གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདག་གི་བྱིས་པའི་ལོ་རབས།(ལྔ་བ)

2017-02-24 12:42:39 གཞི་རིམ་པ། ཀློག་གྲངས། མཆན ཡོད།

                   ཁོ་རང་གང་དུ་ཡོད་དམ། 

ཕལ་ཆེར།   ངའི་སྲིན་མཛུབ་གྱི་སྦོམ་ཕྲ་དང་མཚུངས་ཤིང་ཕོ་བྲང་པོ་ཏ་ལའི་རི་མོ་ཡོད་པ།   སྨྱུག་ཆུ་རྒྱུག་པ་ཧ་ཅང་བཟང་ཞིང་ལག་ལ་ཤིན་ཏུ་བདེ་བའི་ལྕགས་སྨྱུག་དེ་ནི།  ཨ་ཕས་ལྷ་ས་ནས་ཉོས་ཡོང་བ་དང་།  སྔོན་དང་བསྡུར་ན།  ངའི་སྐར་འབྲས་ཇེ་བཟང་དུ་སོང་བས་ཁོང་གིས་ང་ལ་བྱ་དགར་བྱིན་པ་ཡིན།  ང་ཚོའི་འཛིན་གྲྭའི་ནང་ན་ལྕགས་སྨྱུག་དེ་ལྟ་བུ་སུ་ལའང་མེད་པས།  ངས་ལྕགས་སྨྱུག་དེ་སློབ་གྲོགས་གཞན་གྱི་སྔུན་ནས་ངོམ་ངོམ་བྱས་པ་མ་ཟད།   འཛིན་གྲྭའི་ནང་གི་སློབ་གྲོགས་འཇིགས་ལོ་ཡི་ཁ་ངོ་ལོན་ཆེད་ཁོ་ལ་ཐེངས་འགར་གཡར་བ་ཡིན། 

འོན་ཀྱང་དགུན་གནང་སྐབས་ཀྱི་ཉིན་ཞིག་ལ།  ངས་ཨ་ཕའི་དཔེ་སྒྲོམ་ནང་གི་དཔེ་ཆའི་བར་ལ་བཞག་ཡོད་པའི་ལྕགས་སྨྱུག་དེ་གར་སོང་ཆ་མེད་དུ་གྱུར་བས།   དཔེ་ཆ་རེ་རེ་དང་ཉལ་ས།  འཆའ་སྒམ་དང་ཇ་ཁང་།   མགྲོན་ཤག་སོགས་ཀྱི་དངོས་པོ་རྣམས་ཡར་སློག་མར་སློག་ཅི་ལྟར་བྱས་ཀྱང་གཏན་ནས་མ་རྙེད་པས་ཨ་མར་དྲིས་པ་ཡིན།

ཨ་མས་ཀྱང་ང་ལ་རོགས་བྱས་ནས་ཅི་ལྟར་བཙལ་ཡང་།  སྔར་བཞིན་ངལ་བ་འབྲས་མེད་དུ་གྱུར་བའི་སྐབས་སུ།   ཨ་མ་གཉིད་ལས་སངས་པ་བཞིན། "འོ་རེད།   དེ་རིང་ཉིན་གུང་།  ཨ་ཞང་ཚང་གི་རྡོ་བྷ་འུ་ཚང་ལ་ཡོང་བ་ཡིན།  ཁོས་རྩེད་ཆས་སུ་ཁྱེར་སོང་བ་ཡིན་ནམ།"ཟེར་བ་གོ་མ་ཐག   ང་རང་བྱ་འཕུར་བ་ལྟར་ཨ་ཞང་ཚང་ལ་བརྒྱུགས་པ་ཡིན། 

