གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལ་གཞས་མཐུན་པ་དྲུག་སྐོར་ལས། འགྲོག་པའི་སྐོར།༤

2009-01-24 13:49:00 བོད་མི་དམངས། ཀློག་གྲངས། མཆན ཡོད།

༤༦དགུང་གི་སྐར་ཆེན་ཁྲ་མོ།།

ཁྱོད་འཆར་ལ་སྔ་འཕྱི་ཨེ་ཡོད།།

ཁྱོད་འཆར་ལ་སྔ་འཕྱི་མེད་ན།།

དགུང་སྐར་ཆེན་ཁྱུ་ནས་ཁྱོད་བསལ།།

ནང་སྐར་ཕྲན་མང་བོར་ང་འགལ།།

འགལ་སོང་རུང་འགྱོད་པ་ང་མེད།།

 

རྟ་གྲོ་རྒྱ་གོམ་ལག་ཅན་པོ།།

ཁྱོད་རྒྱུག་ག་སྔ་འཕྱི་ཨེ་ཡོད།།

ཁྱོད་རྒྱུག་ག་སྔ་འཕྱི་མེད་ན།

བྱང་རྟ་མང་ཁྱུ་ནས་ཁྱོད་བསལ།།

ནང་རྟ་བརྒྱ་མང་བོར་ང་འགལ།།

འགལ་སོང་རུང་འགྱོད་པ་ང་མེད།།

 

སྡེ་ཚོ་ཆེན་གྲོང་གི་རོགས་ལོ།།

ཁྱོད་རྩེ་ཡ་སྔ་འཕྱི་ཨེ་ཡོད།།

ཁྱོད་རྩེ་ཡ་སྔ་འཕྱི་མེད་ན།།

སྡེ་རོགས་བརྒྱའི་ཁྱུ་ནས་ཁྱོད་བསལ།།

ནང་ན་ཟླ་མང་བོར་ང་འགལ།།

འགལ་སོང་རུང་འགྱོད་པ་ང་མེད།།

 

༤༧རི་མགོ་ལྷ་རིའི་མཆོད་རྟེན་རེད།།

ལྷ་མཇལ་དགོས་བསམ་ནས་ཡོང་ནི་ཡིན།།

 

རི་སྐེད་སིལ་ཏོག་ཁམ་བུ་རེད།།

སིལ་འཐུ་དགོས་བསམ་ནས་ཡོང་ནི་ཡིན།།

རི་འདབས་ན་ཟླ་རྩེ་ས་རེད།།

རོགས་རྩེ་དགོས་སམ་ནས་ཡོང་ནི་ཡིན།།

 

༤༨བྲག་དཀར་ལྷ་རིའི་དབུ་རྩེ་ན།།

བཞོས་མ་མྱོང་སེང་གེ་དཀར་མོ་ཡོད།།

ཁྱོར་བཞོ་རྒྱུའི་བསམ་པ་ཡོད་ན།།

དུང་དཀར་བོའི་བཞོ་ཟེའུ་སྒྲིགས་དང་།།

བཞོ་ནུ་ལག་བདེ་བ་ང་གསལ།།

 

བྲག་དཀར་ལྷ་རིའི་རི་སྐེད་ན།།

བཞོས་མ་མྱོང་འབྲི་ཆུང་ཐུལ་མ་ཡོད།།

ཁྱོར་བཞོ་རྒྱུའི་བསམ་པ་ཡོད་ན།།

ཤིང་ཤུག་པའི་བཞོ་ཟེའུ་སྒྲིགས་དང་།།

བཞོ་ནུ་ལག་བདེ་བ་ང་གསལ།།

 

བྲག་དཀར་ལྷ་རིའི་རི་ཞོལ་ན།།

རྩེ་མ་མྱོང་རོགས་ལོ་ཆ་འགྲིག་ཡོད།།

རོགས་རྩེ་རྒྱུའི་བསམ་པ་ཁྱོར་ཡོད་ན།།

ཁ་བསྐོར་ནས་ཚིག་གསུམ་ཤོད་དང་།།

ནང་ཞེ་སེམས་མཐུན་པ་ང་གསལ།།

 

༤༩ཁུ་བྱུག་བྱ་དང་ཁྱེད་གཉིས་གས།།

ནགས་ཙན་དན་བརྒྱུད་ན་འཕུར་རྒྱུ་ན།།

ཤིང་སིལ་ཏོག་སྣ་ཚོགས་འཁྲུངས་ཡོད།།

སིལ་འཐུ་རྒྱུའི་བསམ་པ་ཡོད་ན།།

སིལ་འཐུ་བའི་སྟབས་ཀ་འགྲིག་ཡོད།།

 

