གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདག་གི་བྱིས་པའི་ལོ་རབས།(བཞི་བ)

2017-02-24 12:31:04 གཞི་རིམ་པ། ཀློག་གྲངས། མཆན ཡོད།

              

                   ཁ་བ་བབས་རྗེས། 

དགུན་ཁར་ཁ་བ་བབས་རྗེས།   སློབ་གྲྭའི་ཁོར་ཡུག་ཀུན་ཏུ་སྲིད་ཞེང་ཤིན་ཏུ་ཆེ་བའི་ཁ་བཏགས་དཀར་པོ་ཞིག་བཏང་བ་འདྲ་ལ།  ཡང་ན།  སྒལ་གཞུང་ཕྲག་ཞེང་ཆེ་བའི་མི་སྟོབས་ལྡན་ཞིག་གིས།   ཚི་ལེན་དཀར་པོ་ཞིག་གོན་ནས་གན་རྐྱལ་དུ་ཉལ་བ་དང་མཚུངས།  གལ་ཏེ།  སློབ་ཁྲིད་འཚོགས་པའི་སྐབས་སུ་ཁ་བ་བབས་པ་དང་།   སློབ་མ་གཅིག་ལ་གཅིན་པ་ཡོད་པས་ཁོ་རང་སྤྱོད་ཁང་དུ་བརྒྱུགས་སོང་བའི་རྗེས་སུ་བལྟས་ཚེ།  ཁོའི་རྐང་རྗེས་ནི་ཚི་ལེན་དཀར་པོའི་སྟེང་གི་སྒྲོག་གུ་རེ་རེ་དང་མཚུངས་པ་ཡིན།

སློབ་ཁྲིད་དང་བོའི་སྐབས་སུ་ཁ་བ་བབས་ཚེ།   སློབ་ཁྲིད་གཉིས་པ་དང་གསུམ་པའི་སྐབས་སུ་ང་ཚོ་སློབ་མ་རྣམས་ཀྱིས་ནན་ཏན་གྱིས་སློབ་ཁྲིད་ལ་མི་ཉན་པར།  སྒེའུ་ཁུང་ཕྱི་རོལ་དུ་ཡང་ཡང་ལྟ་བ་དང་།   སློབ་གྲོགས་འགའ་རེས།   "དགེ་རྒན།  ང་ལ་གཅིན་པ་ཡོད།"ཅེས་དང་།  "དགེ་རྒན།  ང་ལ་སྐྱག་པ་གཏོང་རྒྱུ་ཡོད།"ཟེར་ནས།  དོན་དངོས་སུ།   གཅིན་སྐྱག་མེད་ཀྱང་ཕོ་བ་བསྐྱོར་ནས་ཟུག་གཟེར་རྒྱག་ཁུལ་གྱིས་སྤྱོད་ཁང་དུ་རྒྱུག་པ་ཡིན། 

སློབ་ཁྲིད་གྲོལ་མ་ཐག   ང་ཚོ་ཞི་ལི་ཚོ།  བེའུ་རྡང་ལས་ཤོར་བ་དང་གླ་བ་རྙི་ལས་ཐར་བ་བཞིན།  འཚང་ཁ་བརྒྱབ་ནས་སློབ་གྲྭའི་ར་སྐོར་དུ་ཞོགས་ཤིང་།  ཁ་བའི་ཁྲོད་དུ་རི་མོ་སྣ་ཚོགས་འབྲི་བ་དང་འཇུ་རེས་རྒྱག་པ།  མི་གཟུགས་ལས་པ་སོགས་བྱེད་ཅིང་།  སློབ་གྲོགས་ཞི་མོ་ཚོས།  ཁ་བ་འབབ་ཚུལ་ལ་བལྟས་ཏེ་གར་གྱི་སྟངས་སྟབས་སློབ་པ་དང་།  ཁ་བའི་ཆངས་བུ་རེ་མགོ་ལ་བཞག་ནས་མེ་ཏོག་ཡིན་ཁུལ་བྱེད། 

