གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

པད་མ་ཚེ་བརྟན་གྱི་གློག་བརྙན《རྩྭ་ཐང》ལ་བསྐྱར་ཞིབ་ཅིག

2012-05-25 11:30:00 བསྟན་འཛིན་བདེ་སྐྱིད། ཀློག་གྲངས། མཆན ཡོད།

  གཟའ་སྤེན་པའི་ཉིན་པད་མ་ཚེ་བརྟན་གྱི་གློག་བརྙན་”རྩྭ་ཐང”་ཟེར་བ་དེར་བལྟས་པ་ཡིན། གློག་བརྙན་དེ་ནི་པད་མ་ཚེ་བརྟན་སློབ་མ་ཡིན་དུས་བཟོས་པ་ཞིག་ཡིན་ཞིང་། ནེའུ་ཡོག་གི་ལ་རྩེ་དེང་རབས་བོད་ཀྱི་དཔེ་མཛོད་ཁང་གི་བརྙན་མཛོད་དུ་གློག་བརྙན་དེའི་ངོ་བཤུས་ཤིག་འདུག
  པད་མ་ཚེ་བརྟན་ནམ་རྒྱ་ཡིག་ཏུ་སྤྱོད་མི་བདེ་བའི་མིང་(Wanma Caidan)ནི། རྣམ་དཔྱོད་ཅན་གྱི་བོད་རིགས་གློག་བརྙན་འཁྲབ་ཁྲིད་པ་ཞིག་ཡིན་ཞིང་ཁོང་གིས་པེ་ཅིང་གློག་བརྙན་ཆེད་སྦྱོང་སློབ་གྲྭ་ཆེན་མོར་སློབ་གཉེར་གནང་འདུག་པ་དང་། ཉེ་བའི་ལོ་ཤས་ནང་ཁོང་གིས་ཆེད་སྒྲིག་གློག་བརྙན་གཉིས་བཟོས་འདུག ངེད་ཀྱིས་གློག་བརྙན་དེ་གཉིས་ཀར་བལྟས་པ་ཡིན། དེ་ནི་”ལྷིང་འཇགས་ཀྱི་མ་ཎི་རྡེའུ་འབུམ་”དང་”འཚོལ”་ཟེར་བ་གཉིས་རེད། གློག་བརྙན་དེ་གཉིས་ཀ་ངོ་མཚར་ཞིང་ཁྱད་དུ་འཕགས་པ་མ་ཟད་”འཚོལ”་གྱིས་ངའི་དགའ་བ་ཡོངས་སུ་འཕྲོག་སོང་། དེར་བརྟེན། ངེད་ལ་ཁོང་གི་སློབ་མའི་སྐབས་ཀྱི་གློག་བརྙན་དེར་བལྟ་འདོད་སྐྱེས་པ་མ་ཟད་། ཇི་ལྟར་ཁོང་གི་གློག་བརྙན་སློབ་སྟོན་གྱི་རྟོག་འཆར་ལ་འཕེལ་འགྱུར་དང་། “འཚོལ་”གྱི་ངོས་སུ་རྩལ་དུ་བཏོན་པའི་ཁོང་གི་རྣམ་དཔྱོད་དེ་ཐོག་མའི་གསར་གཏོད་ཀྱི་ནང་དུ་མངོན་གསལ་དོད་པོར་གནས་ཡོད་མིན་ལ་བལྟ་འདོད་ཅིག་སྐྱེས།
  “རྩྭ་ཐང་”ནི་སྐར་མ་ཉི་ཤུའི་དུས་ཡུན་ཅན་གྱི་གློག་བརྙན་ཐུང་ཐུང་ཞིག་རེད། གློག་བརྙན་དེ་སྟབས་བདེའི་སྣང་བརྙན་ཞིག་དང་མཉམ་དུ་འགོ་བཙུགས། དེ་ནི་གནམ་སྔོན་པོའི་འོག་གི་ཁོད་ཡངས་པའི་རྩྭ་ཐང་ཞིག་ཏུ་རྒན་རྒོན་བཟའ་ཚོ་གཉིས་འགྲུལ་བཞུད་བྱེད་ཀྱིན་པའི་ཚུལ་རེད། བཟའ་ཚོ་དེ་གཉིས་ནི་གཞན་གྱིས་རང་ལ་བྱས་པའི་ནོར་འཁྲུལ་ལ་བཟོད་སྒོམ་ཕྲ་ཞིང་ཨུ་ཚུགས་ཅན་གྱི་ཨ་ཁུ་ཚེ་འབྲུག་དང་ཁོང་གི་ཆུང་མ་ཨ་མ་མཚོ་མོ་གཉིས་ཡིན་ཞིང་། ཨ་མ་མཚོ་མོ་ནི་རྒས་ཤིང་འཁོགས་པར་མ་ཟད་ཁུ་སིམ་མེར་ཟུར་དུ་སྡོད་མཁན་གྱི་རྒན་མོ་དེ་ཁྱོ་ཀ་བཙན་པོ་དེའི་དབང་ཤུགས་ཀྱིས་དྲུད་ནས་འགྲོ་བཞིན་ཡོད།
  ཁོང་གཉིས་འབྲོག་སྡེ་གཞན་པ་དེའི་ཕྱོགས་སུ་མགོ་གཏད་ནས་ཨ་མ་མཚོ་མོའི་གཡག་བརྐུ་མཁན་ཕོ་གསར་གསུམ་དེར་གདོང་ཐུག་བྱེད་པར་འགྲོ་བཞིན་འདུག ཁོང་གཉིས་ཀྱི་འགྲོ་ཚུལ་ལས་ང་ཚོས་ཤེས་ཐུབ་པ་ཞིག་ནི། གཡག་དེ་ཚེ་ཐར་དུ་བཏང་བའི་གཡག་ཞིག་རེད། དེའི་གོ་དོན་ནི་ཨ་མ་མཚོ་མོས་གཡག་དེ་བཤས་ར་ནས་གློད་པ་དང་རྐུན་མས་མ་འཁྱེར་བར་དུ་གཡག་དེ་རང་དབང་ཅན་གྱི་སེམས་ཅན་ཞིག་རེད། དེར་བརྟེན། རྐུན་མས་བསགས་པའི་ནག་ཉེས་ནི་བཟང་སྤྱོད་ལ་རྒྱབ་གཏད་ཙམ་མ་ཡིན་པར་དེ་ལས་ལྷག་པའི་ནང་ཆོས་ལ་རྒྱབ་འགལ་ཆགས་ཀྱི་ཡོད།
