གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལ་གཞས་མཐུན་པ་དྲུག་སྐོར་ལས། མཐུན་པའི་སྐོར།༦

2009-05-19 17:21:00 བོད་མི་དམངས། ཀློག་གྲངས། མཆན ཡོད།

༧༦ཁངས་མ་འབབ་རྫ་མགོ་དཀར་ནོ།།

རྨ་ཕ་རིའི་རྨ་ཆེན་གངས་རེད།།

དགུང་ཉི་མ་ཀླད་ནས་ཤར་རུང་།།

ཞུ་འགྲོ་བའི་བསམ་པ་མེད་ནོ།།

ཤར་རྨ་རྒྱལ་གངས་གསེང་དར་རེད།།

གངས་མི་ཞུ་ཟེར་དོན་དེ་ཡིན།།

 

རོགས་མ་རྩེ་སྣང་བ་མཐུན་ནོ།།

ཞེ་མཐུན་རོགས་ལོ་ཁྱོད་རེད།།

གླིང་མི་ཁའི་འཁོར་ལོ་བསྐོར་རུང་།།

འགལ་འགྲོ་བའི་བསམ་པ་མེད་ནོ།།

རོགས་འུ་གཉིས་ཚིག་དང་མནའ་རེད།།

རོགས་མི་འགལ་ཟེར་དོན་དེ་ཡིན།།

 

༧༧མཁར་སྐྱོ་མོའི་གྱང་རྟིང་རྡོ་རེད།།

མཁར་མི་ལོག་ཟེར་དོན་དེ་ཡིན།།

 

ཕོ་ངེད་ཚོའི་ཚིག་རྟིང་མནའ་ཡིན།།

རོགས་མི་འགལ་ཟེར་དོན་དེ་ཡིན།།

 

༧༨འབའ་མང་རའི་བྱེ་ཁུགས་ཐག་རིང་གི།

ང་རྒྱག་གི་འདོ་བའི་བོངས་ཆུང་གི།

རྒྱུག་གོམ་ལག་བར་ནས་བཀའ་དོག་གི།

སྒ་ལྷུ་བཞིའི་འོག་ནས་དབང་ཆུང་གི།

རྟ་རང་རང་དབང་ལ་མ་འོང་ན།།

ངས་དབང་ཆུང་འདོ་བ་སྙིང་རྗེ་གི།

 

ང་རྩེ་མཁན་རོགས་ལོར་ཞེ་མཐུན་གི།

ཞེ་མཐུན་པའི་རོགས་ལོར་དབང་ཆུང་གི།

ཁྱིམ་ཆུང་མའི་རྩིབ་ནས་བཀའ་དོག་གི།

ཁ་ཚིག་གསུམ་བཤད་དུས་དབང་ཆུང་གི།

རོགས་རང་རང་དབང་ལ་མ་འོང་ན།།

ངས་དབང་ཆུང་རོགས་ལོར་སྙིང་རྗེ་གི།

 

༧༩སྟོད་དབུས་གཙང་གསེར་ཏོག་སེར་བོ་རེད།།

གསེར་དགུ་ཐོག་འཛམ་གླིང་ཉི་མ་རེད།།

དཔེ་བཞག་ན་བུ་དང་བུ་མོ་རེད།།

ཞེ་མཐུན་ན་ཀན་གྱི་རང་བཞིན་རེད།།

 

སྡེ་ཆེན་པོ་དངུལ་ཏོག་དཀར་བོ་རེད།།

དངུལ་དུང་ཐོག་ན་ཟླ་ཆུང་ལོ་རེད།།

དཔེ་བཞག་ན་བུ་དང་བུ་མོ་རེད།།

ཞེ་མཐུན་ན་ཀན་གྱི་རང་བཞིན་རེད།།

 

༨༠ས་ཡག་སྤང་དཀར་ཀླད་ནས།།

རྟ་ཡག་གྱི་ལིང་གྲོ་རྒྱ།།

ཁྱོས་ཕྱི་བལྟས་མིག་གིས་འཚོས་ནོ།།

ནང་རྟ་བརྒྱའི་གྲས་ཀྱི་རྒྱན་རེད།།

རྟ་ཞོན་ན་གོམ་ལག་བདེ་ནོ།།

ང་རྟ་བདག་སེམས་ཀྱི་འདོད་རེད།།

 

ས་སྡེ་ཆེན་ཚོ་དྲུག་གླིང་ནས།།

རོགས་ཆུང་ལོ་སྙིང་ལ་རྗེ་བོ།།

ཁྱོས་ཕྱི་བལྟས་མིག་གིས་འཚོས་ནོ།།

ནང་ན་ཟླའི་གྲས་ཀྱི་རྒྱན་རེད།།

རོགས་རྩེས་ནས་སྣང་བ་མཐུན་ནོ།།

ང་བྱི་མོའི་སེམས་ཀྱི་འདོད་རེད།།

 

