གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

དམངས་གླུ་ཆུ་མིག་དགུ་སྒྲིལ།༡

2009-09-24 22:14:00 རྔ་བ་ཁུལ་ས་གནས་ལོ་རྒྱུས་གཞུང་ལས་ཁང་། ཀློག་གྲངས། མཆན ཡོད།

1

གཞས་ལ་གཞས་ལན་མེད་པའི།།

གཞས་ཤིག་ལེན་ར་མ་མྱོང་།།

གོས་ལ་གོང་བ་མེད་པས།།

ཕ་མས་བསྐོན་ར་མ་མྱོང་།།

2

མགོ་ལུང་མ་རྩ་དངུལ་རེད།།

ཆབ་ལུང་རིན་ཆེན་གསེར་རེད།།

ལས་འབྲས་ཅན་གྱི་མགར་བ།།

ལས་དབང་ཅན་གྱིས་འདོགས་གི།

3

སྒུག་རྒྱུ་བྱམས་པ་བསྒུག་ནི།།

བྱམས་པར་ཕེབས་རྒྱུ་མེད་གི།

མི་དགོས་སྡིག་པ་ར་ཙ།།

དྲ་དེ་དྲུད་དེ་ཐོན་ཐལ།།

4

ཁྱོད་ལ་ཡོད་པའི་དངུལ་སྐྱེས།།

ང་ལ་ཡོད་པའི་གསེར་སྐྱེས།།

རྡུང་མཁན་མགར་བ་གཅིག་རེད།།

བསྐོན་རེས་བྱས་ན་ཅི་སྐྱོན།།

5

བྱུ་རུ་དམར་བོའི་དཀྱིལ་ལ།།

དུང་གི་མདུད་པ་བརྒྱབས་ཡོད།།

བྱུ་རུ་མ་ཆག་བར་དུ།།

མདུད་པ་མི་ཤིགས་ཁོ་ཐག།

6

ཆུ་འཁོར་ཆུ་ཡིས་བསྐོར་ཡོད།།

ཉི་མ་རླུང་གིས་བསྐོར་ཡོད།།

ཨ་རོགས་ཁྱོད་དང་ངེད་གཉིས།།

ཚེ་སྔོན་ལས་ཀྱིས་བསྐོར་ཡོད།།

7

ཨ་རོགས་ཁྱོད་ལ་ཅི་དགོས།།

ཅི་དགོས་ང་ལ་ཤོད་དང་།།

ནམ་མཁའི་སྐར་ཆེན་དགོས་རུང་།།

སྐས་བརྒྱ་བཙུགས་ནས་བླངས་ཆོག།

8

གནམ་ན་སྐར་མ་བརྒྱ་ཡོད།།

སྐར་ཆེན་ཟེར་བ་གཅིག་ཡོད།།

ས་ན་མགོ་ནག་བརྒྱ་ཡོད།།

ཆུང་འདྲིས་ཟེར་བ་གཅིག་ཡོད།།

9

རྟ་ཕོས་སེས་སེས་ཆོབ་ཆོབ།།

སྒོ་རའི་ནང་ལ་ཐོན་ཐལ།།

ཕ་མ་ཁ་བཙན་ཆེ་བས།།

ཡར་ཤོག་ཟེར་དབང་མ་ཡོད།།

10

རྟ་ཕོ་ལ་ལ་འགྲོ་དུས།།

ཆུང་འདྲིས་འགྲོ་སྟངས་དྲན་གི།

ལ་དང་ལ་མོ་བརྒྱུད་དུས།།

མིག་མཐའ་མཆི་མས་བཀང་འགྲོ།།

11

ཇ་ནི་འབྲི་ཇ་བསྐོལ་ཡོད།།

མར་ནི་འབྲི་མར་འཕངས་ཡོད།།

