གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལ་གཞས་མཐུན་པ་དྲུག་སྐོར་ལས། མཐུན་པའི་སྐོར།༡༡

2009-07-19 12:55:00 བོད་མི་དམངས། ཀློག་གྲངས། མཆན ཡོད།


༡༤༦
གོས་བརྒྱ་གོན་སྟོང་གོན་བརྗེད་ཐལ།།

གོས་ཆེན་འབྲུག་མ་མ་བརྗེད་ཟིག།

གོས་མ་བརྗེད་ཚུལ་འདིར་བལྟས་ན།།

ཕྱི་རི་མོ་ཡག་ནི་ལོས་ཡིན།།

 

རོགས་བརྒྱ་རྩེས་སྟོང་རྩེས་བརྗེད་ཐལ།།

ངས་དོ་དགོང་ཆུང་ལོ་མ་བརྗེད་ཟིག།

རོགས་མ་བརྗེད་ཚུལ་འདིར་བལྟས་ན།།

རོགས་ཞེ་འདང་ཆེ་ནི་ལོས་ཡིན།།

 

༡༤༧རི་ཡར་བལྟས་མགོ་ན་དར་ལྕོག་ཅིག།

རླུང་མ་གཡུག་བསེར་བུ་རང་བྱུང་ཞིག།

དེའི་བར་ན་དར་ལུང་མདུད་པ་ཞིག།

སྐྲག་མི་དགོས་དར་སྐུད་ཆད་མེད་རེད།།

 

ས་སྡེ་ཆེན་ཁུགས་ན་འདང་ཆེན་ཞིག།

ཁ་མ་བརྒྱབ་མི་ཁ་རང་བྱུང་ཞིག།

དེའི་བར་ན་འདང་ཆེན་རོགས་ལོ་ཞིག།

སྐྲག་མི་དགོས་ཞེ་སེམས་འགྱུར་མེད་རེད།།

 

༡༤༨རྟ་འདོ་བ་ཨ་རིག་ཀླད་རེད།།

རྒྱུག་གོམ་ལག་རིག་སྨོན་གཞུང་རེད།།

ས་མ་རུབ་མུན་པ་འཐིབས་ན།།

རྟ་འདོ་བའི་གོམ་ལག་ཅིར་བརྗེད།།

 

རོགས་ཞེ་མཐུན་སྡེ་ཆེན་དཀྱིལ་རེད།།

ཚིག་བཤད་པ་རྗེ་བཙུན་མགུར་རེད།།

ཁ་མི་ཁ་གླིང་ལ་གྲགས་རུང་།།

རོགས་འདང་ཆེན་ཡིད་ནས་ཅིར་བརྗེད།།

 

༡༤༩ནགས་རྒྱ་རྫོང་སྟག་གི་ཕ་ས་རེད།།

བྱ་ཁུ་ལོ་ཞེ་སེམས་ཆགས་ས་རེད།།

ཞེ་ཆགས་ས་མེད་པ་ཤེས་ན་ཡང་།།

ལས་སྨོན་ལམ་ཅན་དུ་གྱུར་སོང་དུས།།

སྟག་ཕ་ས་ཡིན་རུང་ཆགས་དགོས་གི།

 

ངའི་རྩེ་ཡ་དགོད་གྲོགས་སྡེ་ཡི་རེད།།

རོགས་ང་ཚོ་ཞེ་སེམས་ཆགས་ས་རེད།།

རོགས་རྩེ་ས་མེད་པ་ཤེས་ན་ཡང་།།

འགྲོགས་ཞེ་འདང་ཅན་དུ་གྱུར་སོང་ན།།

རོགས་སྡེ་ཡི་ཡིན་རུང་རྩེ་དགོས་གི།

 

༡༥༠སྟོད་རི་རྒྱལ་མགོ་ན་ཤྭ་གཉིས་ཡོད།།

ཤྭ་གཉི་ག་ནོར་བུ་ཆ་མ་ཡིན།།

རྭ་གཉི་ག་མགོ་ན་རང་བྱོན་ཡིན།།

ཤྭ་རྭ་རིང་རང་ལ་མ་བརྗེད་དང་།།

རྭ་མགོ་ན་རང་ལ་འཐོར་མེད་ཡིན།།

 

ས་སྡེ་ཆེན་ཁུགས་ན་རོགས་གཉིས་ཡོད།།

རོགས་གཉི་ག་ཕ་མ་བུ་ཕྲུག་ཡིན།།

ཚིག་བཤད་པ་སེམས་པའི་སེམས་པ་ཡིན།།

རོགས་རང་གིས་རང་ལ་མ་བརྗེད་དང་།།

ང་ཁ་འཁྱམ་ཚེ་གང་བརྗེད་མེད་ཡིན།།

 

༡༥༡སྟོད་དབུས་གཙང་ཆོས་ར་ནང་ནས།།

ངས་གཡས་སྐོར་བརྒྱབ་ནས་འགྲོ་དུས།།

ང་ལྷ་དང་ལྷ་མོར་འགལ་ཡོད།།

ངས་གཡོན་སྐོར་བརྒྱབ་ནས་འགྲོ་དུས།།

ང་ལྷ་ཕྲུག་མང་བོར་འགལ་ཡོད།།

འགལ་མེད་ནོ་བླ་མ་ཁྱོད་རེད།།

འདང་རྒྱག་ན་བླ་མ་ཁྱོས་རྒྱོབ།།

 

ས་མར་བལྟས་སྡེ་ཆེན་གྲོང་ནས།།

ངས་གཡས་སྐོར་བརྒྱབ་ནས་འགྲོ་དུས།།

ང་ཁ་ཡ་ན་ཟླར་འགལ་ཡོད།།

ངས་གཡོན་སྐོར་བརྒྱབ་ནས་འགྲོ་དུས།།

ང་དྲིན་ཆེན་མ་ལོར་འགལ་ཡོད།།

འགལ་མེད་ནོ་རོགས་ལོ་ཁྱོད་རེད།།

འདང་རྒྱག་ན་རོགས་ལོ་ཁྱོས་རྒྱོབ།།

 

༡༥༢ཡར་བལྟས་ཀྱི་རི་གསུམ་རྩེ་ན།།

ཤིང་ཚིགས་དྲུག་དགུངལ་མཉམ་ཡོད།།

ཤིང་གཅོད་ནི་འབལ་ནི་མ་དགོས།།

རླུང་བསེར་བུ་གཡུག་ན་འགྱོད་རབས་བཤད།།

འདང་བརྒྱབ་ན་འགྱོད་དོན་མེད་གི།

ཤིང་ཀླུ་བདག་རྩད་པ་སྲ་ན།།

རླུང་བསེར་བུ་ཞིག་གིས་ཅི་སྐྱོན།།

 

མར་བལྟས་ཀྱི་སྡེ་ཆེན་དཀྱིལ་ན།།

རོགས་ཞེ་མཐུན་ཚིག་གསུམ་བཤད་ཡོད།།

ཁ་བརྒྱབ་ནས་གཏོར་ནི་མ་དགོས།།

གླིང་མི་ཁ་འཁོར་ན་སྡུག་རབས་བཤད།།

འདང་བརྒྱབ་ན་སྡུག་དོན་མེད་གི།

རོགས་ཞེ་འདང་ཡི་ན་ཡོད་ན།།

གླིང་མི་ཁ་ཞིག་གིས་ཅི་སྐྱོན།།

 

༡༥༣རྟ་ཁྱོད་ལ་ཆ་རྒྱུས་ང་མེད།།

རྒྱ་བྱིན་ནས་ཉོས་རེ་བཏང་ན།།

རྒྱུག་ལོས་བཟང་འདོད་པའི་རྟ་རེད།།

 

རོགས་ཁྱོད་ལ་ཆ་རྒྱུས་ང་མེད།།

ཚིག་བཤད་ནས་འགྲོགས་རེ་བཏང་ན།།

ཁྲེལ་ལོས་ཡོད་འདོད་པའི་རོགས་རེད།།

 

༡༥༤སྟོད་དབུས་གཙང་ཡུལ་གྱི་བླ་མ།།

སྐྱབས་ཁྱོད་ལ་མཇལ་བའི་ཕན་ཆད་ནས།།

ང་འཇིག་རྟེན་འཁོར་བའི་ཕྱོགས་ལ།།

ཞེན་པ་གཏིང་ནས་ལོག་གི།

དེ་བཤད་ན་དམ་ཚིག་ཨེ་རེད།།

 

ས་སྨད་ཕྱོགས་གྲོང་གི་རོགས་ལོ།།

མ་ཁྱོད་ཚོར་འགྲོགས་པའི་ཕན་ཆད་ནས།།

ཁྱོའི་ཕན་གྱི་ཁ་ཡ་ན་ཟླས།།

ཚིག་བཤད་དུས་ཞེན་པ་ལོག་གི།

འདི་བཤད་ན་ཞེ་འདང་ཨེ་རེད།།

 

༡༥༥བྱང་ཕྱོགས་སྐར་མ་སྨེ་བདུན།།

ཁྱོད་ཤར་བའི་ཤར་ལམ་ཨེ་དྲང་།།

ཁྱོད་ཤར་བའི་ཤར་ལམ་དྲང་ན།།

ངས་སྨིན་དྲུག་ཁྲ་མོ་བློས་གཏོང་།།

ཁྱོས་མི་དྲང་ཟེར་ན་མི་ཆོག།

 

