གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདག་གི་བྱིས་པའི་ལོ་རབས།(བཅུ་གཉིས་པ)

2017-03-15 18:40:06 གཞི་རིམ་པ། ཀློག་གྲངས། མཆན ཡོད།

 
                           སྨན་པའང་ཡིན་པའི་དགེ་རྒན་ཞིག

    ང་རང་བོད་ཡིག་དང་དབྱིན་ཡིག་མ་ཟད།   ད་དུང་ཆེས་དགའ་བའི་བསླབ་བྱ་གཞན་ཞིག་ཡོད་པ་ནི་སྐྱེ་དངོས་ཡིན།   སྐྱེ་དངོས་དགེ་རྒན་གྱི་མིང་ལ་མཁའ་མོ་ཆེ་རིང་ཟེར་ཞིང་།   མོ་ནི་གཟུགས་གཞི་ཆེ་ལ་སྐྲ་རིང་བ།   རྣ་གདོང་དང་མཁུར་ཚོས་འབུར་ཞིང་མིག་གཉིས་སྐར་ཆེན་ལྟར་འཚེར་བ།   རྒྱབ་གཞུང་ཆེ་ཞིང་ཡངས་ལ་མགོ་རྐང་མཇིང་གསུམ་སྦོམ་པ་སྟེ།   མདོར་ན།   སྐད་གདངས་ལ་བལྟས་ན་བུད་མེད་ཅིག་དང་གཟུགས་པོའི་ཚུགས་ཀར་བལྟས་ན་སྐྱེས་པ་ཞིག་དང་གཉིས་སུ་མེད།  

   མོས་སློབ་ཁྲིད་བྱས་པ་ནི་ཧ་ཅང་སྤྲོ་སྣང་ལྡན་པ་དང་།   སློབ་ཡུན་ཇི་ལྟར་རིང་ཡང་ཉོབ་སྣང་དང་སུན་སྣང་གང་ཡང་མེད་པར།   རྩེད་མོ་སྣ་ཚོགས་དང་མཚར་སྣང་གིས་ཕྱུག་པའི་མུ་འབྲེལ་བརྙན་འཕྲིན་ཞིག་ལ་ལྟ་བ་དང་འདྲ།  མོ་ལ་ད་དུང་ཁྱད་ཆོས་གཞན་ཞིག་མངའ་བ་ནི།   སློབ་ཁྲིད་ཀྱི་སྐབས་སུ་ཀུ་རེ་རྩེད་མོ་རྩེ་ཞིང་སློབ་གྲོགས་ཡོངས་ལ་འདྲ་མཉམ་གྱི་ལྟ་སྟངས་ཡོད་པ་དེ་ཡིན།  

   མོ་རྒྱུན་དུ་སློབ་ཆས་སྣ་ཚོགས་བཀོལ་ནས་སློབ་ཁྲིད་བྱེད་པར་དགའ།   མོའི་སློབ་ཁྲིད་ཀྱི་སྐབས་སུ།   མ་ནེ་ལག་པར་ཁེན་ནས་གཉིད་ཅོག་རྒྱག་མཁན་དང་མགོ་བོ་ཅོག་ཙེར་བསྙེས་ནས་སྔུར་བ་འཐེན་མཁན།   ཕན་ཚུན་ལ་འཕྲིན་ཡིག་སྐུར་མཁན་སོགས་ཧ་ལམ་མེད་ལ།   གལ་སྲིད་རེ་གཉིས་བྱུང་ཡང་།   རྡོ་གཅིག་གིས་བྱ་བརྒྱ་དགུང་ལ་བདའ།  གཏམ་གཅིག་གིས་འཛམ་གླིང་དབང་དུ་བསྡུ་ཟེར་བ་ལྟར།   མོས་ཀུ་རེ་བརྩེས་ནས་རྨི་ལམ་དཀྲོགས་ཤིང་།  ཁ་མཚར་བཤད་ནས་ཡིད་སེམས་སྤྲོ་རུ་འཇུག

