དེ་རིང་ཞོགས་པར་ཁ་བ་བབས་འདུག། ཞོགས་པའི་ཉི་གཞོན་ག་ལེར་མཁའ་རུ་འཕགས་ཏེ་དཀར་སེང་སེང་གི་ས་གཞིར་གསེར་ཞུན་གྱི་ཁ་དོག་ཉམས་དགའ་བ་ཞིག་བྱུགས་འདུག དྭངས་གཙང་གི་མཁའ་དབུགས་ཁམ་གང་གཞིབ་གཏོང་བྱེད་པ་ལས་ཀྱང་ལུས་སེམས་ཀྱི་ལྗིད་ལྟིག་ལྟིག་གི་ཁུར་བོ་གང་ཞིག་ཡང་སོར་ལེར་སར་ཕོག་པའི་སྣང་བ་ཡང་མོ་ཞིག་བྱུང་ཡོང་། དཀར་ཞིང་འཇམ་པའི་ཁ་བའི་སྟེང་དུ་གོམ་པ་བརྒྱབ་སྟེ་ག་ལེར་མདུན་དུ་བསྐྱོད་པ་ན་ནང་སེམས་སུ་ནད་གཞི་ལྟར་གྱུར་པའི་ཐག་གཅོད་ཐབས་མེད་པའི་དོན་དེ་རྣམས་ལའང་གུ་ཡངས་ཀྱི་གནས་ལུགས་རེ་འཚོལ་ཐུབ་ཅིང་། ལུས་སེམས་ཀྱི་བྲེལ་ཟིང་ལ་ལྷིང་འཇགས་ཀྱི་དབུགས་དབྱུང་ཞིག་ཐོབ་ཡོང་། ལོ་རེར་ཕ་ཡུལ་དུ་ལོག་ཐེངས་རེར་ང་ལ་འདི་འདྲའི་བསམ་གཞིག་གི་སྒོ་མོ་ཡངས་པོ་ཞིག་རེག་སྲིད་ཅིང་། གཞན་ཡུལ་ནས་རང་ཉིད་ཀྱི་ལུས་སེམས་ཉོབ་པར་གྱུར་ཐེངས་རེར་ཕ་ཡུལ་ཞེས་པའི་ལྷིང་འཇགས་ཀྱི་ལོག་མལ་འདི་ནས་སྨན་བཅོས་བྱ་དགོས་ཤིང་། སེམས་པ་ཞིབ་ཏུ་ཕབ་ཏེ་གནད་དོན་ལ་ཐག་གཅོད་དང་ཕུགས་བསམ་ལ་འཆར་གཞི་འདིང་སྟེ་ཡང་བསྐྱར་ལམ་དུ་ཞུགས་རྒྱུ་དེའང་ད་ནི་གོམས་ལུགས་ཤིག་ཏུ་གྱུར་ཟིན་འདུག

　　ཟམ་མི་ཆད་པའི་གྲོང་ཁྱེར་གྱི་འདུ་འགོད་ཀློང་ནས་ང་ལ་མཚམས་རེར་རང་ཉིད་ཀྱང་བོར་འགྲོ་བའི་སྣང་བ་བྱུང་ཡོང་སྟེ། དབང་ཆ་དང་ཁེ་ཕན་ཞེས་པའི་མཚོན་ཆ་མེད་པའི་མི་གཤིས་ཀྱི་འཐབ་ར་ལས་ང་རང་ཡང་ཡང་ཕམ་སྟེ་སུ་ལའང་ཡིད་རྟོན་བྱེད་མི་ཕོད་པར་གྱུར་འགྲོ། ཐ་ན་རང་ཉིད་ཀྱང་གཡོ་ཟོལ་དང་བཅོས་འཛུམ་གྱིས་འདུར་བའི་རང་ཉིད་གཞན་ཞིག་ཏུ་འགྱུར་འགྲོ་བས། སྐབས་རེར་ངས་འཛུམ་མདངས་མེད་ཅིང་ངག་མི་འཁྲོལ་བར་མདུན་རྒྱབ་ཀྱི་ཁ་ཕྱོགས་གཉིས་སུ་གཤར་སྐྱོད་རྒོད་པའི་གྲོང་ཁྱེར་གྱི་མི་ཚོགས་གསེང་ནས་རང་ཉིད་ཡང་ཡང་འཚོལ་དགོས་ཏེ། འདུ་འཛི་རྒོད་པའི་མི་ཚོགས་ཀྱི་འགྲོ་འོང་གི་བར་ནས་ངས་རང་ཉིད་དང་བཅས་པའི་མི་ཚང་མ་སྔར་བས་ཁེར་རྐྱང་གིས་གདུང་ཞིང་འཚོ་བས་སྤྱོ་བཞིན་ཡོད་པའི་ཚོར་བ་བྱུང་ཡོང་། ཐ་ན་རང་ཉིད་ཀྱང་ག་ལེར་མི་གཤིས་དང་གཏན་ཚིགས་མེད་པའི་གཏོལ་མེད་དང་མག་མོག་གིས་གཅུད་པའི་སྐྱེ་ལུས་གཞན་ཞིག་ཏུ་བོར་བཞིན་ཡོད་པ་ཚོར་ཡོང་།

　　དེ་ལྟར་ཡིན་ཕྱིན་ང་རང་དུས་ཚོད་ངེས་ཅན་རེའི་མཚམས་ནས་ཕ་ཡུལ་དུ་ཐེངས་རེ་ལོག་དགོས་ཤིང་། ཕ་ཡུལ་དུ་ལོག་སྟེ་རང་ཉིད་ལ་གསལ་འདེབས་དང་ཡོ་བསྲང་།བསམ་གཞིགས་སོགས་བྱས་ཏེ་རང་ཉིད་བསྐྱར་འཚོལ་གྱི་ལམ་བུར་ཡང་ནས་ཡང་དུ་ཞུགས་དགོས་ཡོད། ཕ་ཡུལ་དུ་ལོག་ཐེངས་རེར་ངས་རང་གི་འདྲིས་ཆ་ཟབ་ཅིང་རྒྱུས་མངའ་ཆེ་བའི་རི་ཆུའི་ཁོར་ཡུག་ལ་ལུས་ཀྱིས་ཚོར་ཞིང་སེམས་ཀྱིས་མྱོང་ཆོག་སྟེ། ཡུན་རིང་དུ་མ་འཕྲད་པའི་གྲོགས་རྒན་རྙིང་བ་ཞིག་དང་ཐུག་པ་ལྟར་ངའི་བྱིས་དུས་ཀྱི་ལོ་ཟླ་དང་ང་དང་ཕ་ཡུལ་བར་གྱི་གཏམ་རྒྱུད་ལ་ཕྱིར་མིག་གི་དྲན་པ་ཐེངས་གཅིག་བཟོ་ཆོག་སྟེ། ཡང་སྙིང་ང་རང་གང་ཞིག་ནས་སྐྱེས་ཤིང་གང་ཞིག་ནས་ལམ་དུ་ཆས་འགོ་བརྩམས་པར་བདེན་ཐུབ་ཀྱི་གནས་ལུགས་ཤིག་དང་ཞུམ་མེད་ཀྱི་སེམས་ཤུགས་ཤིག་བསྩལ་ཡོང་། ལྷག་ཏུ་ཕ་ཡུལ་དུ་ལོག་ཐེངས་རེར་དྲིན་ཆེ་བའི་ཕ་མ་རྒན་རྒོན་གཉིས་ཞལ་འཛུམ་གྱི་ལེར་ངའི་སྔུན་བསུ་རུ་ཐོན་ཡོང་ཞིང་། ནང་མི་ཞེས་པའི་ཤ་རུས་ཀྱིས་གནང་བའི་སྙིང་ཉེ་བའི་མི་དེ་དག་གིས་ཀྱང་ང་ལ་བདེ་འཚམ་གྱི་བཀའ་འདྲི་གནང་ཡོང་བས། ང་རང་གཞན་ཡུལ་དུ་ཡོད་དུས་ཀྱི་སྟོང་སང་སང་གི་སེམས་ཆུང་དང་ཁེར་རྐྱང་གི་ཚོར་སྣང་ལ་སྨྲ་མེད་ཀྱི་དྲོད་ཁོལ་ཞིག་འཕྱུར་ཏེ་སྤོབས་པ་སོར་ཆུད་ཀྱི་ཚོར་སྣང་སྙིང་ཉེ་བ་ཞིག་བྱུང་ཡོང་། དེ་བས་ཀྱང་ང་ནི་རང་ཉིད་ཅེས་པའི་མི་རྐྱང་རྟ་རྐྱང་ཞིག་མ་ཡིན་པར་ཁྱིམ་དང་ནང་མི་ཞེས་པའི་བརྩེ་བ་དྲོན་མོ་ཞིག་གིས་དམ་པོར་འཁྱུད་ཡོད་པའི་ངེས་ཤེས་ཤིག་བླ་ལྷག་ཏུ་འདྲོངས་ཡོང་།