སྡེ་ཆེན་པོ་དཀྱིལ་གྱི་རོགས་ལོ།།

ཁྱོད་རྩེ་བའི་རྩེ་ལམ་ཨེ་དྲང་།།

ཁྱོད་རྩེ་བའི་རྩེ་ལམ་དྲང་ན།།

ངས་ཞེ་མཐུན་རོགས་ལོ་བློས་གཏོང་།།

བློས་བཏང་གི་དུས་ཚོད་ཅིག་ལ།།

ཁྱོས་མི་རྩེ་ཟེར་ན་མི་ཆོག།

 

༡༥༦སྨད་རྒྱ་ནག་ཇ་བག་གྲུ་བཞི་རེད།།

དེ་གྲུ་བཞི་ཡིན་པའི་ཁ་ན་མེད།།

སྐོལ་བཏང་ན་མིག་ལ་ཡག་དགོས།།

འཐུང་བཏང་ན་སྐོམ་པ་སེལ་དགོས།།

 

སྡེ་ཆེན་པོའི་རྩེ་བ་ཁ་ཡག།

ཁྱོའི་ཚིག་གསུམ་ཡག་ནི་ཁ་ན་མེད།།

ནམ་ཡིན་རུང་རོགས་ལོར་ཐུག་དགོས།།

ཐུག་བཏང་ན་ཞེ་འདང་ཡོད་དགོས།།

 

༡༥༧བཀྲ་ཤིས་ཀྱི་སྤང་དཀར་ཀླད་ན།།

དོན་འགྲུབ་པའི་གྲོ་རྒྱ་ང་ཡོད།།

ཕྱི་སྤུ་གར་བལྟ་རྒྱུ་མེད་མོད།།

རྒྱུག་གོམ་པ་འཛོམས་པའི་རྟ་ཡིན།།

 

བཀྲ་ཤིས་ཀྱི་སྡེ་ཆེན་དཀྱིལ་ན།།

དོན་འགྲུབ་པའི་རོགས་ལོ་ང་ཡོད།།

ཕྱི་མོ་སྒོར་བལྟ་རྒྱུ་མེད་མོད།།

འདང་ཞེ་བརྩེ་ཅན་གྱི་རོགས་ཡིན།།

 

༡༥༨ང་དང་པོ་ཞིང་བ་ཡིན་དུས།།

ཞིང་ཆུ་མ་བཏབ་ཅིང་རི་མ་བཏབ།།

ངས་དེ་སང་དེ་ལྟར་འདེབས་རྒྱུ་མིན།།

ཞིང་ཆུ་མ་མིན་པ་འདེབས་རྒྱུ་མིན།།

 

ང་དང་པོ་རྩེ་བ་ཡིན་དུས།།

རོགས་ཁ་མཐུན་འགྲོགས་ལ་ཞེ་མཐུན་འགྲོགས།།

ང་དེང་སང་དེ་ལྟར་འགྲོག་རྒྱུ་མིན།།

རོགས་ཞེ་མཐུན་མིན་པ་རྩེ་རྒྱུ་མིན།།

 

༡༥༩ནས་དྲུག་མང་སྐྱེས་ཚུལ་ཡག་གི།

སྐྱེས་ཡག་ནོ་ངེས་པ་མེད་གི།

དགུང་ཕོ་ཆུང་འབྲུག་གི་མངའ་འོག་རེད།།

དུད་འགྲོ་ཟོག་གི་ཁ་སྒོ་རེད།།

 

རོགས་ཞེ་མཐུན་རྩེ་ཚུལ་ཡག་གི།

ཁྱོད་ཡག་ནོ་ངེས་པ་མེད་གི།

ཡུལ་དྲིན་ཆེན་ཕ་མའི་ཁྲིམས་འོག་རེད།།

ན་ནང་ཟླ་མང་བོའི་རྩེ་རོགས་རེད།།

 

༡༦༠གཟིངས་གྲུ་བཞིའི་མགོ་ཐག་རྩྭ་རེད།།

བློ་གཏོད་སའི་རྐྱལ་བ་དབུགས་རེད།།

བློ་གཏད་ན་སྐྲག་སའི་གཞི་རེད།།

 

རོགས་རྩེ་ས་སྡེ་ཆེན་དཀྱིལ་རེད།།

བློ་གཏོད་ས་ཆུང་མའི་རྩིབ་རེད།།

བློ་གཏོད་ན་སྐྲག་སའི་གཞི་རེད།།

 

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།