ལྐོག་ཉན་དང་ལྐོག་ལྟ།

སློབ་གྲོགས་ཉི་མ་ནི་ངེད་ཅག་འཛིན་གྲྭའི་རྩལ་སྦྱོང་འཛིན་གཙོ་དང་།  སློབ་གྲོགས་པ་སངས་ནི་ངལ་རྩོལ་ཨུ་ཡོན་ཡིན།  ཁོ་གཉིས་སློབ་སྦྱོང་གི་ཕྱོགས་ནས་འཛིན་གྲྭའི་ནང་གི་རྩེ་མོའི་གྲས་སུ་མེད་ནའང་།  ཧ་ཅང་སྡུག་ཐུག་གི་གྲས་སུའང་ལྷུང་མེད།  ལྷག་པར་དུ།   ཁོ་གཉིས་ཀྱི་རིག་པ་ཧ་ཅང་མྱུར་བས།  གྲངས་རིག་དགེ་རྒན་གྱིས་ནམ་རྒྱུན།  "ཁྱོད་གཉིས་ཀྱིས་ཧུར་བརྩོན་ཅུང་ཟད་བྱས་པ་ཡིན་ན།  མ་འོངས་པར།  རྒྱལ་བོ་སྲོང་བཙན་དང་བློན་པོ་ཐོན་མི་ལྟ་བུ་གཉིས་འཁྱོངས་པར་ཐེ་ཚོམ་མེད།"ཅེས་རེ་བ་ཡང་ཡང་བཅངས་ནའང་།  ཁོ་གཉིས་ལ་རིག་པ་ཡོད་པ་མ་གཏོགས་བརྩོན་པ་མི་འདུག

འོན་ཀྱང་།  ཁོ་གཉིས་ལ་ཐུན་མོང་གི་ཁྱད་ཆོས་གཅིག་ཡོད་པ་ནི།  གཞན་གྱི་གསང་བ་ལ་ལྐོག་ཉན་དང་ལྐོག་ལྟ་བྱེད་པ་དེ་ཡིན།  ལྐོག་ཉན་ལྐོག་ལྟའི་ལས་ལ་བསྐོར་ཚེ།  ཁོ་གཉིས་ཀྱི་རིག་པ་སྔར་ལས་ཀྱང་ཇེ་གསལ་དུ་འགྲོ་ཞིང་།  ཐབས་དང་བཀོད་པ་མང་ཞིང་ཀྱ་ཀྱུའི་གཡོ་སྒྱུ་འཛོམས་པའི་ཨ་ཁུ་ཁྲོ་ཐུང་ལྟ་བུ་གཉིས་ཡིན། 

ནངས་དགོང་གི་དུས་སུ།  སློབ་གྲོགས་ཚོས་ཕྱི་རོལ་གྱི་རྩལ་སྦྱོང་ར་བར་རང་སྦྱོང་བྱེད་པའི་གོ་སྐབས་དང་བསྟུན་ནས།  ཁོ་གཉིས་སློབ་ཁང་དུ་འཛུལ་ཏེ།  གཞན་གྱི་འཆའ་སྒམ་གློངས་ནས་གསང་བའི་ཉིན་ཐོ་ཀློག་པ་དང་།  ཕྱི་ཉིན་པར།  སློབ་གྲོགས་ཡོངས་ཀྱི་སྔུན་ནས།  ཅིག་ཅིག་ཅིག་གིས་ཉིན་ཐོ་འདི་འདྲ་བྲིས་འདུག   ཉིག་ཉིག་ཉིག་གིས་ཡི་གེ་དེ་འདྲ་བྲིས་འདུག་ཟེར་ནས།  སློབ་གྲོགས་ཁ་ཤས་ཤིག  དོན་མེད་ངོ་ཚ་དང་ཅི་བྱ་གཏོལ་མེད་དུ་གཏོང་བ་ཡིན། 

