༡༦ཁིས་གོང་མའི་ཁ་ནས་ཡར་བུད་དུས།།

དབུས་བླ་མ་གསུམ་ལ་ལམ་ནས་ཐུག།

ཞྭ་ཕུད་དེ་ཕྱག་གསུམ་འཚལ་རག་ལ།།

དེའི་བར་ལ་ཆུང་འདྲིས་རོགས་ལོ་དྲན།།

དྲན་ཡོད་མེད་ཟེར་ན་དྲིས་བཏང་ན།།

དགུང་ཉི་མ་སེར་བོས་བལྟས་ནས་ཡོད།།

ཁིས་བར་མའི་ཁ་ནས་ཕར་བུད་དུས།།

རྟ་འདོ་བ་གསུམ་ལ་ལམ་ནས་ཐུག།

ལག་བསྲིངས་ནས་སྒ་ཆ་སྟོད་རག་ལ།།

དེའི་བར་ནས་ཆུང་འདྲིས་རོགས་ལོ་དྲན།།

དྲན་ཡོད་མེད་ཟེར་ནས་དྲིས་བཏང་ན།།

དགུང་དུང་ཟླ་དཀར་བོས་བལྟས་ནས་ཡོད།།

ཁིས་ཞོལ་མའི་ཁ་ནས་མར་བུད་དུས།།

རོགས་འདང་ཆེན་གསུམ་ལ་ལམ་ནས་ཐུག།

ངག་བཀུག་སྟེ་ཚིག་གསུམ་བཤད་རག་ལ།།

དེའི་བར་ནས་ཆུང་འདྲིས་རོགས་ལོ་དྲན།།

དྲན་ཡོད་མེད་ཟེར་ནས་དྲིས་བཏང་ན།།

དགུང་སྐར་མ་སྨེ་བདུན་བལྟས་ནས་ཡོད།།

༡༧དབུས་ཁ་ཐག་རིང་བའི་སྟོན་པའི་སྐུ།།

དུས་རྒྱུན་དུ་མཇལ་སྟབས་མི་འགྲིག་གི།

དུས་རྒྱུན་དུ་མཇལ་སྟབས་མི་འགྲིག་རུང་།།

ནམ་ཡིན་རུང་ཕྱག་གསུམ་འཚལ་ལ་འདུག།

གོང་རིན་ཐང་ཆེ་བའི་གོས་ཆེན་ལྭ།།

དུས་རྒྱུན་དུ་ཉོ་སྟབས་མི་འགྲིག་གི།

དུས་རྒྱུན་དུ་ཉོ་སྟབས་མི་འགྲིག་རུང་།།

ནམ་ཡིན་རུང་རི་མོར་བལྟ་ལ་འདུག།

གྲོང་ཁ་ཐག་རིང་བའི་སྙིང་རྗེའི་རོགས།།

དུས་རྒྱུན་དུ་རྩེ་སྟབས་མི་འགྲིག་གི།

དུས་རྒྱུན་དུ་རྩེ་སྟབས་མི་འགྲིག་རུང་།།

ནམ་ཡིན་རུང་ཁ་ནས་གླེང་གིན་འདུག།

༡༨འབྲི་ཐུལ་མ་རྫ་ལ་འཚོགས་དུས།།

ངའི་བཞོ་འབྲི་ཁྱུ་ན་མེད་གི།

འབྲི་མེད་ན་རྫ་རི་སྟོང་བ་རེད།།

ཤིང་ཤུག་པའི་བཞོ་ཟེའུ་སྟོང་བ་རེད།།

རྟ་བརྒྱ་བྱང་ལ་འཚོགས་དུས།།

ངའི་བློ་རྟ་ཁྱུ་ན་མེད་གི།

རྟ་མེད་ན་བྱང་ལམ་སྟོང་བ་རེད།།

སྲབ་སིལ་མའི་ཨ་ལོང་འཁྱག་པ་རེད།།

རོགས་མ་ལོ་སྡེ་ལ་འདུ་དུས།།

ངའི་རོགས་ལོ་གྲས་ན་མེད་གི།

ཞེ་ཡ་ཆུང་ཁོག་པ་སྟོང་བ་རེད།།