གཡང་དཀར་ལུག་དང་ཁྱེད་གཉིས་གས།།

ཕར་སྤང་རི་བརྒྱུད་ན་འགྲོ་རྒྱུ་ན།།

སྨན་མེ་ཏོག་སྣ་ཚོགས་འཁྲུངས་ཡོད།།

སྨན་འཐུ་བའི་བསམ་པ་ཡོད་ན།།

སྨན་འཐུ་བའི་སྟབས་ཀ་འགྲིག་ཡོད།།

 

ཞེ་མཐུན་རོགས་ལོ་ཁྱེད་གཉི་གས།།

ས་སྡེ་ཆེན་བརྒྱུད་ནས་རྩེ་རྒྱུ་ན།།

ནང་ན་ཟླ་མང་བོ་འདུས་ཡོད།།

རོགས་རྩེ་རྒྱུའི་བསམ་པ་ཡོད་ན།།

རོགས་རྩེ་བའི་སྟབས་ཀ་འགྲིག་ཡོད།།

 

༥༠དུང་དཀར་བོའི་སྒྲ་སྙན་ཚོར་དུས་ན།།

ཆོས་དཀར་བོའི་གླིང་ལ་ཐོན་རྟགས་རེད།།

ལྷ་མཇལ་བའི་སྟབས་ཀ་འགྲིག་ནི་རེད།།

 

བྱ་ཁུ་བྱུག་གསུང་སྙན་ཚོར་དུས་ན།།

ནགས་རྒྱ་རྫོང་དཀྱིལ་ལ་ཐོན་རྟགས་རེད།།

སིལ་ཟ་བའི་སྟབས་ཀ་འགྲིག་ནི་རེད།།

 

རོགས་ཆུང་ལོའི་སྐད་སྙན་ཚོར་དུས་ན།།

བོད་ཚོ་ཆེན་གྲོང་ལ་ཐོན་རྟགས་རེད།།

རོགས་རྩེ་བའི་སྟབས་ཀ་འགྲིག་ནི་རེད།།

 

༥༡ཁིས་ཀྱི་ལབ་རྩེ་སྟོད་ཁ་སླ།།

ཕྱི་ཡི་རྨུ་ཐག་འཐེན་ཁ་དཀའ།།

མཐོ་སོང་ན་རླུང་གིས་གཅོད་ལ།།

དམའ་སོང་ན་ཚེ་ལ་གནོད་ལ།།

 

བར་གྱི་རྡེའུ་འབུམ་རྩིག་ཁ་སླ།།

དཀྱིལ་གྱི་སྲོག་ཤིང་འཛུགས་ཁ་དཀའ།།

མཐོ་སོང་ན་ཁ་ཡིག་གོག་འགྲོ།།

དམའ་སོང་ན་བརླན་གྱིས་རུལ་འགྲོ།།

དགའ་ལོ་རོགས་དང་རྩེད་ཁ་སླ།།

ཞེ་མཐུན་པའི་ཚིག་གསུམ་བཤད་ཁ་དཀའ།།

མཐུན་སོང་ན་སྡེ་བས་གོ་འགྲོ།།

གོ་སོང་ན་སེམས་ལ་གནོད་འགྲོ།།

 

༥༢རྡོ་ཡག་པ་འཁུར་ན་འདོད་ནི་ཚོ།།

རྡོ་ཡག་པ་ལྷ་ལུང་རྩེ་ན་ཡོད།།

འཁུར་ཤེས་ན་ལྷ་རྡོ་དཀར་བོ་རེད།།

འཁུར་མ་ཤེས་ཆུ་རྡོ་སྔོན་མོ་རེད།།

 

རྟ་མགྱོགས་པ་ཞོན་ན་འདོད་ནི་ཚོ།།

རྟ་གྱོགས་པ་ཨ་རིག་སྟོད་ན་ཡོད།།

ཞོན་ཤེས་ན་གོམ་པ་རླུང་རེད།།

ཞོན་མ་ཤེས་གོར་མོ་རྡོ་རེད།།

 

རོགས་ཡག་པ་རྩེ་ན་འདོད་ནི་ཚོ།།

རོགས་ཡག་པ་སྡེ་ཆེན་གྲོང་ན་ཡོད།།

རྩེ་ཤེས་ན་ཚེ་གཅིག་རྩེ་རོགས་ཡིན།།

རྩེ་མ་ཤེས་གཏམ་ཆེན་མི་ཁ་རེད།།

 

༥༣ཕ་རིའི་ཁིས་དང་ཚུ་རིའི་ཁིས།།

ཚུ་རིའི་ཁིས་ན་ལབ་རྩེ་རེ།།

ནང་སྲོག་ཤིང་ཅི་ཡོད་མི་ཤེས་གི།

ཕྱི་བལ་ཚོན་དཀར་བོ་ཡིད་རེ་སྨོན།།

 