ཨ་ཞང་ཚང་གི་རྡོ་བྷ་ནི་ལོ་བཞི་ཙམ་གྱི་བྱིས་པ་ཆུང་ཆུང་ཞིག་སྟེ།   ཁོ་ཐེངས་མང་བོར་ངེད་ཚང་ལ་རྩེད་མོ་རྩེ་རུ་ཡོང་བ་ཡིན།  ངས་ཁོ་རང་མཐོང་མ་ཐག   "རྡོ་བྷ།   ངའི་ལྕགས་སྨྱུག་ཁྱོད་ཀྱིས་ཁྱེར་སོང་བ་ཡིན་ནམ།"ཟེར་ནས་ཅི་ལྟར་དྲིས་ཀྱང་།  ཁོས་མགོ་བོ་གཡུག་གཡུག་བྱས་ཏེ་གཏན་ནས་མི་བཤད་པ་མ་ཟད།  མཚམས་ཤིག་ལ།  ཁོ་རང་ཁོ་ཚང་གི་ཨ་མའི་རྒྱབ་ཏུ་བྲོས་ཏེ་ལག་པས་མིག་ཟུང་འཕུར་ཞོར་དྲག་ཏུ་ངུས་པས།   ཁོ་ཚང་གི་ཨ་མས།  "དབྱངས་བྷ།  དེ་རིང་ཕྱི་དྲོར་ཁོ་སྤེན་པ་ཚེ་རིང་དང་མཉམ་དུ་བརྩེས་ནས་བསྡད་པ་ཡིན།  དོ་དགོང་ངས་ཁོ་གཉིས་ལ་འདྲི་དང་བཤད་ནི་རེད།"ཟེར་བས།   ང་རང་ཐབས་ཟད་དེ་ཕྱིར་མི་ཡོང་ག་མེད་བྱུང་། 

ང་རང་ཨ་ཞང་ཚང་གི་སྒོ་ཁར་བུད་པ་ན།  ཁོ་ཚང་གི་ཁ་གཏད་དམ་ཁྱིམ་མཚེས་ཚང་གི་སྤེན་པ་ཚེ་རིང་རྩེད་མོ་རྩེ་བཞིན་འདུག   ཨ་ཙི།  སྤེན་པ་ཚེ་རིང་གི་ལག་གི་ལྕགས་སྨྱུག་དེ་ངས་འཚོལ་བཞིན་པའི་ལྕགས་སྨྱུག་མ་ཡིན་ནམ།  རེད།  ངའི་ལྕགས་སྨྱུག་ཡིན་ཁོ་ཐག་རེད།  ངས་སྤེན་པ་ཚེ་རིང་གི་ལག་ན་ལྕགས་སྨྱུག་ཅིག་ཡོད་པ་མཐོང་དུས་དེ་ལྟར་སྙམ་ཞོར།  ཁོང་ཁྲོ་གཏིང་ནས་ལངས་ཏེ།  ལྕགས་སྨྱུག་དེ་བདག་གི་ལྕགས་སྨྱུག་ཡིན་པ་དང་།  དེ་ང་ལ་སྟེར་དགོས་པའི་རྣམ་འགྱུར་ཅི་ལྟར་བྱས་ཀྱང་།  ཁོས་མི་སྟེར་བའི་བརྡ་ལ།  མགོ་བོ་གཡུག་པ་དང་ལག་པས་བཟོ་ལྟ་སྣ་ཚོགས་བསྟན་པས།  ངས་ཁོའི་ལག་ནས་ལྕགས་སྨྱུག་བཙན་གྱིས་བླངས་པ་ཡིན།  སྤེན་པ་ཚེ་རིང་ནི་སྐད་ཆ་བཤད་མི་ཤེས་པའི་ལྐུགས་པ་ཞིག་ཡིན་པས།   ཁོས་ཁ་ནས།  "ཨ་་་ཨུ་་་ཨ་་་ཨུ།"ཟེར་ཞོར་མིག་མཐར་མཆི་མ་འཁོར་ནའང་།  ངས་ཁོ་ལ་ཁ་ཡ་མ་བྱས་པར་ཁྱིམ་དུ་ཡོང་བ་ཡིན།

གཟའ་འཁོར་གཉིས་གསུམ་ཞིག་གི་རྗེས་སུ།  ངས་ཨ་མ་ལ་རོགས་རམ་བྱས་ནས་ཁྱིམ་ལ་གཙང་སྦྲ་བྱེད་སྐབས།   ངའི་སྔོན་གྱི་ལྕགས་སྨྱུག་དེ་འབོལ་ཁྲིའི་སྲུབས་ཀ་ནས་རྙེད་བྱུང་།  ང་རང་ཡ་མཚར་ནས་ཨ་མར་དྲིས་པ་ན།  "དེ་ནི་ཧ་ལམ།   རྡོ་བྷས་གཡུགས་པ་ཡིན་སྲིད།   ངའི་ལྕགས་སྨྱུག་བོར་བའི་ཉིན་དེར།  ཁོ་རང་འུ་ཚང་གི་འབོལ་ཁྲིའི་གམ་ན་རྩེ་བཞིན་འདུག"ཟེར། 