ང་ཚོ་ཞི་ལི་ཚོ་ཆེས་དགའ་བ་ནི།   ཁ་བ་བབས་རྗེས་ཀྱི་ནངས་དགོང་ལ་ཁ་བ་རྡོག་རྡོག་བཟོས་ནས་རྒྱག་རེས་བྱེད་པ་དང་།  ཁ་བ་འཁྱག་ནས་ཆབ་རོམ་དུ་གྱུར་རྗེས་དར་ཤུད་སྟེག་པ་དེ་ཡིན།  དར་ཤུད་སྟེག་སྐབས།  ཨོང་ཤའི་འོག་ལ་ཤིང་ལེབ་དང་ལྕགས་ལེབ།  རྡོ་ལེབ་སོགས་ལེབ་ལེབ་དང་ངོས་འཇམ་ཡིན་པའི་དངོས་པོ་བཙལ་ཡོང་ནས་ཕན་ཚུན་ལ་འགྲན་སྡུར་བྱེད་པ་དང་།   སྒོས་སུ།   སློབ་གྲོགས་ལ་ལས་ཟས་ཕོར་ཁ་སྦུབས་ཀྱིས་བཞག་སྟེ་དར་ཤུད་སྟེག་ན་ཧ་ཅང་མགྱོགས།  

དར་ཤུད་སྟེག་སྐབས།   སློབ་ཁྲིད་འཚོགས་པའི་ཅོང་བརྡ་གྲག་པ་དེ་ནི་ཧ་ཅང་ཉན་མི་འདོད་པ་ཞིག་སྟེ།  དེས་ང་ཚོར་དར་ཤུད་སྟེག་ནས་རྩེད་མོ་རྩེ་བར་བར་ཆད་བཟོས་པ་ཡིན།  ཅོང་བརྡ་གྲག་མ་ཐག   ང་ཚོ་བྱ་བརྒྱ་ཚང་ལ་འགྲོ་བ་དང་ལུག་ཁྱུ་ལྷས་ལ་ཞོགས་པ་བཞིན་སློབ་ཁང་དུ་འགྲོ་བ་དང་།  སློབ་ཁང་དུ་ཐོན་དུས།  དགེ་རྒན་ལ་ལས་སློབ་ཁྲིད་ཀྱི་རྗེས་སུ་ལུས་པ་རྒྱུ་མཚན་དུ་དྲངས་ནས།  གཤེ་གཤེ་དང་སྡིགས་དམོད་གཏོང་བ་དང་།  ཡང་ན་གཅར་རྡུང་ཅུང་ཙམ་ཡང་བྱེད་པ་ཡིན། 

འོན་ཀྱང་།   འཛིན་བདག་བཀྲ་ཤིས་ནི་བྱིས་པ་ཞིག་དང་འདྲ་བར་ང་ཚོ་དང་ལྷན་དུ་ཁངས་རྩེ་བྱེད་པར་དགའ་ཞིང་།  ཁ་བ་བབས་ནས་སློབ་ཁྲིད་གྲོལ་ལ་ཉེ་སྐབས།  སློབ་གྲྭའི་ར་སྐོར་དུ་ཐོག་དང་པོ་འཐོན་མཁན་ནི་ཁོ་རང་ཡིན།  ང་ཚོ་སྐོར་ཁག་བགོས་ནས་ཁ་བས་རྒྱག་རེས་བྱེད་དུས།  ང་ཚོས་ཁོའི་རྒྱབ་གཞུང་དང་རྐང་ལག   ཕོ་བ་དང་ངོ་དགོང་སོགས་ལ་ཁ་བས་ཇི་ལྟར་བརྒྱབ་ཀྱང་།  ཁོ་རང་ཁོང་ཁྲོ་གཏན་ནས་མི་ལང་བ་མ་ཟད།  མཚམས་ལ་རེར་ཁ་བའི་ཁྲོད་དུ་ལོག་ནས་ཤི་ཁུལ་བྱེད་པ་དང་།  ང་ཚོས་ཁོའི་བརླ་ངོ་དང་ཨོང་ཤའི་སྟེང་ལ་ཤ་གཅུ་བརྒྱབ་ཚེ།  ད་གཟོད།  ཁོ་བགད་ནས་གསེར་འོད་ཀྲིག་ཀྲིག་བྱེད་པའི་ཁ་ནང་གི་གསེར་སོ་དེ་མངོན་སྲིད།