ཤ་མཆིན་པའི་ཁོག་པ་འཁྱག་པ་རེད།།

༡༩རི་མཐོན་པོ་དུང་གི་རྩེ་མོ་ནས།།

བྱ་དཀར་བོ་དུང་གི་གཤོག་པ་ཅན།།

སྨྲེང་ཤལ་ལེ་ཐེངས་གསུམ་གྲགས་བཏང་ན།།

ངས་དང་མའི་ལྷ་བྱ་སེམས་ལ་དྲན།།

ཐང་བདེ་མོ་བྱང་ལམ་རིང་མོ་ནས།།

གོམ་བདེ་མོའི་ཕུམ་དཀར་འདོ་བ་ཁྱོད།།

བདེ་ཤལ་ལེ་གོམ་གསུམ་བརྒྱུགས་བཏང་ན།།

ངས་དང་མའི་བློ་རྟ་སེམས་ལ་དྲན།།

སྡེ་ཆེན་པོའི་སྡེ་ལུང་གོང་མ་ནས།།

རོགས་ཡག་པ་ལྷ་ཕྲུག་འདྲ་བོ་ཁྱོད།།

སྨྲེང་ཤལ་ལེ་ཐེངས་གསུམ་རྩེས་བཏང་ན།།

ངས་དང་མའི་རྩེ་རོགས་སེམས་ལ་དྲན།།

༢༠ཤྭ་ཆ་བརྒྱད་ཤེའུ་ཡི་ཐིག་ལེ་ཅན།།

མགོ་གསེར་ནག་བྱི་རུའི་ར་ལག་ཅན།།

རྐང་རྨིག་བཞི་དུང་གི་པ་ཏྲ་ཅན།།

ལུས་རྒྱན་དྲུག་རྨ་བྱའི་གཡུ་ཐེལ་ཅན།།

ཤྭ་ཁྱོད་ལ་ཡིད་སེམས་དྲང་ནི་གིས།།

ཤྭ་རྫ་ནས་བཤར་དུས་དྲན་ཤིང་རེད།།

སྨུག་ལང་ལོང་འཐིབས་དུས་སྨྲེང་སློང་རེད།།

སྟག་ཤ་ར་དུང་གི་སོ་སྒོ་ཅན།།

ཡག་ཕོ་སྒོ་འཛམ་གླིང་གེ་སར་རྒྱལ།།

ཁ་དུང་སོ་དུང་གི་པ་ཏྲ་ཅན།།

ཚིག་སྙན་མོ་རྗེ་བཙུན་མགུར་མ་ཅན།།

རོགས་ཁྱོད་ལ་ཡིད་སེམས་དྲང་ནི་གིས།།

རོགས་སྡེ་ནས་འགྲོ་དུས་དྲན་ཤིང་རེད།།

ས་ཁ་ཐག་རིང་ནོ་སྨྲེང་སློང་རེད།།

༢༡མཚོ་དུང་ཤ་ཅན་པོའི་ཁ་ན།།

བྱ་དཀར་དམར་གཉིས་ཀ་འཁོར་གི།

བྱ་ཀན་ཚོ་ཚུར་ལ་འཁོར་རུང་།།

ཀན་ས་ལ་ཉན་འདོད་མེད་གི།

རི་བུམ་པ་འདྲ་བའི་མགོ་ནས།།

བྱ་ཁུ་བྱུག་གསུང་སྙན་ཅན་པོ།།

ནང་ཞིག་ལ་གྲག་ན་འདོད་ནས།།

ཞེ་སྡུག་པ་དྭངས་མཐའ་མེད་གི།

མར་བལྟས་ཀྱི་རྩེད་རའི་ནང་ནས།།

བུ་བུ་མོས་ལ་གཞས་ལེན་གི།

རོགས་ཀན་ཚོ་ཚུར་ལ་རྩེ་རུང་།།

ཀན་ས་ལ་ཉན་འདོད་མེད་གི།

གྲོང་རོགས་བརྒྱ་རོགས་མང་གྲས་ཀྱི།།

ཞེ་སྣང་བ་མཐུན་པའི་རོགས་ལོ།།

ནམ་ཞིག་ལ་རྩེ་ན་འདོད་ནས།།