    སྐྱེ་དངོས་སློབ་དེབ་ཀྱི་སྟེང་དུ་རྩི་ཤིང་དང་འདབ་ཆགས་སོགས་ཀྱི་རི་མོ་སྣ་ཚོགས་ཡོད་ཅིང་།   དེ་དག་ནི་ཚོན་མདངས་རྣམ་པར་བཀྲ་ཞིང་བལྟས་ན་མིག་ལ་མཛེས་པ་ཞིག་རེད།   སྒོས་སུ།   མིའི་ལུས་ཕུང་གི་རི་མོ་ཆ་ཚང་ཞིག་ཡོད་པ་དེའི་སྟེང་ནས།   ངས་ང་ཚོའི་མིའི་རིགས་ཀྱི་ལུས་ཕུང་གི་གྲུབ་ཚུལ་དང་ཁྲག་གི་འཁོར་རྒྱུག    གཅིག་སྐྱག་གི་འབབ་ཚུལ།   ཨ་མར་ཕྲུ་གུ་ཆགས་ཚུལ་སོགས་རྟོགས་ཤིང་།   དེ་མ་ཟད།  དགེ་རྒན་མཁའ་མོ་ཚེ་རིང་ལགས་ཀྱིས་ང་ཚོ་ད་དུང་སྐྱེ་དངོས་འགྲེམ་སྟོན་ཁང་དང་།   ཚོད་ལྟ་ཁང་དུ་ཁྲིད་དེ་མིའི་རུས་ཀྲང་སྐོར་གྱི་རི་མོ་སྣ་ཚོགས་ལ་ལྟ་རུ་བཅུག   ལྷག་ཏུ།   དགེ་རྒན་ལགས་ཀྱི་འགྲེལ་བཤད་བྱས་པ་ལ་བརྟེན་ནས།   ངས་ཐོག་དང་པོར།   སློབ་གྲོགས་བུ་མོ་ཚོར་མོ་ལོ་བཅུ་གཉིས་བཅུ་གསུམ་ནས་བཟུང་ཟླ་མཚན་ཞེས་པ་ཞིག་འབབ་རྒྱུ་ཡོད་པ་གསར་དུ་ཤེས།

    ཐེངས་དང་པོར།   དགེ་རྒན་མཁའ་མོ་ཚེ་རིང་ལགས་ཀྱིས་ཕོ་མོ་གཉིས་ཀྱི་ལུས་ཕུང་གི་གྲུབ་ཚུལ་དང་ཟླ་མཚན་འབབ་ལུགས་སོགས་འཆད་སྐབས།   སློབ་གྲོགས་ཚོ་ངོ་ཚ་ནས།   ལག་པས་ཁ་སྣ་བཏུམ་ནས་གད་མོ་དགོད་པ་དང་ངོ་གདོང་དམར་བོར་གྱུར་ནས་སྐད་ཆ་མི་ཤོད་པ་ཡོད་མོད།   མོས་འགྲེལ་བཤད་མང་བོ་བྱས་པ་དང་བསྟུན་ནས།  སློབ་གྲོགས་ཚོའང་རིམ་གྱིས་གོམས་ལོབས་སུ་སོང་ཞིང་།   དགེ་རྒན་ལགས་ལ།   དྲི་བ་སྣ་ཚོགས་ཁ་འདྲི་གཏིང་འདྲི་བྱེད་མཁན་ཇེ་མང་དུ་གྱུར།  

       ལོ་རིམ་དྲུག་པའི་སྐབས་སུ།  ཟླ་རེའི་ནང་དུ།  དགེ་རྒན་མཁའ་མོ་ཚེ་རིང་ལགས་དང་སློབ་གྲོགས་ཞི་མོ་ཚོར་"གསང་བའི་ཚོགས་འདུ་"ཞིག་འཚོགས་རྒྱུ་ཡོད།    ཐོག་མའི་དུས་སུ།    ང་ཚོ་སློབ་གྲོགས་ཞི་ལི་ཚོས།   "གསང་བའི་ཚོགས་འདུ་"དེའི་"དགོངས་དོན་"ལ་ཚོད་དཔག་སྣ་ཚོགས་བྱས་ཤིང་།   སློབ་གྲོགས་ལ་ལས།   "ཁོ་ཚོས་བུད་མེད་རྒྱལ་ཁབ་ཅིག་གཟུག་འདོད་པ་རེད།"ཅེས་དང་།   ཡང་ལ་ལས།   "ཁོ་ཚོས་ང་ཚོ་བསྐྱུར་ཏེ།   ཚོགས་འདུ་ཁང་ན་གློག་བརྙན་ཡག་པོ་ཞིག་ལ་ལྟ་བཞིན་འདུག"ཟེར་བ་སོགས།  ཀུ་རེ་དང་ཚོད་དཔག་གི་སྐད་ཆ་སྣ་ཚོགས་བཤད་མོད།    རྗེས་སུ་སློབ་གྲོགས་བུ་མོ་ཚོས་བཤད་པ་ལྟར་ན།    ཚོགས་འདུའི་ནང་དོན་གཙོ་བོ་ནི་གསང་བ་ཞིག་ཅི་ཡང་མ་ཡིན་པར།    བུ་མོ་ཚོར་ཟླ་མཚན་འབབ་ལུགས་དང་དེ་ལ་མཉམ་འཇོག་བྱེད་ཚུལ།  གཙང་ཤོག་འཇོག་སྟངས་སོགས་ཏེ།   མདོར་ན།   ལུས་ཕུང་བདེ་ཐང་གི་སྐོར་ནས་སློབ་ཁྲིད་ཅིག་བྱས་པ་རེད་འདུག

      རྗེས་ནས་ཤེས་གསལ་ལྟར་ན།    དགེ་རྒན་མཁའ་མོ་ཚེ་རིང་ལགས་ནི།   ང་ཚོའི་སློབ་གྲྭར་མ་ཡོང་བའི་སྔོན་དུ་སྨན་པ་ཞིག་རེད་ཟེར།   དགེ་རྒན་གྱི་ཁྱད་ཆོས་འཛོམས་ལ་སྨན་པའི་ཤེས་བྱའང་ལྡན་པའི་མོ་ནི་དེ་ལྟར།    སློབ་མའི་སློབ་སྦྱོང་དང་བདེ་ཐང་གཉིས་ཀ་གཙིགས་སུ་འཛིན་མཁན་གྱི་དགེ་རྒན་དཔེ་མེད་ཅིག་ཡིན་མོད།  གཞུག་ནས།   མོ་རང་གི་ཁྱོ་གའི་རེ་བ་ལྟར་ལས་གནས་སྤར་ཏེ་ལས་ཁུངས་གཞན་ཞིག་ཏུ་བུད་སོང་བས།   དུས་དེ་ནས།   ངས་ཁོ་མོའི་གྲིབ་མ་ཙམ་ཡང་མཐོང་མ་མྱོང་མོད།   ཁོ་མོས་ཀུ་རེ་རྩེ་སྐབས་ཀྱི་རྣམ་འགྱུར་དང་ཚུགས་ཀ་དེ་དག   མཚམས་ལ་རེར།   ངའི་ཡིད་སེམས་ཀྱི་གངས་དཀར་ངོགས་སུ་ཝ་ལེར་ཝ་ལེར་དྲན་ཡོང་།  