ཆུང་འདྲིས་ཡིད་བཞིན་ནོར་བུས།།

དེའི་ནང་བཞེས་པ་གསོལ་སོང་།།

12

འགྲི་ནི་འགྲོ་ནི་ཟེར་ནས།།

རྟ་ཕོར་སྒ་སྟན་བྱས་ཐལ།།

ཆུང་འདྲིས་ངོ་ལ་བལྟས་ནས།།

ཉིན་རེ་ཞག་རེར་ལྷག་ཐལ།།

13

ཆུང་འདྲིས་ངེད་གཉིད་འདྲིས་འདྲིས།།

རྡོ་ཐོག་རི་མོ་བརྐོས་འདྲ།།

ཆར་བ་ལོ་གསུམ་བབས་རུང་།།

རི་མོ་འདག་རྒྱུའི་དཔེ་མེད།།

14

མཚོ་སྟོད་ངང་བ་གསེར་མགོ།

མཚོ་སྨད་ངང་བ་དངུལ་མགོ།

ཚེ་སྔོན་ལས་འབྲས་ཡོད་ན།།

མཚོ་ཁ་གཅིག་ལ་འཁོར་ཤོག།

15

ས་གདན་པ་ཏྲའི་སྟེང་ལ།།

ཆུ་འབྲུག་རི་མོ་དོད་ཡོད།།

ས་གདན་འདི་འདྲ་ཡོད་རུང།།

རི་མོ་འདིའདྲ་བཀོན་གི།

16

ཆུང་དུས་ཁྲིད་ན་ངོ་ཚ།།

ཆེ་དུས་བསྐྱུར་ན་ངོ་ཚ།།

ཆུང་ཆུང་ཕུར་བ་འདྲ་བོ།།

གཡས་ཕུར་ནང་དུ་དྲོངས་ཤིག།

17

ཀ་བ་རྩེང་མཁན་ཁྱོད་རེད།།

ཀ་རྡོ་འཇོག་མཁན་ང་རེད།།

ཀ་མགོར་རི་མོ་འབྲི་དུས།།

འབྲི་བདག་བརྒྱ་དང་སྟོང་རེད།།

18

བསམ་རྒྱུར་ལྷ་ས་བསམ་ནི།།

ལྷག་རྒྱུར་ཆབ་མདོར་ལྷག་ཐལ།།

ཆབ་མདོ་ཆུ་གཉིས་བར་ནས།།

མ་བསམ་ལྷུན་གྱིས་འགྲུབ་ཐལ།།

19

ལྷ་སའི་པོ་ཏ་རི་ནས།།

གསེར་གྱི་རྒྱ་གླིང་འབུད་གི།

གསེར་གྱི་རྒྱ་གླིང་མ་རེད།།

བན་ཆུང་གསུང་སྐད་རང་རེད།།

20

ལྕང་མ་སྐྱེ་སྟོབས་ཆེ་རུང་།།

དཔའ་བོའི་མདུང་ཤིང་མི་ཉན།།

དྲེལ་ལུ་གོམ་པ་བདེ་རུང་།།

བླ་མའི་ཆིབས་པ་མི་ཉན།།

21

ལྕང་མ་འདེབས་མཁན་ཁྱོད་རེད།།

ལྕང་མ་གཏོང་ནི་ང་རེད།།

ལྕང་མར་སྣ་ལོ་སྐྱེ་དུས།།

བདག་པོ་བརྒྱ་དང་སྟོང་རེད།།

22

ཉི་ཤུའི་ནག་ལ་མ་ཡོང་།།

མ་ལོས་ཁ་ཡ་རྒྱག་གི།

བཅོ་ལྔའི་ཟླ་བར་ཤོག་དང་།།

སྙིང་གཏམ་དེ་དུས་ཞུས་ཆོག།

23

སྟོད་ཀྱི་སྤང་དཀར་ཐང་ན།།