ཕ་རིའི་ཐང་དང་ཚུ་རིའི་ཐང་།།

ཚུ་རིའི་ཐང་ན་ཚ་འབུམ་ཐང་།།

ནང་ཚ་ཚ་ཅི་ཡོད་མི་ཤེས་གི།

ཕྱི་བྲག་རྩི་དཀར་བོར་ཡིད་རེ་སྨོན།།

 

ཕ་རིའི་སྡེ་དང་ཚུ་རིའི་སྡེ།།

ཚུ་རིའི་སྡེ་ན་རྩེ་རོགས་བརྒྱ།།

ཁ་ཚིག་ཆེན་ཅི་ཡོད་མི་ཤེས་གི།

ངག་པི་ཝང་དཀྲོལ་ན་ཡིད་རེ་སྨོན།།

 

༥༤ཆུ་ཡག་པ་ཆབ་ལུང་འགག་ན་ཡོད།།

ཆུ་ཤག་སྒྲ་མ་གྲག་བཅུ་ལུགས་མེད།།

 

ཤིང་ཡག་པ་ཙན་དན་ནགས་ན་ཡོད།།

ཤིང་ཁྲོག་སྒྲ་མ་གྲག་གཅོད་ལུགས་མེད།།

 

རོགས་ཡག་པ་ཚོ་ཆེན་སྡེ་ན་ཡོད།།

གཏམ་མི་ཁ་མ་འཁོར་རྩེ་ལུགས་མེད།།

 

༥༥དགུང་ཨ་སྔོན་ཤེལ་དཀར་མེ་ལོང་རེད།།

དགུང་འཛམ་གླིང་ཉི་མ་ངེད་གཉིས་གས།།

ཤེལ་ཁ་་དོག་གསལ་ནོ་ལོས་ཤེས་མོད།།

ཕྱི་ལྕགས་རི་བརྒྱུད་དེ་འཆར་དགོས།།

ཕྱི་ལྕགས་རི་ཁ་ཐག་རིང་སོང་བས།།

ཕྱི་ལྕགས་རི་བརྒྱུད་དེ་འཆར་དུས།།

འཇའ་ཁ་དོག་ཡག་དུས་ཨེ་ཡིན།།

 

ས་དོག་མོ་པད་མ་འདབ་བརྒྱད་རེད།།

བྱ་ཁུ་བྱུག་སྔོན་མོ་ངེད་གཉི་གས།།

ནགས་རྒྱ་རྫོང་མཐུག་ནོ་ལོས་ཤེས་མོད།།

ས་མོན་ཡུལ་བརྒྱུད་དེ་ཡོང་དགོས།།

ས་མོན་ཡུལ་ཁ་ཐག་རིང་སོང་བས།།

ས་མོན་ཡུལ་བརྒྱུད་དེ་ཐོན་དུས།།

ཤིང་ར་ལག་རྒྱས་དུས་ཨེ་ཡིན།།

 

རོགས་ཆུང་ལོ་ཁ་ཚིག་ཅན་པོ།།

སྡེ་ཡི་རོགས་དང་ངེད་གཉིས་གས།།

ཁྱོད་ཞེ་རྩིས་ཆེ་ནོ་ལོས་ཤེས་མོད།།

ས་སྡེ་ཆེན་བརྒྱུད་དེ་ཡོང་དགོས།།

ས་སྡེ་ཆེན་ཁ་ཐག་རིང་སོང་བས།།

ས་སྡེ་ཆེན་བརྒྱུད་དེ་ཐོན་དུས།།

རོགས་སྣང་བ་མཐུན་དུས་ཨེ་ཡིན།།

 

༥༦གསེར་ཉི་མ་དགུང་ལ་ཤར་དུས།།

གླིང་བཞི་བོའི་མུན་པ་སེལ་འདོད་ཡིན།།

སྤྲིན་ནག་པོའི་རིམ་པ་མཐུག་པས།།

དུས་ད་ཐེངས་ཤར་སྟབས་མི་འགྲིག་གི།

ས་དོག་མོ་ཁངས་ཀྱིས་མ་བཀབ་ན།།

དུས་གཞུག་ཐེངས་ཤར་ན་ལོས་ཆོག།

 

རྟ་འདོ་བར་གསེར་སྒ་སྟོད་དུས།།

ཁིས་གོང་མའི་དར་དཀར་ཐོབ་འདོད་ཡིན།།

རྡོ་ཕ་བོང་ལམ་དགྲ་མང་བས།།

དུས་ད་ཐེངས་ལེན་སྟབས་མི་འགྲིག་གི།

དར་དཀར་བོ་རླུང་གིས་མ་ཁུར་ན།།

དུས་གཞུག་ཐེངས་བླང་ན་ལོས་ཆོག།

 

