གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདག་གི་བྱིས་པའི་ལོ་རབས།(དྲུག་པ)

2017-03-06 14:06:16 གཞི་རིམ་པ། ཀློག་གྲངས། མཆན ཡོད།

                            ཨ་ཕ་དང་འདྲ་བའི་དགེ་རྒན་ཞིག

ཨ་ཕ་ཚེ་ལས་འདས་པའི་ལོ་དེར།  ངའི་སེམས་པ་ཧ་ཅང་སྐྱོ་སྡུག་གིས་མནར་བྱུང་།  ངས་ཨ་ཕ་དྲན་ནས་ཤེད་ཀྱིས་ངུ་སྐབས།  ཨ་མ་དང་ཕུ་བོ་སོགས་ཀྱིས།  "ཨ་ཕ་ཐག་རིང་ཐག་རིང་ཞིག་ལ་ཚོང་རྒྱག་ཏུ་བུད་སོང་།  ཉིན་མ་འགའ་འགོར་ན། ཨ་ཕ་ཕྱིར་ཡོང་སྲིད།"ཟེར་ནས་བདག་གི་ངུ་ཁ་ལེན་པར་བྱེད།  དང་ཐོག  ངས་སྐད་ཆ་དེ་བདེན་པར་རློམ་ནས་རང་སེམས་རང་གིས་གསོས་མོད།  ཉིན་ནས་ཟླ་དང་།  ཟླ་ནས་ལོ་འགོར་ཡང་ཨ་ཕའི་གྲིབ་མ་ཙམ་ཡང་རིག་རྒྱུ་མི་འདུག  དུས་དེ་ནས་བཟུང་།  ངས་མི་ཞིག་ཤི་བའི་རྗེས་ནས།  གཏན་དུ་ཕྱིར་ཡོང་མེད་བའི་གནས་ལུགས་དེ་ཤེས་པ་ཡིན།

ཨ་ཕ་དྲན་ནས་སེམས་ཁམས་མ་སྐྱིད་པའི་རྐྱེན་ཡིན་སྲིད།  ལོ་དེར།  ང་སྔར་བཞིན་སློབ་གྲྭར་སོང་ནས་སློབ་ཁྲིད་ལ་ཉན་ན་ཡང་།  བློ་གཅིག་སེམས་གཅིག་དང་ཁ་ཞེ་གཉིས་མེད།  ཧུར་ཐག་འབད་ཐག་གིས་སློབ་སྦྱོང་བཟང་བོ་ཞིག་བྱེད་མ་ཐུབ།  དེའི་རྐྱེན་གྱིས།  ངའི་སྦྱངས་འབྲས་ཇེ་ཞན་དང་ཇེ་ཞན།  སྐར་འབྲས་ཇེ་དམའ་ནས་ཇེ་དམའ་རུ་གྱུར་བས།  སྔོན་ཆད་ང་ལ་འདང་ཡོད་ཅིང་།  རྩིས་མཐོང་ཆེ་བའི་དགེ་སློབ་སྐོར་ཞིག་གིས་ཀྱང་།  ང་རང་འདང་མེད་རྩིས་མེད་ཅིག་ཏུ་བཅད་སོང་། 

བསྡད་ཀྱིན་བསྡད་ཀྱིན།  གྲངས་རིག་གི་ལས་བྱ་འཆུགས་པ་དང་།  བོད་ཡིག་དང་རྒྱ་ཡིག་གི་ཉན་འབྲི་ལ་ཡིག་ནོར་མང་བ།  ཚིག་བསྒྲིགས་ན། སྐད་ཆའི་ལྷུ་རྐང་མི་འཕྲོད་པའི་སྣང་ཚུལ་ཇེ་མང་དུ་སོང་བ་དང་བསྟུན་ནས།  ངའི་ཨོང་ཤ་དང་ལག་པའི་སྟེང་ལ།  དགེ་རྒན་གྱིས་དབྱུག་པས་འབྲབ་པའི་ཁ་གྲངས་ཀྱང་ཇེ་མང་ནས་ཇེ་མང་དུ་གྱུར།

