ཨ་མ་ལགས་ཀྱིས་སྐད་འཕྲིན་ཕྱེས་ནས་ཟླ་འགའ་ལས་འགོར་མེད་མོད་ད་ལྟ་པར་དང་བརྙན་ཐུང་ཡང་སྐུར་ཤེས་ཀི་འདུགཨ་མས་ང་ལ་ཁ་པར་ལས་ཁང་པ་གསར་བ་དེ་འགྲུབ་རྗེས་ཁང་རྙིང་གི་མཆོད་ཁང་དེ་ཁྱོད་ཀྱི་དཔེ་ཁང་བྱས་ཆོག་ཟེར་འདི་ལ་ཕ་མ་གཉིས་གྲོས་བསྡུར་ཡང་བྱས་ཡོད་ངེས། ངས་ཕ་ཡུལ་དུ་འགྲོ་དུས་གྱང་ངོས་ལ་སྦྱོར་བའི་སྒྱུ་འཕྲུལ་རི་མོ་འགའ་ཤས་དང་དཔེ་ཁང་གསར་བ་ལ་ཁ་ཕབ་བྱེད་དུ་དཔེ་ཆ་གསར་བ་འགའ་ཡང་ཆེད་དུ་ཉོ་དགོས་བསམ། སྒེའུ་ཁུང་ཁ་གཏད་ཀྱི་ཕྱི་རོལ་དུ་ལྕང་མ་ཞིག་འཛུགས་དགོས་དྲན། ང་ལོ་གཅིག་གི་ནང་ཕ་ཡུལ་དུ་ཐེངས་གཅིག་གཉིས་ཙམ་ལས་ལོགས་མི་ཐུབ་མོད་དབྱར་ཁ་ཐོན་ཐུབ་ན་ལྕང་སྡོང་དེར་ལོ་འདབས་རྒྱས་ནས་མཐོ་རུ་འཕགས་ཚེ་ངས་དེའི་ཉི་གྲིབ་འོག་ནས་དཔེ་ཆར་ལྟ་བ་དང་གྲོགས་པོ་རེ་གཉིས་མགྲོན་དུ་ཡོང་ཚེ་དེའི་བསིལ་གྲིབ་འོག་ནས་ལྷོད་ལྷོད་ངང་ཁ་བརྡ་བྱས་ཚེ་སྐྱིད་རྒྱུ་རེད་བསམ། ཨ་མར་སྐད་ལན་ཞིག་ཀྱང་མ་བཞག་པའི་བར་གླགས་དེར་ངའི་ཡིད་ལ་འདི་འདྲིའི་མང་པོ་ཞིག་འཕྲོ་རིམ་འཕྲོར་དྲན་སོང་།ང་ནི་སྟོང་བསམ་རང་ལུགས་པ་ཞིག་ཡིན་ཡང་སྲིད་དེ་མ་མཐའ་ཡང་རང་ཉིད་དགའ་བའི་དོན་དག་ཞིག་ཐོས་ཚེ་དེའི་གཞུག་གི་དོན་དག་མང་པོ་ཞིག་ལ་ཆེད་དུ་བསམ་བློ་བཏང་བ་དེ་འདྲ་མིན་ནའང་དེའི་ནང་ཞིག་ལ་འཁོར་འགྲོ་གི་འདུག་ལ་མཚམས་དང་མཚམས་སུ་གཉིད་ཀྱང་ཡོང་མི་ཐུབ་པའི་ཚོད་དུ་ཡོད། འདི་ནི་ང་ལ་མཚོན་ན་དོན་དག་གསར་བ་ཞིག་ཀྱང་མིན་དེ་དེང་མ་སློབ་ཆུང་ན་ཡོད་དུས་ཀྱང་འཚོགས་ཐུན་རྣམས་སུ་གང་ཞིག་ཏུ་འདང་བརྒྱབ་ནས་འཚོགས་ཐུན་རེ་རེ་གར་སོང་མ་གོ་དུས་མང་ལ་མཚམས་རེར་འཚོགས་ཐུན་གཅིག་གི་དུས་ཚོད་ཀྱིས་ཀྱང་མ་འདང་བར་འཚོགས་ཐུན་རྗེས་མར་མུ་འབྲེལ་གྱི་ཚུལ་དུ་འདང་རྒྱག་གི་རེད།སྐབས་དེའི་འདང་རྒྱག་ཕྱོགས་ནི་སློབ་གྲོགས་བུ་མོ་ཞིག་ཀྱང་མི་ཐུབ་པའི་རང་ཉིད་གློ་བུར་དུ་དཔའ་བོ་ཞིག་ཏུ་གྱུར་ནས་སློབ་གྲྭའི་ནང་ནས་དཔའ་རྟགས་མང་པོ་ཞིག་བཞག་པའི་སྐོར་ལ་བྱུང་རིམ་རྙོག་འཛིང་ཅན་དང་གསོན་ཉམས་ལྡན་པའི་སྐོར་ལ་ཞིབ་ཕྲའི་སྒོ་ནས་འདང་རྒྱག་དགོས་ཀི་རེད།མཚམས་རེར་འཚོགས་ཐུན་སྐབས་བསམ་གཞིག་གི་ཕུག་པ་གཏིང་ནས་གཏིང་དུ་བསྐོར་ཏེ་གདོས་བཅས་ཤ་ཁྲག་གི་ཕུང་པོ་རྦད་དེ་སློབ་ཁང་དུ་གད་སྙིགས་བཞིན་བསྐྱུར་ཏེ་རྟོག་བཟོའི་འཇིག་རྟེན་དེ་རུ་སླེབས་ནས་དཔའ་རྟགས་མང་པོ་གཅིག་རྗེས་གཉིས་མཐུད་ཀྱིས་འཇོག་དང་འཇོག་བཞིན་པའི་སྐབས་སུ་གློ་བུར་དུ་དགེ་རྒན་གམ་ལ་ཡོང་བའང་མ་ཚོར་བར་འགྲམ་པའི་ངོས་གང་ཞིག་སྦུད་ལྷོག་གེར་བུད་འགྲོ་དུས་ཀྱང་ཡོད།ཡང་ན་ཁྲིད་སྟེགས་ཐོག་གི་དགེ་རྒན་གྱིས་སམ་ཕྱིས་སམ་ས་སྨྱུག་གཡུག་ཏེ་ང་ནི་སྐར་མའི་གོ་ལ་གང་ཞིག་གི་ཐོག་ནས་འདྲེད་ཤུད་བརྒྱབ་ཏེ་གློ་བུར་དུ་གང་ཞིག་ཏུ་ལྕད་སེ་ལྷུང་སོང་བ་ལྟ་བུའི་དུས་ཀྱང་ཡོད།ཡིན་ན་ཡང་ད་ཐེངས་ཨ་མ་ལགས་ཀྱིས་བསྐུར་བའི་པར་དེ་ནི་ཁང་རྙིང་གི་སྐོར་མ་ཡིན་ལ་པར་འདིས་ཀྱང་ང་རང་གཞུག་གི་འཆར་གཞིའི་དྲ་རྒྱ་མང་པོ་ཞིག་གི་ནང་དུ་མ་ཚུད་པར་དེ་ལས་ལྡོག་སྟེ་མི་ལོ་བཅུའི་སྔོན་གྱི་ངའི་བྱིས་དུས་ཀྱི་འཚོ་བའི་པང་དུ་ཡུན་གྱིས་ཁྲིད་སོང་། པར་འདི་ལ་མ་མཐའ་ཡང་ང་རང་སྒེར་ངོས་ནས་བཤད་ན་གསར་ལམ་ཁག་ནས་མཐོང་དང་མཐོང་བཞིན་པའི་གནའ་བོའི་བང་སོ་དང་རིག་དངོས་གསར་རྙེད་ཁྲོད་ཀྱི་ལོ་རྒྱུས་རིན་ཐང་ལྟ་བུའི་ཕྱིར་དྲན་གྱི་རིན་ཐང་ཞིག་ཅིས་ཀྱང་ཡོད། སྐབས་དེ་དུས་ཀྱི་གཏམ་རྒྱུད་རེ་རེ་བཞིན་ཆུང་དུས་བུར་ཤོག་མཐོང་ན་ལྕེ་ཐོག་ལ་ཞིམ་མངར་གྱིས་འཁྱུལ་ཡོང་བའི་བུ་རམ་གྱི་བྲོ་བ་ནང་བཞིན་ཡིད་ངོས་སུ་ཞིམ་མངར་གྱིས་འཁྱུལ་ཡོང་བ་ཞིག་རེད།

　　འདི་ནས་ལུགས་ལྡོག་གིས་བརྩིས་པའི་མི་ལོ་བཅུ་ཙམ་གྱི་སྔོན་དུ་ང་ལོ་དགུ་དང་ངའི་ཕུ་བོ་ལགས་ལོ་ན་བཅུ་ཙམ་ཡིན། སྐབས་དེར་ངེད་ཀྱི་ཨ་ཅེ་ལ་མཱན་ཐོ་ལེན་ཞིག་ཡོད། དེ་ནི་ཁྱིམ་གྱི་མཐོ་ས་ཞིག་ཏུ་བཀལ་ཡོད། མ་མཐའ་ཡང་ངའི་ལག་པས་ཐུག་མི་ཐུབ་ས་ཞིག་ཏུ་བཀལ་ཡོད་ཤག་ཤག་ཡིན། སྐབས་དེར་ང་གླུ་ལེན་རྒྱུར་དགའ་པོ་ཡོད། རྒྱུན་དུ་ཁྱིམ་མཚེའུ་ཚང་ལ་འགྲུལ་བ་གསར་བ་རེ་ཐོན་ཡོད་ཚེ་ལམ་སང་སོང་ནས་ཁོང་ཚོར་གླུ་ལེན་གི་རེད། ཁོང་ཚོས་ཀྱང་ང་ལ་རྔན་པར་བུ་རམ་རེ་སྟེར་གི་རེད།དབྱར་ཁ་རྣམས་སུ། མ་ལགས་དང་ཨ་ཅེ་ནུ་མོ་བཅས་ཟོག་དེད་དེ་དབྱར་སའི་ཐོག་འགྲོ་དགོས་པ་དང་ཕུ་བོ་ངེད་གཉིས་དགུན་སའི་ཐོག་ཨ་ཕ་དང་མཉམ་དུ་བསྡད་དེ་ཀློག་སློབ་པ་ཡིན། ཨ་ཕས་ཉི་མ་རེ་རེ་བཞིན་ངེད་གཉིས་ལ་ཀློག་སློབ་ཞོར་ཀློང་གསལ་བཀའ་བརྒྱད་ཀྱི་ཤོག་ངོས་མདའ་ཚད་མ་བཅུ་རེ་འབྲི།ནུབ་ཇ་འཐུང་རྗེས་རྣམས་སུ་ཨ་ཕས་ངེད་གཉིས་ལ་མདོ་མཛངས་བླུན་གྱི་ནང་གི་གཏམ་རྒྱུད་རེ་རེ་ཀློག་ཏུ་འཇུག་པ་ཡིན། དཔེར་ན་ཁྱིམ་བདག་དབྱུག་པ་ཅན་དང་སྟག་མོ་ལུས་སྦྱིན་སོགས་ཕྱིས་སུ་སློབ་ཆུང་ལ་འགྲོ་སྐབས་ངས་མལ་ཁང་གཅིག་པའི་སློབ་གྲོགས་ཚོར་བཤད་ཀྱང་མྱོང་།ངེད་སང་གི་དགུན་ས་དེ་ལུང་པ་ཆེན་པོ་ཞིག་གི་མདའ་རུ་ཡོད། ལུང་པ་ཆེན་པོ་དེའི་མདའ་རུ་རུ་བ་གཉིས་ལས་མེད་དེ་ངེད་ཚང་དང་ཁྱིམ་མཚེའུ་ཚང་ཡིན། ལུང་པ་ཆེན་པོ་དེའི་རི་མཐོ་ས་དམའ་ས་ཐང་ཡངས་ས་ནས་ངོས་གཟར་ས་གང་དུའང་ངས་རྐང་རྗེས་དཔར་མྱོང་། ལུང་པ་ཆེན་པོ་དེའི་ནང་དུ་རྩི་ཤིང་སྣ་ཚོགས་ཡོད།དབྱར་ཁ་མིག་དབང་བསྲེགས་པར་བྱེད་པའི་མེ་ཏོག་སྣ་ཚོགས་ཡོད། ལུང་ཕྲན་མང་པོ་ནས་འབབ་པའི་ཆུ་མིག་མང་པོ་གཞུང་ཆུར་འདྲེས་ནས་རྒྱང་དུ་བཞུར།རྒྱུ་སྐར་གྱི་འཁོར་ལམ་དང་དུས་བཞིའི་འགྱུར་བ་ཐམས་ཅད་ལ་ང་ཚོས་རང་གི་འགྲེལ་བཤད་བྱེད། ང་ཚོས་རྟེན་འབྲེལ་མཐུ་ཆེན་པོར་བརྩི་ཞིང་གཟའ་སྐར་གྱི་འཕྲོད་དང་དུས་ཀྱི་སྦྱོར་བ་ལ་མཐོང་ཆེན་པོ་སྤྲོད།སྣང་སྲིད་དྲེགས་པའི་རིགས་ལ་བསྡོས་ན་དབལ་ཚ། བཀུར་ན་སྙིང་ཉེ་ཟེར། འཇིག་རྟེན་གྱི་ཁམས་ཐམས་ཅད་ན་རྒྱུ་ཞིང་ལས་དང་བྱ་བ་སྤྱི་དང་ཁྱད་པར་རྔམས་ཆེན་གྱི་རིགས་ལ་ཀོ་ལོང་སྡོམས་པའི་ས་བདག་ལྷ་ཀླུ་དྲེགས་པའི་ཚོགས་ལ་འགྱེས་ན་བཅོས་ཀ་བྱེད་ལོ་རེ་བཞིན་སྲུང་བ་ཚུལ་བཞིན་བྱས་ན་ཐག་རིང་མགྲོན་དུ་འགྲོ་བ་དང་བག་མ་བག་སྐྱེལ་བྱེད་པ། རོ་འདོན་དང་དུར་འདེབས་པ། སྐྱས་དང་ཁྱིམ་གསར་འཛིན་པ་སོགས་ལ་འཚུབས་དང་བར་ཆད་གང་ཡང་མེད་པར་དགེ་ཞིང་བཀྲ་ཤིས་པའི་ཡིད་ཆེས་འཆིང་། འདི་ལ་གཏོ་ཐབས་བྱིས་པའི་རྩེད་མོ་ལ་ཕན་པ་རི་རྒྱལ་ལྷུན་པོ་ཡང་ཟེར།འདི་བྱས་པས་མི་ནོར་དང་ཟས་གཡང་མི་ཉམས་པ།ལྷ་ཀླུ་མི་འཁྲུགས་པ། འཇིག་རྟེན་ལ་བདེ་བ་ཁོ་ན་འབྱུང་བའི་ལས་སུ་སྙམ།ལོ་གཅིག་གི་སྲུང་བ་རྣམས་ཅི་བཞིན་འགྲུབ་ན་དེའི་ནུས་པ་ནི་ཇི་ལྟར་གསང་བ་ཡིན་པ་དེ་ལྟར་ནུས་པ་ཆེ་བ་མཚན་མོ་སྒོ་ཟོག་མི་ཚང་བའི་དུས་སུ་ཕྱི་སྐོར་བྱེད་དགོས་པའི་ངེད་ཚང་གི་ལྷ་མོ་འོད་ཟེར་ཅན་མའི་འཁོར་ལོ་ཀོ་ཐུམས་ཅན་དེ་ལྟ་བུ་ཞིག་ཡིན།