༨༡ངས་རྟ་བརྒྱ་རྟ་མང་མིག་གིས་འཚོས།།

ངས་འདོ་བ་རྐྱང་རྒོད་སེམས་ཀྱིས་འཚོས།།

རྟ་བརྒྱ་བོ་མིག་གིས་མ་འཚོས་ན།།

རྟ་གཅིག་དེ་འཚོ་ས་མི་འགྲོ་གི།

 

ངས་རོགས་བརྒྱ་རོགས་མང་མིག་གིས་འཚོས།།

ངས་ཆུང་གཅིག་རོགས་ལོ་སེམས་ཀྱིས་འཚོས།།

རོགས་བརྒྱ་བོ་མིག་གིས་མ་འཚོས་ན།།

རོགས་གཅིག་དེ་འཚོ་ས་མི་འགྲོ་གི།

 

༨༢ཡར་བལྟས་ཀྱི་དགུང་སྔོན་གནམ་ན།།

སྤྲིན་དཀར་སྤྲིན་དམར་གཉིས་ཡོད།།

སྤྲིན་དམར་རྔམས་ཀ་མཐུག་རུང་།།

ཞེ་སྤྲིན་དཀར་ཞིག་ལ་ཆགས་ཡོད།།

སྤྲིན་དཀར་བོ་དཀར་བོ་དུང་རེད།།

སྤྲིན་དཀར་བོར་ཆགས་དོན་དེ་ཡིན།།

 

ཕྱི་སྲིད་སྡེ་ཚོ་དྲུག་གླིང་ན།།

རོགས་་མཐུན་ཞེ་མཐུན་གཉིས་ཡོད།།

ཁ་མཐུན་ཁ་ཚིག་ཡག་རུང་།།

སེམས་ཞེ་མཐུན་རོགས་ལོར་ཆགས་ཡོད།།

རོགས་བརྩེ་འདང་མ་དང་བུ་རེད།།

ཞེ་རོགས་ལ་ཆགས་དོན་དེ་རེད།།

 

༨༣རྟ་གྲོ་རིལ་སྔོ་རིལ་བརྒྱུགས་ནོ།།

ངེད་ཚང་གི་བློ་རྟར་གསང་དགོས།།

ངའི་བློ་རྟས་གོ་རེ་སོང་ན།།

ངའི་བློ་རྟས་གློ་འཕྲ་འཕེན་ན།།

ངས་ཨ་ལ་ཞང་ང་བཤད་ནི།།

གློ་འཕྲ་འཕེན་ན་བློ་རྟ་བཙོང་ང་བཏང་།།

སྒ་ངན་གཅོག་ན་སྒར་ར་འབུལ་ལ་བཏང་།།

བློ་རྟ་བཙོངས་ནས་རྟ་ཞིག་རྙེད་ནི་རེད།།

སྒར་ལ་ཕུལ་ནས་ཆོས་ཤིག་བཅོས་ནི་རེད།།

གོ་གཅིག་ཆོད་ཉིས་ཆོད་བྱུང་ནི་རེད།།

 

རོགས་འུ་གཉིས་འདི་ནས་རྩེ་ནོ།།

ངེད་ཚང་གི་རྒན་མོར་གསང་དགོས།།

ངའི་རྒན་མོས་གོ་རེ་སོང་ན།།

ངའི་རྒན་མོས་བཟའ་སྡིག་བྱེད་ལ།།

ངས་ཨ་ལ་ཞང་ང་བཤད་ནི།།

བཟའ་སྡིག་བྱེད་ན་བཟའ་ཚང་འཐོར་ར་བཏང་།།

མི་ཁ་སྐོར་ན་མི་ལ་སྟེར་ར་བཏང་།།

བཟའ་ཚང་ཐོར་ནས་མཐུན་པ་བཙལ་ནི་རེད།།

མི་ལ་བྱིན་ནས་མི་ངོ་ལོན་ནི་རེད།།

གོ་གཅིག་ཆོད་ཉིས་ཆོད་བྱུང་ནི་རེད།།

 

༨༤རྟ་གྲོ་རིལ་གཉིས་ཀྱི་ཕན་ནས།།

ཉོས་ཡོད་པའི་ཨ་སང་གྲོ་རྒྱ།།

བསྐྱུར་ཞེ་ན་ཡ་ལ་ཡ་ཡིན།།

ཞོན་ཞོན་པའི་རྟ་བོར་ཤ་མེད།།

རྟ་ཤ་མེད་བརྒྱ་མེད་འདི་ཚོ།།

བཙོང་ཞེ་ན་ཅང་གིས་མི་ཉོ།།

རབ་ཡིན་ན་ཕར་ལ་རྒྱག་ག་བཏང་།།

 