དེ་ལས་ཀྱང་སེམས་སྡུག་པ་ཞིག་ནི།  དགེ་རྒན་ཁ་ཤས་ཀྱིས། ངའི་དངོས་མིང་གིས་མི་འབོད་པར་རྟོལ་ཕྲུག་དང་གླེན་པ།  དབྱངས་བྷ་ཆོ་མེད།  བྱེའུ་མིག་མགོ་ལེབ་ཅེས་པ་སོགས་མཚང་མིང་སྣ་ཚོགས་ཀྱིས་འབོད་ཅིང་།  སློབ་མ་ཉུང་ཤོས་ཀྱིས་ཀྱང་དེ་ལྟ་དེ་ལྟར།  ང་ལ་མཚང་འབྲུ་དང་ཟུར་ཟ་མང་པོ་བྱས་པས།  ངས་ཨ་མྱེས་ལགས་ཀྱིས་བསང་འབུལ་མཆོད་བསྟོད་བྱེད་སའི་ལྷ་དང་གཞི་བདག་དེ་དག་ལ་འཁང་ར་བྱས་ཤིང་།  གལ་ཏེ།  ཁོ་ཚོས་བདག་ལ་རོགས་རམ་བྱེད་པའི་དབང་དུ་བཏང་ན།  ངས་ང་ལ་མཚང་འབྲུ་དང་ཟུར་ཟ་བྱེད་མཁན་དེ་དག་ལ།  སྐྱིན་པ་ལེན་འདོད་པའི་བསམ་ཚུལ་ཡང་སྐྱེས་མྱོང་།

འོན་ཀྱང་།  དུས་ནམ་ཞིག་དང་ས་ཆ་གང་ལ་སོང་ཡང་།   ཁྲེལ་མེད་བློ་ཆུང་དང་ཁ་ཞེ་གོ་ལྡོག   རང་བསྟོད་གཞན་སྨད་དང་གཞན་མི་ཁྱད་གསོད་བྱེད་པའི་མི་ནི་ཧ་ཅང་ཉུང་ཤོས་ཡིན་ལ།  གཞན་ལ་བསམ་ཤེས་དང་ཕན་ཚུན་རོགས་རེས།  སྐྱིད་སྡུག་མཉམ་མྱོང་བྱེད་པའི་མི་ནི་མང་ཤོས་ཡིན་པ་ནང་བཞིན།  སློབ་གྲྭའི་དགེ་སློབ་མང་ཤོས་ཀྱིས།  ང་ལ་སེམས་གསོ་རོགས་རམ་དང་ལྟ་སྐྱོང་ཚད་མེད་གནང་མྱོང་ལ།  དགེ་རྒན་སྐྱབས་ལོའང་།  བདག་གིས་གུས་པར་འོས་པའི་མི་མང་ཤོས་ཁྲོད་ཀྱི་གཅིག་ཡིན། 

ཉིན་ཞིག་གི་ཉིན་གུང་ཟ་མ་ཟོས་རྗེས།  ང་རང་སློབ་གྲྭའི་ཇ་ཁང་རྒྱབ་ཀྱི་ལྕང་སྡོང་འོག་ཏུ་ཁེར་རྐྱང་གིས་སྡོད་དུས།  དགེ་རྒན་སྐྱབས་ལོས། "དབྱངས་བྷ། ཁྱོད་ངའི་ཉལ་ཁང་དུ་ཤོག་དང་།  ང་ཁྱོད་ལ་བཤད་རྒྱུ་ཞིག་འདུག"ཅེས་བོས་བྱུང་། 

དགེ་རྒན་ཁོང་ནི།   ནམ་རྒྱུན་ཀུ་རེ་རྩེད་མོ་ལ་དགའ་ཞིང་།  ལྷག་བསམ་ཟོལ་མེད་དང་བློ་དཀར་གཞུང་དྲང་གི་མི་ཞིག་ཡིན།  ཁོང་ལ་གཞན་དང་ཐུན་མོང་ལ་ཡིན་པའི་ཁྱད་ཆོས་ཤིག་ཡོད་པ་ནི།  གཟུགས་རིང་ཞིང་མགོ་བོ་ཆེ་བ།  མིག་གཉིས་ཀ་ཧ་ཅང་ཆུང་བ་དེ་ཡིན་ལ།  གདོང་ལ་འཛུམ་མདངས་མངོན་ཐེངས་རེར།  མིག་གཉིས་ཀ་སྔར་ལས་ཇེ་ཆུང་དུ་སོང་སྟེ།  ལག་པའི་ཐལ་མོ་གཉིས་ཁ་སྦྱར་བ་བཞིན་མིག་ཟུང་ཡོངས་སུ་རུབ་ནས་མིག་རྡོ་གཉིས་ཀ་གཏན་ནས་མི་རིག  དེ་ལ་རྐྱེན་བྱས་ནས།  སློབ་མ་པྲ་ཚག་འགའ་རེས།  ལྐོག་ནས་ཁོང་གི་མཚང་མིང་ལ། "མིག་གྲོག་མ་"ཞེས་ཀྱང་འབོད་ཀྱིན་ཡོད། 

ང་ཁོང་གི་རྗེས་དེད་ནས་ཉལ་ཁང་དུ་ཐོན་པ་ན།  ཁོང་གིས་གདོང་ལ་འཛུམ་མདངས་ཕྱུང་ཞིང་མིག་ཟུང་ཇེ་ཆུང་དུ་བཏང་སྟེ།  "ཡ་དབྱངས་བྷ།  དེ་རིང་ངས་ཀྱང་ཉིན་མ་མི་ཆོད་གི   ཁྱོད་ཀྱིས་ང་ལ་འགྱིག་འདེད་རོགས་བྱས་ན་ཅི་འདྲ་རེད།"ཅེས་དྲིས་པས།  ངས་ཀྱང་ཁོང་གི་དགོངས་པ་དང་བསྟུན་ནས་འགྱིག་དེད་པ་ཡིན།  ངེད་གཉིས་ཀྱིས་ཐེངས་མ་གསུམ་ལ་འགྱིག་དེད་ཅིང་།  ཐེངས་མ་གསུམ་པོ་ང་རང་རྒྱལ་ཞིང་ཁོ་རང་ཕམ་སོང་བས།  ཁོང་གིས་ང་ལ།  "དབྱངས་བྷ།  ཁྱོད་ངོ་མ་རིག་ཡག་ཅིག་རེད་ཡ།  སློབ་མ་ཁ་ཤས་ཀྱིས་ཁྱོད་རང་གླེན་པ་ཞིག་རེད་ཟེར་མོད།  ངས་བལྟས་ན་གཏན་ནས་མ་རེད།  ཁྱོད་ཀྱིས་དེ་རིང་ནང་བཞིན།  སློབ་སྦྱོང་ལ་བློ་རྩེ་གཅིག་སྒྲིམ་བྱེད་ཐུབ་ན།  འབྲས་བུ་བཟང་བོ་ཞིག་མི་ལོན་ག་ལ་སྲིད།"ཅེས་སོགས།  ཟོལ་མེད་སྐུལ་ལྕག་དང་ལྷད་མེད་བསླབ་བྱ་གནང་བའི་རྐྱེན་ལ་བརྟེན་ནས།  བདག་གི་སློབ་སྦྱོང་གི་འབྲས་བུའང་རིམ་བཞིན་ཇེ་བཟང་ཇེ་ལེགས་སུ་སོང་སྟེ།  སློབ་མཐར་ཕྱིན་ཁར།  ང་རང་འཛིན་གྲྭའི་ནང་གི་སློབ་སྦྱོང་བཟང་གྲས་སུ་ཚུད། 

ཁོང་ནི་བདག་གི་ཨ་ཕ་དང་འདྲ་བར།  ང་ལ་བཀའ་དྲིན་རི་ལྟར་ལྕི་ཞིང་།  བརྩེ་བ་མཚོ་ལས་ཟབ་པའི་དགེ་རྒན་བཟང་བོ་ཞིག་ཡིན་ལ།  དུས་ད་ལྟའང་།  ཁོང་གི་ཆུང་ལ་རུབ་པའི་སྤྱན་ཟུང་དང་དགོད་འཛུམ་འཁྱིལ་བའི་ཞལ་རས་དེས། མི་མངོན་པའི་ངང་ནས།  ང་ལ་དཀའ་སྡུག་རྒྱབ་བསྐྱུར་དང་གོམ་པ་མདུན་སྤོ་བྱེད་དགོས་པའི་སྙིང་སྟོབས་སྩོལ་བཞིན་ཡོད། 

                               ཆད་པ་བཅད་པ།

ཉིན་དེར།  ངའི་འདུག་གྲོགས་རྡོ་རྗེ་དང་ངེད་གཉིས་ལས་རེས་པ་ཡིན།  ཕྱི་དྲོའི་སློབ་ཐུན་གསུམ་པ་གྲོལ་ནས་སློབ་མ་ཚོ་ཡུལ་ལ་སོང་རྗེས། ངས་སློབ་ཁང་གི་ནང་གི་ཤོག་ཧྲིལ་འཐུ་བ་དང་ཐང་འཕྱག་པ།  སྒོ་སམ་འབྱིད་པ་སོགས་བྱས་ཤིང་། རྡོ་རྗེ་ཡིས་དྲ་མ་དང་ཅོག་ཙེ་གཙང་མར་ཕྱིས་རྗེས།  ངེད་གཉིས་ཡུལ་ལ་སོང་བ་ཡིན། 

