གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདག་གི་བྱིས་པའི་ལོ་རབས།(དང་པོ)

2017-02-07 13:32:21 གཞི་རིམ་པ། ཀློག་གྲངས། མཆན ཡོད།

ང་རང་ཐོག་དང་པོར་སློབ་གྲྭར་འགྲོ་བའི་ཉིན་དེར།   ཨ་ཕ་བྱ་བ་ཞིག་གི་ཆེད་དུ་ལྷ་སར་སོང་ནས་ཕྱིར་མ་ཐོན་པའི་སྟབས་ཀྱིས།  ངེད་ཚང་གི་ཨ་མྱེས་ཀྱིས་ང་རང་སློབ་གྲྭར་བསྐྱལ་བ་ཡིན།   ནངས་མོ་དེར།  ཨ་མྱེས་སྔ་མོ་ནས་མལ་ལས་ལངས་ཏེ་ཁ་ལག་གཙང་མར་བཀྲུས་རྗེས།  "གཅེས་ཕྲུག   མྱུར་དུ་ལོངས་དང་།   འུ་གཉིས་མགོན་ཁང་ནང་དུ་ལྷ་བསང་གཏོང་དུ་འགྲོ"ཟེར།

ངེད་ཚང་གི་ཨ་མྱེས་ལགས་ནི་སྔགས་པ་གྲགས་ཅན་ཞིག་ཡིན་ཏེ།  ང་ཚོའི་སྡེ་བ་མ་ཟད།  སྡེ་བ་གཞན་དང་གཞན་གྱི་ཁྱིམ་མི་ལ་ན་ཚ་དང་ཕྱུགས་ཟོག་ལ་གོད་ཀ  མདོར་ན།  བགེགས་དང་བར་ཆད་བྱུང་ནས་ཅི་བྱ་གཏོལ་མེད་དང་ཐབས་ཟད་འུ་ཐུག་ཏུ་གྱུར་སྐབས།  ངེད་ཚང་གི་ཨ་མྱེས་གདན་འདྲེན་བྱས་ནས་རིམ་གྲོ་སྒྲུབ་པ་ཡིན།  ཁོ་ནི་དེ་ལྟར།  གཞན་གྱིས་བློ་རྩེ་གཏོད་སའི་ཆོས་པ་རྣམ་དག་ཅིག་ཡིན་པ་མ་ཟད།  ང་ལ་མཚོན་ནའང་།  བོད་ཡིག་གི་འཆད་ཉན་འབྲི་ཀློག་སློབ་པའི་དགེ་རྒན་ཐོག་མ་ཡིན་ལ།  ཁོས་བྱ་བ་གང་ལས་ཀྱང་།  ཐོག་མར་ཁ་ཏོན་འདོན་པ་དང་བསང་བཏང་ནས་གསོལ་བ་འདེབས་པ་ནི་གོམས་གཤིས་ཤིག་ཏུ་གྱུར་ཡོད། 

དུས་རྒྱུན་དུ།  ང་རང་ཨ་མྱེས་དང་འགྲོགས་ནས་དགོན་པ་དང་ལྷ་ཁང་།  མགོན་ཁང་དང་ལབ་ཙེ་བསྟོད་ས་སོགས་སུ་སོང་མྱོང་བ་དང་།  ཁོས་བསང་གཏོང་བ་དང་ཕྱག་འཚལ་བ།  བསང་མཆོད་འདོན་པ་སོགས་མང་བོ་མཐོང་ཐོས་བྱུང་ཡོད་མོད།   ཉིན་དེར།  ཁོས་དུས་རྒྱུན་དང་མི་འདྲ་བའི་བསང་མཆོད་གཞན་ཞིག་བཏོན་པ་ནི་འདི་ལྟ་སྟེ།   "མཆོད་དོ།།  མཆོད་དོ།།  དཀོན་མཆོག་གསུམ་ལ་མཆོད།།  ས་འདིའི་ས་བདག་མཆོད།།   གནས་འདིའི་གཞི་བདག་མཆོད།།  རང་གི་སྐྱེས་ལྷ་མཆོད།།"ཅེས་དང་།   "བུ་འདིའི་གདོང་གྲོགས་མཛོད།།  ཁ་ལས་རླུང་རྟ་དར།།  བསམ་དོན་ཡིད་བཞིན་འགྲུབ།།  ཚེ་རིང་ནད་མེད་ཤོག།"ཅེས་པ་སོགས།  སྔོན་ཆད་ནང་དོན་གཏན་ནས་མི་གོ་བའི་བསང་མཆོད་ཀྱི་ཚབ་ཏུ།  ངས་ཀྱང་གོ་བ་རགས་ཙམ་ལེན་ཐུབ་པའི་བསང་མཆོད་གསར་བ་ཞིག་བཏོན་སོང་།