རོགས་ཁྱོད་ཚོ་བཟའ་ང་ཉན་ན།།

བཙལ་ཡོད་པའི་རྒྱུ་བྱིན་ཆུང་མ།།

སྐྱུར་ཞེ་ན་ཡ་ལ་ཡ་ཡིན།།

རྩེ་རྩེ་བའི་རྒྱུ་བྱིན་ཆུང་མ།།

ལོ་ལོནས་ལོ་ལོ་མང་གི།

སྟེར་ཞེ་ན་ཅང་ལ་མི་དགོས།།

སོང་ཟེར་ན་འགྲོ་ས་མེད་གི།

རབ་ཡིན་ན་ཕར་ལ་རྒྱག་ག་བཏང་།།

 

༨༥རྟ་འདོ་བ་སྙིང་ལ་རྗེ་བོ།།

ཁྱོས་རྟ་བདག་འཁྱམ་པའི་ཁ་ལོངས།།

སུག་སྐོར་སྒྲོག་སུམ་རྩའི་ཁྲིམས་རྩིས།།

ཁྱོར་ཐོབ་བྱ་ཅན་པོ་དེ་རེད།།

ཡང་ཐོབ་བྱ་མེད་ནོ་ང་རེད།།

 

རོགས་ཆུང་ལོ་སྙིང་ལ་རྗེ་བོ།།

ཁྱོས་རྒྱུ་བྱིན་ཆུང་མའི་ཁ་ཉོན།།

ཡང་དྲིན་ཆེན་ཕ་མའི་ཚིག་རྩིས།།

ཁྱོར་ཐོབ་བྱ་ཅན་པོ་དེ་རེད།།

ཡང་ཐོབ་བྱ་མེད་ནོ་ང་རེད།།

 

༨༦རྫ་ཁ་རི་ཉུལ་གི་བོའུ་རྒྱུ།།

རྫ་ཁ་རི་ཉུལ་ནས་འགྲོ་དོན།།

ངའི་འགྲོ་དོན་ཤ་བོ་ཁྱོད་ཡིན།།

ཤ་ཁྱོད་ལ་ཐོབ་བྱ་མེད་ན།།

རྫ་ཁ་རི་ཉུལ་ནོ་དོན་མེད།།

བོའུ་ཕྲག་ལ་འཁུར་ནོ་ལན་ཆགས།།

 

སྡེ་ཁ་རི་ཉུལ་གི་འཁྱམ་པ།།

སྡེ་ཁ་རི་ཉུལ་ནས་འགྲོ་དོན།།

ངའི་འགྲོ་དོན་རོགས་ལོ་ཁྱོད་ཡིན།།

རོགས་ཁྱོད་ལ་ཐོབ་བྱ་མེད་ན།།

སྡེ་ཁ་རི་ཉུལ་ནོ་དོན་མེད།།

ཁ་ཚིག་གསུམ་བཤད་ནོ་ལན་ཆགས།།

 

༨༧ཁྱོད་རི་གསུམ་རྩེ་ཡི་ཁོལ་མོ།།

ཤིང་བྲ་མས་ལན་ཆགས་ཨེ་གཏོད་གི།

ཤིང་བྲ་མས་ལན་ཆགས་གཏད་བཏང་ན།།

འདུག་མི་དགོས་ཁོལ་མོ་བུད་ལ་ཤོག།

ཁྱོད་ཡོང་ས་ཁྲ་ཡག་རྫ་ཡོད།།

བློ་གཏོ་ས་བྲག་དམར་ང་ཡོད།།

 

ས་སྡེ་ཆེན་གྲོང་གི་དགའ་ལོ།།

ཁྱིམ་ཆུང་མས་ལན་ཆགས་ཨེ་གཏོད་གི།

ཁྱིམ་ཆུང་མས་ལན་ཆགས་གཏད་བཏང་ན།།

འདུག་མི་དགོས་དགའ་ལོ་བུད་ལ་ཤོག།

ཁྱོད་ཡོང་ས་སྡེ་ཆེན་གྲོང་ཡོད།།

བློ་གཏོད་ས་བྱི་མོ་ང་ཡོད།།

 