མེ་ཏོག་སྣ་མ་སྣ་ཚོགས།།

རང་རང་དགའ་བའི་མེ་ཏོག།

མཛུ་གུ་བཙུགས་ནས་བཞག་ཡོད།།

24

ཡག་ནི་རྒྱལ་མཚན་ཡག་གི།

མཐོ་ནི་རྒྱལ་མཚན་མཐོ་གི།

རྒྱལ་མཚན་ཁོག་ཁ་སྟོང་ནོ།།

ད་ལོ་མིན་ན་མ་ཤེས།།

25

ཕྱི་ནི་གོས་ཆེན་ཁུག་མ།།

ནང་ནི་ཡུག་པོའི་རྩམ་པ།།

ཁ་ལ་བཟའ་རྒྱུ་མ་ཟེར།།

སྣ་ལ་བསྣོམ་འདང་མེད་གི།

26

མགོ་དང་ཞྭ་གཉིས་བར་ལ།།

མི་འཆུག་སྐྲ་ཞིག་བསླེས་ཡོད།།

འཆུག་མེད་ཞྭ་ལོང་བཏགས་ཡོད།།

འཆུག་ན་སྔོན་མའི་ལས་རེད།།

27

རྟ་དང་སྒ་གཉིས་བར་ལ།།

མི་གནོད་སྟན་ཞིག་བཏིངས་ཡོད།།

མི་འགྱུར་གློ་ཞིག་བརྒྱབས་ཡོད།།

འགྱུར་ན་སྔོན་མའི་ལས་རེད།།

28

རོགས་དང་འུ་གཉིས་བར་ལ།།

མི་འཆུག་ཚིག་ཅིག་བཤད་ཡོད།།

འཆུག་མེད་མནའ་ཞིག་བསྐྱལ་ཡོད།།

འཆུག་ན་སྔོན་མའི་ལས་རེད།།

29

ཆུ་དང་ཉ་མོ་གཤིབས་གཤིབས།།

ངེད་གཉིས་གཤིབས་རྒྱུ་བྱུང་ན།།

དོལ་དང་ལྕགས་ཀྱུའི་གནོད་པ།།

བྱུང་དང་མ་བྱུང་མི་འདུག།

30

ང་རང་གཉིས་ལས་དགའ་བ།།

སྟེང་ཕྱོགས་ལྷ་ལ་ཨེ་ཡོད།།

ལྷ་ཆེན་ཚངས་པ་དཀར་པོ།།

ང་རང་གཉིས་ལ་སྨོན་སོང་།།

31

སེམས་གཉིས་གཅིག་ཏུ་བསྒྲིལ་བའི།།

གཙང་མའི་ཡིད་ཀྱི་མཆོད་པ།།

ནམ་མཁའི་བླ་མ་དཀོན་མཆོག།

མར་མེ་བཞེས་རོགས་གནོང་དང་།།

32

དབུས་ཀྱི་རི་རྒྱལ་ལྷུན་པོ།།

མ་འགྱུར་བརྟན་ལ་བཞུགས་དང་།།

ཉི་མ་ཟླ་བའི་སྐོར་ཕྱོགས།།

ནོར་ཡོང་བསམ་པ་མི་འདུག།

33

ཆུ་ལ་ཡིག་ཆུང་བསྐུར་བས།།

གཏམ་ལ་གསལ་ཆ་མི་འདུག།

ཐག་རིང་བྱམས་པའི་ས་ཕྱོགས།།

བདེ་མོའི་ངང་ལ་བཞུགས་སམ།།

34

རི་མགོ་མཐོན་པོའི་ཉི་མ།།

དྲོ་རོགས་མེད་པའི་འཁྱག་རོགས།།

ཐག་རིང་ས་ཡི་བྱམས་པ།།

དགའ་རོགས་མེད་པའི་སྐྱོ་རོགས།།

35