ང་ལ་འགྱོད་པ་སྐྱེས་བྱུང་།  ངས་སྤེན་པ་ཚེ་རིང་གི་ལག་ནས་བཙན་གྱིས་ཁྱེར་ཡོང་བའི་ལྕགས་སྨྱུག་དེ།   མ་གཞི་དངོས་གནས་ཁོ་རང་གི་ཡིན་འདུག   ཉིན་དེའི་ཕྱི་དྲོར།  ངས་ལྕགས་སྨྱུག་ཁྱེར་ནས་ཁོ་ཚང་གི་སྒོ་ཁར་ཐེངས་འགར་སོང་མོད།   ཁོ་ཚང་གི་སྒོ་ལ་ལྕགས་ཟྭ་ཆེན་པོ་ཞིག་བརྒྱབ་འདུག  

ཉིན་དེ་ཚོར།  ངས་སྤེན་པ་ཚེ་རིང་གཏན་ནས་མ་རིག   དགོང་མོ་ཞིག་ལ།  ངས་ལས་བྱ་འབྲི་ཞོར་ངེད་ཚང་གི་བཟའ་མིའི་ཁ་བརྡར་ཉན་དུས།  "ཁོ་ཚང་ལོ་འགའི་སྔོན་དུ་ལྷ་ས་ནས་འདི་རུ་ཚོང་རྒྱག་ཏུ་ཡོང་བ་རེད།  ཁོ་ཚང་གི་ཨ་ནེར་ན་ཚ་ལྕི་མོ་ཞིག་བྱུང་བས་མྱུར་དུ་བུད་སོང་། ཧ་ལམ་ཕྱིར་ཡོང་རྒྱུ་མ་རེད།"ཟེར་བ་གོ་བས།  ངའི་སེམས་པ་སྐྱོ་སྣང་དང་ངོ་ཚ།  འགྱོད་པ་སོགས་ཀྱིས་རབ་ཏུ་མནར་ཏེ་ལས་བྱའང་འབྲི་མི་འདོད་པར་གྱུར།  

                    བརྗེད་མི་ཐུབ་པའི་མི། 

ངེད་ཚང་གི་ཁྱིམ་ནས་སློབ་གྲྭའི་བར་དུ་ལེ་དབར་བཅུ་ཙམ་འགྲོ་དགོས་པས།  ཞོགས་པ་སྔ་མོ་ནས་ལངས་ཏེ་ལམ་ལ་མ་ཆས་ན།  ནངས་སྦྱོང་གི་རྗེས་སུ་ལུས་སྲིད།  དེ་བས།  ཁྱིམ་དང་སློབ་གྲྭའི་བར་ཐག་ཉེ་བའི་སློབ་གྲོགས་མང་ཤོས་དང་བསྡུར་ན།  ང་རང་ནམ་རྒྱུན།   དགོང་འཕྱི་འགྱངས་བྱས་ནས་ཡུལ་ལ་ཐོན་ན།  ནངས་སྔ་ལངས་བྱས་ནས་སློབ་གྲྭར་འགྲོ་དགོས་པ་བཤད་མ་དགོས།