ཁོས་དགེ་རྒན་གཞན་པ་དང་ཕ་མ་རྣམས་དང་མི་འདྲ་བར།  "རྩེས་རྩེས།  སྐྱིད་པོ་ཞིག་རྩེས།   རྩེད་མོ་རྩེ་སྐབས་སྤྲོ་སྣང་གིས་རྩེ་ཤེས་པ་དེའང་སློབ་ཁྲིད་ཅིག་ཡིན།  ཡ།  ང་ཨ་མེ་རུ་ཀའི་ཁྱད་འཕགས་དམག་མི་ཞིག་ཡིན་ཁུལ་བྱེད།  ཁྱོད་ཚོ་ཀྲུང་གོ་བའི་དམག་མི་ཆོས།  ད་དམག་འཁྲུག་གི་འགོ་རྩོམ་རྒྱུ་ཡིན།"ཟེར་བ་དང་ལྷན་དུ་ཁ་བས་རྒྱག་རེས་བྱེད་པ་ཡིན།

དེ་ལྟར།  ང་ཚོ་དགེ་སློབ་སྐོར་ཞིག་"འཐབ་འཛིང་གི་ཁྲོད་དུ་ཤི་རྨས་འཚབ་ཆེན་བྱུང་"སྐབས།  སློབ་གྲོགས་ཁག་གཅིག་གིས།  "རྨས་མ་རྣམས་"རྒྱབ་ཏུ་ཁུར་ནས་"སྨན་ཁང་"དུ་སྐྱེལ་བ་དང་།  ངེད་ཚང་གི་འཛིན་གཙོ་སྟེ།  "སྨན་པ་"གསང་བདག་གིས།  "དམག་མི་རྨས་མ་"རྣམས་ཀྱི་སྟོད་ལྭ་ཡར་ལ་བརྫེས་ནས་སྙིང་གི་ལྡིང་མཚམས་བརྟག་པ་དང་།  དོར་མ་མར་ལ་བཤུས་ཏེ།  ཨོང་ཤའི་སྟེང་ལ་མཛུབ་མོས་"གནམ་ཁབ་"རྒྱག་པ་ཡིན། 

ང་ཚོ་ཁ་བའི་ཁྲོད་དུ་འཇུ་རེས་རྒྱག་རེས་བྱེད་པ་དང་།   ཁ་བ་ཞུ་རྗེས་ཀྱི་འདམ་བག་ནང་དུ་རྩེད་མོ་བརྩེས་ནས་ལྭ་བ་ཚང་མ་འབག་བཙོག་བཟོས་ནའང་།  འཛིན་བདག་བཀྲ་ཤིས་ཀྱིས་གཤེ་གཤེ་གང་ཡང་མི་གཏོང་བར།  "ངས་བལྟས་ན།  ལྭ་བ་འབག་རྩོག་བྱས་པར་སྐྱོན་ཆེན་པོ་མི་འདུག  རྩེད་མོ་བརྩེས་ན་ལྭ་བ་ལོས་བརླག   གལ་ཆེ་བ་ནི།  ཁྱོད་ཚོས་ནམ་རྒྱུན།  ཕ་མ་རྣམས་ལ་ལྭ་བ་སོ་མ་ཉོ་བའི་རེ་བ་མི་འདོན་པར།  འབག་རྩོག་གི་ལྭ་བ་རང་གིས་བཀྲུས་ནས་གཙང་མ་བྱེད་དགོས།"ཟེར།  

