གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཉི་ཡིག་ནས་བསྒྱུར་བའི་བརྩམས་སྒྲུང་། སྐུ་སྲས། ༡

2011-01-12 10:34:00 ནཱ་ཚི་མེད་སོ་སད་ཁེ། ཀློག་གྲངས། མཆན ཡོད།


                                ལེའུ་དང་པོ།*    
      ཕ་མས་ངན་ལང་སྐྱག་ལང་ལ་བཏང་ནས་ཡོང་བར་བརྟེན།   བྱིས་པའི་དུས་ནས་བཟུང་ཕམ་ཁ་རྐྱང་རྐྱང་མྱངས་ནས་བསྡད།   སློབ་ཆུང་གི་སྐབས་སུ་ཁང་པའི་ཉིས་ཐོག་ནས་མར་མཆོངས་ཏེ་སྒལ་ཚིགས་བརྡལ་ཅིང་གཟའ་འཁོར་གཅིག་ཙམ་ལ་ངལ་གསོ་བྱེད་དགོས་པ་བྱུང་། 
      དེ་ལྟར་གླེན་རྟགས་སྟོན་དགོས་དོན་ཅི་ཞིག་ཡིན་པ་སུས་ཀྱང་དོགས་སློང་སྐྱེས་སྲིད་མོད།   འོན་ཀྱང་།  དམིགས་བསལ་གྱི་རྒྱུ་མཚན་ལྡན་པའི་གནས་ལུགས་གང་ཡང་མི་འདུག   
      ཁང་པའི་ཉིས་ཐོག་ནས་སྐེ་བསྲིངས་ཏེ་མར་ལ་བལྟས་ནས་བསྡད་ཡོད་པའི་སྐབས་དེར།  སློབ་གྲོགས་ཞིག་གིས“ཨ་རོགས  ཁྱོད་བུ་ངར་བ་ཡིན་ན།  དེ་ནས་མར་ལྡོངས་དང་”ཞེས་ཀུ་རེའི་ཚུལ་གྱིས་ངར་བསླངས་པའི་རྐྱེན་རེད།   སློབ་གྲྭའི་ལས་བཟོ་བས་ཁུར་ནས་ཕྱིར་ཡུལ་ལ་བསྐྱལ་ཡོང་དུས།   ཨ་ཕས་མིག་ཆེར་བགྲད་དེ་“གླེན་པ་ཁྱོད།  ཉིས་ཐོག་ནས་མར་ལྡིང་མཁན་ཡང་ཡོད་པ་ཡིན་ནམ”ཞེས་བཤད་པར། “ཐེངས་རྗེས་མར་སྒལ་ཚིགས་བརྡལ་དུ་མ་གཞུག་པར་མར་ལྡིང་རྒྱུ་ཡིན”ཞེས་ལན་བཏབ།
       ངས་གཉེན་ཉེ་ཞིག་གིས་བྱིན་པའི་གྲི་ཆུང་ཆུང་དེ་གྲོགས་པོ་ཞིག་ལ་ངོམ་པ་ན། “བཀྲག་མདངས་ནི་ཡོད་ཀྱང་།  རྣོན་པོ་ཞིག་མིན་པ་འདྲ”་ཞེས་བཤད་བྱུང་། 
       “ གཅོད་མི་ཐུབ་པ་ཞིག་དང་གཏུབ་མི་ཐུབ་པ་ཞིག་མེད།  ག་རེ་གཅོད་དགོས་པ་ཡིན་ནམ།”ཞེས་དྲིས་པར།   “འོ་ན།  ཁྱོད་ཀྱི་མཛུབ་མོ་ཆོད་དང”ཞེས་བཤད་པ་དང་།  ངས་གཡས་ལག་གི་མཐེབ་ཆེན་བཅད།  ཡིན་ནའང་།  གྲི་ཆུང་དྲགས་པ་དང་མཛུབ་མོའི་རུས་པ་སྲ་མོ་ཡིན་པར་བརྟེན།  ད་ལྟའང་མཐེབ་མཛུབ་ལག་པའི་སྟེང་དུ་ལུས་འདུག་ཀྱང་རྨ་ཁ་ཤི་རག་བར་དུ་ཡལ་མི་སྲིད་པ་འདྲ། 