དཀར་ཡོལ་དཀར་སངས་གཅིག་ལ།།

རི་མོ་བཀྲ་ཤིས་རྟགས་བརྒྱད།།

དེ་འདྲའི་དཀར་ཡོལ་འགྲུབ་ཀྱང་།།

རི་མོ་འགྲུབ་ས་མ་རེད།།

36

དཀར་ཡོལ་དཀར་སངས་ནང་ལ།།

སེང་གེའི་འོ་མ་བླུགས་ཡོད།།

སྡུག་ཤི་རྒྱག་རྒྱུ་ཞིག་གིས།།

སྣག་ཚའི་ཐིགས་པ་གཏོར་སོང་།།

37

ཤ་བ་རྭ་ཅོ་རིང་ཡང་།།

གནམ་གི་ཀ་བ་མི་ཉན།།

རི་བོང་སུག་ལག་ཐུང་ཡང་།།

ལ་མོ་འདྲ་འདྲ་བརྒྱབ་ཡོད།།

38

རྟ་ཕོ་ཆས་ཀྱིས་གསོས་ཏེ།།

རྐང་ཐང་འགྲོ་དགོས་བྱུང་ན།།

རྟ་ར་གྲུ་བཞིའི་ནང་ལ།།

བཏགས་དང་མ་བཏགས་མེད་གི།

39

བྱ་དེ་ཁུ་བྱུག་རྒྱལ་པོ།།

ལྷོ་རུང་ཕྱོགས་ལ་ཕེབས་ན།།

ཁུག་རྟ་ང་ཡང་མ་སྐྱུར།།

ལྷོ་རུང་ཕྱོགས་ལ་ཁྲིད་རོགས།།

40

ཚེས་ཆེན་བཅོ་ལྔའི་ཟླ་བ།།

ཤར་ན་བསམ་པ་མ་གཏོགས།།

ང་ལ་ཉི་ཤུའི་ཕྱེད་ཆ།།

ཤར་དང་མ་ཤར་མེད་གི།

41

སྣང་བ་མི་འཁྲུལ་དགུ་འཁྲུལ།།

བུ་མོ་ཁྱེད་ཉིད་འཁྲུལ་སོང་།།

དྲིན་ཅན་ཕ་མ་བཞག་ནས།།

ཨ་གསར་རོགས་ལ་འགྲོགས་སོང་།།

42

ཕ་རུའི་གླང་མ་གུག་གུག།

ཚུ་རུའི་སྟག་མ་དགྱེ་དགྱེ།།

གུག་ན་ཕར་གུག་ཚུར་གུག།

མ་གུག་རང་རང་སོ་སོ།།

43

ཇོ་བོར་གསེར་ཤོག་སྒྲོན་མཁན།།

ང་ཡིན་ཁོ་ཡིན་ཟེར་གི།

ལྷ་ཁང་རྟུག་དྲིས་བཀང་མཁན།།

ང་མིན་ཁོ་མིན་ཟེར་གི།

44

ལྷ་སའི་ཇོའི་ཁང་ནང་ན།།

ཀ་རིང་བརྒྱ་དང་བརྒྱད་ཅུ།།

ཀ་རིང་རེ་རེའི་ངོས་ན།།

སྟོན་པའི་སྐུ་རེ་བཞུགས་གི།

45

ཙན་དན་ལོ་མའི་སྟེང་ན།།

རྗེ་བཙུན་སྒྲོལ་མ་བཞུགས་པ།།

ལོ་མ་རེ་རེའི་ངོས་ནས།།

སྒྲོལ་མས་གསུངས་སྐད་འབྱོན་བྱུང་།།

46

ཀ་མགོ་མི་འགྱུར་ལྷ་རེད།།

ཀ་རྟིང་མི་འགྱུར་རྡོ་རེད།།

བྱམས་པ་མི་འགྱུར་ཚིག་རེད།།

ཚིག་གི་རྩ་བ་མནའ་རེད།།

47