ཕྱི་ཉིན་སྔ་མོར་སློབ་གྲྭར་ཐོན་པ་ན།  ངེད་ཚང་གི་སློབ་མ་ཚེ་རིང་སློབ་ཁང་སྒོ་ཁ་ན་ངུ་བཞིན་འདུག  ངས་ཁོ་ལ་ངུ་བའི་རྒྱུ་མཚན་དྲིས་པ་ན། ཁོས་ང་ལ།  "ངའི་སྣག་བུམ་བཅག་འདུག  འཆའ་སྒམ་དུ་ཡོད་པའི་གོ་རེ་དང་སྐོམ་ཆུའང་མི་འདུག  རྡོ་རྗེ་དང་ཁྱོད་གཉིས་ཁ་སང་ལས་རེས་པ་རེད།  ཁྱོད་གཉིས་ཀྱིས་ཅི་ཞིག་བྱས་པ་ཡིན།  ང་ལ་སྐྱིན་ཚབ་གཞལ་དགོས།"ཟེར་ནས་དྲག་ཏུ་ངུས། 

ངས་ཅི་ཡིན་འདི་ཡིན་དང་། ཅི་བྱུང་གང་བྱུང་མ་ཤེས་པར་སྡོད་པའི་སྐབས་དེར།  "དབྱངས་བྷ།  རྡོ་རྗེ་དང་ཁྱོད་གཉིས་ངའི་གཞུང་ལས་ཁང་དུ་ཤོག་དང་།"ཞེས།  ངའི་ལྟག་རྒྱབ་ནས་མི་ཞིག་གིས་བོས་བྱུང་།  ཁ་ཕྱིར་འཁོར་ནས་ལྟ་དུས།  དེ་ནི་ངེད་ཚང་གི་འཛིན་བདག་བཀྲ་ཤིས་རེད། 

ངེད་གཉིས་ཁོང་གི་སྡོད་ཁང་དུ་ཐོན་པ་ན།  ཁོང་གིས་ངོ་གདོང་ལ་གཟབ་ནན་གྱི་ཉམས་ཤིག་བསྡུས་ཏེ།  "ཁ་སང་ཁྱོད་གཉིས་སློབ་ཁང་གི་ལས་རེས་པ་རེད།  ད་ནངས།  ཚེ་རིང་གི་འཆའ་སྒམ་ནང་གི་སྣམ་བུམ་བཅག་འདུག་པ་མ་ཟད།  ཁོས་ཡུལ་ནས་ཁྱེར་ཡོང་བའི་གོ་རེའང་མི་འདུག་ཟེར།  ཤོད་དང་།  ཁྱོད་གཉིས་ཀྱིས་ཅི་ཞིག་བྱས་པ་ཡིན།"ཞེས་དྲིས་བྱུང་།  ངེད་གཉིས་ཀྱིས།  ཁ་སང་ཕྱི་དྲོར་སློབ་ཐུན་གསུམ་པ་གྲོལ་རྗེས།  ཅི་ལྟར་སློབ་ཁང་ལ་གཙང་དག་བྱས་པ་དང་།  ཡུལ་ལ་ཅི་ལྟར་སོང་བ་སོགས་བཤད་པ་ན།  ཁོང་གིས་ཡང་བསྐྱར།  "བྱིས་པ་ཡ་རབས་ཤིག་བཅའ་ན་བརྐུ་བྱེད་མི་ཉན།  ངས་ཁྱོད་གཉིས་ཀས་བརྐུས་སོང་ཟེར་བ་མིན་མོད།  གལ་སྲིད།  ཁོའི་གོ་རེ་ཁྱོད་གཉིས་ཀས་ཁྱེར་སོང་ན།  སློབ་ཐུན་བཞི་བ་མ་གྲོལ་བའི་ཡར་སྔོན་དུ།  ངའི་རྩིབ་ལ་ཡོང་ནས་ངོས་ལེན་བྱས་ན་ལེགས།  ཡ།  ད་ཁྱོད་གཉིས་སོང་།  སོང་ནས་འདང་ཞིབ་མོ་ཞིག་རྒྱོབ།"ཅེས་བཤད་བྱུང་། 

སློབ་ཐུན་དང་པོའི་སྐབས་སུ།  ངས་འཛིན་བདག་གིས་བཤད་པའི་སྐད་ཆ་དེ་དག་ཡིད་ལ་ཤར་ནས།  སློབ་ཁྲིད་ལ་ནན་ཏན་གྱིས་ཉན་མ་ཐུབ།  ངེད་གཉིས་ཀྱིས།  ཁོའི་འཆའ་སྒམ་ནང་གི་གོ་རེ་དེ་མིག་གིས་ཀྱང་མ་རིག   ཁྲེལ་མེད་ཨ་ཁུ་སྤྱང་ཀི་འདྲ་བ་དང་།  གཡོ་ཅན་ཨ་ཅེ་ཝ་མོ་འདྲ་བ་དེ་སུ་ཡིན་ནམ།  ངོ་མ་སུ་ཞིག་ཡིན་ནམ། 