ལོ་རིམ་དང་པོ་ནས་གསུམ་པར་འཕར་བའི་བར་དུ།  ཧ་ལམ་ཞོགས་པ་རེ་རེར།  ཨ་ཕས་ང་རང་སློབ་གྲྭར་བསྐྱལ་བ་ཡིན།  གྲང་ནས་ཁ་འཁོབ་ལག་འཁོབ་དང་།  ཁངས་ནས་ཤ་འདར་རུས་འདར་བྱེད་པའི་དགུན་ཁའི་ཞོགས་པ་རེ་རེར།  ཨ་ཕ་དང་ངེད་གཉིས།  ནམ་མ་ལངས་གོང་ནས་ལམ་ལ་འབུད་དགོས་ཤིང་།  མུན་ནག་གི་ཁྲོད་ན།  དཀར་གསལ་གྱིས་འཚེར་བའི་ལམ་འགྲམ་གློག་འོད་ཀྱི་འོག་ཏུ།  ཨ་ཕས་བདག་གི་དཔེ་ཁུག་ཕྲག་པ་གཡོན་པར་གཟར་ཏེ་སྔོན་ལ་འགྲོ་ཞིང་།  ང་རང་ད་དུང་གཉིད་མ་སངས་པར།  མིག་ཟུང་ཟམ་ཟིམ་དང་གོམ་པ་འཁྱར་འཁྱོར་གྱིས།  ཁོང་གི་རྗེས་བསྙེགས་ནས་སོང་བ་ཡིན། 

རྒྱ་ལམ་དཀྱིལ་དུ།  སྟོད་ལྭ་དམར་སེར་གོན་པའི་ཨ་ཅེ་འགའ་རེས།  ཕྱགས་མ་རིང་བོ་བཟུང་ནས་རྒྱ་ལམ་འཕྱག་བཞིན་འདུག་ལ།  ལམ་འགྲམ་གཡས་གཡོན་གྱི་ལྕང་སྡོང་དང་སྦྱར་སྡོང་གི་འོག་ན།  རྒས་ནས་སྐྲ་ལོ་དཀར་ཞིང་འཁོགས་ནས་གཉེར་མ་མང་བའི་ལོ་ལོན་རེ་འགས། རྐང་ལག་གི་བཟོ་ལྟ་སྣ་ཚོགས་སྟོན་བཞིན་ལུས་པོ་སྦྱོང་རྡར་བྱེད་བཞིན་འདུག

འབྱོར་བ་མི་བཟང་རྒྱུ་མེད་པའི་ཁྱིམ་བདག་མང་ཤོས་ཀྱིས།  ཞོགས་པར་བྱིས་པ་རྣམས་ལྕགས་རྟའི་འཕོངས་ལ་བཞག་ནས་སམ།  ཡང་ན་རླངས་འཁོར་བསྐོར་ནས་བྱིས་པ་སློབ་གྲྭར་སྐྱེལ་བཞིན་ཡོད་མོད།  བདག་གི་ཨ་ཕས།  ང་ནམ་རྒྱུན་རྐང་ཐང་དུ་འཁྲིད་པ་མ་གཏོགས།  རླངས་འཁོར་གྱིས་བསྐྱལ་མ་མྱོང་། 

མཚམས་ལ་རེར།  ངས་ཨ་ཕ་ལ་ལེ་བདའ་བྱས་ནས།  "ཁྱོད་ང་ལ་འདང་མི་ཆེ་བ་ཁོ་ཐག་རེད།  གཞན་གྱི་ཨ་ཕས་རང་གི་བྱིས་པ་ལྕགས་རྟ་དང་རླངས་འཁོར་གྱིས་སློབ་གྲྭར་བསྐྱལ་ནའང་།  ཁྱོད་ཀྱིས་ནམ་ཡང་ང་རང་རྐང་ཐང་དུ་འཁྲིད་དོན་ཅི་ཡིན་ནམ།"ཞེས་མཆུ་ཏོ་གཅུས་ནས་འགྲོ་དུས།  ཨ་ཕའི་གདོང་ལ་འཛུམ་མདངས་མངོན་ཞོར་དང་།  ལག་པ་གཡས་པས།  ངའི་འགྲམ་པ་དང་གཉའ་ལྟག་གང་རུང་ལ་ཤ་གཅུ་ཡང་མོ་རྒྱག་ཞོར།  "དབྱངས་བྷ།  ཁྱོད་ཀྱིས་སློབ་སྦྱོང་བཟང་བོ་བྱེད་འདོད་དམ།"ཞེས་འདྲི་བ་ཡིན།