ང་དགའ་ལོ་སྡེ་ན་ཡོང་དུས།།

སྡེ་ཆེན་པོ་མི་ཁ་རྒོད་པས།།

དུས་ད་ཐེངས་རྩེ་སྟབས་མི་འགྲིག་གི།

སེམས་གངས་དཀར་གཞན་ལ་མ་འཁོར་ན།།

དུས་གཞུག་ཐེངས་རྩེ་ན་ལོས་ཆོག།

 

༥༧བྲག་དཀར་བོར་ཐེམ་པ་བརྒྱ་ཡོད་རུང་།།

རྒོད་ཐང་དཀར་འབབ་ས་གཅིག་ཡིན།།

 

ས་བྱང་ལམ་རྒྱུག་ས་བརྒྱ་ཡོད་རུང་།།

རྟ་འདོ་བའི་རྒྱུག་ལམ་གཅིག་ཡིན།།

 

ཁ་གཏམ་ཚིག་བཤད་ས་བརྒྱ་ཡོད་རུང་།།

ཚིག་ཞེ་གཏམ་བཤད་ས་གཅིག་ཡིན།།

 

༥༨འབྲོང་བྲེ་སེར་སྐྱེ་བ་མི་ལེན།།

འབྲོང་བྲེ་སེར་སྐྱེ་བ་བླངས་ན།།

འབྲོང་འཁྱགས་ཀྱིས་ཁོགས་ནི་དཔེ་མེད།།

 

ཉ་གསེར་མིག་སྐྱེ་བ་མི་ལེན།།

ཉ་གསེར་མིག་སྐྱེ་བ་བླངས་ན།།

ཉ་དར་ལ་འབྱར་ནི་དཔེ་མེད།།

 

ང་རོགས་མང་ཁྱུ་ལ་མི་རྩེ།།

ང་རོགས་མང་ཁྱུ་ལ་རྩེས་ན།།

ངའི་ཚིག་གཏིང་ལོན་ནི་དཔེ་མེད།།

 

༥༩གཞུ་ཤ་རྭ་དཀར་བོའི་དོ་ལ།།

འབྲོང་རྭ་སྨུག་པོའི་འཆང་ཞོག་དང་།།

གཞུ་སེང་རྒྱུན་ཕྲ་མོའི་ཁ་སྟོད་དང་།།

གཞུ་འགུགས་གི་རྩ་བ་དེ་ཡིན།།

 

མདའ་ཉག་ཕྲན་སྨུག་གི་རྩེ་ལ།།

བྱ་ཐང་དཀར་རྒོད་ཀྱི་སྒྲོ་སྟོད་དང་།།

སྨད་རྒྱ་ནག་མཚལ་གྱི་ཐིག་རྒྱོབ་དང་།།

མདའ་དྲང་གི་རྩ་བ་དེ་ཡིན།།

 

ཆུང་དུས་རྩེ་རོགས་ཡིད་ལ།།

ཁ་ནས་ཕྲ་མོའི་ངག་ཁུགས་དང་།།

ཡིད་ཀྱིས་དོན་གཏམ་ཚིག་ཤོད་དང་།།

ཞེ་མཐུན་པའི་རྩ་བ་དེ་ཡིན།།

 

༦༠ཆུ་དྭངས་མོ་ཆུ་དཀར་ཐང་ན་སྣང་།།

བཅུ་མི་ཉན་ཆུ་འབུ་གཏིང་ན་སྣང་།།

ཁྱོས་གསོམ་དཀར་ཐོམ་བུ་ང་གཡོར་དང་།།

ཆུ་དྭངས་མོ་མགོ་ནས་མ་སྙོགས་ན།།

ངས་གཏིང་ནས་བསྐྱུར་ལ་ཁ་ནས་བཅུ།།

 

ཤིང་དྲང་མོ་ཙན་དན་ནགས་ན་སྣང་།།

གཅོད་མི་ཉན་ཀླུ་བཙན་རྩ་ན་སྣང་།།

ཁྱོས་རྣོ་ཆེན་སྟ་རེ་ང་གཡོར་དང་།།

ཤིང་ཡལ་གའི་རྩེ་མོ་མ་ལྡེམ་ན།།

ངས་རྩ་ནས་བསྐྱུར་ལ་རྩེ་ནས་གཅོད།།

 

རོགས་མཐུན་གྲོང་ཆུང་སྡེ་ན་སྣང་།།

རྩེ་མི་ཉན་བཟའ་ཚང་གཡས་ན་སྣང་།།

ཁྱོས་ནང་གཏམ་ཚིག་གསུམ་ང་ཤོད་དང་།།

རོགས་འུ་གཉིས་ཁ་སེམས་མཐུན་སོང་ན།།

ངས་ཡུལ་ནས་བསྐྱུར་ལ་རི་ནས་རྩེ།།

 

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།