སློབ་ཐུན་བཞི་བའི་ཚོགས་བརྡ་བརྒྱབ་སྟེ།  ང་ཚོ་སློབ་ཁང་དུ་ཞོགས་ནས་འགྲོ་བའི་སྐབས་དེར།  "དབྱངས་བྷ།  རྡོ་རྗེ་དང་ཁྱོད་གཉིས་ངའི་གཞུང་ལས་ཁང་དུ་ཤོག་དང་།  མྱུར་དུ་ཤོག"ཅེས་འཛིན་བདག་གིས་ཡང་བསྐྱར་བོས་བྱུང་།  ད་ཐེངས།  ཁོང་གི་གདོང་ལ་འཛུམ་ཞིག་ལངས་ཏེ།  "དགོངས་པ་མ་ཚོམ།  ཚེ་རིང་གི་གོ་རེ་དེ།  འུ་ཚོ་སློབ་གྲྭས་གསོས་ཡོད་པའི་ཁྱི་གུ་རྒྱ་དམར་གྱིས་ཟོས་པ་རེད།  ཁྱི་གུས་གོར་ཁུག་ལ་སོ་བཏབ་ནས་ཕྱི་རོལ་དུ་དྲུད་སོང་བ་རེད།  ངས་ཁྱོད་གཉིས་ལ་ཉེས་མེད་ཉེས་འགེལ་བྱས་སོང་།"ཟེར།

ཕྱི་དྲོར།  སློབ་གྲྭ་གྲོལ་ལ་ཉེ་སྐབས།  ངས་རྡོ་རྗེ་བོས་ནས་འཛིན་བདག་གི་རྩིབ་ལ་སོང་སྟེ།  "དགེ་རྒན་ལགས།  ངེད་གཉིས་ཀས་ངེད་གཉིས་ལ་ཆད་པ་ཞིག་གཅོད་རྒྱུ་ཡིན།"ཞེས་བཤད་པ་ན།  དགེ་རྒན་གྱིས་སྨིན་མ་སྡུད་ཞོར།  "ཁྱོད་གཉིས་ལ་ནོར་འཆུགས་མེད་ན་ཆད་པ་ཅི་ཞིག་གཅོད།"ཅེས་དྲིས་སོང་། 

"ངེད་གཉིས་ལ་ནོར་འཆུགས་ལོས་ཡོད།  ཁ་སང་ཕྱི་དྲོར།  ངེད་གཉིས་ཀྱིས་སློབ་ཁང་ལ་ཟྭ་རྒྱག་རྒྱུ་བརྗེད་སོང་བ་རེད།  གལ་ཏེ།  ངེད་གཉིས་ལ་ནོར་འཆུགས་མེད་ན།  ཚེ་རིང་གི་གོ་རེ་ཁྱི་གུས་འཁུར་ག་ལ་སྲིད།  ནོར་འཁྲུལ་ལ་ངོས་ལེན་དང་སྐྱིན་ཚབ་ཀྱི་ཆེད་དུ།  ངེད་གཉིས་སང་ཉིན་ཡང་བསྐྱར་ལས་རེས་པ་བྱེད་རྒྱུ་ཡིན།  དེ་ནི་རང་གིས་རང་ལ་ཆད་པ་བཅད་པའང་ཡིན།"ཞེས་བཤད་པ་ན།  དགེ་རྒན་རྐུབ་སྟེགས་སྟེང་ནས་ཡར་བཞེངས་ཏེ།  "དངོས་གནས་ཡག་པོ་འདུག  ངོ་མ་ཡག་པོ་རེད།  རང་འགུལ་གྱིས་རང་གི་བྱས་ཉེས་ལ་འགན་འཁུར་བ་དེ་ལས་གཟི་བརྗིད་ཆེ་བ་ཞིག་གང་ན་ཡོད།  ཁྱོད་གཉིས་ཀྱིས།  སློབ་གྲྭའི་སློབ་མ་ཡོངས་ལ་མིག་དཔེ་ཡག་པོ་བསྟན་སོང་།  བཀའ་དྲིན་ཆེ།  དངོས་གནས་བཀའ་དྲིན་ཆེ།" ཞེས་བཤད་ཞོར།  མིག་མཐའ་ལ་མཆི་མ་ལྷུང་ལ་ཁད་ཅིག་འཁྱིལ་སོང་། 


རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།