       ལྷས་རའི་ཤར་ཕྱོགས་ལ་གོམ་པ་ཉི་ཤུ་ལྷག་ཙམ་སོང་ཚེ། ལྷོ་ངོས་སུ་ཚོད་ཞིང་ཆུང་ཆུང་ཞིག་ཡོད་པ་དང་དེའི་ནང་དུ་ལི་ཙི་སྡོང་བོ་ཞིག་འགྲེངས་འདུག   འདི་ནི་སྲོག་ལས་ཀྱང་རྩ་ཆེ་པའི་ལི་ཙི་སྡོང་བོ་ཞིག་རེད།  འབྲས་བུ་སྨིན་ཡོད་པའི་སྐབས་སུ།  ངས་སར་ལྷུང་ཡོད་པའི་སིལ་ཏོག་བཏུས་ཡོང་སྟེ་སློབ་གྲྭ་ནས་ཟས།   ཚོད་ཞིང་གི་ནུབ་ཕྱོགས་ནི་ཡཱ་མ་ཞི་རོ་ཁང་ཟེར་བའི་གཏའ་མ་ཁང་གི་ལྷས་རར་འབྲེལ་ཡོད་པ་དང་།  གཏའ་མ་ཁང་དེ་རུ་ཁཱང་ཐ་རོད་ཅེས་འབོད་པའི་ལོ་བཅུ་གསུམ་བཅུ་བཞི་ཅན་གྱི་གཞོན་ནུ་ཞིག་འདུག   ཁཱང་ཐ་རོད་ནི་མི་གཉོམ་ཆུང་ཞིག་རེད།  ཡིན་ཡང་།  རྒྱུན་དུ་ཤིང་ར་བརྒལ་ཏེ་ལི་ཙི་བརྐུ་རུ་ཡོང་བཞིན་འདུག   ཉིན་ཞིག་གི་ས་སྲོད།   ང་རང་སྒོ་རྒྱབ་ནས་སྦས་ཏེ་ཁོ་རང་འཛིན་བཟུང་བྱས།  སྐབས་དེར་ཁོ་རང་འགྲོ་སའི་ལམ་མ་རྙེད་པར་སྟོབས་ཤུགས་ཡོད་རྒུས་ང་ལ་ཕྱིར་རྒོལ་བྱས། 
        ཁོ་རང་ང་ལས་ལོ་གཉིས་ཙམ་གྱིས་ཆེ།   གཉོམ་ཆུང་ཞིག་ཡིན་ནའང་ལུས་སྟོབས་ཆེན་པོ་འདུག   མགོ་དཀྲིས་མཐུག་པོ་ཞིག་རྒྱབ་ཡོད་པའི་ཁོང་གིས་མགོ་བོ་ངའི་བྲང་ཁར་ཤུགས་ཀྱིས་གཏད་ནས་ཡོང་ནའང་།  སྟབས་མ་ལེགས་པར་མགོ་བོ་ཤུལ་ཏེ་ངའི་ཕུ་ཐུང་ཆེན་པོའི་ནང་དུ་ཚུད་པས།  ངས་ལག་པ་འགུལ་མ་ཐུབ་པར་གང་བྱུང་མང་བྱུང་དུ་གཡུག་པའི་སྐབས་དེར་ཁོང་གིས་ངའི་ལག་ངར་ལ་སོ་བཏབ་པ་དང་།  ངས་ན་ཟུག་བཟོད་མ་ཐུབ་པར་ཁོ་རང་ཤིང་རར་གཏད་ཅིང་ཉྭ་སྒྲོག་བརྒྱབ་ཏེ་ཐང་ལ་བསྒྱེལ།