གོ་ཐོས་ལྟར་ན།  ཡུལ་ལ་སོང་ནས་ས་རུབ་རྗེས་ཀྱང་།  ཁོ་གཉིས་ཁྱིམ་མཚེས་གཡས་གཡོན་གྱི་ཁང་ཐོག་དང་སྒོ་ཁ།  དྲ་ཁ་སོགས་སུ་འཇབས་ནས་སོང་སྟེ།  དེ་བ་ཚང་གི་ཅི་བཤད་གང་ལས་ཀྱི་བྱ་བ་ལ་ལྐོག་ལྟ་ལྐོག་ཉན་མང་པོ་བྱས་པས།  གཞན་གྱིས་ཁོ་གཉིས་འཛིན་བཟུང་བྱས་ནས་གཅར་རྡུང་བྱས་པ་མ་ཟད།   ཁྱིམ་མཚེས་ཕན་ཚུན་གྱི་བར་ལ།  སྡུག་མེད་སར་དཀའ་ལས་དང་།  གྱོད་མེད་སར་ཁ་མཆུ་མང་པོ་བསླངས་པ་རེད། 

ཉིན་ཞིག་ལ།  ཁོ་གཉིས་ཀྱིས།  ཞི་ལི་ཚོའི་སྤྱོད་ཁང་གི་གྱང་ངོས་སུ་ཁུང་བུ་ཞིག་བརྐོས་ཏེ།  ཕར་ངོགས་སུ་ཡོད་པའི་ཞི་མོ་ཚོའི་སྤྱོད་ཁང་ནང་དུ་ལྐོག་ལྟ་བྱེད་བཞིན་པ་དགེ་རྒན་བུད་མེད་ཅིག་གིས་མཐོང་བས།  ཁོ་གཉིས་འཛིན་བདག་ལ་སྤྲད་ཅིང་།  འཛིན་བདག་གིས་ཁོ་གཉིས་ལ་གོ་སྐོན་བློ་འགུགས་ཀྱི་བསླབ་བྱ་མང་པོ་གནང་བ་དང་།   ཉིན་དེའི་ཕྱི་དྲོར།  སློབ་གཙོས་སློབ་གྲྭའི་སློབ་མ་ཡོངས་རྫོགས་གཅིག་ཏུ་བསྡུས་ཏེ།  སློབ་མ་བཟང་བོ་ཞིག་ཅི་ལྟར་བྱེད་པའི་སྐོར་གྱི་གཏམ་བཤད་སྤེལ་སོང་། 

སློབ་གཙོས་བཤད་རྒྱུར།  "མི་བཟང་བོ་ཞིག་ཡོང་བར།  སློབ་སྦྱོང་ལས་ཀྱང་ཀུན་སྤྱོད་གལ་ཆེ་བ་རེད།  སློབ་སྦྱོང་གི་འབྲས་བུ་བཟང་བོ་ལོན་ཀྱང་།  ཀུན་སྤྱོད་མི་ལེགས་པའི་མི་ནི་རྩ་བ་དུག་དང་འབྲེལ་བའི་མེ་ཏོག་དང་འདྲ་ལ།  མི་དེ་འདྲ་ལག་ཆགས་རྗེས།  ང་ཚོའི་རྒྱལ་ཁབ་དང་མི་རིགས་ལ་གོ་མི་ཆོད་པ་མ་ཟད།  གནོད་པ་སྐྱེལ་མཁན་གྱི་འཇིགས་སྐུལ་རིང་ལུགས་པ་ཞིག་ཏུ་འགྱུར་བར་ཐེ་ཚོམ་མེད།"ཅེས་དང་།  "གཞན་གྱི་གསང་བ་སྐོར་ཞིག་ལ་ལྐོག་ལྟ་ལྐོག་ཉན་བྱེད་པ་ནི་ཁྲིམས་འགལ་ཡིན་པ་རེད།  དེ་ཁྲིམས་འགལ་ཡིན་དོན་ནི།  མི་རྣམས་ཀྱི་བདེ་སྐྱིད་སྐོར་ཞིག་གསང་བའི་ཐོག་ནས་ཀྱང་ཡོང་གིན་ཡོད།   ཁྲིམས་ལུགས་ཡག་པོ་དང་སྒྲིག་སྲོལ་ལེགས་པོ་ཞིག་ལ་བརྩི་སྲུང་བྱེད་པ་ནི།  རང་གཞན་ཀུན་ལ་བདེ་སྐྱིད་བསྐྲུན་པ་རེད།"ཅེས་སོགས་མང་པོ་གསུངས་པ་མ་ཟད།  "ཤིང་འཁྱོག་དྲང་ལ་ལེན་དགོས།  མྱི་འཁྱོག་ཁྲིམས་ལ་སྦྱོར་དགོས།"ཟེར་ནས།  ཁོ་གཉིས་ལ་འོས་འཚམ་གྱི་ཆད་པའང་བཅད་སོང་། 

དུས་དེ་ནས་བཟུང་།  ཁོ་གཉིས་ཀྱིས་ལྐོག་ལྟ་ལྐོག་ཉན་བྱེད་པའི་མ་རབས་ཀྱི་བྱ་བ་ཧ་ལམ་མ་བསྒྲུབས་པ་འདྲ་སྟེ།    མཐར་ཕྱིན་རག་བར་དུ།  ངས་དེའི་སྐོར་གྱི་སྐད་ཆ་ཅི་ཡང་མ་གོ    ངས་བལྟས་ན།  མི་ལ་བཅའ་ནི་དགོས།   ཤིང་ལ་གཞོག་ནི་དགོས། ཟེར་བ་ནི་ངོ་མ་རེད་ལ།  ཁོ་གཉིས་ཀྱང་སྔར་བྱས་རྒྱབ་བསྐྱུར་དང་།  ད་བྱེད་པང་ལེན་བྱེད་ཕོད་པའི་བྱིས་པ་ཡ་རབས་གཉིས་རེད་སྙམ།  

                               ཕུ་བོའི་ཉལ་ཁང་ནང་གི་མཐོང་ཐོས། 

ལོ་རིམ་གསུམ་པར་བུད་པ་ནས་བཟུང་།    ང་ཡང་སློབ་གྲྭ་ནས་ཞག་སྡོད་བྱས་ཤིང་།  མཚམས་ལ་རེར།  དམའ་འབྲིང་གསུམ་པ་ཡིན་པའི་ཕུ་བོའི་ཉལ་ཁང་དུ་དགོང་མ་འགའ་རེ་ཉལ་བ་ཡིན།  ཕུ་བོ་ཟླ་བ་ནི་ངའི་ཨ་མའི་མིང་བོའི་ཞི་ལི་ཡིན་ལ།  ཁོ་རང་ང་ལས་ལོ་གསུམ་གྱིས་ཆེ་ཞིང་སློབ་སྦྱོང་ལ་བཟང་བ་མ་ཟད།  གཏམ་ཀུ་རེ་བཤད་ན་ཐོགས་པ་མེད་ཅིང་།  གླུ་ལ་ཡུས་ཕྱོགས་ལ་བྱང་མ་ཡིན་པ་དེ་ཁོའི་ཁྱད་ཆོས་ཤིག་ཡིན།