༨༨སྟོད་དབུས་གཙང་ཡུལ་གྱི་བླ་མ།།

ང་བྲག་ཁུང་སྐམ་པོའི་ནང་ནས།།

སྒོམ་ཏིང་ངེ་འཛིན་ལ་བཞུགས་ནོ།།

ཚེ་འདི་ཕྱི་བསམ་ནི་མིན་ན།།

དབུས་གྲྭ་བ་སྟོང་གི་དབུས་ན།།

སྐྱིད་བརྒྱབ་ནས་འདུག་ནི་ལོས་ཐུབ།།

 

ང་ཁ་འཁྱམ་བྱི་ལི་ཟེར་བ།།

ས་སྡེ་ཆེན་འཁྱམ་པའི་ལྟ་བྱས།།

ཡུལ་རི་ཁ་ཁྱི་ཁ་ཉུལ་ནོ།

།མ་ཁྱོད་ཚོ་བསམ་ནི་མིན་ན།།

ཡུལ་ཉལ་ས་དྲོན་པོའི་ནང་ནས།།ལུ

ས་ཉལ་ནས་འདུག་ནི་ལོས་ཐུབ།།

 

༨༩ཁྲི་རྒྱབ་ཡོལ་སྟེང་གི་བླ་མ།།

ཁྲི་སེར་བོའི་སྟེང་ནས་ཁྱོད་བཞུགས།།

མགོ་སྒུར་ནས་ཕྱག་གསུམ་ངས་འཚལ།

ཚེ་འདི་ནས་སྡིག་གྲིབ་ང་ལྗིད།།

ཚེ་ཕྱི་མའི་དོན་དག་ཁྱོར་གསལ།།

 

ས་སྡེ་ཆེན་གྲོང་གི་རོགས་ལོ།།

སྡེ་ཆེན་པོའི་དཀྱིལ་ནས་ཁྱོད་སྡོད།།

ཁ་བགད་ནས་ཚིག་གསུམ་ངས་བཤད།།

སྡེ་འདི་ནས་མི་ཁ་ང་ངན།།

ཚེ་གང་གི་དོན་དག་ཁྱོར་གསལ།།

 

༩༠རྟ་འདོ་བ་སྙིང་ལ་རྗེ་བོ།།

ངའི་བློ་རྟ་མ་བྱས་གོང་ལ།།

ཁྱོར་བཤད་རྒྱུ་ཚིག་གསུམ་ཡོད་ནོ།།

རྟ་བློ་རྟ་ཉོས་པའི་ཕྱིན་ཆད།།

སྒ་གཞན་པ་རྒྱབ་ལ་བླངས་ནས།།

སྲབ་གཞན་པ་མགོ་ལ་གོན་དུས།།

ཁྱོའི་རྟ་བདག་མཛད་པ་བཙོག་གི།

ཁྱོའི་སྒ་ངན་རྒྱབ་ནས་ལེན་ན་ཐང་།།

ཁྱོའི་ཐུར་ངན་མགོ་ནས་ཕུད་ལ།།

མར་དགོན་འདབས་ཐུར་ར་བདའ་ལ།།

སྒར་དགོན་བདག་བླ་མ་ཡོང་ནས།།

ལད་པ་སུམ་བརྒྱ་དྲུག་ཅུ།།

ལད་ཅན་ང་རེད་ཟེར་རུང་།།

ངའི་རྟ་རྒན་བདག་པོ་ང་རེད།།

སྒར་གྱི་བླ་མ་འོ་རེད།།

 

རོགས་ཆུང་ལོ་སྙིང་ལ་རྗེ་བོ།།

ངའི་རྩེ་རོགས་མ་བྱས་གོང་ལ།།

ཁྱོར་བཤད་རྒྱུ་ཚིག་གསུམ་ཡོད་ནོ།།

རོགས་ཚེ་འགྲོག་ཉན་པའི་ཕྱིན་ཆད།།

མི་གཞན་པའི་ཁ་བཤད་རྒྱུག་ནས།།

ཚིག་གང་ཡག་གཞན་ལ་བཤད་དུས།།

ཁྱོའི་རོགས་ཀྱི་མཛད་པ་བ་བཙོག་གི།

ཚིག་རྩུབ་མོས་ཡིད་སེམས་གསོད་ལ།

།ཡུལ་ཕ་མར་ནང་མཚང་བཤད་ལ།།

ཁྱོའི་དྲིན་ཆེན་ཕ་མ་གཉིས་ཀྱིས།།

ལད་པ་སུམ་བརྒྱ་དྲུག་ཅུ།།

ལད་ཅན་ང་རེད་ཟེར་རུང་།།

ངའི་རོགས་ལོའི་བདག་པོ་ང་རེད།།

ཀན་རྒན་རྒོན་གཉིས་ཀ་འོ་རེད།།

 

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།