ཞེ་སྡུག་པ་དྭངས་མཐའ་མེད་གི།

༢༢མཚོ་རང་འཁྱིལ་ཡིན་ནོ་དགའ་གི།

མཚོ་བཞུར་རྒྱུ་མེད་ནོ་སྡུག་གི།

རོགས་རང་མཐུན་ཡིན་ནོ་དགའ་གི།

རོགས་ཐུག་རྒྱུ་མེད་ནོ་སྡུག་གི།

༢༣འབྲུག་དགུང་སྔོན་གནམ་ན་སིང་སིང་སིང་།།

ཆར་བར་སྣང་ཁམས་ན་དལ་ལ་ལ།།

ལོ་ཡག་སྙེ་མ་གྲིག་གྲིག་གྲིག།

ལོ་ཡག་ནོ་སེམས་པ་སྡུག་སྤྱད་རེད།།

རོགས་སྡེ་ཆེན་གྲོང་ན་ལྷང་ལྷང་ལྷང་།།

ཁ་ཚིག་གསུམ་ཁྲོམ་ན་ཤ་ར་ར།།

ཁྱིམ་ཆུང་མ་རྩིབ་ན་ཉིལ་ལི་ལི།།

རོགས་རྩེ་ནོ་སེམས་པ་སྡུག་སྤྱད་རེད།།

༢༤དབྱར་མེ་ཏོག་ར་བའི་ནང་ནས།།

རྩྭ་མེ་ཏོག་པད་མ་དཀར་བོ།།

ངས་བཏབ་ནས་ལོ་གསུམ་འགོར་ཡོད།།

ཁྱོད་མ་བཀད་ཟླ་གསུམ་འགོར་ཡོད།།

ཁྱོད་ལོ་དང་ཟླ་བ་འགོར་རུང་།།

ངའི་རྣམ་ཤེས་སྦྲང་མ་འདྲ་བོ།།

ཁྱོའི་རྩིབས་ནས་མ་སོང་བསྡད་ཡོད།།

ས་མར་བལྟས་སྡེ་ཆེན་གྲོང་གི།

རོགས་ཆུང་ལོ་ལྷ་སྐུ་འདྲ་བོ།།

ཁྱོར་རྩེ་ནས་ལོ་གསུམ་འགོར་ཡོད།།

ཐུག་མ་ཐུབ་ཟླ་གསུམ་འགོར་ཡོད།།

ཁྱོད་ལོ་དང་ཟླ་བ་འགོར་རུང་།།

ངའི་རྣམ་ཤེས་གཡུ་ཆུང་འདྲ་བོ།།

ཁྱོའི་རྩིབས་ནས་མ་སོང་བསྡད་ཡོད།།

༢༥སྟོད་དབུས་གཙང་གསེར་རིའི་རི་རྒྱུད་ནས།།

བྱ་སྐྱིད་གི་ཡོད་ཅིང་སྡུག་གི་ཡོད།།

གཅིག་ལོས་སྐྱིད་གསེར་མཐའ་གསེར་ཡུལ་རེད།།

གཉིས་ལོས་སྡུག་གསེར་ཏོག་རིག་རྒྱུ་མེད།།

དེ་རིག་རྒྱུ་མེད་ཀྱང་བརྗེད་གི་མེད།།

ས་གར་སོང་ས་ནས་གླེང་གི་ཡོད།།

ས་སྡེ་ཆེན་ཁ་རིའི་རི་རྒྱུད་ནས།།

ང་སྐྱིད་གི་ཡོད་ཅིང་སྡུག་གི་ཡོད།།

གཅིག་ལོས་སྐྱིད་རང་ས་རང་ཡུལ་རེད།།

གཉིས་ལོས་སྡུག་རོགས་ལོ་རིག་རྒྱུ་མེད།།

རོགས་རིག་གི་མེད་ཀྱང་བརྗེད་གི་མེད།།

ས་གར་སོང་ས་ནས་གླེང་གི་ཡོད།།

༢༦མཚོ་སྔོན་པོ་གཡུ་ཡི་མེ་ལོང་རེད།།

ཉ་གསེར་མིག་མིག་ནང་གི་རྒྱན་ཆ་རེད།།