དྲུག་དཀར་རིན་ཐང་ཆེ་རུང་།།

གདམ་ག་བརྒྱབ་ན་ཉོས་ཆོག།

ཆུང་འདྲིས་བྱམས་པ་འདྲ་བོ།།

སུ་དང་གང་ལ་མི་འདུག།

48

ཕ་རུའི་བྲག་དམར་དཀྱིལ་ལ།།

སྒྲོལ་མའི་སྐུ་ཞིག་བཞེངས་བྱུང་།།

སྒྲོལ་མ་སྒྲོལ་རྐྱང་ཡིན་ན།།

དད་པ་རྒྱང་ནས་བཞག་འགྲོ།།

48

ཆུང་འདྲིས་ཡོང་གི་བསམ་ནས།།

ལོ་ཟླ་ཞག་ལ་བསྒུགས་ཡོད།།

ཆུང་འདྲིས་གཞན་ལ་སོང་བས།།

ཞེན་ཁ་གཏིང་ནས་ལོག་བྱུང་།།

50

ཅོག་ཙེ་དམར་བོའི་སྟེང་ལ།།

གོས་ཆེན་ལག་རས་བཞག་བྱུང་།།

ཅོག་ཙེ་རེ་རེ་ཕྱིས་དུས།།

ཆུང་འདྲིས་རེ་རེ་དྲན་བྱུང་།།

51

ཁྱོད་ནི་ལ་མོའི་ཕར་ནང་།།

ང་ནི་ལ་མོའི་ཚུར་ནང་།།

གཅིག་སེམས་གཅིག་ལ་མཐུན་ན།།

ལ་མོ་ཁ་ཉག་བཟོ་ཆོག།

52

ཕ་རུའི་ལྕང་མ་ཚུར་འགུག།

ཆུ་གཉིས་བར་དུ་བཙུགས་སོང་།།

ལས་འབྲས་མེད་པའི་ལྕང་མ།།

ཆུ་གཉིས་བར་ནས་སྐམ་སོང་།།

53

ཨ་ཤོག་ཨ་གསར་ཚེ་ལ།།

ཤོག་བུའི་དར་ལྕོག་བཙུགས་ཡོད།།

ཞག་གསུམ་ཁོམ་ལོང་མེད་པར།།

མགོ་ཤག་གཞུག་ལ་གས་སོང་།།

54

དཀར་ཡོལ་ཆག་ན་རྡོ་རེད།།

རི་མོ་ཡལ་ན་ཚོན་རེད།།

རྒྱ་ནག་དཀར་སྒམ་ནང་ནས།།

དེ་བས་ཡག་རེ་ལེན་འགྲོ།།

55

རི་མགོ་མཐོན་པོའི་རྩེ་ལ།།

དར་ལྕོག་ཁ་གང་བཙུགས་ཡོད།།

ཁ་ཞེང་ཆུང་འདུག་མ་བསམ།།

མ་ཎི་འབྲུ་དྲུག་དོད་ཡོད།།

56

ཕྱི་ཡི་དཀར་ཡོལ་དཀར་བོ།།

ནང་གི་འོ་མ་དཀར་བོ།།

ཆུང་འདྲིས་བསམ་པ་དཀར་བོ།།

དཀར་བོ་དེ་གསུམ་འཛོམས་བྱུང་།།

57

མཆོད་རྟེན་མི་བཞེངས་དགུ་བཞེངས།།

བྲག་དམར་དཀྱིལ་ལ་བཞེངས་བྱུང་།།

སྐོར་བ་རྒྱག་བསམ་འདུག་ཀྱང་།།

བསྐོར་ལམ་བདེ་མོ་མི་འདུག།

58

དབྱར་ཆུ་ཆེ་ན་ཆེ་སོང་།།

དགུང་ཆུ་ཆུང་ན་ཆུང་སོང་།།

རྟ་ཕོ་རག་ཆུང་ངེད་གཉིས།།

ཆུ་མགོ་བསྐོར་ནས་སླེབས་ཡོང་།།

