གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རང་བྱུང་ཁམས་ཀྱི་དེབ་ཐེར།

2009-04-02 12:21:00 ཇོ་ཝཧལ་ར་ནེ་རོ། ཀློག་གྲངས། མཆན ཡོད།

               གསལ་བཤད།  དེབ་འདི་ནི་ཕྱི་ལོ ༡༩༢༨ ལོའི་དབྱར་ཁར་རྒྱ་གར་གྱི་སྲིད་བློན་དང་པོ་ཇོ་ཝཧལ་ར་ནེ་རོ་ཡིས་ཁོང་གི་སྲས་མོ་ཨིན་ཌི་ར་གྷན་དི་ལ་བྲིས་པའི་འཕྲིན་ཡིག་ཕྱོགས་སྒྲིག་གི་དེབ་ཆུང་ཞིག་ཡིན། 
               ཁྱེད་དང་བདག་མཉམ་དུ་ཡོད་དུས་ཁྱེད་ཀྱིས་རྟག་ཏུ་ང་ལ་བྱ་དངོས་མང་པོ་ཞིག་གི་སྐོར་དྲིས་ཤིང་ངས་ཀྱང་དེ་དག་ལ་ལན་འདེབས་ཐབས་བྱས་པ་ཡིན། དེང་སྐབས་ཁྱེད་ནིMussoorie ལ་སྡོད་པ་དང་ང་ནི Allahabad རུ་ཡོད་པས་ངེད་གཉིས་ཀྱི་གླེང་མོལ་དེ་དག་བྱེད་ཐབས་བྲལ། དེར་བརྟེན་ངས་ཁྱེད་ལ་བསྟུན་མར་འུ་ཅག་གི་གོ་ལ་འདི་དང་དབྱེ་སྡོད་བྱེད་པའི་རྒྱལ་ཁབ་ཆེ་ཆུང་མང་པོ་ཞིག་གི་ལོ་རྒྱུས་འགྲེལ་བརྗོད་ཐུང་ཐུང་རེ་འབྲི། ཁྱེད་ཀྱིས་དབྱིན་ཇི་དང་རྒྱ་གར་གྱི་ལོ་རྒྱུས་ཏོག་ཙམ་བཀླགས་མྱོང་ཡོད་པ་རེད། འོན་ཀྱང༌། དབྱིན་ཇི་ནི་གླིང་ཕྲན་ཆུང་ཆུང་ཞིག་ཁོ་ན་ཡིན་པ་དང་དེ་ལས་རྒྱ་གར་ནི་རྒྱལ་ཁབ་ཆེན་པོ་ཞིག་ཡིན་ན་ཡང་འདི་ནི་སའི་གོ་ལ་ངོས་ཀྱི་ཆ་ཤས་ཆུང་ཆུང་འབའ་ཞིག་ཡིན། གལ་ཏེ་ང་ཚོས་རང་རེའི་འཛམ་གླིང་འདིའི་སྐོར་གྱི་ལོ་རྒྱུས་ཤེས་འདོད་ན་ཅིས་ཀྱང་ང་ཚོས་རྒྱལ་ཁབ་ཡོངས་རྫོགས་དང་དེར་བཅའ་སྡོད་བྱེད་པའི་མི་མང་ཚང་མའི་སྐོར་ལ་མནོ་བསམ་གཏོང་དགོས་པ་ལས་རང་ཉིད་ཀྱི་ལྟེ་ཁྲག་འཕོ་སའི་རྒྱལ་ཁབ་ཆུང་ཆུང་གཅིག་ཙམ་ལ་སེམས་ཐབས་མེད།