                              སྐྱོན་མི་འདུག་སྙམ།  

     ཉིན་ཞིག་གི་བོད་ཡིག་སློབ་ཁྲིད་ཀྱི་སྐབས་སུ།   དགེ་རྒན་གྱིས་ང་ཚོར།   བོད་མཁས་པ་ཟེར་བའི་རྩོམ་པ་པོ་གྲགས་ཅན་ཞིག་གི་ལོ་རྒྱུས་བཤད་པ་ཡིན།   ཁོས་བཤད་རྒྱུར།  "ཁོང་གི་མཚན་དངོས་ལ་མི་ཕམ་དགེ་ལེགས་རྣམ་རྒྱལ་ཟེར་ཞིང་།  རྒྱལ་དབང་ལྔ་བའི་སྐབས་ཀྱི་མཁས་པ་ཞིག་རེད།  ཉི་མ་ཤིན་ཏུ་དྲོ་བའི་ཉིན་ཞིག་ལ།  རྒྱལ་དབང་ལྔ་བས་རབ་གསལ་ཁ་རུ་ཇ་འཐུང་ཞོར་ཉི་མར་ལྡེ་ནས་ཡོད་སྐབས།  མི་ཕམ་དགེ་ལེགས་རྣམ་རྒྱལ་ཁོང་ཚང་ལ་མཇལ་དུ་ཡོང་བ་རེད།"

    "མི་ཕམ་དགེ་ལེགས་རྣམ་རྒྱལ་གྱིས།  ཁ་བཏགས་དཀར་པོ་ཞིག་མཐོ་རུ་བཏེགས་ནས་མཇལ་ཁ་ཞུས་རྗེས།   ཁོང་གཉིས་མཉམ་དུ་བསྡད་ནས་གསུང་གླེང་སྣ་ཚོགས་མཛད།   གསུང་གླེང་མང་བོ་བྱས་རྗེས།   རྒྱལ་དབང་ལྔ་བས།  'ངས་སྔོན་ཆད་ཁྱོད་རང་མཁས་པ་ཞིག་རེད་ཅེས་གོ་མྱོང་།  དེ་རིང་ཁ་བརྡ་བྱས་ནས་བལྟས་ན།  དངོས་གནས་དྲང་གནས་ཀྱི་མཁས་པ་ཞིག་རེད།  ཁྱོད་ཀྱི་མིང་ལ་བོད་ཡུལ་གྱི་མཁས་པའམ།  ཡང་ན་བོད་མཁས་པ་ཟེར་ན་འགྲིག'ཅེས་གསུངས་པ་ན།   མི་ཕམ་དགེ་ལེགས་རྣམ་རྒྱལ་གྱིས་ཉམ་ཆུང་གི་བཟོ་ལྟ་སྟོན་ཞོར།  'དེ་འདྲ་ཞིག་ག་ལ་ཡིན།  ང་ནི་བོད་ཡུལ་གྱི་མཁས་པ་ཞིག་མ་ཡིན་པར།  བོད་ཡུལ་ན་མང་བོ་ཡོད་ཀྱང་།   མཚན་སྙན་གྲགས་མེད་པའི་སྲོག་ཆགས་བོང་བུ་ལྟ་བུ་ཞིག་ཡིན།'ཞེས།  ཁེངས་སྐྱུང་གི་སྒོ་ནས་གསུང་ལན་ཞུས་པ་རེད།"

