་ཆུ་ཚད། རིན་ཐང་གི་ལྟ་བ། དཔྱོད་ཤེས་ཀྱི་བློ་མིག་སོགས་ནི་ཚད་མི་མཐུན་ཞིང་། ཚུལ་མི་གཅིག་པར་མ་ཟད། འདི་འགྲིག་དང་གན་མི་འགྲིག་ཟེར་ཚད་མཐའ་དག་རང་ཉིད་དགའ་ཞིང་མོས་པའི་ཤེས་རིག་གང་ཞིག་གི་ཟུར་འགའ་རེ་དང་། ངོས་གཞན་རེ་ལ་བཅར་ནས་མོལ་གྱིན་ཡོད་པ་ཤ་སྟག་ཡིན་པས།
  ཏན་ཏན་ཏིག་ཏིག་གི་ཚད་ཤིང་ཞིག་ཡོད་སྲིད་ཀྱང་མི་སྲིད་ལ། ཡོད་རྒྱུའི་རེ་བའང་མེད།
  གང་ལྟར། དགག་སྒྲུབ་རང་བཞིན་ཅན་གྱི་རྩོམ་ཡིག་ཅིག་ལ་མཚོན་ལ། ཟུར་མི་འདྲ་བའི་ངོས་གཉིས་ནས་ཅིས་ཀྱང་གླེང་ཡང་དགོས་ལ། གླེང་ཚུལ་ཡང་། ཁྱད་པར་འཕགས་བསྟོད་ལས། "བདག་ནི་  སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཞིང་། །གང་ཞིག་རིགས་པ་ལྡན་པའི་ཚིག ། དེ་ཉིད་སྟོན་པར་ཡོངས་སུ་འཛིན། །"ཞེས་གསུངས་པ་ནང་བཞིན་འཁྱོང་ཚེ། ད་གཟོད། མངར་སྐྱུར་གྱི་བྲོ་བ་ཏོག་ཙམ་ཞིག་ཡོད་པར་མ་ཟད། དགག་སྒྲུབ་སྙིང་སྟོབས་ཟེར་ཡ་དེ་ཡང་མདངས་གསལ་ཞིང་། མདོག་བཀྲ་བ་སྟེ། བསམ་གཞིག་སྣ་ཚོགས་ཀྱི་འོད་ཟེར་འཕྲོ་བའི་ཤེས་རབ་ཀྱི་གོང་བུ་ཟླ་མེད་ཅིག་ཏུ་འགྱུར་བར་ངེས་པས། ཕྲན་གྱིས་ཀྱང་།སྐབས་འགའ་རེ་དང་། དོན་རེ་ཟུང་གི་ཐད་དུ་བགྲོ་ཞིང་གླེང་བའི་གཏམ་ལ་ངར་ཤུགས་ཀྱི་བླ་སྲོག་ལྡན་ཞིང་།སྒལ་ཚིགས་ཀྱི་སྲ་བརྟན་མངོན་ཆེད་དུ་ཨེན་ཙམ་ཤུགས་དྲག་པའི་རྣམ་འགྱུར་འགའ་རེ་བསྟན་པ་མ་གཏོགས། གཞན་དུ་མི་བདེན་རྫུན་སྒྲིག་གི་ཞྭ་མོ་དང་། དགོས་མེད་སྙད་འཚོལ་གྱི་ཀླན་ཀ་སོགས་མགོ་བའི་ནད་བཞིན་སྤངས་བར་བྱས་ཡོད། མ་ཟད། གུས་པོའི་རེ་འདོད་ཀྱི་འཁྱེར་སོ་དང་མོས་འདུན་གྱི་འཇུག་ཡུལ་དངོས་མ་དེ། དད་པ་ལ་རྒྱ་རུ་མི་འཛིན་ཞིང་། དོགས་སེམས་ང་རྒྱལ་དུ་མི་རློམ་པར། དྲང་པོ་དྲང་བཞག གཟུར་མེད་གཡོན་མེད། བདེན་པ་བདེན་རྐྱང་གི་སྒང་ནས་ལྟ་ཚུལ་ལན་གཅིག་རྗོད་འདོད་པ་དེ་ཡིན་པས། སྐབས་དང་སྐབས་སུ་མ་ཤེས་མ་དཔྱོད་པའི་དབང་གིས་སུ་དང་གང་ལ་ཕོག་ཐུག་དང་། ཐུགས་ཡིད་སུན་པའི་རྐྱེན་དུ་གྱུར་ཚེ་ གནོང་འགྱོད་ཆེན་པོའི་སྒོ་ནས་དགོངས་སེལ་ཞུ་བ་ཡིན།