ཁོ་ཚོའི་ཉལ་ཁང་དུ་མི་བརྒྱད་ཡོད་ཅིང་།  ཉལ་ཁང་ནང་གི་གཡས་གཡོན་དུ་ཐོག་བརྩེགས་ཡིན་པའི་ཉལ་ཁྲི་གཉིས་རེ་བཞག་འདུག   དྲ་མའི་ཁ་རུ།  ངའི་ངོ་དགོང་གི་ཆེ་ཆུང་ཙམ་ཡོད་པའི་ངོ་ལྟ་ཞིག་བཞག་འདུག་ལ།  དེ་ནི་ཁོ་ཚོས་ཉམས་སངས་གཏོད་བྱེད་ཀྱི་ཡོ་བྱད་མེད་དུ་མི་རུང་བ་ཞིག་རེད།   དགོང་སྦྱོང་གྲོལ་ནས་ཉལ་ཁང་དུ་ཐོན་པ་ན།  ཁོ་ཚོས་སོ་དང་རྐང་བ།  མགོ་བོ་སོགས་བཀྲུས་རྗེས་ངོ་ལྟ་འཕྲོག་རེས་བྱས་ནས་མགོ་སྐྲ་ཡང་ཡང་བཤད་དེ་ཉམས་སངས་སྣ་ཚོགས་བཏོད་པ་ཡིན།  དེ་དང་ཞོར་དུ།  ཉིན་མོ་དེར་བྱུང་བའི་སློབ་ཁང་གི་དོན་དག་སྣ་ཚོགས་ལབ་གླེང་བྱེད། 

ཁོ་ཚོའི་སྐད་ཆ་མང་ཆེ་བ་ནི།  སློབ་ཁྲིད་དང་སློབ་གསེང་དབར་གྱི་བྱ་བ་ཙག་ཙིག་གི་སྐོར་ཡིན་ལ།  དེའི་ནང་གི་སློབ་གྲོགས་རེ་གཉིས་ཀྱིས་ཁ་བརྡ་མང་བོ་མི་བྱེད་པར།  ཉིན་དེའི་སློབ་ཁྲིད་ཀྱི་ནང་དོན་ལ་བསྐྱར་སྦྱོང་བྱེད་པ་དང་།  རྒྱ་བོད་དབྱིན་གསུམ་གྱི་དཔེ་ཆ་སྣ་ཚོགས་ལ་ལྟ་བ་རེད།  མཚམས་ལ་རེར།  ཁོ་ཚོས།  དགེ་རྒན་སུ་ཞིག་ནི་ཁོག་རྒྱ་ཆེ་བ་དང་སུ་ཞིག་ནི་སྤྲོ་ཐུང་ཡིན་པ།  སུ་ཞིག་གིས་གཅར་རྡུང་བྱེད་པ་དང་སུ་ཞིག་ལ་སྙིང་རྗེ་ཆེ་བ་སོགས་ལབ་ཡོང་།  ཁོ་ཚོས་བཤད་ན།  ཁོ་ཚོའི་དབྱིན་ཡིག་དགེ་རྒན་ནི།  སྤམ་ཆེ་བ་རྒྱ་བཟའ་ཀོང་ཇོ་འདྲ་བ་དང་།  སྤྲོ་ཐུང་བ་ཨ་སྟག་ལྷ་མོ་འདྲ་བ་ཞིག་ཡིན་ཟེར།  སང་ནངས་དབྱིན་ཡིག་གི་ནངས་སྦྱོང་ཡིན་པའི་དགོང་མོར།  ཁོ་ཚོར་ངོ་ལྟ་འཕྲོག་རེས་བྱས་ནས་ཉམས་སངས་རྒྱག་ཁོམ་མེད་པར།  དབྱིན་ཡིག་གི་མིང་ཚིག་མང་བོ་བློར་འཛིན་བྱེད་པ་རེད།

ཡང་སྐབས་སྐབས་སུ།  ཁོ་ཚོས་གླུ་དང་གླུ་དབྱངས་བླངས་ནས་སེམས་པ་སྐྱིད་ལ་བསྐུར་ཞིང་།  ངའི་ཕུ་བོ་ནི་ཁོ་ཚོའི་ནང་གི་རྩེ་གྲ་ཡིན་པ་རེད།  ངའི་ཕུ་བོ་དེ་གླུ་དབྱངས་ལེན་པ་ལས་ཀྱང་།  དམངས་གླུ་དང་ལ་ཡུས་བླངས་ན་ཧ་ཅང་ངར།  ངས་ཁོས་བླངས་པའི་གླུ་དང་ལ་ཡུས་མང་བོ་ཞིག་གི་ནང་དོན་ཡག་པོ་ཞིག་མ་གོ་ཡང་།  དེ་ལས་རེ་གཉིས་ཤིག་ངས་ད་ལྟའང་ད་དུང་བརྗེད་མེད་པ་ནི།  དམངས་གླུ་དཔེར་ན།

