དགོད་སྒྲས་ཁེངས་པའི་ཉིན་མོ། 

སློབ་གྲྭར་ཐོན་རྗེས་ཀྱི་ཆེས་ཐོག་མའི་སློབ་ཁྲིད་ནི་འཛིན་བདག་བཀྲ་ཤིས་ཀྱི་སློབ་ཁྲིད་རེད།   འཛིན་བདག་བཀྲ་ཤིས་ནི་ཕལ་ཆེར་ཕོ་ལོ་སུམ་ཅུར་བུད་མ་ཐག་གི་གསར་བུ་ཞིག་ཡིན་ཞིང་།   ཁོའི་གྲལ་དག་པའི་གོན་པ་དང་དངུལ་མདོག་འཕྲོ་བའི་ལག་འདོགས་ཆུ་ཚོད།  ལྟག་ཀར་བཤད་པའི་ནག་ཀྱུག་ཀྱུག་གི་སྐྲ་ལོ་སོགས་ནི་དངོས་གནས་མིག་ལ་མཛེས་ཤིང་།   སྒོས་སུ།  གསེར་འོད་ཀྲིག་ཀྲིག་བྱེད་པའི་ཡ་ཁའི་མདུན་སོ་གཉིས་ནི།   དགེ་རྒན་གཞན་ལ་མེད་པའི་ཁྱད་ཆོས་ཤིག་སྟེ།   འཛིན་གྲྭ་གཞན་གྱི་སློབ་མ་མང་ཤོས་ཀྱིས།  ཁོའི་མིང་ལ་དགེ་རྒན་བཀྲ་ཤིས་མི་ཟེར་བར།  ཁྱེད་ཚང་གི་དགེ་རྒན་གསེར་སོ་ཞེས་འབོད་པ་ཡིན། 

ང་ཚོ་ཐོག་དང་པོར་སློབ་ཁྲིད་འཚོགས་དུས།   བསླབ་བྱ་སོ་སོའི་དགེ་རྒན་རྣམས་ཀྱིས།   སློབ་མ་རེ་རེ་གྲལ་མགོར་བོས་ནས་རང་ཉིད་ངོ་སྤྲོད་དུ་འཇུག་ལ།  དེའི་སྐབས་སུ།   ང་ཚོའི་འཛིན་གྲྭའི་ནང་ནས་དགོད་བྲོ་བའི་གཏམ་རྒྱུད་དང་སེམས་སྐྱིད་པའི་དོན་དག་མང་བོ་བྱུང་ཡོད།  འཛིན་བདག་ཀྱིས་ཀྱང་ཐོག་མར་རང་ཉིད་ངོ་སྤྲོད་རགས་ཙམ་བྱས་རྗེས།   ང་ཚོ་སློབ་མ་རྣམས་ལ་རང་ཉིད་ཀྱི་ཕ་ཡུལ་དང་ལོ་ཚོད།  ཁྱིམ་མི་དང་དགའ་ཕྱོགས་སོགས་རེ་རེ་བཞིན་ངོ་སྤྲོད་བྱེད་དུ་བཅུག

སློབ་མ་ཚོ།  འདི་འདྲའི་མི་མང་གི་ཁྲོད་ནས་རང་ཉིད་ངོ་སྤྲོད་བྱེད་པར་ལོབས་མེད་པས།   ཁོ་ཚོ་ངོ་ཚ་བ་དང་།  སེམས་ལ་འཚབ་སྣང་དང་སྐྲག་སྣང་སྣ་ཚོགས་སྐྱེ་བཞིན་འདུག    དཔེར་ན།   སློབ་གྲོགས་རྡོ་རྗེ་སྒྲོལ་མ་གྲལ་མགོར་སོང་ནས་སྐར་མ་གསུམ་ཙམ་འགོར་ཡང་།  མོས་མཚམས་རེར་ལག་པས་མགོ་ལ་འཕྲུག་པ་དང་།   སྐབས་རེར་ལག་པས་འགྲམ་པ་སྐྱོར་བ།  ལན་རེར་མིག་གིས་ང་ཚོར་ལྟ་བ་དང་མགོ་བསྒུར་ནས་རྐང་སྣེར་ཅེར་ནས་འདུག་པ་ལས།  སྐད་ཆ་གཅིག་ཀྱང་མ་ཤོད་པ་དང་།  ཡང་དཔེར་ན།   སློབ་གྲོགས་ཉི་མ་ཚེ་རིང་གིས།  ང་ད་ལོ་ལོ་བརྒྱད་ཡིན་ཟེར་བའི་ཚབ་ཏུ་བཤད་ཉེས་ཤོར་ཏེ།  "ངའི་མིང་ལ་ཉི་མ་ཚེ་རིང་ཟེར།  ང་ད་ལོ་ལོ་བརྒྱད་བཅུ་ཡིན།"ཟེར་བས།  སློབ་གྲོགས་ཚང་མ་ཧབ་ཆ་བརྒྱབ་ཅིང་།   འཛིན་བདག་བཀྲ་ཤིས་ཀྱང་།   ཁ་ནང་གི་གསེར་སོ་མངོན་བཞིན་ལྷུག་ལྷུག་གིས་བགད་བྱུང་། 

ཡང་སློབ་གྲོགས་ལ་ལས།  "ང་རང་བཙན་མོ་ཞང་རེབ་གོང་རྫོང་གི་ཡིན།"ཟེར་ནས་གོ་རིམ་ལྡོག་སྟེ་བརྗོད་པ་དང་།   ལ་ལས།  "ངའི་ཨ་ཕའི་མིང་ལ་སྙིང་མོ་སྐྱིད་ཟེར།   ཨ་མའི་མིང་ལ་བདེ་མཆོག་རྒྱལ་ཟེར།"ཞེས་བཤད་མ་ཐག    མྱུར་དུ་ལྕེ་སྣར་བྱེད་ཞོར།   "མ་རེད་མ་རེད།   ངའི་ཨ་ཕའི་མིང་ལ་བདེ་མཆོག་རྒྱལ་ཟེར།   ཨ་མའི་མིང་ལ་སྙིང་མོ་སྐྱིད་ཟེར།"ཟེར་ནས་མྱུར་དུ་དག་བཅོས་བྱེད་པ་ཡིན། 

ཉིན་དེའི་དགོད་སྒྲ་དང་སྤྲོ་སྣང་གི་ཁྲོད་ནས།   ངས་ཉིན་སྔོན་མར་མིང་ཐོ་འགོད་སྐབས།   སེམས་ཚེགས་དང་སེམས་ཁུར་བྱས་པ་དེ་དག་གར་སོང་ཆ་མེད་དང་ཤུལ་མེད་རྗེས་མེད་དུ་གྱུར་ཅིང་།   སློབ་གྲྭ་ནི་གྲོགས་པོ་མང་ཞིང་དགོད་སྒྲ་མོད་སའི་ཚོགས་ར་སྐྱིད་པོ་ཞིག་དང་།  རྩེད་མོ་སྣ་ཚོགས་རྩེ་ཆོག་སའི་གནས་ཚང་ཡག་པོ་ཞིག་རེད་འདོད་བྱུང་། 

ང་ཚོས་རེ་རེ་བཞིན་ངོ་སྤྲོད་བྱས་ཚར་རྗེས།   འཛིན་བདག་བཀྲ་ཤིས་ཀྱིས་སློབ་མ་རྣམས་ཀྱི་འདུག་ས་དང་འདུག་རོགས་གཏན་ཁེལ་བྱས་པ་དང་།  དེ་ནས་སློབ་གྲྭའི་སྒྲིག་ལམ་དང་དུས་ཚོད་བཀོད་སྒྲིག་གི་རིམ་པ་སོགས་གསལ་བོར་བཤད་རྗེས།   གདོང་ལ་གཟབ་ནན་གྱི་ཉམས་ཤིག་བསྡུས་ཏེ།  "དེ་རིང་ནས་བཟུང་།   ང་ཚོ་ཁྱིམ་ཚང་གཅིག་གི་བཟའ་མི་ལྟ་བུ་ཡིན།   བཟའ་མི་ཕན་ཚུན་དབར་དུ་རོགས་རམ་དང་རྒྱབ་སྐྱོར་བྱེད་པ་མ་གཏོགས།  ཕན་ཚུན་ལ་བརྙས་བཅོས་དང་དམའ་འབེབས་སོགས་གཏན་ནས་བྱེད་མི་རུང་།   ང་ནི་ཁྱོད་ཚོའི་བཟའ་དཔོན་ལྟ་བུ་ཡིན།   དོན་དག་ཅི་ཞིག་ཡོད་ཀྱང་ང་རང་བཙལ་ནས་རྒྱུ་མཚན་བཤད་ཆོག"ཅེས་བཤད་བྱུང་། 