　　དེ་ལྟར་ང་རང་ཕ་ཡུལ་དུ་ལོག་པ་ནི་ལན་མ་རྙེད་པའི་སྟོང་ཆ་ཅི་ཞིག་གི་ཁ་སྐོང་བའམ་བོར་ཟིན་པའི་དངོས་པོ་ཅི་ཞིག་འཚོལ་སྙེག་བྱེད་པ་སྟེ། དེ་བས་ཀྱང་ཤོར་ཟིན་པའི་དུས་ཚོད་གང་ཞིག་ལ་ཁ་གསབ་དང་ངང་སྒུག་བྱེད་ཀྱིན་པ་དང་ཡང་འདྲ། ཕ་ཡུལ་ནས་ངས་རང་ཉིད་ཀྱི་ལུས་སེམས་མཐའ་དག་ག་ལེར་ལྷོད་དུ་འབབ་བཞིན་པ་ཚོར་ཡོང་ཞིང་། ཞོགས་པར་མལ་ལས་ལྡང་བ་ནས་དགོང་མོར་གཉིད་དུ་མ་ཡུར་བའི་བར་དུ་ངས་ལག་ཐོག་གི་བྱ་ལས་ཤིག་གམ་བསམ་བློའི་གནད་དོན་ཞིག་ལ་ནན་ཏན་གྱིས་གཞོལ་ཆོག་ཅིང་། ཉིན་གཅིག་གི་དུས་ཚོད་ཀྱི་ནང་དུ་ང་རང་གཟབ་ནན་དང་བརྟན་རླིང་གི་མི་ཞིག་ཏུ་གྱུར་ཏེ་ལག་ཐོག་གི་དོན་དག་དང་ནང་སེམས་ཀྱི་གནད་དོན་ལ་ཐག་གཅོད་ལེགས་པར་གྲུབ་ཆོག དེ་ལྟར་ཡིན་ཕྱིན་ང་རང་ཕ་ཡུལ་དུ་ཡོད་སྐབས་གྲོང་ཁྱེར་དུ་ཡོད་དུས་ལྟར་རང་ཉིད་ཅི་ཞིག་གི་རྗེས་སུ་ལུས་དོགས་ཀྱི་སེམས་ཁྲལ་བྱེད་མི་དགོས་ཏེ། བག་ཡངས་ཤིང་སོས་དལ་བའི་ཉི་མ་རིང་པོ་ཞིག་གིས་ང་ལ་ངང་སྒུག་བྱས་ཏེ་ངའི་འཚུབ་སྣང་དང་བརྗེད་ངས་ལ་བསམ་གཞིགས་དང་རང་དབང་བྱེད་ཆོག་སའི་ལྷོད་ཡངས་ཀྱི་བར་སྟོང་ཞིག་སྤྲད་ཡོང་། ལྷག་ཏུ་ཕར་ལྟས་ཚོད་ལ་ང་ཚོའི་རྣམ་ཀུན་གྱི་དོན་དག་མང་པོ་ཞིག་དུས་ཚོད་ཀྱི་རྗེས་མ་ཆོད་པའམ་བྲེལ་འཚུབ་དང་བྱ་མང་གིས་ཕུངས་འགྲོ་སྟེ། ཉིན་གཅིག་གི་དུས་ཚོད་མང་ཤོས་ཤིག་དོན་ཆེན་ཅི་ཞིག་བདའ་བའམ་ཁེ་ཕན་ཅི་ཞིག་གི་རྗེས་མ་ཆོད་པའི་སེམས་ཁྲལ་དང་འཚབ་འཚུབ་ཀྱིས་ཕར་ལ་རྫོགས་འགྲོ་སྟེ། ང་ཚོའི་ཉེ་འཁོར་གྱི་འཚོ་བའི་ཞིབ་ཆ་མང་པོ་ཞིག་