  ཨ་ཁུ་ཚེ་འབྲུག་དང་ཨ་མ་མཚོ་མོ་གཉིས་ཁོང་ཚོའི་ངོ་ཤེས་རྙིང་པ་དར་ལོ་ཚང་གི་སྦྲ་འདབས་སུ་སླེབས་དུས། ལག་ཏུ་རྭ་ཙེ་ཐོགས་ཤིང་ས་མཐོའི་སྐྲ་རིང་བཞག་པའི་དར་ལོའི་བུ་འཇིགས་དགའ་མི་དེ་གསུམ་སྐད་གཏོང་བར་མངགས། དེ་ནས་མནའ་བསྐྱལ་བའི་མཛད་སྒོ་རྒྱས་པ་ཞིག་འཚོགས་ཤིང་། གློག་བརྙན་དེ་གོ་རིམ་ཅུང་ཙམ་ལྡོག་པའི་སྒོ་ནས་མཇུག་བསྒྲིལ་བ་དེས། ཡ་མཚན་པའམ་ཡང་ན་ཚོད་དཔག་ཐུབ་པ་གང་ཡང་མིན་པར་བློ་འགུག་དང་ཡིད་ཚིམ་པ་ཞིག་བྱུང་། དེ་ནི་གློག་བརྙན་སློབ་སྟོན་པའི་རྣམ་དཔྱོད་མངོན་སྟངས་ཤིག་ཡིན་པ་འདྲ།
  གློག་བརྙན་དེར་བལྟས་པའི་རྗེས་སུ། ངེད་ཀྱི་བསམ་པར། གློག་བརྙན་དེ་ནི་ཨ་ཁུ་ཚེ་འབྲུག་དང་ཨ་མ་མཚོ་མོའི་སྐོར་མིན་པ་མ་ཟད་གློག་བརྙན་དེའི་ཁྲོད་དུ་ཡོད་པའི་མི་གཞན་པ་ཚོའི་སྐོར་ཡང་མ་རེད་འདོད།
  དེ་ནི་མི་ཚེའི་འགྲོ་སྟངས་ཤིག་གི་སྐོར་ཏེ་། གང་དུ་ཕོ་ཁྱོ་གས་བོར་བའི་མནའ་ཚིག་ལ་ཡིད་ཆེས་ཆོག་པ་དང་གང་དུ་མི་རྣམས་ཀྱིས་ད་དུང་ཡང་རིན་གོང་མཐོ་བའི་གཡག་རྣམས་ཚེ་ཐར་ལ་གཏོང་བ་དང་། གང་དུ་རླུང་འཕྲིན་ནི་ཕྱི་རོལ་གྱི་འཇིག་རྟེན་དང་ཁྱེད་གཉིས་ཉེ་བར་བཅར་བྱེད་ཀྱི་ལམ་ཁ་ཉེ་ཤོས་དེ་རེད་།། ད་དུང་དེ་ནི་ས་ཆའི་སྐོར་ཏེ། ཡུལ་ལ་གནས་པ་ཙམ་མ་ཡིན་པར་དེས་མི་ཚེའི་འགྲོ་སྟངས་འདིར་སྟོབས་ཤུགས་སྦྱིན་ཅིང་རྒྱ་ཆེ་བའི་ཐང་གཤོངས་དང་རི་ཚོགས་རྣམས་ནི་དེར་གནས་པའི་མི་རྣམས་དང་ཁ་བྲལ་ཐབས་མེད་པ་དེ་རེད།
  དེ་ནི་བལྟ་རིན་ཡོད་པ་ཞིག་རེད། དེ་ནི་ཧ་ཅང་བལྟ་རིན་ཡོད་པ་ཞིག་རེད། ཐག་རིང་ནས་ལ་རྩེ་དཔེ་མཛོད་དུ་སོང་བ་དེར་ཡང་དགེ་མཚན་བྱུང་། འདི་ལས་མང་ཙམ་བཤད་དགོས་སམ།

མ་རྩོམ་གྱི་འབྲེལ་ཐག་འདི་རུ་ཡོད་།
http://yuthoklane.blogspot.com/2010/07/review-grasslands-by-pema-tseden_6305.html
  བསྟན་འཛིན་བདེ་སྐྱིད་ནི་ཨ་རིའི་ཧར་བ་སྒྲི་གཙུག་ལག་སློབ་ཆེན་(Harvard University) གྱི་རྩོམ་རིག་སློབ་ཐོན་པ་དང་ད་ལྟ་ཀོ་ལིམ་ཕིག་ཡ་གཙུག་ལག་སློབ་ཆེན་(Columbia University) དུ་རྩོམ་རིག་ཆེད་ལས་མཁས་བའི་སློབ་སྦྱོང་མཇུག་སྐྱོང་བཞིན་ཡོད་།
     ༼རིག་འབྱུང་བཀྲ་ཤིས་དོན་གྲུབ་ཀྱིས་བསྒྱུར༽

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།