ཁོ་རང་ཅོག་ཙེའི་གྲལ་ཤར་གྱི་བར་ནས་ཡར་འགྲོ་མར་འགྲོ་བྱེད་པ་དང་།   མཚམས་རེར།  གཡས་ཕྱོགས་ཀྱི་སློབ་གྲོགས་ག་གེ་མོའི་དཔེ་ཁུག་དང་ལྕགས་སྨྱུག་ལ་རེག་རེག་བྱས་ནས།  "ཁྱོད་ཀྱི་དངོས་པོ་འདི་དག་ཅི་འདྲའི་ཡག་པ་ལ།   སུ་ཡིས་ཉོས་པ་ཡིན།"ཞེས་འདྲི་བ་དང་།  ཡང་སྐབས་རེར།  གཡོན་ཕྱོགས་ཀྱི་སློབ་གྲོགས་ཤིག་གི་རྐང་སྣམ་དང་ཚི་ལེན་ལ་བལྟས་ནས།   "ཁྱོད་ཀྱི་ལྭ་བ་འདི་ཅི་འདྲའི་གཙང་མ་ཞིག་རེད།   ལྭ་བ་འདི་ཁྱོད་ཀྱི་ཨ་མས་བཀྲུས་པ་ཡིན་ནམ།"ཞེས་པར།  སློབ་གྲོགས་ཚོས་ཡིན་པའི་བརྡ་ལ་མགོ་བོ་ནང་དུ་ལྡེམ་ཚེ།  ཁོས་ཡང་བསྐྱར།  "ངོ་མ་ཡག་པོ་རེད།  འོན་ཀྱང་ངས་བལྟས་ན།  ད་ནས་བཟུང་།  རང་གི་ལྭ་བ་རང་གིས་བཀྲུས་ན་འདི་ལས་ཀྱང་ཡག་པོ་དང་གཙང་མ་ཡིན་རྒྱུ་རེད།"ཟེར། 

གང་ལྟར།  ཉིན་དེ་ནི་ཧ་ཅང་སྤྲོ་སྣང་ལྡན་པ་ཞིག་ཡིན།  ཕྱི་དྲོར་ཡུལ་ལ་ཡོང་ནས།  ངས་ངེད་ཚང་གི་བཟའ་མི་རྣམས་ལ་སློབ་གྲྭའི་ནང་གི་མཐོང་ཐོས་མྱོང་གསུམ་བཤད་སྐབས།   ཁོ་ཚོ་བགད་བགད་ནས་མིག་ཆུ་བཞུར་བ་དང་།  ཕོ་བསྐྱོར་ནས་འགྲེ་ལོག་རྒྱག་ཞོར།  "དབྱངས་བྷ་ལེ་ལེ།  ད་མ་བཤད།  ང་བགད་བགད་ནས་རྒྱུ་མ་ན་ཡིན་འདུག  དབྱངས་བྷ་ལེ་ལེ།  ད་མ་བཤད།   ...    ...."ཟེར་ནས་ཞུ་བ་བྱས་སོང་།  