                     ཁྱིམ་བདག་ཚོགས་འདུ།

དེ་ལྟར།  འཛིན་བདག་བཀྲ་ཤིས་ང་ཚོ་དང་མཉམ་དུ་རྩེད་མོ་རྩེ་བར་དགའ་བ་མ་ཟད།   བར་རྒྱུགས་དང་མཇུག་རྒྱུགས།  རྒྱུགས་ཆུང་སོགས་གང་བླངས་ཀྱང་།  ཁོས་སྐར་འབྲས་ལ་བལྟས་ནས།  རྒྱུགས་འབྲས་ཞན་པའི་སློབ་གྲོགས་ཁ་ཤས་གཞུང་ལས་ཁང་ངམ།  ཁོའི་ཉལ་ཁང་དུ་བོས་ནས་ཁ་བརྡ་བྱེད་པ་མ་གཏོགས།  ཁྱིམ་བདག་ལ་ཁ་པར་བཏང་ནས་སྡུག་ལ་མི་གཏོད་ལ།  སྐར་འབྲས་བཟང་བའི་སློབ་མ་ཚོར་དམིགས་ཀྱིས་སློབ་གསོ་བཏང་ནས།  སྦྱངས་འབྲས་ཞན་ཤས་ཀྱི་སློབ་མ་རྣམས་ལ་རོགས་རམ་བྱེད་དགོས་པ་བཤད་མོད།  སྐར་འབྲས་བཟང་བའི་སློབ་མ་ཁ་ཤས་ཀྱིས་སྔར་བཞིན།  སློབ་མ་ཅིག་ཤོས་དག་ལ་མཚང་འབྲུ་བྱེད་པ་ཡིན། 

ཁྱིམ་བདག་ཚོགས་འདུ་འཚོགས་སྐབས་ཀྱང་།   འཛིན་བདག་གིས་ཁྱིམ་བདག་རྣམས་ལ།  རྒྱུགས་གཞིའི་དཀའ་སླ་དང་།  སློབ་མ་རེ་རེའི་རྒྱུན་ལྡན་གྱི་སློབ་སྦྱོང་བྱེད་སྟངས།  ཀུན་སྤྱོད་དང་སྒྲིག་ལམ་སོགས་ཀྱི་ཐད་ནས་ངོ་སྤྲོད་བྱེད་པ་ལས།  སློབ་མ་རེ་རེའི་སྦྱངས་འབྲས་ལ་ཨང་རིམ་བཀར་ཏེ་སྐར་འབྲས་རེའུ་མིག་གྱང་ངོར་སྦྱོར་བ་དང་།  ཁྱིམ་བདག་ཚང་མའི་མདུན་དུ།  སློབ་མ་རེ་རེའི་གདོང་ལ་མཛུབ་མོ་བཙུགས་ནས།   སློབ་མ་ག་གེ་མོའི་སྦྱངས་འབྲས་ཞན་ཚུལ་རྩོག་ཚུལ་གྱི་གཏམ་ཅི་ཡང་མི་ལབ་པ་ཡིན། 

ཡང་ཁོང་གིས།  རྒྱུགས་འབྲས་ལ་ནན་ཏན་མི་བྱེད་པ་དང་སྐར་འབྲས་ཨང་རིམ་གཏན་ནས་མི་འགེར་བའང་མིན་ཏེ།   སྐར་འབྲས་ཨང་རིམ་བཀར་ནས་རིམ་པ་འབྱེད་པ་དང་།   བཟང་བོ་ལ་བསྟོད་པ་དང་ཞན་པ་ལ་སྐུལ་ལྕག   ཡར་ཐོན་ཅན་ལ་རྟིང་སྐུལ་གྱི་བྱ་དགའ་སྟེར་བ་ནི་ང་ཚོ་འཛིན་གྲྭའི་ནང་ཁུལ་ནས་བསྒྲུབས་པ་ལས།  ཁྱིམ་བདག་དང་སློབ་གྲྭའི་དགེ་སློབ་ཡོངས་རྫོགས་ཀྱི་སྔུན་ནས་མི་སྒྲོག་པ་ཡིན། 