རགས་ཀློག་ཙམ་གྱིས་ཕར་ལ་ཕྱིན་འགྲོ་བས། ནམ་ཞིག་གི་ཚེ་ན་ང་ཚོས་ལག་པ་རང་གི་བྲང་ཐོག་ཏུ་བཞག་སྟེ་བསམ་བློ་ཞིབ་མོར་གཏོང་སྐབས་རང་ལ་ཐོབ་ན་འདོད་པའི་བདེ་སྐྱིད་ཅེས་པའི་ནང་སེམས་ཀྱི་ལོངས་སྤྱོད་དག་དུས་རྒྱུན་རང་གི་མིག་ནང་དུ་འཇོག་རིན་མེད་པའི་འཚོ་བའི་ཞིབ་ཆ་དེ་དག་གིས་གྲུབ་ཡོད་ཅིང་། འཚོ་བའི་ཞིབ་ཆ་དེ་དག་ཟང་ཟིང་དང་གཟབ་ནན་མ་བྱས་པའི་ཀློང་ནས་བོར་ཟགས་སུ་སོང་ཚར་ཡོད་པ་རྟོགས་ཡོང་། དེ་ལྟ་བས་ན་ང་རང་ཕ་ཡུལ་དུ་ཡོད་སྐབས་དོན་ཆེན་ཅི་ཞིག་གི་རྗེས་མ་ཆོད་མདོག་གིས་བྲེལ་འཚུབ་དང་སེམས་ཁྲལ་བྱེད་མི་དགོས་ཤིང་། གནས་ལུགས་ཆེན་པོ་ཅི་ཞིག་བཤད་ཡོད་མདོག་གིས་ལག་པ་མཐོན་པོར་ཡང་གཡོབ་མི་དགོས་པས། ཕ་ཡུལ་དུ་ཡོད་དུས་ངའི་ལུས་སེམས་ཀྱི་ཡོད་ཚད་ལ་ལྷིང་འཇགས་དང་རང་དབང་གི་སྣང་བས་ཡོངས་སུ་སིམ་ཡོང་།

　　ངའི་བསམ་པར་ཕ་ཡུལ་དུ་ལོག་པ་ནི་རིན་པ་མི་དགོས་པའི་ཡུལ་སྐོར་གྱི་ཚུལ་གཞན་ཞིག་སྟེ། ང་ཚོ་ས་ཆ་ཞིག་ནས་ས་ཆ་གཞན་ཞིག་ཏུ་ཡུལ་སྐོར་དུ་བསྐྱོད་པའང་སོ་སོའི་འཚོ་བས་ངལ་བའི་ལུས་སེམས་ལ་རྡོག་ངལ་ཐེངས་གཅིག་གསོ་བའི་ཆེད་དང་དེ་ལས་ལྷག་པའི་སེམས་ཁམས་ཡངས་མོ་ཞིག་གིས་འཚོ་བ་དང་བྱ་བར་གདོང་གཏད་པའི་ཆེད་དུ་ཡིན་པར་སྙམ། འོན་ཀྱང་ཡུལ་སྐོར་དུ་བསྐྱོད་ན་ང་ཚོར་ལྟོ་གོས་ཀྱི་མ་མཐའི་འཚོ་བ་ཕུད་པའི་རྒྱུ་འབྱོར་གྱི་ཡོང་འབབ་དེ་ལས་མོད་པ་ཡོད་དགོས་ཏེ་བསམ་པའི་དཔལ་ཡོན་ལ་རྒྱུ་དང་འབྱོར་བས་ཕུན་སུམ་ཇེ་ཚོགས་སུ་གཏོང་སྟངས་ཤིག་ཡིན་པ་རེད། ཕ་ཡུལ་དུ་ལོག་པ་ནི་དེ་ལྟ་མ་ཡིན་པར་རང་ཉིད་ལ་རྒྱུ་འབྱོར་དང་མཚན་སྙན་གྱི་ལག་ཡོང་ཡོད་ཀྱང་མེད་རུང་། ལོ་གཅིག་གི་ནང་ཚུན་དུ་རྒྱུ་རྐྱེན་ཅི་ཡང་མེད་པར་ལོག་སླེབས་བྱེད་འདོད་ས་ཞིག་དང་ལག་པ་སྟོང་རུང་རིན་མེད་ངང་བསྐྱོད་ཆོག་སའི་ལྗོངས་རྒྱུ་ཁུལ་ཞིག་ཡིན་པར་འདོད་དེ།