                             ཟས་ཕོར། 

སློབ་གྲྭར་སོང་ནས་ཡུན་རིང་མ་འགོར་བའི་ཉིན་ཞིག་ལ།   ངས་ཨ་མ་ལགས་ལ།   སང་ཉིན་ང་རང་སློབ་གྲྭ་ནས་བསྡད་དེ།   ཉིན་གུང་སློབ་གྲོགས་ཚོ་དང་མཉམ་དུ་ཟ་མ་ཟ་འདོད་པའི་རེ་བ་ཞུས་པར།   ཨ་མས་ཁས་ལེན་བྱས་པ་མ་ཟད།   ཟ་མ་ཟ་སྤྱད་ཀྱི་ཟས་ཕོར་དང་ཐུར་མ་གྲ་སྒྲིག་བྱས་ནས་ངའི་དཔེ་ཁུག་ནང་ལ་བཞག   ང་སློབ་གྲོགས་ཚོ་དང་མཉམ་དུ་རྩེད་མོ་རྩེ་བ་དང་ཁ་བརྡ་བྱེད་པ།   གནའ་གཏམ་བཤད་ནས་འགྲན་སྡུར་བྱེད་རྒྱུར་ཧ་ཅང་དགའ་བས།   དགོང་མོ་དེར།  སང་ཉིན་སློབ་གྲོགས་ཚོ་དང་ལྷན་དུ།   སློབ་གྲྭའི་ཟ་མའང་ཟོས་ཆོག་སྙམ་ནས་སེམས་པ་དགའ་སྤྲོ་ཡིས་ཁེངས། 

མཚན་མོ་དེར།  ངས་རྨི་ལམ་ཞིག་རྨིས་བྱུང་།  རྨི་ལམ་ནང་དུ།  ང་རང་སློབ་གྲྭར་འགྲོ་དུས་བྱ་རྒྱལ་རྒོད་པོ་བཞིན་དུ་བར་སྣང་ནས་འཕུར་ཏེ་འགྲོ་བ་དང་།   སློབ་གྲྭའི་སྒོ་ཆེན་དང་གྱང་ར་སོགས་ལ་ཐོགས་རྡུགས་མེད་པར།  སྐབས་རེར་འཕུར་ནས་འགྲོ་བ་དང་།  མཚམས་རེར་འཛུལ་ནས་སོང་ཆོག་པ་ཞིག་རེད།   མ་ཟད།  ངའི་སློབ་གྲོགས་སྐོར་ཞིག་གིས་ཀྱང་།  དཔེ་ཁུག་དང་ལྭ་བ་གང་རུང་གཤོག་པ་བྱས་ནས་མཁའ་ལ་འབའ་འབུ་འཕུར་འཕུར་དང་།  ཆུ་ལ་ཉ་མོ་རྐྱལ་རྐྱལ་བྱེད་ཐུབ་པ་རེད།  ཉིན་གུང་།  རང་རང་གི་ཟས་ཕོར་བཟུང་ནས་སྡོང་རྒན་ཆེན་པོ་ཞིག་གི་སྟེང་ཏུ་བབས་ཏེ་ཟ་མ་ཟ་སྐབས།  སློབ་གྲོགས་ཤིག་གི་ཇ་ཕོར་ལག་ནས་ཤོར་ཏེ་ངའི་རྐང་བ་ཆུ་ཁོལ་གྱིས་བསྲེགས་པ་དང་།  ངས་ཁ་ནས།  "ཨ་ཚ་ཚ།  ཨ་ཚ་ཚ།"ཤོར་བ་དང་མཉམ་དུ་གཉིད་ལས་སད།  དེ་ནི།  ནམ་གུང་གི་རྨི་ལམ་སྟོང་བ་ཡིན།  གཅིན་རྡོ་ཐོག་ཏུ་བཏང་ན་བརླ་སྒང་དུ་བཞུར་ཟེར་བ་ལྟར།  ཆ་འཇོག་མེད་པའི་རྨི་ལམ་ཞིག་རེད་མོད།  དོན་དངོས་སུ།  གཉིད་ལས་སད་དུས་ངའི་ལྒང་བུ་གཅིན་གྱིས་གང་ནས་ཤོར་ལ་ཁད་བྱེད་ཀྱིན་འདུག 

ཕྱི་ཉིན་སྔ་དྲོའི་སློབ་ཐུན་བཞི་བ་གྲོལ་རྗེས།   སློབ་གྲོགས་ཚོས་རང་རང་གི་ཟས་ཕོར་དང་ཐུར་མ་བཟུང་ནས་ཇ་ཁང་གི་སྒོ་ཁར་བཤར།   ངས་ཀྱང་།   དེ་རིང་སློབ་གྲྭའི་ཟ་མ་ཟོས་ན་ཅི་འདྲའི་སྐྱིད་པ་ལ་ཨང་སྙམ་ཞོར།  དཔེ་ཁུག་ནང་གི་ཟས་ཕོར་ལེན་རྩིས་བྱེད་སྐབས།  ཨ་ཙི།  དཔེ་ཁུག་ཡར་སློག་མར་སློག་ཅི་ལྟར་བྱས་ཀྱང་ཟས་ཕོར་མི་འདུག   ཟས་ཕོར་གྱི་གྲིབ་མ་ཙམ་ཡང་མི་འདུག   ངས་ལམ་བར་ནས་བོར་སོང་བ་ཡིན་ནམ།  ཡང་ན་་་  ་་་།  

ཟས་ཕོར་གང་སོང་ཆ་མེད་དུ་གྱུར་བས།   ང་ཇ་ཁང་གི་སྒོ་འགྲམ་ནས་ལངས་ཏེ་སློབ་གྲོགས་ཚོས་ཟ་མ་འཛེད་པའི་རྣམ་པར་བལྟས་ནས་བསྡད།  ཁོ་ཚོའི་ཟས་ཕོར་ནང་གི་ཁ་རླངས་ཐོལ་ཐོལ་བྱེད་པའི་ཟ་མ་དེ་ཅི་འདྲའི་གཙང་བ་ལ་ཨང་།  གལ་སྲིད།  ང་ལ་ཟས་ཕོར་ཡོད་ཚེ།  ངས་ཀྱང་ཁོ་ཚོ་དང་མཉམ་དུ་ཟ་མ་ཟོས་ན་ཅི་འདྲ་ཞིམ་ཨང་སྙམ་མོད།   ང་ལ་བྱ་ཐབས་ཟད་དེ།  ཇ་ཁང་གི་སྒོ་ཁ་ནས་བཀྲེས་ལྟོགས་ཀྱིས་མནར་བའི་ཞི་ལ་ཞིག་དང་འདྲ་བར་ཡུན་རིང་དུ་མི་འདུག་ཐབས་མེད་བྱུང་། 

བྱ་ཐབས་ཟད་དེ།  ང་རང་ཕྱིར་སློབ་ཁང་དུ་ཡོང་ནས་ལས་བྱ་འབྲི་འགོ་བརྩམས།  ངས་གཟབ་ནན་གྱིས་ལས་བྱ་འབྲི་འདོད་ཀྱང་།   མིག་ལམ་དུ།  ད་སོ་མ་མཐོང་བའི་ཇ་ཁང་སྒོ་ཁར་ཡོད་པའི་སློབ་མ་རྣམས་དང་།  སློབ་མ་དེ་དག་གི་ཟས་ཕོར།  ཟས་ཕོར་ནང་གི་ཟ་མ་དེ་དག་གི་སྣང་བརྙན་ཤར་ཞིང་།  ཁ་ཆུ་བཞུར་ནས་འབྲི་དེབ་ཀྱི་ཐིག་ཕྲེང་རེ་གཉིས་ཀྱང་རློན་པ་བྱས།  མཚམས་ཤིག་ལ།  ངའི་མིག་ལམ་དུ་རླངས་པ་ཐོལ་ཐོལ་བྱེད་པའི་ཟ་མ་ཞིག་དངོས་སུ་ཤར་བྱུང་།  "དབྱངས་བྷ།  འདིར་ཤོག་དང་།  འུ་གཉིས་ཀྱིས་མཉམ་དུ་ཟ།"  འདི་ནི་ངེད་འཛིན་གྲྭའི་སློབ་གྲོགས་སྙིང་ལྕགས་ཚེ་རིང་གི་སྐད་ཆ་རེད།