　　ང་ཚོས་རྩི་ཤིང་དང་མེ་ཏོག་ཐམས་ཅད་ལ་རྒོད་གཡུང་གི་ཁྱད་པར་གྱིས་ཕོ་མོ་གཉིས་སུ་དགར།དཔེར་ན་ཤུག་པ་ལ་རིགས་གཉིས་ཡོད། ང་ཚོས་འཇམ་རྩུམ་དབྱེ་ནས་འཇམ་པོ་དེར་འབྲི་ཤུག་དང་རྩུབ་ཤས་ཆེ་བ་དེར་གཡག་ཤུག་ཅེས་འབོད་ཀི་རེད་ལ་འབྲི་ཤུག་ལ་ཤུག་ཐོག་ཆེན་པོ་སྐྱེས་ཀི་རེད།དེ་མིན་དབྱར་སྟོད་ལ་ཐོག་ཏུ་མེ་ཏོག་དཀར་པོ་བཞད་པའི་སུར་དཀར་དང་མེ་ཏོག་སྔོ་དམར་བཞད་པའི་སུར་ནག་ཉིན་ལ་སྐྱེས་པའི་སྤེན་དཀར་དང་སྲིབ་ལ་སྐྱེས་པའི་སྤེན་ནག ལྕང་མ་དང་གླང་མ་བྲ་མ། ཉ་བྲུག་ཚེར་དཀར་ཚེར་ནག་ལྗང་མ། རྟག་མ། སྤེན་མ། སྙེག་མ།འོམ་འབུ། ཨུ་གྱོ། བེ་ལོ། འཁྲུས་བ། གླ་ཁེ། སྐྱེ་ཁེ། བཀྲ་ཚེར། རྟ་ཚེར།སོགས་ཡོད། ཨ་ཕས་ང་ཚོར་མེ་ཏོག་རེ་རེའི་མིང་བཤད་དུས་དཔེར་ན་དུག་མདའ་ནག་པོ་པོ་རོག་མདའ་ཁུར་འདྲ།དུག་མོ་ནག་པོ་ལྕགས་ཀི་ཁབ་ཤུབས་འདྲ། གླ་སྒང་བ་ནི་བོན་པོའི་སིལ་བུ་འདྲ།ཧུང་ལེན་སྔོན་པོ་སྤྱང་ཀིའི་རྔ་མ་འདྲ། གཡའ་གྱི་མོ་ནི་ཟངས་ཀྱི་པ་ཊ་འདྲ།གངས་ཤམ་པ་ནི་ཤེལ་གྱི་མཆོད་རྟེན་འདྲ་ཞེས་དཔེ་འཇོག་གི་སྒོ་ནས་ངོ་སྤྲོད་གནང་བས་བརྗེད་དཀའ་ཞིང་ངོས་འཛིན་སླ་བ་ཡིན། དེ་མིན་མེ་ཏོག་གི་སྐོར་ལ་ན་རུ་ཟིལ་བ་སོགས་ཟིལ་བ་བཅུ་གསུམ་དང་ཚ་བ་གསུམ་ས་འཛིན་གསུམ། ཏིག་ཏ་གསུམ།སྔོ་ཚ་བ་གསུམ། སྟོང་རི་ཟིལ་བ། སྔོ་ཡི་བུ་མོ་སྤུན་བདུན། སོགས་ཧ་ཅང་མང་བ་ཡིན།སྐབས་དེར་དུས་བཞིའི་འགྱུར་བ་ཧ་ཅང་དལ་ལ་སོ་སོའི་དབྱེ་བའང་མངོན་གསལ་དོད་པོ་ཡིན།

　　ཐོག་མར་ང་ཚོས་དགུན་ཟླ་ནས་མགོ་བརྩམས་ཏེ་གླེང་ན། ལུག་ཟླ་ནག་རིལ་མར་ཆུ་ལ་ཉིན་དར་འདུག།སྤྲེལ་ཟླའི་ཡར་ངོས་ལ་མཛོ་བོའི་རྭ་གད་མར་ངོས་ལ་ཕག་མོའི་མཆུ་དྲོས་ཞེས་ཡར་ངོས་ལ་ཙག་ཆེ་ཞིང་མར་ངོས་ལ་ས་ལ་དྲོད་ལྷུང་།ཡང་ན་ཡར་ངོས་ལ་ཕོ་ལྕང་གི་གདོང་གད་མོ་ལྕང་གི་ནུ་མ་འགད་ཡང་ཟེར་བ་རེད། དེ་ནས་ལོ་གཅིག་གི་དུས་ཚོད་ནང་ཉི་མ་ཁེར་བརྩི་གཉིས་བརྩི་བྱས་ཏེ་བསྒུག་པའི་ལོ་སར་གྱི་ཀ་ར་ཟོས་རྗེས་གཟོད་དཔྱིད་ཟླ་ཚེས་པ་རེད། དཔྱིད་ཀ་ནི་ཕྱེ་མ་ལེབ་ཀྱི་གཤོག་ཁུད་དུ་གཅུད་ནས་འཕུར་ཡོང་། ཡང་མིན་ན་ཁུ་ཡུག་ཚུར་འོང་དང་སྨིན་