  སྤྱིར་བཏང་། མདའ་སྨྱུག་གི་ཡིག་ཆའི་ནང་དུ་ཚིག་སྐྱོན་དང་ཡིག་སྐྱོན་གྱི་ཆ་མ་མང་ན་མི་ཉུང་བའི་ཚོད་དུ་ཡོད་པ་ཁོ་བོས་འདིར་ཆེད་དུ་མ་བཤད་ཀྱང་ཀུན་ལ་གསལ་ངེས་ཡིན་པས་རེ་རེ་བཞིན་དུ་ཤིག་ཐོག་མཛུབ་མོ་ཀེར་བ་ནང་བཞིན་གཅིག་གཅིག་གཉིས་གཉིས་བྱས་ཏེ་རྗེན་པར་ལྷང་ལ་ཕུད་པའི་ལས་སུ་ཞུགས་མེད། དོན་གྱི་གནད་འཆོལ་ཞིང་། རིགས་པའི་ཚུགས་མ་ཟིན་པར་སྣང་བ་སྟེ། བཤད་ཉེས་ཟེར་ཉེས་ཁུར་བའི་གནད་སྒོ་ཆེ་ཤོས་དག་གི་ཐད་དུ། ཁོང་གི་ཚིག་རིས་ཇི་མ་ཇི་བཞིན་དུ་མ་བཅོས་མ་བསྒུལ་བར་རང་སོར་བཀོད་ཡོད། འུ་ཅག་སུ་ཡིན་ཡང་། དགག་སྒྲུབ་རྩོམ་ཡིག་འབྲི་སྐབས་ཕན་ཚུན་དབར་གྱི་ལྟ་ཚུལ་དང་། བསམ་ཚུལ་སོགས་མ་འདྲ་བའི་དབང་གིས་སོ་སོར་ཚིག་རྣོན་པོ་རེ་དང་དོན་བརྗིད་པོ་རེས་གསལ་འདེབས་མི་བྱེད་ཐབས་མེད་ཡིན་པས། ལེགས་ཉེས་ཀྱི་དབྱེ་མཚམས་རྟོགས་ཤིང་བླང་དོར་གྱི་འགལ་འཛོལ་དབེན་པའི་རྒྱ་ཆེའི་ཀློག་པ་པོ་ཡོངས་ཀྱིས་ཀྱང་། རྩོམ་ཡིག་འབྲི་མཁན་དག་གི་ཐོབ་ཀྱི་མཐོ་དམན་དང་། རིགས་ཀྱི་དབྱེ་བ་ཙམ་ལ་མི་བལྟོས་པར། བདེན་པའི་གཏམ་ཞིག་སུ་ཡིས་བརྗོད་ཡོད། དྲང་པོའི་ཐིག་ཅིག་གང་གིས་བཏབ་ཡོད་ཕྱོགས་རིས་དང་འཐེན་འཁྱེར་གྱི་ན་བུན་རྒྱང་དུ་སྤྱུགས་ཏེ་དྲང་བོ་དྲང་བཞག་གི་ལམ་ནས་གཟིགས་རྒྱུ་ཐུགས་རྗེ་ཆེ་ཞུ་བ་ཡིན།
  ཞེས་བོད་རབ་རྒྱན་ཤིང་རྟ་ལོའི་རི་དྭགས་མགོ་ཅན་གྱི་ཟླ་བའི་དཀར་ཕྱོགས་རྒྱལ་བ་གསུམ་པ་ལེགས་པ་བརྒྱད་དང་ལྡན་པའི་ཚེས་ཀྱི་ཉི་དྲོས་ཀྱི་ཆ་ཕུར་བ་བདུད་རྩི་ཐུན་མཚམས་ཀྱི་དུས་སྦྱོར་དགེ་བར། གསེར་ཐང་བླ་རུང་ལྔ་རིག་ནང་བསྟན་སློབ་གླིང་གི་གྲལ་མཐའ་འཛིན་པ་མགོ་ལོག་རབ་ལྡན་གྱིས་མཇུག་ལེགས་པར་སྦྱར་བ་དགེའོ།། །།

(མཆོད་མེའི་པར་དབང་གཞན་གྱིས་དགོལ་མི་རུང)

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།