ཁོས་དེ་རིང་ངས་ཟས་ཕོར་བོར་བ་དང་།  ཟས་ཕོར་མེད་ན་ཟ་མ་ཟ་མི་ཐུབ་པའི་རྒྱུ་མཚན་ཤེས་ཏེ།   བསམ་གཟས་ནས་སློབ་ཁང་དུ་ཡོང་ནས་ང་དང་ལྷན་དུ་སྐྱིད་སྡུག་མཉམ་མྱོང་གིས་ཟ་མ་ཟ་འདོད་པ་རེད།   སློབ་གྲོགས་སྙིང་ལྕགས་ཚེ་རིང་ནི་གྲལ་ཤར་གཡོན་མའི་གྲལ་མགོར་བསྡད་ཡོད་ལ།  ཁོ་ནི་མིག་གཅིག་གིས་གཏན་ནས་མི་རིག་པའི་དབང་བོ་སྐྱོན་ཅན་ཞིག་ཡིན།  ཁོ་རང་དེ་ལྟར་དབང་བོ་སྐྱོན་ཅན་ཞིག་ཡིན་ནའང་།   ཁོ་ལ་ཡོད་པ་ནི།  སློབ་གྲོགས་གཞན་ལ་མེད་པའི་བསམ་པ་དཀར་པོ་ཞིག་དང་གཤིས་ཀ་བཟང་བོ་ཞིག་ཡོད་པ་དེ་ཡིན།  སྒོས་སུ་ཉིན་དེར།  ཁོས་ང་དང་མཉམ་དུ།   སྡུག་དུས་ཀྱི་འདུག་རོགས་དང་ལྟོགས་དུས་ཀྱི་ཟ་རོགས་བྱས་པས།  ང་ཁོ་ལ་བརྩེ་འདང་ཟབ་མོ་ཆགས་པ་དང་།  ངའི་སེམས་སུ་རང་གི་ཨ་ཕར་བཤད་དེ།  ནམ་ཞིག་ལ་སྒོར་མོ་ཡོད་དུས་ཁོའི་མིག་ལ་སྨན་བཅོས་བྱེད་དགོས་སྙམ། 

ངེད་གཉིས་ཀྱིས་སློབ་ཁང་ནང་དུ།  ཟ་མ་ཟ་ཞོར་དང་ལབ་གླེང་བྱེད་ཞོར་སྡོད་སྐབས།   འཛིན་བདག་བཀྲ་ཤིས་ཀྱིས།  ངའི་ཟས་ཕོར་ནང་དུ་རླངས་པ་ཐོལ་ལོ་ལོ་བྱེད་པའི་ཟ་མ་ཁྱེར་ནས་ཐོན་བྱུང་།   ང་རང་ཡ་མཚར་ནས།   ཟས་ཕོར་འཛིན་བདག་གིས་ཁྱེར་བའི་རྒྱུ་མཚན་འདྲི་རྩིས་བྱེད་སྐབས།  ཁོང་གིས།  "ངས་ཁྱོད་ཀྱི་ཟས་ཕོར་བརྐུས་པ་མིན།   ངས་སློབ་གྲོགས་སུ་ཞིག་དཀའ་ཁག་ལ་ཕྲད་སྐབས།  སུ་ཞིག་གིས་རོགས་རམ་བྱེད་མིན་ལ་བལྟ་འདོད་པ་ཡིན།"ཞེས་དང་།   ངའི་རྩིབ་ཀྱི་སློབ་གྲོགས་སྙིང་ལྕགས་ལ་བལྟས་ནས།  "ཕ་བཟང་གི་བུ་དང་།  གཡག་བཟང་གི་ཀོ་ཟེར་བ་ནི་ངོ་མ་ཁྱོད་ལྟ་བུ་ཞིག་རེད།  དངོས་གནས་ངར་བ་རེད།   ཡ།  ད་ཟ་མ་འཁྱག་གི་མ་འཇུག   ཟོ་ཟོ།"ཟེར་ཞོར།  རླངས་པ་ཐོལ་ཐོལ་བྱེད་པའི་ཟས་ཕོར་དེ་ངེད་གཉིས་ཀྱི་མདུན་ཅོག་སྟེང་ལ་བཞག་སོང་། 

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།