59

ཁྲ་ནི་རས་ཁྲ་ཁྲ་བྱུང་།།

འཇམ་ནི་གོས་ཆེན་འཇམ་བྱུང་།།

འཇམ་པོ་གོས་ཆེན་གོན་ཉིན།།

རས་ཁྲ་དགོངས་པ་མ་འཚོམ།།

60

གོས་ཆེན་ཕོར་ཁུག་ནང་ལ།།

ཡུག་པོའི་རྩམ་པ་བླུགས་སོང་།།

ལྡུག་མཁན་ཧམ་པ་ཆེ་སོང་།།

ལྡུག་ས་བསམ་པ་ཕམ་སོང་།།

61

ཞབས་བྲོ་རྒྱག་དགོས་བསམ་ནས།།

རྐང་ལ་འཇུར་ལྷམ་གོན་ཡོད།།

འཇུར་ལྷམ་མ་ཟད་བར་དུ།།

ཞབས་བྲོ་ཟད་ས་མ་རེད།།

62

རྒྱ་ལྕང་ལྕང་མའི་འོག་ནས།།

ཚིག་གསུམ་སྐད་ཆ་ལབ་ཡོད།།

བྱེའུ་ཆུང་འཇོལ་མོ་མ་གཏོགས།།

སུ་དང་གང་གིས་མི་ཤེས།།

63

དཀར་ཡོལ་དཀར་སངས་ནང་ལ།།

དཀར་གསུམ་འོ་མ་བླུགས་ཡོད།།

འོ་མ་ཆུ་ལ་འགྱུར་ན།།

སྐྱེ་བ་སྔོན་གྱི་ལས་རེད།།

64

ཆུ་ལ་ཡིག་ཆུང་བསྐུར་ཡོད།།

སྐྱོགས་དཀར་ནང་དུ་ཨེ་བྱུང་།།

བསམ་པའི་བང་ཆེན་བཏང་ཡོད།།

རྨི་ལམ་ནང་དུ་ཨེ་བྱུང་།།

65

བདག་གི་ཆུང་འདྲིས་བྱམས་པ།།

རྫ་རིའི་འོག་གི་ཆུ་རེད།།

ཆུ་སྒྲ་སིལ་སིལ་མ་གཏོགས།།

ཆུ་རྒྱུན་མཐོང་རྒྱུ་མི་འདུག།

66

རྨོན་མཛོ་ཞིང་ལ་འགྲོ་འགྲོ།།

ངེད་གཉིས་འགྲོ་རྒྱུ་བྱུང་ན།།

ལས་ལ་བསྐོས་པའི་གཉའ་ཤིང་།།

འཁུར་དགོས་བྱུང་ཡང་ལས་རེད།།

67

རྐང་གཉིས་སྡོམ་པའི་ལྷམ་དེ།།

རྒྱ་ལྕང་ཡིན་ཡང་མི་གྱོན།།

རང་སེམས་སོང་བའི་ན་ཟླ།།

རྒྱལ་བུ་ཡིན་ཡང་མི་འདྲིས།།

68

རི་མགོ་མཐོ་མིན་མ་ལྟ།།

བདེ་སྙོམ་ཡིན་མིན་ལྟོས་ཤིག།

ན་ཟླའི་སྐྱེ་ལོར་མ་ལྟ།།

ཁོག་གི་ཤེས་རྒྱར་ལྟོས་ཤིག།

69

ང་ཡི་ཆུང་འདྲིས་བྱམས་པ།།

ལྷོ་ཕྱོགས་ནགས་ཀྱི་ཁུ་བྱུག།

ཟླ་བ་ཞགས་ལ་བསྒུགས་ཀྱང་།།

མཇལ་བའི་སྐལ་བ་དཀོན་པ།།

70

ཨ་གསར་གསར་ལ་དགའ་བ།།

བུ་མོ་གཏད་སོ་མེད་པ།།

གཏད་སོ་མེད་པའི་བུ་མོར།།