        ཡཱ་མ་ཞི་རོ་ཁང་གི་ས་ངོས་ནི་ཚོད་ཞིང་ལས་སྨི་གཉིས་ཙམ་གྱིས་དམའ་བར་བརྟེན།   ཤིང་རའི་དྲ་རྐང་གོང་མ་གཉིས་ཆག་སྟེ་”ཨག་”སྐད་དང་བཅས་རང་གི་ས་ཐོག་ཏུ་མགོ་ཐུར་དུ་ལྷུང་སོང་།   ཁོ་རང་མར་ལྷུང་བའི་སྐབས་སུ།   ངའི་ལྭ་བའི་ཕུ་ཐུང་གི་ཕྱེད་ཀ་ཆད་དེ་གློ་བུར་དུ་ལག་པ་རང་དབང་དུ་གྱུར།   ཉིན་དེའི་མཚན་མོར།   ཨ་མ་ལགས་ཡཱ་མ་ཞི་རོ་ཁང་ལ་འགྱོད་བྱེད་དུ་སོང་བ་དང་ཞོར་ལ་ཕུ་ཐུང་ཕྱིར་ཁྱེར་ཡོང་།  
        དེ་ལས་གཞན་པའི་པྲ་ཚག་ཀྱང་མང་པོ་བྱས།   ཁང་པ་ལས་པའི་ལས་བཟོ་བ་ཁཱ་ནལ་ཁོ་དང་ཉ་ཚོང་ཁང་གི་ཁཱ་ཁུའུ་གཉིས་ཁྲིད་དེ།   མཱོ་ས་ཁུའུ་ཡི་ལ་སེར་གྱི་ཞིང་ས་སློག་རྡོ་སློག་ ཀྱང་བྱས་མྱོང།   ལ་སེར་གྱི་མྱུ་གུ་ཅུང་ཙམ་མ་གཏོགས་འབུས་མེད་པའི་ས་ཞིང་དེ་ཁྲེ་རྒོད་ཀྱི་སོག་མས་ཡོངས་སུ་བཀབ་ཡོད་པ་དང་། དེའི་སྟེང་དུ་ང་ཚོ་མི་གསུམ་གྱིས་ཉིན་ཕྱེད་ཙམ་ལ་འཇུ་རེས་བསྟུད་མར་བྱས་པས་ལ་སེར་ཡོད་ཚད་བཅག་བཅག་ལད་ལད་བྱས།   ཧྥའུ་རའུ་ཁ་བ་ཚང་གི་འབྲས་ཞིང་གི་ཁྲོམ་པའི་ནང་དུ་ས་བཏབ་པ་དང་། ཞིང་ལ་ཆུ་འདྲེན་བྱེད་ཀྱི་སྨྱུག་སྦུག་ནང་དུ་རྡོ་དང་དབྱུ་གུ་བརྫངས་ཏེ།   ཆུ་མཚམས་ཆད་པ་མཐོང་རྗེས་ཡུལ་ལ་ལོག་སྟེ་ཟ་མ་ཟ་བཞིན་པའི་སྐབས་དེར།   ཧྥུ་རུ་ཁ་བ་ཁོ་རང་ཁ་སྤོ་ཁ་ནས་ལངས་ཤིང་ཞེ་སྤོ་གཏིང་ནས་ལངས་ཏེ་སྐད་ཅོར་རྒྱག་བཞིན་ཁྱིམ་ལ་ཤོར་ནས་ཐོན།   སྐབས་དེར་སྒོར་ཆད་འཇལ་བས་དོན་དག་མཇུག་བསྡུ་སོང་བ་འདྲ། 
        ཨ་ཕས་ང་ལ་ཅུང་ཙམ་ཡང་མི་གཅེས།  ཨ་མ་ནི་གཅེན་པོ་ཁོ་ནར་ཕྱོགས་ཞེན་ཆེ།   གཅེན་པོ་ནི་ཤ་མདངས་དཀར་ཞིང་ཟློས་གར་ལ་ལད་མོ་བྱས་ཏེ་སྐྱེས་མ་འཁྲབ་སྟོན་བྱེད་པར་དགའ།   ཨ་ཕས་ང་རང་མཐོང་ཐེངས་རེར་”བླུན་ཕྲུག་འདི།  ཅིས་ཀྱང་མི་བཟང་བོ་ཞིག་ཏུ་འཁྱོངས་མི་སྲིད་ཁོ་ཐག་རེད”ཅེས་གཤེ་གཤེ་གཏོང་བ་དང་།             ཨ་མས་”མ་རབས་ཁོ་ན་བྱེད་བཞིན་ཡོད་པས།  སེམས་ཁུར་ཞིག་རེད”ཅེས་སྡུག་མོས་འདོན་བཞིན་འདུག 