ངའི་སེམས་ལ།  ངས་མགོ་ཡི་ཞྭ་མོ་བཤད་དུས།  ཨ་ཕས་རྐང་གི་ལྷམ་ཀྲད་བཤད་དོན་ཅི་ཡིན་ནམ།  སློབ་སྦྱོང་བཟང་བོ་བྱེད་པ་དང་།  རླངས་འཁོར་གྱིས་སློབ་གྲྭར་བསྐྱལ་བ་གཉིས་ལ་འབྲེལ་བ་ཅི་ཞིག་ཡོད་དམ་སྙམ་ཞོར།  "དེ་གཉིས་ནི་འབྲེལ་མེད་དོན་གཞན་རེད།  ངས་སློབ་སྦྱོང་བཟང་བོ་བྱེད་མི་འདོད་ཅེས་སུས་བཤད་སོང་།"ཞེས་མ་དགའ་བའི་ཉམས་ཀྱིས་བཤད་པ་ན།  ཨ་ཕས། "སློབ་སྦྱོང་བཟང་བོ་བྱེད་ན་ལུས་ཕུང་བདེ་ཐང་ཡིན་དགོས།  ལུས་ཕུང་བདེ་ཐང་ཡོང་བར་ལུས་པོ་འགུལ་སྐྱོད་བྱེད་དགོས་པ་རེད།"ཅེས་བཤད་མོད།  ང་ད་དུང་སྤོ་ལངས་ནས་མཆུ་ཏོ་འཇོང་འཇོང་བྱས་པ་ན།  ཨ་ཕ་དགོད་ཞོར་དུ། "ང་ཁྱོད་ལ་འདང་མི་ཆེ་བར་སུ་ལ་ཆེ།"ཟེར་ནས།  ངའི་འགྲམ་པའི་སྟེང་ལ་མཆུ་སྦྱོར་བྱེད་པ་ཡིན། 

ཡང་སྐབས་རེར།  ཨ་ཕས་གདོང་ལ་ཅུང་ཟད་གཟབ་ནན་གྱི་ཉམས་ཤིག་བཏོད་དེ། "འུ་ཚང་གིས་རླངས་འཁོར་སྟབས་བདེ་ཞིག་ཉོས་ཟིན་མོད།  ཨ་ཕས་ད་དུང་།  ཁ་ལོ་ཆོག་ཡིག་བླངས་མེད་པས།   གང་འདོད་དུ་རླངས་འཁོར་སྐོར་མི་ཉན།  འུ་ཚོས་རང་གི་བདེ་སྐྱིད་ཆུང་ཆུང་ཞིག་གི་ཆེད་དུ།  གཞན་གྱི་བདེ་འཇགས་ལ་འགན་མ་ཁུར་ན་ག་ལ་ཆོག"ཟེར། 

རྗེས་སུ།  ང་རང་སློབ་འབྲིང་དང་མཐོ་འབྲིང་།  སློབ་གྲྭ་ཆེན་མོ་སོགས་འགྲིམས་ནས་ལག་ཆགས་པ་ན།  ངས་ཨ་ཕའི་སྐད་ཆ་དེ་དག་ནི་ཅི་འདྲའི་བདེན་པ་ཞིག་རེད་ཨང་འདོད་ལ།  ངའི་ཨ་ཕ་ལགས་ནི། བསམ་བློ་བཞི་གསུམ་བཅུ་གཉིས་ཐོངས་ཤིང་།  བློ་རྩེ་ཉི་ཤུ་རྩ་ལྔ་འཁོར་ཐུབ་པའི་མི་ཞིག་ཡིན་པ་མ་ཟད།  རང་གི་བྱིས་པ་ལ་འདང་ཆེ་བའི་ཨ་ཕ་བཟང་བོ་ཞིག་ཡིན་པ་ཤེས་སོང་།

ད་ལྟའང་།  ངས་ཁོང་གིས་བདག་གི་འགྲམ་པའི་སྟེང་ལ་འོ་བྱེད་པ་དང་།  གཉའ་ལྟག་ལ་ཤ་གཅུ་ཡང་མོ་རྒྱག་པ།  གྲངས་རིག་གི་ལས་བྱ་འབྲི་མི་ཤེས་དུས།  རོགས་རམ་དང་མཛུབ་སྟོན།  བློ་འབྱེད་བྱས་པ་སོགས་ཡང་ཡང་དྲན་བྱུང་། 


རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།