དྲུག་ཕར་འགྲོ་ལམ་ནས་འཕྲད་པའི་གཏམ་རྒྱུད་དང་བསྡོངས་ནས་སླེབས་ཡོང་བ་འདྲ། གང་ལྟར་དཔྱིད་ཀ་ཐོན་ན། ཁུ་ཡུག་སླེབས་ན། སྣོད་ཀྱི་འཇིག་རྟེན་ལ་མདངས་རྒྱས། བཅུད་ཀྱི་སེམས་ཅན་ལ་བསོད་ནམས་འཕེལ། དེ་ཡང་བྱ་ཟད་དར་ཟད་ཟེར་ཞིང་དགུན་ཁར་ཕྱུག་རིགས་ཀྱིས་དར་ཐོག་ལ་བཏང་བའི་ལྕི་བ་རིམ་གྱིས་དར་ཞི་བ་དང་ལྷན་དུ་ལྕི་ཞྭ་གྱོན་པའི་འཁྱག་དར་ཁོ་ན་ཤུལ་དུ་ལྷག་པ་རེད་ཟླ་བ་འདིར་ང་ཚོས་བྱ་ལྕི་ལུ་ཞྭ་གོན་ཟེར། དེ་ནས་རིམ་གྱིས་ནམ་ཟླ་ཇེ་དྲོར་འགྲོ་ཞིང་སྔོར་མའི་མྱུ་གུ་འབུས་ཏེ་ཁྱི་བོ་ཐོ་ཁ་སྔོན་ནང་བྱ་སྣ་འོལ་བས་ཁྲིད་དེ་བྱ་བརྒྱའི་སྲི་མོ་དང་པུ་ཤུད་ལྟག་ར་མ་ཙག་ལ་རྐང་འཇུབ་ཐོན། འོ་བྱིའུ་དང་སྤྲི་བྱིའུ་ཁུ་ཡུག་འཕྲོ་རིམ་འཕྲོར་ཐོན།ཁུ་ཡུག་ཐོན་ཁར་ཁྭ་ཏྭ་སྨྱོ་ཞིང་སྲེག་པས་བཟའ་འཐོར་རྒྱག། སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན་གཉིས་ཀར་སོས་ཐོན།སྤྲེལ་འབྲུག་གསེར་མགོ་ཞེས་སྤྲེལ་ཟླའི་ནང་འབྲུག་ཐོག་མར་གྲགས་པ་ཡིན་ན་ཡག་པོར་བརྩི་ཞིང་བྱ་འབྲུག་ཐལ་ཁ་ཞེས་བྱ་ཟླའི་ནང་འབྲུག་ཐོག་མར་གྲགས་པ་ཡིན་ན་ལོ་དེར་ཐོག་ཁ་རྒོད་ཁར་བརྩི། ཁྱི་ཕག་གཉིས་ཀའི་ནང་བེའུ་ཡར་བུ་དང་ཡར་བུ་རྩིབ་བཏོག་རྩིབ་བཏོག་སོ་གཉིས་དང་སོ་ཉིས་སོ་བཞི་དང་སོ་བཞི་སོ་དྲུག་སོ་དྲུག་ཁ་གང་ལ་འགྱུར། ཕག་རི་སྐྱ་ཐང་སྔོན་སོང་ན་གཞི་ནས་དབྱར་ཟླ་སླེབས་ཀི་རེད།བྱི་ཟླའི་ནང་འབབ་ཞོད་ཆེ་བས་བྱི་ཉ་རུལ་ཆུ་རུལ་ཟེར་ཞིང་གླང་ཆུ་བྲུག་འོ་བྲུག་ལ་འོ་མ་མང་པོ་འཇོ་རྒྱུ་ཡོད་ལ་སྟག་ཙ་དེ་འོ་ལེན་ནང་འོ་མ་ཕྱིར་ཇེ་ཉུང་ལ་འགྲོ་བ་རེད། དབྱར་གཞུང་ལ་ཉི་མ་དྲོ་སྐབས་སྦྲ་མཐའ་བཀྱགས་ནས་དེའི་བསིལ་གྲིབ་འོག་ཏུ་བསྡད་དེ་འོ་ཇ་འཐུང་ནས་བསྡད་ན་སྐྱིད་ཅིག་ཡིན་ལ་འབྲིས་བེའུ་ཁྲིད་ནས་ཤོར་སོང་ཚེ་སྔུན་མ་ཆོད་ན་སྡུག་ཞིག་ཀྱང་ཡིན།སྟོན་མཇུག་ལ་རུ་བ་དགུན་སར་འགེལ་ཞིང་དགུན་དུས་ཕུ་བོ་ངེད་གཉིས་རྟ་རྫི་ཡིན། ཆབ་དང་ཚས་དཀར་ནག་གི་རྩེད་མོའི་རིགས་ལ་བྱང་ཆུབ་པའི་ནུ་མོ་ཁྱིམ་མི་དག་ལས་ཆུང་བ་དེ་ཡིན་ཕྱིན་གནས་ལུགས་མེད་ན་ཡང་ཕ་མ་གཉིས་མོའི་ཕྱོགས་ནས་ཀ་ལངས་ལངས་བྱེད། ང་རང་དེ་ལ་ཤིན་ཏུ་སྡང་། དུས་རྒྱུན་ཆབ་འཕངས་ཚེ་གཡོ་སྒྱུ་རེ་མ་འཁྲབ་ན་མོ་མི་རྒྱལ་དུས་མེད་ལ་དུས་འདི་འདྲར་བཟོད་མི་ཐུབ་པའི་ཚིག་པ་ཟ་རྒྱུ་ཡོང་མོད་མོའི་རྒྱབ་རྩ་ནི་བརྟན་པོ་བྲག་ཡིན་པས་བྱ་ཐབས་བྲལ།འགྲོ་ཞོར་ལ་སེན་ཏོག་བྱེད་པ་དང་ཆབ་རྡོ་གཏོར་བ་སོགས་སྐྱིན་པ་ཅུང་ཙམ་རེ་བླངས་པས་མགུ་གང་དགོས་པ་ཡིན།སྐབས་དེར་ང་ནི་མིག་གིས་མཐོང་ཚོད་ལ་ཐུག་དགོས་པ་ཞིག་དང་ཐུག་ཚོད་པོ་ཁ་ཕྱེས་ནས་ནང་དུ་ཅི་ཞིག་ཡོད་མེད་ལྟ་དགོས་མཁན་ཞིག་ཡིན།དེ་བས་ངས་རྒྱུན་དུ་ཨ་ཅེའི་མཱན་ཐོས་ལིན་དེ་མཐོང་ཐུབ་པ་ལས་རག་ཐུབ་ཀི་མེད།སྒྲ་ཐག་གི་ཕྱི་ཤུན་རྒྱབ་ཀྱི་པར་དང་ཨ་ཅེའི་མན་ཐོའི་ལིན་ལ་ཡུན་རིང་སྨོན་ཞིང་བལྟས་ཏེ་རིག་པ་ལྕགས་སྐུད་ལྟར་བསྒྲིམས་རྗེས་ངའི་ཡིད་ལ་གཞི་ནས་ཐབས་བཀོད་ཅིག་དྲན་ཞིང་ཚོད་ལྟ་དེ་དངོས་སུ་ལག་བསྟར་བྱེད་རྒྱུ་རེད།ནང་དུ་ཅི་ཡོད་ལྟ་འདོད་ནས་ཡུན་རིང་འགོར་བའི་སྒྲ་ཕབ་འཕྲུལ་ཆས་རྙིང་སོང་དེ་ཨ་མའི་མི་མཐོང་ས་ཟིག་ནས་ཁ་ཕྱེས།ནང་གི་ཟིང་སྐུད་བླངས་ནས་རྒྱུད་སྐུད་བྱས། ཤིང་ལེབ་ཞིག་གི་ཐོག་ཏུ་ལྕགས་འཛེར་བཞི་བརྡབས། པེ་སི་ཁུ་ལུ་ཞིག་གི་ཁ་ལེབ་བཞི་བཏོན་ནས་གཅུས་ཕུར་བྱས་ནས་ཏིང་ཏིང་ཏིང་ལྟ་བུ་ཞིག་གྲགས་པའི་རྡོ་ཆས་རྙིང་མའི་སྐབས་ཀྱི་རོལ་ཆས་ཞིག་དང་འདྲ་ལ་ཅུང་ཟད་སྔོན་ཐོན་ཡང་ཡིན་པ་འདི་ངའི་མི་ཚེ་འདིའི་རོལ་ཆས་ཐོག་མ་དེ་ཡིན། འདི་ནི་དཔེ་མཚོན་ཙམ་ཡིན་པ་ལས་ང་ཚོས་རྩེད་ཆས་མང་པོ་གསར་རྟོད་བྱེད་ཀི་རེད། དེ་ལས་ཀྱང་ཕུ་བོའི་ལག་རྩལ་ནི་ངའི་ཡིད་ལ་དྲན་པ་ལས་ཀྱང་ཡག་པོ་ཡོད། ཁོའི་རྩེད་ཆས་དག་ནི་སྤུས་ཀ་ཅན་ཞིག་དང་མིག་ལ་འགྲོ་བ་ཤ་སྟག་ཡིན་པས་ངས་རྒྱུན་དུ་ཁོས་གསར་རྟོད་བྱས་པའི་རྩེད་ཆས་དག་ཉོ་དགོས་ཀི་ཡོད།དཔེར་ན་ཁོའི་ཚབ་ཏུ་ཟོག་རྫི་དང་རྟ་རྫི་ལ་འགྲོ་བ་སོགས་ཀྱང་རྩེད་ཆས་ཀྱི་རིན་པའི་ནང་དུ་བརྩི་བ་རེད།

　　ང་ཚོས་རྒྱུ་སྐར་ཉེར་བརྒྱད་པོ་ངོས་འཛིན་ཤེས་ན་དབྱར་དགུན་སྟོན་དཔྱིད་ཀྱི་རུ་བ་འདུག་སའི་ས་དགྲ་ཡོད་མེད་ལ་ལྟ་མི་དགོས་ཟེར་བས་ཨ་ཕས་ཆུང་དུས་ནས་ང་ཚོར་རྒྱུ་སྐར་ཉེར་བརྒྱད་པོར་འདྲ་བ་རྒྱུ་མཚན་དུ་བྱས་པའི་དཔེ་སྣ་ཚོགས་དང་གཏམ་རྒྱུད་ཉན་སྤྲོ་མོ་རེ་དང་མཚམས་སྦྱར་ནས་ངོ་སྤྲོད་པ་ཡིན། དཔེར་ན།སྣར་མ་ལུག་གི་བྲང་མགོ་འདྲ།རྒྱལ་གཉིས་རྟ་ཕོ་གཤིབ་པ་འདྲ།རྟ་ཆེན་སྟ་རེ་ཕྱར་བ་འདྲ།རྟ་ཆུང་ཝ་མོའི་ལག་ཡས་འདྲ།ས་རི་སྟག་གི་སྦར་མོ་འདྲ།ས་ག་ཕྱུག་པོའི་བེའུ་རྡང་འདྲ།ལྷ་འཚམས་གླང་ཆེན་རྒུར་བ་འདྲ། བྲ་ཉེ་སྔག་པའི་ཧོམ་ཁོང་འདྲ།སེ་སྟོད་སྨད་ཕྱུག་པོ་ཁ་བཞི། སྲ་མདའ་སྤྲང་པོ་ཁ་ལྔ། བྲེ་ཁ་ཡོན།ཕུལ་རྐུབ་ཡོན་སོགས་དང་སྐེད་འཁྱོག་དང་སྨིན་དྲུག་གཡུལ་འཐབ་པ་ལ་སྐེད་འཁྱོག་གིས་མདའ་འཕངས་ཏེ་སྨིན་དྲུག་སྐར་འབྲུ་དྲུག་ཏུ་བཏང་བ་དང་སྨིན་དྲུག་གིས་རྦབ་རྡོ་སྒྲིལ་ནས་སྐེད་འཁྱོག་གི་སྐེད་པ་བཅད་པའི་གཏམ་རྒྱུད་ཉན་ནས་མི་ཚར་བ་བཤད་རྒྱུ་ཡོད། ཕྱིས་སུ་ང་རང་སློབ་ཆུང་ན་ཡོད་དུས་ངས་སློབ་གྲྭའི་དཔེ་ཁང་ནང་ནས་མིའི་འགྲོ་བ་གཟའ་སྐར་སྟེང་དུ་འཚོ་བ་ཞེས་པའི་བྱིས་པའི་རྒྱུན་ཤེས་ཀྱི་དཔེ་ཆ་འདི་འདྲ་ཞིག་ཀློག་མྱོང་། དེ་ནི་ཨ་ལགས་ཚེ་ཏན་ཞབས་དྲུང་གིས་བསྒྱུར་བ་རེད། དཔེ་ཆ་དེར་སའི་གོ་ལ་ནི་ནམ་ཡང་འགུལ་སྐྱོད་བྱེད་དེ། དེ་ནི་ཕྱོགས་གཅིག་ནས་རང་གི་སྲོག་ཤིང་ལ་བརྟེན་པའི་ཚུལ་གྱིས་རང་འཁོར་བྱེད་ཅིང་ཕྱོགས་གཅིག་ནས་ཉི་མ་ལ་བལྟོས་ནས་སྤྱི་འཁོར་བྱེད་པ་རེད། སའི་གོ་ལའི་རང་འཁོར་གྱིས་ཉིན་མཚན་གྱི་འགྱུར་ལྡོག་བསྐྱེད་དེ་རང་འཁོར་ཚར་གཅིག་ནི་ཉིན་ཞག་གཅིག་ཡིན། དེའི་ཕྱིར་སའི་གོ་ལའི་རང་འཁོར་གྱི་འཁོར་ཕྱོགས་ནི་ནུབ་ནས་ཤར་དུ་འགྲོ་བས་ང་ཚོས་ཉི་མ་དང་ཟླ་བ་སྐར་མ་རྣམས་ཤར་ནས་འཆར་ཞིང་ནུབ་ཏུ་ནུབ་པ་མཐོང་བ་རེད་ཟེར་ཞིང་དེ་བཞིན་སའི་གོ་ལའི་ཉི་མ་ལ་སྐོར་བ་བྱེད་པའི་སྤྱི་འཁོར་གྱི་བགྲོད་པ་གཅིག་གི་དུས་ཚོད་ལ་ཉིན་ཞག་སུམ་བརྒྱ་རེ་ལྔ་དགོས་པ་ལ་ང་ཚོས་ལོ་གཅིག་ཅེས་འབོད་པ་རེད་ཟེར། རྗེས་སུ་ངའི་དགེ་རྒན་ཞིག་གི་ཁ་ནས་བོད་ཀྱི་རྩིས་གཞུང་ལ་བརྟེན་ནས་འབའ་བ་ཕུན་ཚོགས་དབང་རྒྱལ་གྱིས་བཙོན་ཁང་ནས་མི་ལོ་བཅོ་བརྒྱད་ལ་བསྡད་དེ་ཟླ་བའི་གོ་ལའི་ཐོག་ཆུ་ཡོད་པའང་ཐོག་མར་ཤེས་པ་རེད་ཟེར་སྐད་ཆ་འདི་གོ་བས་ང་ཡང་ཧ་ལས། རྒྱུན་ཤེས་ཀྱི་དཔེ་ཆ་དེ་རྣམས་སུ་བཤད་པའི་གཟའ་སྐར་གྱི་ཆགས་རིམ་ནི་ཨ་ཕས་བཤད་པའི་གཏམ་རྒྱུད་དེ་ཚོ་དང་མཐུན་སའང་འདུག་ལ་མི་མཐུན་ས་ཡང་འདུགསྐབས་རེར་འདི་འདྲ་རེ་ཨ་ཕས་ཇི་ལྟར་ཤེས་སོང་བ་ཡིན་ནམ་སྙམ་པའང་འདུག