                   ངས་ཁྱོད་ལ་འཕྲིན་པ་འདི་དག་གི་ནང་དོན་གནད་ཉུང་ཙམ་ལས་འབྲི་མི་ཐུབ་པའི་བློ་དོགས་འདུག འོན་ཀྱང་བདག་གི་རེ་བར་གནད་དོན་ཉུང་ཤས་དེས་ཁྱེད་ལ་སྤྲོ་སྣང་སྐྱེད་རྒྱུ་དང་འཛམ་གླིང་ནི་ཧྲིལ་པོ་གཅིག་སྟེ་དེའི་ནང་འཚོ་སྡོད་བྱེད་པའི་མི་ཚང་མ་དང་འུ་ཅག་ནི་གཅེན་གཅུང་ངམ་མིང་སྲིང་ཡིན་པའི་གོ་རྟོགས་སྐྱེད་རྒྱུ་དེའོ། ཁྱེད་ཉིད་འཚར་ལོངས་བྱུང་རྗེས་རིམ་བཞིན་དེབ་ཐེར་མཐུག་པོ་དེ་དག་ལས་སའི་གོ་ལ་དང་དེར་འཚོ་སྡོད་བྱེད་པའི་མི་རྣམས་ཀྱི་ལོ་རྒྱུས་ཀློགས་དང་དེས་ཁྱེད་ཀྱིས་བཀླགས་མྱོང་ཡོད་པའི་གཏམ་རྒྱུད་དམ་བརྩམས་སྒྲུང་དག་ལས་ཆེས་ལྷག་པའི་དང་བ་སྟེར་ངེས།

ཁྱེད་ཀྱིས་ཤེས་གསལ་བཞིན་རང་རེའི་སའི་གོ་ལ་འདི་ནི་བགྲང་བྱ་སྟོང་ཕྲག་མང་པོ་ལོན་པའི་ཧ་ཅང་གི་བགྲེས་པོ་ཞིག་ཡིན་པ་དང༌། དུས་ཡུན་རིང་པོ་ཞིག་ལ་དེར་སྐྱེས་པ་དང་བུད་མེད་སུ་ཡང་འཚོ་སྡོད་བྱེད་མྱོང་མེད། འགྲོ་བ་མིའི་རིགས་མ་བྱུང་བའི་སྔ་རོལ་ཏུ་དེར་སེམས་ཅན་གཅིག་པུ་གནས་པའི་དུས་རབས་ཤིག་དང༌། སེམས་ཅན་གྱི་རིགས་མ་བྱུང་བའི་སྔ་རོལ་ཏུ་དེར་སྲོག་ལྡན་རིགས་གཅིག་ཀྱང་གནས་མ་མྱོང་བའི་དུས་རབས་ཤིག་བྱུང་བ་རེད། དེང་སྐབས་མིའི་རིགས་དང་སེམས་ཅན་གྱི་རིགས་སྣ་ཚོགས་ཀྱིས་ཁེངས་པའི་རང་རེའི་འཛམ་གླིང་འདི་ཡི་ནང་དེ་དག་གཅིག་ཀྱང་མེད་པའི་དུས་སྐབས་དེ་ཅི་འདྲ་ཞིག་ཡིན་པ་ནི་དཔག་དཀའ་བ་ཞིག་ཡིན་མོད། ཚན་རིག་པ་དང་དངོས་པོའི་གནས་ལུགས་ལ་རྟོག་ཞིབ་དང་མནོ་བསམ་བྱེད་མཁན་ཚོས་འུ་ཅག་ལ་ས་སྒང་གི་ཁམས་འདིའི་དྲོད་ཚད་ཧ་ཅང་མཐོ་པས་སྲོག་ལྡན་རིགས་གཅིག་ཀྱང་འཚོ་གནས་མི་ཐུབ་པའི་དུས་སྐབས་ཤིག་བྱུང་མྱོང་བ་འགྲེལ་བརྗོད་བྱེད་བཞིན་ཡོད། དེ་བཞིན་གལ་སྲིད་ང་ཚོས་ཁོང་རྣམས་ཀྱི་དཔྱད་གཞིའི་དེབ་ཐེར་དག་བཀླགས་ཏེ་བྲག་རྡོ་དང་འགྱུར་རྡོ་རིགས་ལ་རྟོག་ཞིབ་བྱས་པ་ན་ང་ཚོ་རང་ངོས་ནས་ཀྱང་དེ་ནི་དངོས་གནས་ཤིག་ཡིན་པ་དཔོགས་ཐུབ།

ཁྱེད་ཀྱིས་དཔེ་དེབ་དག་ལས་ལོ་རྒྱུས་ཀློག་བཞིན་ཡོད་པ་རེད། འོན་ཀྱང་མིའི་འགྲོ་བ་མ་བྱུང་བའི་ཆེས་གདོད་མའི་དུས་སུ་དཔེ་དེབ་ཞེས་པ་ནི་ཅིས་ཀྱང་འབྲི་ཐབས་བྲལ་བ་ཞིག་ཡིན་ན། ང་ཚོས་སྐབས་དེར་ག་རེ་བྱུང་མིན་ཇི་ལྟར་དཔག འུ་ཅག་གིས་རང་དགར་རྟོག་བཟོ་ཙམ་བྱེད་བསྡད་ན་མི་རིགས། སྤྱིར་བཏང་ང་ཚོས་དྲན་སྣང་དུ་ཅི་ཤར་དང་གང་འདོད་རྟོག་བཟོ་བྱས་ཏེ་ཆེས་ཡིད་དུ་འོང་ཞིང་ངོ་མཚར་ཆེ་བའི་ལྷ་སྒྲུང་རིགས་རྩོམ་པ་ནི་ཧ་ཅང་གི་དང་སྣང་འདྲེན་པ་ཞིག་ཡིན་མོད། དེ་ནི་ང་ཚོས་མངོན་སུམ་དུ་མཐོང་བའི་དོན་གནས་གང་ལའང་གཞི་བཞག་མེད་པས་དེར་ངེས་པར་དུ་བདེན་ཁུངས་དགོས་ངེས་སུ་གྱུར་ཡོད་པ་མ་རེད། འོན་ཀྱང་ང་ཚོར་ཆེས་ཡ་ཐོག་གི་དུས་སྐབས་དེར་བྲིས་པའི་དེབ་ཐེར་རིགས་མེད་ན་ཡང༌། འུ་ཅག་གི་བགོ་སྐལ་དུ་ཐོབ་པའི་བྱ་དངོས་ཁག་ཅིག་གིས་གནས་ཚུལ་འབོར་ཆེན་ཞིག་དཔེ་དེབ་ཇི་བཞིན་འགྲེལ་བརྗོད་ཞིབ་གསལ་བྱེད་བཞིན་ཡོད། ང་ཚོ་ལ་བགྲང་ཡས་པའི་བྲག་རྡོ་དང་རྫ་རི། མཚེའུ་དང་རྒྱུ་སྐར། གཙང་པོ་དང་བྱེ་ཐང༌། གདོད་མའི་སྲོག་ཆགས་ཀྱི་འགྱུར་རྡོ་སོགས་ཡོད་པ་འདི་དག་དང་གཞན་བྱ་དངོས་མང་པོ་ཞིག་ནི་རང་རེའི་སའི་གོ་ལའི་སྔ་རབས་ལོ་རྒྱུས་ཀྱི་དེབ་ཐེར་ཡིན། དེ་ཡི་ལོ་རྒྱུས་རྟོགས་པའི་ཐབས་ལམ་དངོས་ནི་གཞན་གྱིས་བརྩམས་པའི་དེབ་ཐེར་དག་ཀློག་པ་ཙམ་མིན་པར་རང་བྱུང་ཁམས་ཀྱི་དེབ་ཐེར་ཆེན་མོ་འདི་ཉིད་བཀླག་རྒྱུའོ།། བདག་གི་རེ་བ་ནི་ཁྱེད་ཀྱིས་མི་འགྱངས་པར་བྲག་རྡོ་དང་རི་རྒྱུད་དག་ལས་ལོ་རྒྱུས་དེ་ཇི་ལྟར་ཀློག་པར་སྦྱངས་རྒྱུའི་འགོ་རྩོམ་རྒྱུ་དེ་ཡིན། ཁྱེད་ཀྱིས་མཐོང་བའི་རྐང་ལམ་ནང་ངམ་རི་ཟུར་དུ་བརྡལ་བའི་རྡེའུ་ཡོད་དོ་ཅོག་ནི་རང་བྱུང་ཁམས་ཀྱི་དེབ་ཐེར་ཆེན་མོའི་ནང་གི་ཤོག་ལྷེ་རེ་རེ་ཡིན་ལ། གལ་སྲིད་ཁྱེད་ཀྱིས་དེ་དག་བཀླག་ཐབས་ཤེས་སོང་ན་དེས་ནི་ཁྱོད་ལ་བྱ་དངོས་མང་པོ་ཞིག་གི་ལོ་རྒྱུས་ཀྱི་བརྒྱུད་རིམ་འཆད་ངེས། ཧིན་རྡུ་དང་ཨུར་ཏུའུ། ཡང་ན་དབྱིན་ཡིག་སོགས་སྐད་ཡིག་གང་འདྲ་ཞིག་ཡིན་ཡང་ཐོག་མར་དེ་ཀློག་ཐུབ་པར་ངེས་པར་དུ་སྐད་ཡིག་དེའི་དབྱངས་གསལ་ལ་སྦྱངས་དགོས་པ་ལྟར། ཁྱེད་ཀྱིས་རྡོ་དང་བྲག་རི་སོགས་རང་བྱུང་ཁམས་ཀྱི་དེབ་ཐེར་དག་ལས་དེ་ཡི་ལོ་རྒྱུས་བཀླག་རྒྱུའི་སྔོན་ལ་ངེས་པར་ཏུ་རང་བྱུང་ཁམས་ཀྱི་དབྱངས་གསལ་སྦྱངས་དགོས། གཅིག་བྱས་ན་ཁྱེད་ཀྱིས་ད་ལྟ་ནས་དེ་ཇི་ལྟར་བཀླག་རྒྱུའི་སྐོར་ཤེས་ངེས། ཁྱེད་ཀྱིས་ཟླུམ་ཞིང་འོད་མདངས་འཚེར་བའི་ཆུ་རྡེའུ་ཆུང་ཆུང་ཞིག་ལ་ལྟོས་དང༌། དེས་ཁྱེད་ཉིད་ལ་རྒྱུ་མཚན་འགྲེལ་བརྗོད་བྱེད་ཀྱིན་མི་འདུག་གམ། ཅི་འདྲ་བྱས་ནས་ཆུ་རྡེའུ་ཆུང་ཆུང་དེ་མཆོག་སོགས་གང་ཡང་མེད་པའི་སྒོར་དབྱིབས་དང་འཇམ་ཤ་དོད་པོ། འོད་མདངས་ཅན་ཞིག་ཆགས་པ་ཡིན་ནམ། གལ་སྲིད་ཁྱེད་ཀྱིས་རྡོ་བ་ཆེན་པོ་ཞིག་ཆག་ཧྲུགས་སུ་བཏང་བ་ཡིན་ན་དེ་ཡི་ཆ་ཤས་ཆུང་ཆུང་རེ་ནི་རྩུབ་ལ་ཟུར་ངོས་དང་མཆོག་སོགས་མི་སྙོམས་པ་རེ་ཡིན་ངེས། དེ་ནི་སྒོར་ཞིང་འཇམ་པའི་ཆུ་རྡེའུ་ཆུང་ཆུང་རེ་དང་ཡེ་ནས་མི་འདྲ། གང་འདྲ་བྱས་ནས་ཆུ་རྡེའུ་ཆུང་ཆུང་དེ་སྒོར་ཞིང་འཇམ་ལ་འོད་མདངས་ཅན་ཞིག་ཆགས་པ་རེད། གལ་སྲིད་ཁྱོད་ལ་དེར་དཔྱད་པའི་རྣམ་དཔྱོད་ཚད་ལྡན་ཞིག་ཡོད་ན་དེས་ནི་ཉིད་ལ་དེ་ཡི་ལོ་རྒྱུས་འཆད་ངེས་སོ།། དེས་ནི་ཁྱོད་ལ་འདི་ལྟར་འཆད་ཀྱི་ཡོད་དེ། དུས་ཡུན་ཤིན་ཏུ་རིང་པོ་འདས་པའི་སྔོན་ཆད་ཞིག་ལ་དེ་ནི་ཁྱེད་ཀྱིས་ཆག་ཧྲུགས་སུ་བཏང་ཞིང་ཟུར་དང་མཆོག་མགོ་མང་པོ་ཡོད་པའི་རྡོ་བ་ཡི་ཆ་ཤས་ཆུང་ཆུང་ཞིག་ལྟ་བུའི་བྲག་རྡོའི་ཆ་ཆུང་ངུ་ཞིག་ཡིན་ལ། ཕལ་ཆེར་རི་ངོགས་སུ་བསྟི་གནས་བྱས་ཏེ་བསྡད་ཡོད། རྗེས་སུ་ཆར་ཆུ་ཡིས་བཤལ་འདེད་བྱས་ཏེ་རྫ་ཆུ་འབབ་པའི་གྲོག་ཤུར་ཕྲ་མོའི་གཤོང་དུ་བསྐྱལ་བ་དང་རྫ་ཆུ་ཡིས་དེ་བདས་ནས་རྒྱུགས་ཆུ་ཕྲ་མོའི་ཀློང་དུ་བསྐྱལ། རྒྱུགས་ཆུ་ཕྲ་མོས་དེ་ཆུ་ཀློང་ཆེན་པོའི་འཇིངས་སུ་འཁུར་པ་དང༌། རྒྱུན་ཆད་མེད་པར་ཆུ་གཏིང་ནས་འགྲེ་ལྡོག་བརྒྱབས་པས་དེ་ཡི་ཟུར་དང་ངོས་ཚང་མ་འཇམ་པོར་བསྙོམས་ཤིང་འོད་མདངས་འཚེར་བར་གྱུར་ཏེ། ད་གཟོད་ཁྱེད་ཀྱི་མཐོང་ཡུལ་དུ་གྱུར་བའི་ཆུ་རྡེའུ་འདི་གྲུབ་པ་ཡིན་ལ། གང་འཚམས་ཤིག་ནས་དེ་རྒྱུགས་ཆུས་ཤུལ་ཏུ་བསྐྱུར་ཙ་ན་ཁྱེད་ཀྱིས་རྙེད་ཐུབ་པ་བྱུང་བ་རེད། གལ་སྲིད་རྒྱུགས་ཆུས་མུ་མཐུད་དུ་ཁུར་བ་ན་དེ་ཇེ་ཆུང་ཇེ་ཆུང་དུ་གྱུར་ནས་མཐར་བྱེ་མའི་ཆ་ཤས་ཞིབ་ཞིབ་ཅིག་ཆགས་ངེས་ཤིང་བྱེ་རྡུལ་གྱི་སྤུན་གྲོགས་ཚོ་དང་མཉམ་དུ་བསྒྲིལ་ནས་མཚོ་འགྲམ་དུ་བྱིས་པ་ཚོས་བྱེ་མའི་ཕུང་པོ་ཡི་མཁར་རྫོང་བརྩིགས་ཏེ་རྩེད་མོ་རྩེད་སའི་འགྲམ་ཐང་མཚར་སྡུག་ལྡན་པ་ཞིག་བསྐྲུན་གྱི་ཡོད་པ་རེད།

                གལ་སྲིད་ཆུ་རྡེའུ་ཆུང་ཆུང་ཞིག་གིས་འདི་འདྲའི་འབོར་ཆེན་ཞིག་འཆད་ཐུབ་ཀྱི་ཡོད་ན། ང་ཚོས་བྲག་རྡོ་དང་རྫ་རི་ཡོད་ཚད། ད་དུང་རང་རེའི་མཐའ་སྐོར་གྱི་བྱ་དངོས་མང་པོ་ཞིག་ལས་ཇི་འདྲའི་མང་པོ་ཞིག་དཔོག་ཐུབ་ཨང༌།།

(བུདྡྷ་སྐྱབས་ཀྱིས་བསྒྱུར།)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།