ཕྱིར་ཡོང་བའི་ལམ་བར་དུ།   ངས་ཁོང་ལ།  ལྷ་བསང་བཏང་ནས་བསང་མཆོད་བཏོན་ན་དགོས་པ་གང་འདྲ་ཡོད་ཚུལ་གྱི་དྲི་བ་བཏོན་པ་ན།   ཁོས་བཤད་རྒྱུར།   "བྱ་བ་གང་ཞིག་སྒྲུབ་ཀྱང་།  བསམ་པ་ཡར་སེམས་དང་སྐུད་པ་ཡར་འཁེལ་བྱེད་དགོས་པ་མ་ཟད།  ཟས་མཆོད་ཁ་མ་འཕངས་ཟ་སྲོལ་མེད།  གཏམ་ཀུ་རེ་མེད་ན་བཤད་སྲོལ་མེད་ཅེས་པ་ལྟར།  ཟས་ཕུད་ལྷ་ལ་མཆོད་ན།  བསོད་ནམས་མི་ལ་འཁོར་བ་ཡིན། ཁྱོད་སློབ་གྲྭར་སོང་ན།   སློབ་སྦྱོང་གི་གྲུབ་འབྲས་བཟང་བོ་ཞིག་ལོན་པར་ང་ལ་ཡིད་ཆེས་ཡོད།"ཅེས་ཟེར། 

སྔ་དྲོའི་ཆུ་ཚོད་དགུ་བ་ཙམ་ལ།  ངེད་གཉིས་སློབ་གྲྭར་ཐོན་སོང་།   སློབ་གྲྭའི་ཁང་བ་དག་ནི་སྡེ་བའི་ནང་གི་ལྷ་ཁང་མགོན་ཁང་དེ་དག་དང་གཏན་ནས་མི་འདྲ་བར།   ཁང་བརྩེགས་མང་བོ་དམག་མི་གྲལ་ལ་བསྒྲིགས་པ་བཞིན།   མཐོ་དམའ་རིང་ཐུང་སྙོམས་པ་དང་གཙང་ལ་གྲལ་དག་པ་ཞིག་རེད།   སློབ་གྲྭའི་སྒོ་ཆེན་ཡར་ཐེམ་གྱི་འཕྲེད་བྱང་དམར་པོའི་སྟེང་དུ།  "སློབ་མ་གསར་བར་དགའ་བསུ་ཞུ།"ཞེས་པའི་བོད་ཡིག་གི་ཡིག་འབྲུ་འགའ་བྲིས་འདུག   དེ་དུས།  ངས་སློབ་གྲྭའི་ནང་ནས་སྦྱངས་འབྲས་ཅི་འདྲ་ཞིག་ལོན་ནམ།   འདི་ན།  སྐྱིད་སྡུག་མཉམ་མྱོང་དང་བློ་གཅིག་སེམས་གཅིག་གིས་འགྲོགས་ཆོག་པའི་གྲོགས་པོ་ཨེ་ཡོད་དམ་སྙམ་ནས།   སྐྲག་སྣང་དང་སེམས་ཁུར་ཞིག་ཀྱང་སྐྱེས་ཡོང་། 

སློབ་གྲྭའི་ར་སྐོར་ནང་ནི།   ད་སོ་མ་བཀྲུས་པའི་སྡེར་མ་ཆེན་པོ་ཞིག་དང་འདྲ་བར་ཧ་ཅང་གཙང་མ་ཡིན་པ་དང་།   སྟོན་རླུང་གིས་གཡོ་བའི་སྡོང་བོ་དང་མེ་ཏོག་རྣམས་ཀྱིས།   ང་ཚོ་སློབ་མ་གསར་བ་རྣམས་ལ་དགའ་བསུ་བྱེད་པ་དང་མཚུངས་ཤིང་།   ཡང་མཚམས་རེར།  ད་ཅི་ཡུལ་ནས་ཡོང་དུས།   ཨ་མའི་སེམས་འཁྲེང་ནས་ང་ལ་ལག་གཡུག་བྱེད་པའི་རྣམ་པ་དང་འདྲ།   ཁོར་ཡུག་ཀུན་ཏུ།  སློབ་མ་མང་བོ་སྐྱག་ཚང་ནང་དུ་རྡོ་འཕངས་པ་བཞིན།  འུར་འུར་ཟིང་ཟིང་གིས་རྩེད་འཇོ་སྣ་ཚོགས་རྩེ་བ་དང་།  ང་དང་ཨ་མྱེས་གཉིས་སློབ་གྲྭའི་རྩལ་སྦྱོང་ར་བ་བརྒལ་ནས།   མདུན་ཕྱོགས་ཀྱི་ཁང་བརྩེགས་གཉིས་པའི་ནང་ལ་མིང་ཐོ་འགོད་དུ་སོང་བ་ཡིན། 