གང་ལྟར་ངའི་སྣང་ངོ་ནས་ཨ་ཕ་ནི་སློབ་ཆུང་སྐབས་ཀྱི་དག་ཡིག་གསར་བསྒྲིགས་ལྟ་བུ་ཞིག་དང་མཐོ་འབྲིང་སྐབས་ཀྱི་དུང་དཀར་ཚིག་མཛོད་ལྟ་བུ་ཞིག་ཡིན། ཇི་ལྟར་སྔོག་ཐུབ་ན་དེ་ལྟར་ཤེས་བྱ་གསར་བ་མང་པོ་ཞིག་རང་གི་རྒྱུད་ལ་ལེན་ཐུབ་པ་ཡིན་ལ་ད་ལྟའང་དེ་འདྲ་ཞིག་ཡིན།ཁོ་ལ་རས་ཐུམ་ནག་པོ་བརྒྱབ་པའི་ཟིན་དེབ་དང་ཕྱི་ཤུན་ལྗང་གུ་ཅན་གྱི་ཟིན་དེབ་སྣ་ཚོགས་པ་ཡོད། ནང་དུ་དབུ་མེད་རྐྱང་བས་བྲིས་པའི་ཟིན་བྲིས་དང་རིས་དབྱིབས་སྣ་ཚོགས་ཀྱང་ཡོད།ད་ལྟའི་ངའི་དཔེ་ཁང་གི་དཔེ་ཆའི་གྲངས་ཀའི་སུམ་ཆའི་ཕྱེད་ཀ་ལྟ་བུ་ཞིག་ཨ་ཕས་ཀྱང་ཡིན། གང་ལ་སོང་ཡང་དཔེ་ཆ་རེ་མ་ཉོས་ན་སེམས་མི་བདེ་བའི་གོམས་སྲོལ་འདི་ངས་ཨ་ཕ་ནས་རྒྱུད་འཛིན་བྱས་པ་ཡིན།

　　ད་ལྟ་རྒྱུན་དུ་ངས་དྲན་ཡོང་བ་ནི་ཆུང་དུས་མཱན་ཐོས་ལིན་ཞིག་ཀྱང་ལག་ཏུ་བཞག་མ་མྱོང་བའི་ཨ་ཅེ་ཡིན། མོའི་འཚོ་བའི་དྲོ་འཁྱག་ལ་ངས་བསམ་བློ་གང་ཡང་བཏང་མ་མྱོང་། མོས་རང་གི་དགའ་རོགས་དང་ལྷན་དུ་ནང་མ་ཁང་ཞིག་གཉེར་ཡོད་ལ་ཚོང་ཡང་བཟང་རབས་ཟེར་མོད་ལས་ཀ་འདིར་ང་དགའ་བོ་ཁྱོན་ནས་མེད་པ་དེའི་རིགས་ཡིན་ངས་ནམ་རྒྱུན་མོ་དང་ལས་རིགས་གཅིག་པའི་མི་དག་ལ་མཐོང་ཆུང་གི་མིག་གིས་བལྟས་པ་ཡིན་ལ་ཁ་བརྡ་ཅུང་ཙམ་རེ་བྱས་ནའང་ཚིག་གཤིས་ལ་སུན་སྣང་བསྲེས་ནས་བཤད་པ་ཡིན། ཡིན་ན་ཡང་ངས་ནམ་རྒྱུན་ཨ་ཅེ་ལ་སྒོར་མོ་སྐུར་ཤོག ངའི་སྒོར་མོ་ཆད་སོང་ཞེས་ནམ་རྒྱུན་ཨ་ཅེའི་གློའུ་ཁུག་ནང་དུ་ལག་པ་བསྲིངས་བསྲིངས་ལ་ཡོད། མོས་ང་ལ་མང་པོ་ཞིག་ལྷན་དུ་བསྐུར་དུས་མེད་པ་འདྲ་མོད་མ་བསྐུར་དུས་ཞིག་ཁྱོན་ནས་མེད། ངས་ཆེན་པོ་ཆེན་པོ་ཞིག་བཤད་ནས་བར་སྣང་ཁམས་ནས་ཕོ་བྲང་ཞིག་བཞེངས་དགོས་ལབ་ཏེ་སློབ་ཆུང་གི་འཚོགས་ཐུན་སྐབས་ཀྱི་འཇིག་རྟེན་དེ་འདྲ་ཞིག་ཏུ་ཡང་བསྐྱར་འགྲོ་བར་རྩོམ་དུས་ཨ་ཅེས་ང་ལ་ད་ལོའི་དགུན་ལྭ་ཆ་ཚང་ཞིག་ཉོས་ནས་བསྐུར་བྱུང་ལ་མངའ་རིས་ནས་དགུན་ཁ་འཁྱག་གི་རེད་ཟེར།

　　                                                            2021.9.22ལ་མངའ་རིས་ནས་བྲིས།

རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།