     "སྟོད་འདུ་ཁང་ཆེན་མོའི་ཁྲི་སྟེང་ན།།
             རྗེ་བླ་མ་ན་བཟའ་སེར་བོ་ཅན།།
             ཆོས་ལམ་རིམ་གསུང་ནོ་ཡག་རེ་ལྟོས།།
             གན་ཡང་ཡང་གསུང་གི་སྨོན་ལམ་འདེབས།།

      སྨད་གྲོང་རྡལ་དཀྱིལ་གྱི་སློབ་གྲྭ་ན།།
              རྒན་དམ་པ་ཐུགས་རྒྱུད་སྙིང་རྗེ་ཅན།།
              གསུང་སློབ་ཁྲིད་བྱས་ནོ་བཟང་རེ་ལྟོས།།
              གན་ཡང་ཡང་བཟང་གི་སྨོན་ལམ་འདེབས།།

      བར་གཡང་ཁྱིམ་ཚང་གི་གོ་ཁ་ན།།
              ཡུལ་ཕ་མ་ཤེས་རྒྱ་ཁོག་རྒྱ་ཅན།།
              ནང་བུས་ཕྲུག་འཛོམས་ནོ་སྐྱིད་རེ་ལྟོས།།
              གན་ཡང་ཡང་སྐྱིད་པའི་སྨོན་ལམ་འདེབས།།" ཞེས་དང་།  

ལ་ཡུས་བླངས་པ་དཔེར་ན།

      "བྱ་ཁུ་ལོ་རྒྱ་གར་ཡུལ་ནས་སྡུག།
              བྱེའུ་འཇོལ་མོ་རྒྱ་རྫོང་ནགས་ནས་སྡུག།
              ཕྱོགས་ཕྱོགས་ནས་སྡུག་ནོ་དོན་མེད་རེད།།
              ཤིང་སྡོང་མགོ་གཅིག་ལ་སྨོན་ལམ་འདེབས།།

      མ་ཁྱོད་ཀྱིས་སྡེ་ཆེན་སྟོད་ནས་དྲན།།
              ཕོ་ང་ཡིས་སྡེ་ཆེན་སྨད་ནས་དྲན།།
              ཕྱོགས་ཕྱོགས་ནས་དྲན་ནོ་དོན་མེད་རེད།།
              ཁྱིམ་བཟའ་ཚང་གཅིག་ལ་སྨོན་ལམ་འདེབས།།" ཞེས་དང་།

ཡང་ལ་ཡུས་གཞན་ཞིག་ནི་དཔེར་ན།

      "ནགས་རྒྱ་རྫོང་ནང་གི་གསོམ་དཀར་ཁྱོད།།
              བྱ་ཁུ་ལོའི་ཉིན་དྲན་མཚན་དྲན་ཡིན།།
              དྲན་བཏང་ན་འཕུར་འདོད་མི་སྐྱེ་གི།
              རིག་བཏང་ན་འགྲོ་འདོད་མི་ཡོང་གི།

       ས་སྡེ་ཆེན་གྲོང་གི་པད་མ་མཚོ།།
               བུ་ང་ཡི་ཉིན་དྲན་མཚན་དྲན་ཡིན།།
               དྲན་བཏང་ན་གཉིད་རྒྱུ་མི་ཡོང་གི།
               རིག་བཏང་ན་ཟ་མ་མི་དགོས་ཀི།" ཞེས་པའོ།།

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།