མིང་ཐོ་འགོད་སའི་ཁང་བའི་སྒོ་ཁ་རུ།   "སློབ་སྟོན་ཁང་།"ཞེས་པའི་སྒོ་རྟགས་ཤིག་བཀལ་འདུག་ལ།  ནང་དུ་དགེ་རྒན་བུད་མེད་ཅིག་བསྡད་འདུག་པ་དང་མོ་ནི་རྒྱ་རིགས་ཤིག་རེད།   ཨ་མྱེས་ལགས་ཀྱིས་རྒྱ་སྐད་ཐ་ངེ་ཐུང་ངེ་རེ་མ་གཏོགས་བཤད་མི་ཤེས་པ་དང་།   ངས་ཀྱང་དེ་བཞིན།  རྒྱ་སྐད་ཙ་ག་ཙིག་གེ་མ་གཏོགས་བཤད་མི་ཤེས་པའི་རྐྱེན་གྱིས།  མོ་རང་རྒྱ་རིགས་ཤིག་ཡིན་པ་ཤེས་དུས།  ཨ་མྱེས་ཀྱིས་ང་ལ་ལྟ་ཞོར།  "ཡ་དབྱངས་བྷ།  དེ་རིང་ཡང་འུ་གཉིས་ཀྱིས་དཀའ་རྒྱུ་རེད།"ཅེས་བཤད་མོད།   མ་བསམས་ས་ནས།  མོ་རང་ཡར་ལངས་ནས།  "ཨ་ཁུ།  ཁྱེད་གཉིས་བདེ་མོ།"ཞེས་ཁམས་འདྲི་བྱས་སོང་།

མ་གཞི།  མོ་ནི་བོད་སྐད་ཐན་ཐུན་ཡང་བཤད་ཤེས་པའི་རྒྱ་རིགས་བུད་མེད་ཅིག་རེད།   མོས་ཤོག་བུ་དཀར་པོ་ཞིག་གི་སྟེང་དུ་ངའི་མིང་དང་ལོ་ཚོད།   ས་གནས།  ཕ་མ་གཉིས་ཀའི་མིང་དང་ཁ་པར་ཨང་གྲངས་བཅས་བྲིས་རྗེས།   སློབ་ཁང་དང་ཉལ་ཁང་།  ངའི་འདུག་གནས་སོགས་རེ་རེ་བཞིན་ངོ་སྤྲོད་ཡག་པོ་བྱས།  ང་རང་མོའི་གམ་དུ་བཅར་དུས།  ཁོ་མོའི་ལུས་སྟེང་གི་སྤོས་ཆུའི་དྲི་མ་ཞིམ་པོ་ཞིག་ངའི་སྣ་ལམ་དུ་ཁྱབ་ཅིང་།  དེ་ནི་ཨ་མ་དང་ཨ་ཅེ་སོགས་ཀྱིས་ངོ་གདོང་ཡག་ལས་བྱེད་སྐབས་ཀྱང་ཚོར་མ་མྱོང་བའི་དྲི་མ་ཁྱད་པར་ཅན་ཞིག་རེད། 

བལྟས་ཚོད་དུ།  དགེ་རྒན་དེ་ནི་གཤིས་ཀ་བཟང་ཞིང་ངང་རྒྱུད་རིང་བའི་བུད་མེད་ཡ་རབས་ཤིག་སྟེ།  ངས་སྔོན་ཆད་ཡུལ་ཚོ་སྲིད་གཞུང་ནས་མཐོང་བའི།   ཕར་བཤད་ལ་ལན་འདེབས་མེད་ཅིང་།  ཚུར་བཤད་ལ་ཁོང་ཁྲོ་ལངས་ཡོང་བའི་ཨ་ཅེ་སྒྲོལ་མ་དང་།  ཨ་ཁུ་དཔལ་ལྡན་ཟེར་བའི་ལས་བྱེད་པ་དེ་ཚོ་དང་གཏན་ནས་མི་འདྲ་བ་རེད།   ངས་བསམས་ན།  མི་ཡི་བཟང་ངན་ནི།  ཕོ་མོ་དང་མི་རིགས་གང་ཡིན་ལ་ཁྱད་པར་མེད་པར།  མགྲོན་པོ་འཛུམ་གྱིས་བསུ་བ་དང་།  སྐད་ཆ་དྲང་མོར་བཤད་པ་དེའང་མི་བཟང་བོ་ཞིག་གི་མཚོན་རྟགས་རེད་སྙམ།  


 རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།