ཨ་འགྲོགས་སྐྱ་འགྲོགས་བྱས་ཆོག།

71

ཆོས་ལ་དུང་བ་ཡོད་རུང་།།

ཆོས་ལ་ལས་འཕྲོ་མི་འདུག།

སྡོམ་པ་ཤོར་བའི་ཨ་བཙུན།།

འཁོར་བའི་སྒོ་རུ་ཐོན་བཞག།

72

ཁྱོད་ནི་ལ་མོའི་ཕར་རྒྱབ།།

ང་ནི་ལ་མོའི་ཚུར་རྒྱབ།།

སྐྱེ་སྔོན་ལས་འཕྲོ་ཡོད་ན།།

ཕར་སོང་ཚུར་འོང་བྱས་ཆོག།

73

སྒོ་ཁྱི་ངན་གི་མ་གསུངས།།

རྐུན་མ་ཇག་པ་ཐོན་དུས།།

ཨ་འཐེན་སྐོར་འཐེན་གནང་མཁན།།

སྒོ་ཁྱི་མིན་ན་མེད་གི།

74

ཆུ་མོ་བཞུར་ན་བཞུར་ག།

རླུང་བུ་གཡུག་ན་གཡུག་ག།

ཐག་རིང་ཡུལ་གྱི་བྱམས་པ།།

གོ་རྒྱུ་ཐོས་རྒྱུ་མི་འདུག།

75

དང་པོ་ལམ་ལ་ཆས་དུས།།

མཉམ་འགྲོ་མཉམ་འདུག་བྱས་ཡོད།།

ཆར་དང་རླུང་གིས་དེད་དུས།།

ཁྱོད་ནི་ང་ལས་མགྱོགས་པ།།

76

དཔོན་པོ་ཐོག་ནག་སེར་བ།།

བབས་ཡོང་བསམ་པ་མ་བྱུང་།།

མ་བསམ་དཔོན་པོ་ཚང་གིས།།

ང་ལ་གཉའ་སྒ་བསྟད་བྱུང་།།

77

རྟ་དང་སྒ་གཉིས་བར་ན།།

གྲུ་བཞིའི་སྟན་ཞིག་ཡོད་ན།།

ང་དང་ཆུང་འདྲིས་བར་ན།།

མི་འགྱུར་ཚིག་ཅིག་བཤད་ཡོད།།

78

མེ་ཏོག་བཏབས་ཡོད་བཏབས་ཡོད།།

བྱེ་མའི་རི་ལ་བཏབས་ཡོད།།

ལས་འཕྲོ་ཡོད་པའི་མེ་ཏོག།

བྱེ་མའི་རི་ནས་སྐྱེས་བཞག།

79

ཕ་རུའི་རི་རྒྱལ་མགོ་ན།།

རླུང་རྟ་མང་པོ་གཏོར་ཡོད།།

རླུང་རྟ་ཆུང་གི་མ་འདོད།།

བཀྲ་ཤིས་རྟགས་བརྒྱད་དོད་ཡོད།།

80

གོས་ཆེན་ཁ་གང་ཁ་དོ།།

རི་མོ་འབྲུག་བརྒྱ་དོད་ཡོད།།

དེ་འདྲ་རོགས་ལོས་གོན་ནས།།

རི་མོ་དེ་འདྲ་ཡག་སོ།།

81

ཁྱོད་ནི་གསེར་གྱི་བུམ་པ།།

ང་ནི་དངུལ་གྱི་བུམ་པ།།

དོན་མེད་ལྕགས་ཀྱི་བུམ་པ།།

བར་ལ་འཚང་གི་མ་འདུག།

 

 

རྩོམ་ཁུངས། སི་ཁྲོན་མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།