         གང་ལྟར་ཀྱང་ཁྱེད་ཚོས་ཤེས་གསལ་ལྟར།  ང་རང་དངོས་གནས་བཟང་བོ་ཞིག་འཁྱོངས་མི་སྲིད་པ་ཁོ་ཐག་རེད།   ཕ་མས་སེམས་ཁུར་བྱེད་བཞིན་པ་དེ་ལའང་ཁག་མི་འདུག་སྟེ། ང་རང་བཙོན་ཁང་ལ་བསྐྱལ་མ་དགོས་པར་ཉི་མ་འཁྱོལ་ཐབས་བྱེད་བཞིན་པས་རྐྱེན་གྱིས་རེད།
        ཨ་མ་སྙུང་གཞིས་འདས་བའི་ཉིན་གཉིས་གསུམ་ཙམ་གྱི་ཡར་སྔོན་ལ།   གཡོལ་ཁང་ནས་མགོ་ལངས་སྟེག་ནས་རྩིབ་གཞོགས་ཐབ་ཀའི་ཁ་གདེངས་ལ་ཕོག་པ་དང་ན་ཟུག་ཆེན་པོ་བྱུང་ཞིང་།  “ ཁྱོད་འདྲ་བའི་བུ་ཞིག་མཐོང་འདོད་ཡང་མི་འདུག “ཅེས་ཨ་མ་ཁོང་ཁྲོ་ཆེན་པོ་ལངས་བར་བརྟེན།   ང་རང་གཉེན་ཉེ་ཚང་ལ་ཞག་འདུག་བྱེད་དུ་སོང་།   གཉེན་ཉེ་ཚང་ལ་ཐོན་ནས་ཅུང་མ་འགོར་བར་ཨ་མ་ཚེ་ལས་འདས་སོང་ཞེས་བརྡ་ཐོན།   དེ་འདྲའི་མགྱོགས་མྱུར་ངང་ཚེ་ལས་འདས་འགྲོ་བ་ཡིད་ལའང་མ་ཤར།   སྙུང་གཞི་དེ་འདྲིའི་ལྕི་མོ་ཞིག་ཡིན་པ་ཤེས་རྒྱུ་ན།   ཨ་མའི་སེམས་ཁ་མ་དཀྲུགས་ན་ཡག་པོ་བྱུང་སོང་སྙམ་སྟེ་ཕྱིར་ཁྱིམ་ལ་ལོག  གཅེན་པོས་” བླུན་ཕྲུག་ཁྱོད་ཀྱི་རྐྱེན་གྱིས་ཨ་མ་ལགས་སྔ་ས་ནས་འདས་སོང་བ་རེད”ཅེས་བཤད་པ་དང་།   ང་རང་ཁོང་ཁྲོ་ལངས་ཏེ་གཅེན་པོ་ལ་འགྲམ་ལྕག་ཐེངས་འགའ་གཞུས་པ་ཡིན། 
           ཨ་མ་ཚེ་ལས་འདས་རྗེས།   ཨ་ཕ་དང་གཅེན་པོ།   ངེད་གསུམ་མཉམ་གཅིག་ཏུ་འཚོ་བ་རོལ་ནས་བསྡད་ཅིང་།   ཨ་ཕ་ནི་ལས་ཀ་གང་ཡང་མི་བྱེད་པར་མི་སུ་ཞིག་ཡིན་རུང་མཐོང་མ་ཐག དེ་ལ་” ཁྱོད་རང་སྐྱག་གཟན་རེད།  ཁྱོད་རང་སྐྱག་གཟན་རེད།”  ཅེས་གཤེ་གཤེ་གཏོང་བའི་གོམས་གཤིས་ངན་པ་ཞིག་ཁ་ལ་ལོབས་ཡོད་པ་དང་།  ཅི་ཞིག་ལ་སྐྱག་གཟན་ཟེར་པ་ད་དུང་ཡང་ཤེས་ཀྱི་མི་འདུག    