གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཆུ་རུལ།

2009-12-16 08:43:00 བུན་ཡེ་ཏའོ་ཡིས་བརྩམས། ཀློག་གྲངས། མཆན ཡོད།

རེ་བ་ཡིས་མ་བཟུང་ཆུ་རུལ་འདི་ལས།།

ཡེར་མོ་ཙམ་མཐོང་བའི་གོ་སྐབས་དབེན་པས།།

གོ་ཆོད་དུ་མེད་པའི་ཟངས་དུམ་ལྕགས་གྲུག།

ཅི་འདོད་དུ་གཡུག་པར་ཕངས་སེམས་མེད་ཅིང་།།

ཟ་འཕྲོ་དང་འཐུང་ལྷག་འཕོ་བ་ལ་ཡང་།།

ཐེ་ཚོམ་གྱི་འཆིང་ཐག་བཅད་ན་ལེགས་སོ།།

 

མརྒད་ཀྱི་རྒྱན་ཆ་ཟངས་ཀྱིས་འདོགས་སྲིད།།

ཁམ་བུ་ཡི་མེ་ཏོག་ལྕགས་ལ་བཞད་སྲིད།།

མཛེས་སྡུག་གི་གོས་ཆེན་ཞག་གིས་བཏགས་ཤིང་།།

མཚམས་སྤྲིན་གྱི་སྦྱིན་བདག་རླམ་ལ་བཅོལ་ན།།

ཝུ་དཀར་གྱི་ཁ་རྒྱན་རབ་ཏུ་བཏགས་པའི།།

ཆུ་རུལ་དེ་བདུད་རྩི་ལྗང་ཁུར་འགྱུར་ཞིང་།།

མུ་ཏིག་གི་རྗེས་འགྲོ་ཝུ་དཀར་གདོང་དེ།།

དགོད་སྒྲ་ལས་ཆེར་གྱུར་ཆང་རག་རྐུན་པོ།།

དུག་སྦྲང་གི་འོ་ཡིས་བསྣན་པར་གྱུར་ཚེ།།

རེ་བ་ཡིས་མ་བཟུང་ཆུ་རུལ་དེ་ལ།།

བསྔགས་བརྗོད་ཀྱི་ཚིག་འགའ་བརྗོད་ན་ཆོག་ཅིང་།།

ཁེར་རྐྱང་གི་སྡུག་བསྔལ་ལྕེ་མེད་པ་ཡིས།།

མ་བཟོད་པའི་ཚེ་ན་ཆུ་རུལ་དེ་ཡིས།།

གླུ་གཞས་རེ་གཏོང་བའི་ཁས་ལེན་བྱས་ཆོག།

 

རེ་བ་ཡིས་མ་བཟུང་ཆུ་རུལ་འདི་རུ།།

མཛེས་སྡུག་རང་གནས་ས་གཏན་ནས་མིན་པས།།

མཛེས་མིན་གྱི་བདག་པོར་ཉེ་བར་གཏད་དེ།།

ཅི་ལྟ་བུའི་འཇིག་རྟེན་བསྐྲུན་པའི་ཆ་ལ།།

འདྲེན་བྱེད་ཀྱི་མདའ་མོ་འཕངས་ན་ལེགས་སོ།།

(ལྷ་ཕྱུག་སྐྱིད་ཀྱིས་བསྒྱུར།)

 

རྩོམ་ཁུངས། ༢༠༠༣ལོའི་སྦྲང་ཆར།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།