　　ཕ་ཡུལ་དུ་ལོག་ཐེངས་རེར་ངས་ཁྱིམ་ལས་ལ་བྱང་བའི་འབྲོག་མོ་སུ་ཞིག་གི་རུམ་ནང་དུ་བཅུག་པའི་རང་གི་སྐྱེ་ལོ་ལྟ་སའི་མེ་ལོང་ལས་དྭངས་པའི་ནམ་མཁའ་སྔོན་པོ་འདི་མཐོང་ཐུབ་ཅིང་། མཐོངས་ཡངས་པའི་མཐོ་སྒང་གི་ནམ་མཁའ་སྔོན་པོ་འདི་མཐོང་ཐེངས་རེར་ངས་ཁོག་རྒྱ་དང་དྭངས་གཙང་ཞེས་པའི་ཐ་སྙད་ཀྱི་འགྲེལ་བ་མང་པོ་ཡིད་ངོར་ཤར་ཡོང་ལ། ངའི་འགུ་མི་གང་བའི་སྒེར་སེམས་ཀྱི་ནམ་མཁར་ཆོག་ཤེས་དང་གུ་ཡངས་ཀྱི་གསལ་ཞིག་ཡང་ཡང་འདེབས་ཡོང་།

　　ང་འདི་ལྟར་ཕ་ཡུལ་གྱི་པང་དུ་རྒྱབ་ལག་བྱས་ཏེ་མཐོ་སྒང་གི་ཉི་མར་བསྲོ་བཞིན་ལྷོད་ཉམས་ཀྱིས་འགྲེང་ནས་སྡོད་དུས། ངས་རི་ལྡེབས་ཀྱི་ངོས་སུ་བཀྲམ་པའི་ནོར་ནག་གི་ཁྱུ་ཚོགས་དང་ཁྱུ་ཚོགས་ཀྱི་མཐའ་རུ་བསྲུང་བའི་རྫི་བོ། ལྕགས་ཐབ་ཀྱི་ནང་དུ་ཚག་སྒྲ་དང་བཅས་ནས་འབར་བའི་ལྕི་བ་དང་དེ་ལས་མཆེད་པའི་དུ་བའི་གཡུ་འབྲུག། ཚ་བོ་དང་ཚ་མོ་ཚོའི་རྩེད་འཇོར་རོལ་བའི་ལྷད་མ་འདྲེས་པའི་འཛུམ་མདངས་སོགས་མིག་ལམ་དུ་འཆར་ཞིང་འོངས། ཅི་འདྲའི་གདོད་ནས་རང་བཞིན་གྱིས་ལྷུན་དུ་གྲུབ་པ་ལྟ་བུའི་རང་བྱུང་གི་རྣམ་པ་ཉམས་དགའ་བོ་ཞིག་ཨང་། ངས་འབྲོག་ཐང་གི་ཕ་ཡུལ་གྱི་རྣམ་པ་འདི་ལས་རྒྱུ་འབྱོར་གྱིས་མ་བཞེངས་པའི་འཚོ་བའི་ཟ་ཟུར་གྱི་བདེ་སྐྱིད་ཀྱི་རྣམ་པ་གཞན་ཞིག་མཐོང་བྱུང་། དེ་བས་ཀྱང་གལ་ཏེ་ང་ཚོ་ལྷོད་དུ་འབབ་རྒྱུ་བྱུང་ཚེ་འཚོ་བ་གང་འདྲ་ཞིག་ལའང་ཡིད་ཚིམས་ཆོག་སྟེ། གལ་ཏེ་ང་ཚོས་ཕ་ཡུལ་མ་བོར་ན་རང་ཉིད་བོར་མི་འགྲོ་ཞིང་། ཕ་ཡུལ་མ་བོར་ན་བདེ་སྐྱིད་ཀྱི་བདེན་པ་བོར་མི་འགྲོ་བའི་ནང་སེམས་ཀྱི་ཁ་དོག་དེ་མཐོང་བྱུང་།

རྩོམ་སྒྲིག་པ། ལྷ་སྐྱིད།
 

རྩོམ་ཁུངས། ངེད་དྲ་བ།