  "ངོ་མ་བཤད་ན།  མི་ཕམ་དགེ་ལེགས་རྣམ་རྒྱལ་ལགས་ནི།   སྐབས་དེར་བོད་ཡུལ་ན་མིང་དུ་གྲགས་པའི་མཁས་པ་ཆེན་པོ་ཞིག་རེད་མོད།  ཁོང་ལ་མཁས་པ་ཡིན་པའི་ང་རྒྱལ་དང་ཁེངས་དྲེགས་ཅི་ཡང་མེད་པར།   ནམ་རྒྱུན་ཁེངས་སྐྱུང་གི་སྒོ་ནས་བྱ་བ་སྒྲུབ་མཁན་ཞིག་རེད།  རྗེས་སུ།  ཁོང་གིས་དཔེ་ཆ་རྩོམ་སྐབས་ཀྱང་ཁེངས་སྐྱུང་གི་སྒོ་ནས།   དཔེ་ཆའི་འགོ་ཤོག་གི་སྟེང་ལ།  བོང་མཁས་པ་མི་ཕམ་དགེ་ལེགས་དགེ་ལེགས་རྣམ་རྒྱལ་ཞེས་བྲིས་པ་རེད།   འོན་ཀྱང་།  ཁོང་ཉིད་སྐུ་གཤེགས་རྗེས་ཁོང་གི་སློབ་མ་དང་མཁས་པ་རྣམས་ཀྱིས།  བོང་མཁས་པ་ཞེས་པ་ཞིག་ག་ལ་ཡོད།  འདི་ཕལ་ཆེར་ཡིག་ནོར་ཡིན་རྒྱུ་རེད་སྙམ་ནས།   བོང་གི་རྗེས་ཡིག་ང་ཡིག་གི་ཚབ་ཏུ་ད་ཡིག་ཅིག་བྲིས་ཏེ།  བོད་མཁས་པ་ཞེས་བཅོས་ཤིང་།   དུས་དེ་ནས་བཟུང་།  ཁོང་གི་མཚན་ལ།   བོད་མཁས་པ་མི་ཕམ་དགེ་ལེགས་རྣམ་རྒྱལ་ཞེས་གྲགས་པ་རེད།"ཟེར།  

   དགེ་རྒན་གྱིས་ང་ཚོར་ཁོང་གི་ལོ་རྒྱུས་དེ་འདྲ་ཞིག་བཤད་དོན་ནི།   ང་ཚོར་ནུས་པ་དང་ཡོན་ཏན།  ཐུན་མིན་གྱི་ཁྱད་ཆོས་དང་བྱིངས་ལས་འཕགས་པའི་བློ་རིག་ཅི་འདྲ་ཡོད་ཀྱང་།   ང་རྒྱལ་དང་ཁེངས་དྲེགས་ཡོད་མི་འོས་པར་ཕན་ཚུན་བརྩི་བཀུར་དང་ཁེངས་སྐྱུང་བྱེད་འོས་པ་དེ་རེད།  

    དེ་ཡང་ངོ་མ་རེད།  རང་གི་ནུས་པས་གཞན་ལ་སྲིད་ཞུ་སྒྲུབ་པ་དང་འགན་ཁུར་དང་ལེན་བྱེད་མཁན་ཞིག་ཡིན་ཚེ།  ང་ཚོ་ཆེ་ཆེ་གྲགས་གྲགས་ཀྱི་མཚན་སྙན་ཅི་ཡང་མེད་པའི་བོང་བུ་ལྟ་བུ་ཞིག་བྱས་ཀྱང་སྐྱོན་མི་འདུག་སྙམ།   ཁ་དཔེ་ལ།   བོང་སྐྱ་ལི་ཟོག་གི་མཐའ་མ་ཟེར།   འདང་བརྒྱབ་ན་འཁོར་བའི་གཞི་མ་ཡིན་ཟེར་བ་ལྟར།  རྣ་འབྱོག་ལྷ་བ་ལྷབ་བེ།   ཨོང་ཤ་ལྡ་མ་ལྡེ་མེར་རང་གི་ལས་ཀ་ལ་གཡོ་སྒྱུ་དང་སུན་སྣང་གང་ཡང་མེད་པར།  དུས་བཞིར་འབད་བརྩོན་བྱེད་མཁན་ནི་ང་རྒྱལ་གྱི་རྭ་རྩེ་རྡར་བའི་འབྲོང་གཡག་དང་།  ཁེངས་དྲེགས་ཀྱི་མགོ་འཕང་སྟོད་པའི་རྟ་ཕོ་སོགས་གང་ཡང་མ་ཡིན་པར།  སྙན་གྲགས་ཅི་ཡང་མེད་པའི་སྤྱིར་བཏང་གི་བོང་བུ་ཡིན་པའོ།།  


རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།