རྗེས་སུ།  ང་ལག་ཆགས་ནས་ཨ་མའི་བཤད་པ་ལྟར་ན།   འཛིན་བདག་གིས་ཁྱིམ་བདག་ལ་འབྲེལ་བ་མ་བྱས་པ་དང་ཁ་པར་མ་བཏང་བའང་གཏན་ནས་ཡིན་མི་འདུག   ཁོས་སློབ་སྐབས་རེ་རེར།  ངའི་སློབ་སྦྱོང་གི་གནས་ཚུལ་དང་རྣམ་འགྱུར་སོགས་ཨ་མ་ལ་བཤད་འདུག་པ་མ་ཟད།  ཁྱིམ་བདག་གིས་སློབ་མ་ཇི་ལྟར་སྐྱོང་བ་དང་སློབ་གསོ་ག་རེ་གཏོང་འོས་པའི་བསམ་ཚུལ་མང་བོ་བཤད་སོང་ཟེར། 

ང་ཚོ་དང་བསྡུར་ན།  ཁྱིམ་བདག་ཚོགས་འདུ་འཚོགས་སྐབས།  འཛིན་གྲྭ་གཞན་གྱི་སློབ་མ་ལ་ལ་སྐྲག་ནས་ཙི་གུ་བཞའ་བཞའ་དང་།  འཇིགས་ནས་ལུ་གུ་ལྡིང་ལྡིང་བྱེད་དེ།   ཁོ་ཚོས་སྐར་འབྲས་རེའུ་མིག་གི་ཨང་རིམ་དང་བསྟུན་ནས།  ཁྱིམ་བདག་ཡོངས་ཀྱི་སྔུན་ནས་དགེ་རྒན་གྱི་གཤེ་གཤེ་ལ་ཉན་དགོས་པ་མ་ཟད།  ཁྱིམ་ལ་སོང་རྗེས།  ཕ་མ་རྣམས་ཀྱི་གཅར་རྡུང་ཡང་ཉོ་དགོས་ཟེར། 

མི་སུམ་ཅུར་བསམ་པ་སུམ་ཅུ་དང་།  མཛོ་སུམ་ཅུར་རྭ་ཁ་དྲུག་ཅུ་ཟེར་བ་ལྟར།   ང་ཚོའི་འཛིན་གྲྭའི་ནང་གི་སྦྱངས་འབྲས་བཟང་བའི་སློབ་མ་ལ་ལས།   "ཁྱིམ་བདག་ཚོགས་འདུའི་སྐབས་སུ།  འཛིན་བདག་གིས་ངན་པ་ལ་སྐྱོན་རྗོད་མི་བྱེད་པ་ཅིའི་ཕྱིར་ཡིན་ནམ།"ཟེར་ནས།  མ་དགའ་བའི་རྣམ་འགྱུར་ཡང་སྟོན་པ་ཡིན།  གནའ་མིའི་ཁ་དཔེར།  བཟང་མ་བཤད་ན་ཇེ་ཉུང་།  སྐྱོན་མ་བཤད་ན་ཇེ་མང་ཟེར་བ་ལྟར།  ཁོ་ཚོའི་སྐད་ཆ་དེ་ལའང་གནས་ལུགས་མེད་པ་ཞིག་ག་ལ་ཡིན་མོད།  གང་ལྟར།  ངས་སྐབས་དེར།  ཁྱིམ་བདག་མང་བོའི་སྔུན་ནས་ངོ་ཚ་ཉོ་མ་དགོས་པ་ནི།  འཛིན་བདག་བཀྲ་ཤིས་ཀྱི་བཀའ་དྲིན་དུ་འདོད་དེ།  དེ་ནི་ང་རང་།  འཛིན་གྲྭའི་ནང་གི་ཨང་རིམ་དང་པོ་དང་གཉིས་པ་མ་ཡིན་པར།  སྐབས་རེར་ཨང་རིམ་འབྲིང་ཙམ་དང་།  ལན་རེར་ཨང་རིམ་དམའ་ཤོས་ཡིན་པའི་རྐྱེན་ཡིན་ནའང་ཐང་།


རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།