རྩ་མི་ཚང་པའི་ཕ་རྒན་ཞིག་རེད། གཅེན་པོས་ང་རང་ལས་གཉེར་པ་ཞིག་བཤད་རྒྱུ་ཡིན་ཞེས་དབྱིན་སྐད་སློབ་སྦྱོང་བྱེད་བཞིན་འདུག   ཁོ་རང་གི་གཤིས་ཀ་ཐོག་མ་ཉིད་ནས་སྐྱེས་མ་ཞིག་དང་མཚུངས་ཤིང་གཡོ་སྒྱུ་ཆེ་བས་ངེད་གཉིས་བར་ལ་དེ་འདྲའི་བརྩེ་འདང་ཆགས་མེད། ཉིན་བཅུའི་མཚམས་ནས་ཐེངས་རེར་འཁོན་འཛིང་བྱེད་དགོས་བར་ཆགས།  ཉིན་ཞིག་ལ་ངེད་གཉིས་མིག་མངས་འདེད་པའི་ཚེ་ན།   ང་རང་ཁོང་གི་རིག་པ་ལས་ཕམ་ཞིང་འུ་ཐུག་ཐབས་ཟད་ཡོད་པའི་རྣམ་པ་དེ་ལ་འཕྱ་དམོད་བྱས། ཁོང་ཁྲོ་ཆེན་པོ་ལངས་ཏེ་ལག་གི་འགྱིག་རྡེའུ་ཡིས་གཅེན་པོའི་ཐོད་པ་ལ་བརྒྱབ། སྨིན་མཚམས་ནས་ཁྲག་ཅུང་ཙམ་མ་གཏོགས་བཞུར་ཡོང་མེད་ནའང་།   གཅེན་པོས་ཨ་ཕར་གཏུག་བཤེར་བྱས་ཤིང་།   ཨ་ཕས་”ཕ་བུའི་འབྲེལ་བ་བཅད་པ་ཡིན་”ཞེས་ཁོངས་ཁྲོ་དང་བཅས་སྨྲས།  
           སྐབས་དེར་ཐབས་བཀོད་ཟད་དེ་ཨ་ཕས་བཤད་པ་ནང་བཞིན་ཕ་བུའི་འབྲེལ་བ་ཆད་རྒྱུ་རེད་བསམ་བཞིན་ཡོད་པའི་སྐབས་དེར།   ལོ་བཅུའི་རིང་ལ་གཡོག་ལས་བྱས་ནས་བསྡད་ཡོད་པའི་ཁཱེ་ཡོ་ཟེར་བའི་གཡོག་མོ་དེས།   ངུ་ཞོར་དུ་ཨ་ཕ་ལ་ཞུ་བ་བྱས་པས་མཐར་ཨ་ཕའི་ཁོང་ཁྲོ་ཞི་བར་གྱུར།   ཡིན་ནའང་ཨ་ཕ་ལ་དེ་འདྲའི་འཇིགས་སྣང་མ་སྐྱེས།   དེ་ལས་ལྡོག་སྟེ་གཡོག་མོ་ཁཱེ་ཡོ་ལ་སྙིང་རྗེ་ཤིག་སྐྱེས་བྱུང་།   གཡོག་མོ་ཁོ་རང་གི་ཁྱིམ་རྒྱུད་ནི་སྔོན་ཆད་སྐུ་དྲག་ཚང་ཞིག་རེད་ཟེར་མོད།   ཐཱོ་ཁུ་ང་བའི་སྲིད་དབང་ཐོར་བཤིག་ཏུ་གྱུར་སྐབས་ཁྱིམ་ཚང་ཉམས་རྒུད་དུ་གྱུར་ཏེ་གཞན་གཡོག་ལ་ཚུད་པ་རེད་ཅེས་གོ་ཐོས་བྱུང་།   དེ་བས་སྤྱིར་བཏང་གི་རྒན་མོ་ཞིག་ཏུ་ཆགས་ཡོད་པ་རེད།  ལས་འབྲེལ་གང་ཞིག་ཡོད་པ་མི་ཤེས་མོད། གང་ལྟར་ཀྱང་ཁོ་མོ་ང་ལ་འདང་ཞེན་ཤིན་ཏུ་ཆེ།   བསམ་ཡུལ་ལས་འདས་པ་ཞིག་རེད།   ཨ་མ་ལགས་ཐོག་མ་ཉིད་ནས་ང་ལ་འདང་ཞེན་མེད་པ་དང་ཨ་ཕ་ཡང་ཐབས་ཟད་འུ་ཐུག་འདུག   སྡེ་མི་རྣམས་ཀྱིས་ཀྱང་ང་ལ་ཐན་ལྟས་ཐཱ་རའོ་ཞེས་སྡེ་གྲལ་ནས་ཕུད་ཡོད་པའི་སྐབས་དེར།   རྒན་མོ་དེས་ང་ལ་ཤིན་ཏུ་བརྩེ་ཞིང་སེམས་ཁུར་མཛད་བཞིན་འདུག 
           ང་ལ་ཀུན་གྱིས་དགའ་མོས་བྱེད་པའི་གཤིས་རྒྱུད་འཇམ་པོ་ཞིག་མེད་པས་སེམས་ཆུང་བྱས་ཏེ་བསྡད་ན་གཞན་གྱི་དམའ་འབེབས་བྱ་ཡུལ་དུ་གྱུར་བ་ཡིད་ལའང་མ་ཤར། དེ་ལས་ལྡོག་སྟེ་རྒན་མོ་ཁཱེ་ཡོ་ལྟར་ང་ལ་གཅེས་སྐྱོང་བྱེད་པའི་ཚུལ་དེར་ཡ་མཚན་དང་བཅས་བསམ་གཞིགས་བཏང་། མཚམས་རེར་ཇ་ཁང་དུ་མི་གཞན་མེད་པའི་སྐབས་སུ། ཁོ་མོས་” ཁྱོད་ཀྱི་སེམས་རྒྱུད་དྲང་ལ།   རང་གཤིས་ལེགས་པོ་འདུག “ཅེས་བསྟོད་བསྔགས་བྱས་མྱོང་མོད་། འོན་ཀྱང་།  ངས་དེའི་ནང་དོན་རྟོགས་མ་ཐུབ། སྐབས་དེར་ངའི་བསམ་པར་”གཤིས་རྒྱུད་བཟང་ན་མི་གཞན་པའང་ང་ལ་དགའ་མོས་བྱེད་སྲིད་ངེས་རེད”་ཅེས་བསམས་བྱུང་། ཡིན་ནའང་།དེ་ལྟར་བཤད་ཐེངས་རེར་ངས་རྒྱུན་དུ་”ང་རང་ངོ་བསྟོད་ལ་མི་དགའ”ཅེས་ལན་བཏབ།   “རྒྱུ་མཚན་དེའི་དབང་གིས་ཁྱོད་ལ་གཤིས་རྒྱུད་བཟང་པོ་ཞིག་འདུག”ཅེས་འཛུམ་མདངས་ཀྱིས་ངའི་གདོང་ལ་ཅེར་འདུག ཕལ་ཆེར་ཁོ་མོས་རང་སྣང་གང་ཤར་གྱིས་ངོ་བསྟོད་བྱེད་བཞིན་ཡོད་པ་འདྲ་སྙམ་སྟེ་སེམས་པ་ཅུང་ཙམ་སྐྱིད་པོ་མ་བྱུང་། 
         ཨ་མ་འདས་རྗེས་རིམ་བཞིན་ཁཱེ་ཡོ་ཡིས་ང་ལ་བཅིངས་པའི་བྱམས་བརྩེ་ཆེ་རུ་ཕྱིན་པ་དང་།    ཅིའི་ཕྱིར་ང་ལྟ་བུའི་མི་ལ་འདི་ལྟར་འདང་ཞེན་ཆེ་བ་རྒྱུ་མཚན་གང་ཡིན་པ་བློ་ལ་མ་དཔོག   སྙིང་བོ་མི་འདུག  སྤྱིར་ང་ལ་ཤ་ཚ་མ་དགོས་པར་བསྡད་ན་ཆོག་མོད།   དེ་ལྟར་བྱེད་པ་ལ་སེམས་ནས་བཟོད་དཀའ་བ་ཞིག་འདུག  དེ་འདྲ་ཡིན་ཡང་ཁཱེ་ཡོ་སྔར་བཞིན་ང་ལ་བྱམས་བརྩེ་ཆེ།  སྐབས་འགར་རང་ཉིད་ཀྱི་དངུལ་བེད་སྤྱད་དེ་ཉ་བསྲེག་མ་དང་ཀ་ར་གོ་རེ་སོགས་ཉོས་ནས་སྟེར་བ་དང་།   གྲང་ངར་ཆེ་བའི་མཚན་མོར་གསང་སྟབས་ཀྱིས་ཅུང་རྡོག་ཁོལ་མ་ཁྱེར་ཡོང་སྟེ་ངའི་བསྔས་མགོའི་འགྲམ་དུ་བཞག་རྗེས་གོམ་ཁ་ཡང་མོས་ཕྱིར་ལོག་འགྲོ    སྐབས་འགར་རྫ་ཁོག་ཐུག་པ་ཡང་ཁྱེར་ཡོང་། 
         ཁ་ཟས་ཁོ་ན་མ་ཡིན་པར་ལྷམ་དང་རྐང་འབོལ།   ཞ་སྨྱུག   འབྲི་དེབ་སོགས་ཀྱང་ཐོབ་མྱོང་།   ཤོག་དངུལ་གསུམ་ཙམ་བསྐྱིས་མྱོང་བའི་དོན་དག་ཀྱང་ཡོད།  འོན་ཀྱང་།  དེ་ནི་ངས་ཕར་ལ་” སྐྱིས་ཤིག “་ཅེས་རེ་བ་བཏོན་པ་མ་ཡིན་པར།  ཁོ་མོ་ངའི་ཁྱིམ་ལ་ཡོང་སྟེ་”དངུལ་མེད་པར་དཀའ་ཁག་ལ་འཕྲད་ཡོད་པ་མ་ཡིན་ནམ།  འདི་བེད་སྤྱོད་གཏོང་རོགས་གནང་”ཞེས་སྨྲས་ཏེ་བསྐྱིས་བ་རེད།   སྐབས་དེར།  ངས་ཡང་ཡང་” མི་དགོས “་ཞེས་བཤད་མོད།  “ ཅིས་ཀྱང་བེད་སྤྱོད་བྱོས་ཤིག”་ཅེས་ནན་གྱིས་སྐུལ་བར་ངས་ཀྱང་བསྐྱིས་བའི་ཚུལ་དུ་བླངས། དོན་དངོས་སུ་སེམས་གཏིང་ནས་དགའ་སྤྲོ་ཆེན་པོ་སྐྱེས།  
        ཡིན་ནའང་།  ཤོག་དངུལ་གསུམ་པོ་དངུལ་ཁུག་ཏུ་བཞག་ཅིང་རུམ་ལ་བཅུག་སྟེ་སྤྱོད་ཁང་ལ་སོང་བ་ན།   རུམ་ནས་ཤུལ་ཏེ་སྐྱག་དོང་ནང་དུ་ལྷུང་སོང་།   ཐབས་བྲལ་ཏེ་ཁཱེ་ཡོ་ལ་བཤད་པ་ན།  ཁོ་མོས་མགྱོགས་མྱུར་གྱིས་དབྱུ་གུ་ཞིག་བཙལ་ཡོང་སྟེ་” ཡར་བླངས་ནས་སྟེར “་ཞེས་སྨྲས།   ཅུང་ཙམ་འགོར་རྗེས།   དོང་ཆུའི་འགྲམ་དུ་ཤག་སྒྲ་ཞིག་བྱུང་བ་དང་ཕྱིར་བུད་དེ་བལྟས་པ་ན།   ཁོ་མོས་དངུལ་ཁུག་ཡར་བཏེགས་ཡོང་སྟེ་ཆུས་འཁྲུད་བཞིན་འདུག   དངུལ་ཁུག་ལས་ཤོག་དངུལ་གཅིག་བླངས་ཏེ་བལྟས་པ་ན་མདོག་ཇ་མདོག་ཏུ་གྱུར་ཞིང་རི་མོའང་ཅུང་ཙམ་དག་འདུག   ཁོ་མོས་མེ་ཐབ་ཀྱིས་སྐམ་པར་བྱས་ཏེ་”ད་ཆོག་པ་འདྲ་”ཞེས་སྨྲས།   ངས་སྣས་བསྣམས་ཏེ་” དྲི་ངན་ཞིག་བྲོ”་ཞེས་བཤད་པ་ན། དེས་ན་”ང་ལ་བྱིན་དང་གསར་བ་ལ་བརྗེས་ཏེ་སྟེར་”ཞེས་སྨྲས།   གང་ཞིག་ནས་གཡོ་ཐབས་བཀོལ་པ་མི་ཤེས་མོད་ཤོག་སྒོར་གྱི་ཚབ་ལ་དངུལ་སྒོར་གསུམ་ཁྱེར་ནས་ཡོང་།   དངུལ་སྒོར་དེ་གང་ལ་བེད་སྤྱོད་བཏང་བ་བརྗེད་སོང་།   “སྐྱིན་པ་མྱུར་དུ་སྟེར་རྒྱུ་ཡིན”་ཞེས་ཁས་བླངས་ཟིན་ཡོད་ཀྱང་སྟེར་མ་ཐུབ།   ད་ལྟར་མཚོན་ན་ལྡབ་བཅུ་ཡི་སྐྱིན་པ་སྟེར་འདོད་ཀྱང་སྟེར་མི་ཐུབ། 

                                                                          
    *སྐུ་སྲས་ནི་ཉི་ཧོང་གི་རྩོམ་པ་པོ་ནྰ་ཚི་མེད་སོ་སད་ཁེ་ཡིས་ད་ནས་ལོ་ངོ་བརྒྱ་ལྷག་གི་སྔོན་དུ་བརྩམས་གནང་མཛད་པའི་བརྩམས་སྒྲུང་མིང་གྲངས་ཅན་ཞིག་ཡིན་ལ།  འཛམ་གླིང་གི་སྐད་ཡིག་བཅོ་བརྒྱད་ལྷག་ལ་ཡིག་སྒྱུར་བྱས་ཡོད་པར་སྐད། 
སྤྱིར་ན་སྐུ་སྲས་ཡིག་སྒྱུར་གྱི་ལས་ལ་ཞུགས་པའི་ཉི་སྡོད་བོད་མི་དག་གི་ཆེད་ལས་ནི་རྒྱལ་སྤྱིའི་དཔལ་འབྱོར་རིག་པ་དང་ཁོར་ཡུག་ཚན་རིག      རྫས་འགྱུར་བཟོ་རིག་པ།  གློག་རྡུལ་རིག་པ།  རྒྱལ་སྤྱིའི་བཅའ་ཁྲིམས་རིག་པ་སོགས་ཡིན་པས་ན།  བོད་ཡིག་གི་ཆུ་ཚད་ལ་ཚད་བཀག་ཡོད་པ་མ་ཟད་།  ཡིག་སྒྱུར་གྱི་ལས་ལ་བྱང་ཆ་ཆེར་མེད་པས་ནོར་འཆུག་དང་ཆད་ལྷག    ཚིག་སྦྱོར་མི་བདེ་བ་སོགས་སྐྱོན་ཆ་གང་མང་མང་ཅིག་ཡོད་སྲིད་ནའང་།   ལྗགས་ལྕེ་གཞན་ཞིག་གཡར་ནས་འཚོ་དགོས་པའི་གྲུ་ཁ་འདིར་ང་ཚོས་མི་རིགས་སྐད་ཡིག་ལ་དུངས་སེམས་མཚོན་པའི་ཆེད་དུ་བརྩམས་སྒྲུང་འདི་བོད་ཡིག་ཏུ་སྒྱུར་བ་ཡིན་པས།  རྒྱ་ཆེ་བའི་ཡུལ་མི་སྤུན་ཟླ་ཚོས་སློབ་སྟོན་གང་མང་བསྩོལ་བར་སྙིང་ནས་རེ།  
                                                           (ཉི་སྡོད་བོད་མི་འགས་བསྒྱུར) 

རྩོམ་ཁུངས། ཉི་སྲས་ཀྱི་པོད་ཁུག

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།