མཚོ་རླངས་པ་སྤྲིན་དཀར་འཁྱིལ་བ་རེད།།

སྤྲིན་ལངས་ན་སེམས་ཀྱི་སྨྲེང་སློང་རེད།།

སྡེ་ཆེན་པོ་དུང་དཀར་གཡས་འཁྱིལ་རེད།།

རོགས་ཆུང་ལོ་དུང་དཀར་མདུད་པ་རེད།།

ཞེ་སྣང་བ་དུང་གི་ཁོག་པ་རེད།།

དུང་བུས་ན་སེམས་ཀྱི་སྨྲེང་སློང་རེད།།

༢༧མཚོ་སྔོན་པོ་གཡུ་ཡི་མེ་ལོང་རེད།།

དེའི་ནང་ན་དུང་བྱ་དཀར་བོ་ཞིག།།

ཕྱི་བལྟས་ན་དུང་བྱ་མི་རིག་གི།

ནང་བོས་ན་དུང་བྱས་མི་གོ་གི།

བྱ་དུང་བྱ་ཡིད་ནས་མི་བརྗེད་གི།

སྦྲ་མཐིང་སྨུག་རས་ཀྱི་སྒོ་དར་ཅན།།

དེའི་ནང་ན་འདང་ཅན་རོགས་ལོ་ཞིག།

ཕྱི་བལྟས་ན་རོགས་ལོ་མི་རིག་གི།

ནང་བོས་ན་རོགས་ལོས་མི་གོ་གི།

རོགས་འདང་ཅན་ཡིད་ནས་མི་བརྗེད་གི།

༢༨མཚོ་སྔོན་པོ་གཡུ་ཡི་འདབས་ན།།

ཉ་གསེར་མིག་བྱི་རུའི་རྒྱན་ཆ།།

མཚོ་རླངས་པ་སྤྲིན་དཀར་འཁྲིགས་འདྲ།།

སྤྲིན་ལངས་ན་སེམས་ཀྱི་སྨྲེང་རེད།།

སྡེ་ཆེན་པོ་མར་ཁུའི་མཚོ་མོ།།

རོགས་ཆུང་ལོ་མར་མེ་བསྒྲོན་འདྲ།།

ཚིག་བཤད་ནོ་རྗེ་བཙུན་མགུར་མ།།

མགུར་བླངས་ན་སེམས་ཀྱི་སྐྱིད་རེད།།

༢༩རྟ་གཅིག་མ་གཏོགས་ངར་མེད།།

རྟ་གཅིག་དེ་གཡུ་ལུང་ཉིན་ན་ཡོད།།

ས་གཡུ་ལུང་གཡང་གིས་བཀང་ཡོད།།

རྟ་མ་རིག་ཞེ་རེ་སྨྲེང་ཡོད།།

རོགས་གཅིག་མ་གཏོགས་ངར་མེད།།

རོགས་གཅིག་དེ་ཚོ་དྲུག་གླིང་ན་ཡོད།།

ཚིག་སྙན་མོ་མནའ་ཡིས་བསྒགས་ཡོད།།

རོགས་མ་རིག་ཞེ་རེ་སྨྲེང་ཡོད།།

༣༠ངར་རྟ་ཞིག་ཡོད་ཀྱང་འདི་ན་མེད།།

སྤང་སེར་བོའི་ཕོ་བྲང་ཀླད་ན་ཡོད།།

རྟ་དེ་ཚོ་རྟ་འགྲིན་དམར་བོས་བསྲུངས།།

ང་ཡང་གཅིག་ཞོན་ན་འདོད་གོ་གི།

ངར་རོགས་ཤིག་ཡོད་ཀྱང་འདི་ན་མེད།།

ས་སྡེ་ཆེན་རྩེ་བའི་གྲོང་ན་ཡོད།།

མ་དེ་ཚོ་རྗེ་བཙུན་སྒྲོལ་མས་བསྲུངས།།

ང་ཡང་གཅིག་རྩེ་ན་འདོད་གོ་གི།

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི