གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལ་གཞས་མཐུན་པ་དྲུག་སྐོར་ལས། འགྲོག་པའི་སྐོར།༣

2009-01-24 13:48:00 བོད་མི་དམངས། ཀློག་གྲངས། མཆན ཡོད།

༣༡ཡར་གྱི་ཡུལ་ལ་ཡར་ལྟོས་དང་།།

ཡར་ཀན་ན་རྫ་ཆེན་རྫ་བདུན་སྣང་།།

དེའི་མཇུག་ན་འབྲི་མོ་ཆ་བདུན་སྣང་།།

བཞོ་ཤེས་ན་ནུ་ལག་གང་བདེ་རེད།།

 

ཕར་ནང་ཕར་ལ་ཕར་ལྟོས་དང་།།

ཕར་ཀན་ན་ཐང་ཆེན་ཐང་བདུན་སྣང་།།

དེའི་མཇུག་ན་འདོ་བ་ཆ་བདུན་སྣང་།།

རྒྱུག་ཤེས་ན་གོམ་ལག་གང་བདེ་རེད།།

 

མར་ནང་མར་ལ་མར་ལྟོས་དང་།།

མར་ཀན་ན་ཚོ་ཆེན་ཚོ་བདུན་སྣང་།།

དེའི་མཇུག་ན་རོགས་ལོ་ཆ་བདུན་སྣང་།།

རྩེ་ཤེས་ན་སྣང་བ་གང་མཐུན་རེད།།

 

༣༢འདི་བྱང་གི་རྟ་བརྒྱ་གཤར་ནས་ཐལ།།

འདི་གོམ་ཆེན་འདོ་བ་ལུས་སོང་ཟིག།

འདི་ལུས་ནི་མ་རེད་བསྡད་ནི་རེད།།

ཁ་དཀར་རྐྱང་ལ་སྒུག་ནི་རེད།།

 

འདི་དགུང་གི་སྐར་བརྒྱ་གཤར་ནས་ཐལ།།

འདི་སྐར་ཆེན་ཁྲ་མོ་ལུས་སོང་ཟིག།

འདི་ལུས་ནི་མ་རེད་བསྡད་ནི་རེད།།

འཛམ་གླིང་ཉི་མར་སྒུག་ནི་རེད།།

འདི་གྲོང་གི་རོགས་བརྒྱ་གཤར་ནས་ཐལ།།

འདི་ཕ་བཟང་དགའ་ལོ་ལུས་སོང་ཟིག།

འདི་ལུས་ནི་མ་རེད་བསྡད་ནི་རེད།།

ཆུང་འདྲིས་རོགས་ལ་སྒུག་ནི་རེད།།

 

༣༣ཐང་དཀར་བྱ་དང་ངེད་གཉིས་ཀ།

སྟོད་ཀྱི་ཕྱོགས་ནས་ཡོང་ནི་ཡིན།།

བྲག་དཀར་བོ་བསམ་ནས་ཡོང་ནི་རེད།།

ཁྱོད་བྲག་དཀར་བྱ་བརྒྱས་བསྐོར་ཡོད་ན།།

ང་ཡ་གའི་རི་བོའི་རྩེ་ལ་འབབ།།

 

འདོ་བ་རྟ་དང་ངེད་གཉིས་ཀ།

སྟོད་ཀྱི་ཕྱོགས་ནས་ཡོང་ནི་ཡིན།།

ས་བྱང་ལམ་བསམ་ནས་ཡོང་ནི་རེད།།

ཁྱོད་བྱང་ལམ་རྟ་བརྒྱས་བསྐོར་ཡོད་ན།།

ང་ཕ་གའི་བྱང་ལམ་ཐད་ལ་བསྐྱོད།།

 

དགའ་ལོ་སྤུན་དང་ངེད་གཉིས་ཀ།

སྟོད་ཀྱི་ཕྱོགས་ནས་ཡོང་ནི་ཡིན།།

རོགས་མ་ལོ་བསམ་ནས་ཡོང་ནི་རེད།།

ཁྱོད་མ་ལོ་རོགས་བརྒྱས་བསྐོར་ཡོད་ན།།

ང་མ་གའི་སྡེ་བརྒྱད་གྲོང་ལ་རྩེ།།

 

༣༤རི་ཆུང་ཆུང་བུམ་པ་འདྲ་བོ།།

རྒོད་ཐང་དཀར་བབ་ན་ཨེ་ཆོག།

 

ཐང་ཆུང་ཆུང་གཡུ་གཞོང་འདྲ་བོ།།

རྟ་འདོ་བ་འཚོས་ན་ཨེ་ཆོག།

 

རོགས་ཆུང་ཆུང་མེ་ཏོག་འདྲ་བོ།།

ཕོ་ངེད་ཚོ་རྩེ་ན་ཨེ་ཆོག།

 

༣༥དགུང་ཉི་མ་གསེར་གྱི་རྣ་རྒྱན་ཅན།།

གསེར་སེར་བོའི་རྣ་རྒྱན་ཡག་ནི་གིས།།

གླིང་འདི་ནས་ཅུང་ཞིག་ཤར་ན་འདོད།།

 

རྟ་འདོ་བ་གསེར་གྱི་གདོང་སྲབ་ཅན།།

དངུལ་དཀར་བོའི་གདོང་སྲབ་ཡག་ནི་གིས།།

བྱང་འདི་ནས་ཅུང་ཞིག་རྒྱུག་ན་འདོད།།

 

རོགས་ཆུང་ལོ་ཚིག་གི་སྡེབ་སྦྱོར་ཅན།།

ཚིག་ལ་ལའི་སྡེབ་སྦྱོར་ཡག་ནི་གིས།།

གྲོང་འདི་ནས་ཅུང་ཞིག་རྩེ་ན་འདོད།།

 

༣༦ཐང་དཀར་བྱ་དང་འུ་གཉིས་ཀ།

བྲག་དཀར་བོའི་རི་ཡི་གཡས་གཡོན་རེད།།

བྱ་འབབ་རྒྱུའི་བསམ་པ་ཁྱོད་ཡོད་ན།། ད

གུང་སྟོད་རྒྱུའི་སྟབས་ཀ་འགྲིག་ཡོད།།

 

གོམ་ཆེན་རྟ་དང་འུ་གཉིས་ཀ།

ས་བྱང་ལམ་ཐང་གི་གཡས་གཡོན་རེད།།

རྟ་རྒྱུག་རྒྱུའི་བསམ་པ་ཁྱོད་ཡོད་ན།།

རྟ་རྒྱུག་རྒྱུའི་སྟབས་ཀ་འགྲིག་ཡོད།།

 

རྩེ་རོགས་སྤུན་དང་ངེད་གཉིས་ཀ།

བོད་ཚོ་ཆེན་སྡེ་ཡི་གཡས་གཡོན་རེད།།

རོགས་རྩེ་རྒྱུའི་བསམ་པ་ཁྱོད་ཡོད་ན།།

རོགས་རྩེ་རྒྱུའི་སྟབས་ཀ་འགྲིག་ཡོད།།

 

༣༧རྒོད་ཐང་དཀར་སྐྱེ་བ་བླངས་བླངས་ལ།།

དགུང་སྔོན་པོ་བརྒྱུད་དེ་སྟོད་ལ་འགྲོ།།

ཡང་ཡང་བྱ་རུ་ཨེ་སྐྱེ་གི།།

ཡང་ཡང་བྱ་རུ་སྐྱེས་བཏང་རུང་།།

བྲག་དཀར་བོའི་དཀྱིལ་ནས་ཨེ་ཐུག་གམ།།

 

རྟ་འདོ་བའི་སྐྱེ་བ་བླངས་བླངས་ལ།།

ས་བྱང་ལམ་བརྒྱུད་དེ་རྒྱུག་ག་འགྲོ།།

ཡང་ཡང་འདོ་བར་ཨེ་སྐྱེ་གི།།

ཡང་ཡང་འདོ་བར་སྐྱེས་བཏང་རུང་།།

ས་བྱང་ལམ་དཀྱིལ་ནས་ཨེ་ཐུག་གམ།།

 

རོགས་ངེད་ཚོའི་སྐྱེ་བ་བླངས་བླངས་ལ།།

ས་གྲོང་ཆུང་བརྒྱུད་དེ་རྩེ་ཡ་འགྲོ།།

ཡང་ཡང་མི་རུ་ཨེ་སྐྱེ་གི།

ཡང་ཡང་མི་རུ་སྐྱེས་བཏང་རུང་།།

ས་གྲོང་ཆུང་དཀྱིལ་ནས་ཨེ་ཐུག་གམ།།

 

༣༧རི་ཆུང་ཆུང་བུམ་པ་འདྲ་བོ།།

བྱ་ཁྱོད་ཚོས་ཆུང་གི་མ་བསམ།།

བྱ་ཁྱོད་ཚོའི་འབབ་རི་ཉན་ན།།

 

ཐང་ཆུང་ཆུང་མེ་ལོང་འདྲ་བོ།།

རྟ་ཁྱོད་ཚོས་ཆུང་གི་མ་བསམ།།

རྟ་ཁྱོད་ཚོ་རྒྱུག་ས་ཉན་ན།།

 

རོགས་ཆུང་ཆུང་མེ་ཏོག་འདྲ་བོ།།

རོགས་ཁྱོད་ཚོས་ཆུང་གི་མ་བསམ།།

རོགས་ཁྱོད་ཚོའི་རྩེ་རོགས་ཉན་ན།།

 

༣༨ཆུ་མགོ་དབུས་གཙང་ཡུལ་ཡིན།།

ཆུ་རྔ་བྱ་ཁྱུང་བྲག་ཡིན།།

ཆུ་བཅུ་འདོད་སེམས་ན་ཡོད་ན།།

ཆུ་བཅུ་བའི་སྟབས་ཀ་འགྲིག་ཡོད།།

 

རྟ་འདོ་བ་བྱང་ལམ་གཡས་རེད།།

སྒ་སྲབ་རྒྱ་ནག་མཁར་རེད།།

རྟ་རྒྱུག་འདོད་སེམས་ན་ཡོད་ན།།

རྟ་རྒྱུག་གི་སྟབས་ཀ་འགྲིག་ཡོད།།

 

ང་དགའ་ལོ་སྡེ་ལུང་གཡས་རེད།།

རོགས་ཁྱོད་ཚོ་སྡེ་ལུང་གཡོན་རེད།།

རོགས་རྩེ་འདོད་སེམས་ན་ཡོད་ན།།

རོགས་རྩེ་བའི་སྟབས་ཀ་འགྲིག་ཡོད།།

 

༣༩རྟ་དཀར་བོ་དུང་དཀར་འདྲ་བོ།།

ཁ་དུང་སྲབ་ཞོག་དང་བློ་རྟ་བྱེད།།

 

གོས་གསེར་མ་འབྲུག་ཆུང་རི་མོ་ཅན།།

གོས་འདབས་ཀ་ཞོག་དང་འཕྱོར་གོས་བྱེད།།

རོགས་མ་ལོ་མེ་ཏོག་འདྲ་བོ།།

ཁ་ཚིག་གསུམ་ཤོད་དང་རྩེ་རོགས་བྱེད།།

 

༤༠བྱ་གཤོག་ཆེན་སྙིང་ལ་རྗེ་བོ།།

དགུང་ཨ་སྔོན་བརྒྱུད་དེ་འཕུར་དུས།།

བྲག་དཀར་བོ་མིག་ལ་ཤར་གི།

འབབ་མ་ཐུབ་ཡིད་རེ་སྨྲེང་གི།

 

རྟ་འདོ་བ་སྙིང་ལ་རྗེ་བོ།།

ས་བྱང་ལམ་བརྒྱུད་དེ་འགྲོ་དུས།།

རྩྭ་བྱི་རུག་མི་ལ་ཤར་གི།

ཟ་མ་ཐུབ་ཡིད་རེ་སྨྲེང་གི།

 

རོགས་ཆུང་ལོ་སྙིང་ལ་རྗེ་བོ།།

བོད་ཚོ་ཆེན་བརྒྱུད་དེ་འགྲོ་དུས།།

རོགས་ཆུང་ལོ་མིག་ལ་ཤར་གི།

རྩེ་མ་ཐུབ་ཡིད་རེ་སྨྲེང་གི།

 

༤༡བྱ་ཁུ་བྱུག་ཕྱོགས་ཡོང་མགྲོན་པོ་རེད།།

བྱ་ནེ་ཙོ་ནགས་ཀྱི་གཞི་འཛིན་རེད།།

ནགས་ཙན་དན་གཡུ་ལོ་རྒྱས་དུས་སུ།།

བྱ་འུ་གཉིས་ཡོང་ས་མི་གཅིག་རུང་།།

སྐད་གསུང་སྙན་ནགས་ནས་མཉམ་གྲག་བྱེད།།

 

མཛོ་ཁྱུང་དཀར་ཕྱོགས་ཡོང་མགྲོན་པོ་རེད།།

འབྲི་ཐུལ་མ་རྫ་རིའི་གཞི་འཛིན་རེད།།

ཟླ་དྲུག་པའི་རྩི་ཏོག་རྒྱས་དུས་སུ།།

མཛོ་འུ་གཉིས་ཡོང་ས་མི་གཅིག་རུང་།།

རྫ་གཅིག་ནས་རྩི་མགོ་མཉམ་ཟ་བྱེད།།

 

རོགས་ངེད་ཚོ་ཕྱོགས་ཡོང་མགྲོན་པོ་རེད།།

མ་ཁྱོད་ཚོ་སྡེ་ཆེན་གཞི་འཛིན་རེད།།

བོད་ཚོ་ཆེན་རོགས་བརྒྱ་འདུས་དུས་སུ།

།རོགས་འུ་གཉིས་ཡོང་ས་མི་གཅིག་རུང་།།

སྡེ་གཅིག་ནས་ཚིག་གསུམ་བཤད་ལ་རྩེ།།

 

༤༢སྟོད་ལྷ་ཁང་གསེར་ཁང་ནང་ན།།

གསེར་སྒོ་རེ་ལ་ཤེལ་སྒོ་རེ།།

ཕྱི་ཡིག་ཆུང་སྔགས་ཀྱི་ལཉྫ་རེད།།

མགོས་ཕྱག་གསུམ་འཚལ་ཏེ་མཇལ་སྙམ་ཡོད།།

 

སྨད་རྒྱ་ནག་ཚོང་སྡེ་བར་མ་ནས།།

གོས་གསེར་མ་རེ་ལ་འབྲུག་མ་རེ།།

ཕྱི་འབྲུག་ཆུང་རི་མོ་རང་བབས་རེད།།

གསེར་སེར་བོ་བྱིན་ནས་ཉོ་སྙམ་ཡོད།།

 

ཤེལ་དཀར་གྲོང་ཆུང་བར་མ་ན།།

རོགས་ཆ་ཡོད་རེ་ལ་ཆ་མེད་རེ།།

ཁྱོད་ཆ་ཡོད་རོགས་ཀྱིས་རྩེ་འགོ་ཁྲིད།།

ཞེ་མཐུན་པའི་ཚིག་གསུམ་བཤད་སྙམ་ཡོད།།

 

༤༣བྱ་ཁུ་བྱུག་ཕྱོགས་ཡོང་མགྲོན་པོ་རེད།།

བྱེའུ་འཇོལ་མོ་ནགས་ཀྱི་གཞི་འཛིན་རེད།།

ནགས་ཡར་ནང་སྐྱིད་ལ་མར་ནང་སྐྱིད།།

ཤིང་དྲང་མོ་ཞི་ལ་འབབ་རྒྱུ་ཡིན།།

ནགས་སྐྱིད་ས་ཞིག་ནས་གྲག་རྒྱུ་ཡིན།།

 

རྟ་འདོ་བ་ཕྱོགས་ཡོང་མགྲོན་པོ་རེད།།

རྩྭ་བྱི་རུག་བྱང་གི་གཞི་འཛིན་རེད།།

བྱང་ཡར་ནང་བདེ་ལ་མར་ནང་བདེ།།

བྱང་བདེ་མོ་ཞིག་ནས་བརྒྱུག་རྒྱུ་ཡིན།།

རྩྭ་མོད་ས་ཞིག་ནས་འདུག་རྒྱུ་ཡིན།།

 

ང་དགའ་ལོ་ཕྱོགས་ཡོང་མགྲོན་པོ་རེད།།

ཁྱོད་མ་ལོ་སྡེ་ཡི་གཞི་འཛིན་རེད།།

སྡེ་ཡར་ནང་སྐྱིད་ལ་མར་ནང་སྐྱིད།།

རོགས་ཞེ་མཐུན་ཞིག་ལ་རྩེ་རྒྱུ་ཡིན།།

ས་སྐྱིད་ས་ཞིག་ནས་འདུག་རྒྱུ་ཡིན།།

 

༤༤དགུང་ཨ་སྔོན་ལྕགས་ཟྭ་གྲུ་བཞི་རེད།།

འབྲུག་ཕོ་ཆུང་ལྕགས་ལོང་སྒྲིམ་མ་རེད།།

ཁྱོས་ལྕགས་ཟྭ་གྲུ་བཞི་འབྱེད་རྒྱུ་ན།།

ལྕགས་ལོང་སྒྲིམ་མ་འགྲོལ་རྒྱུ་ན།།

ལྡེ་མིག་དཀར་བོ་སྤྲིན་ལ་སྐུར།།

ལྕགས་ཟྭ་གྲུ་བཞི་འབྱེད་ལ་བཏང་།།

ལྕགས་ལོང་སྒྲིམ་མ་འགྲོལ་ལ་བཏང་།།

ཡིད་སྨོན་པའི་ཆར་རེ་འབབ་བ་བཏང་།།

 

ཕར་བྱང་ལམ་ལྕགས་ཟྭ་གྲུ་བཞི་རེད།།

འདོ་བ་ལྕགས་ལོང་སྒྲིམ་མ་རེད།།

ཁྱོས་ལྕགས་ལོང་སྒྲིམ་མ་འགྲོལ་རྒྱུ་ན།།

ལྡེ་མིག་ཕྲ་མོ་ལྕག་ལ་སྐུར།།

ལྕགས་ཟྭ་གྲུ་བཞི་འབྱེད་ལ་བཏང་།།

ལྕགས་ལོང་སྒྲིམ་མ་འགྲོལ་བ་བཏང་།།

ཡིད་སྨོན་པའི་རྟ་རེ་བརྒྱུག་ག་བཏང་།།

 

བོད་ཚོ་ཆེན་ལྕགས་ཟྭ་གྲུ་བཞི་རེད།།

རོགས་ཆུང་ལོ་ལྕགས་ལོང་སྒྲིམ་མ་རེད།།

ཁྱོས་ལྕགས་ཟྭ་གྲུ་བཞི་འབྱེད་རྒྱུ་ན།།

ལྕགས་ལོང་སྒྲིམ་མ་འགྲོལ་རྒྱུ་ན།།

ལྡེ་མིག་སྙན་མོ་ངག་ལ་སྐུར།།

ལྕགས་ཟྭ་གྲུ་བཞི་འབྱེད་ལ་བཏང་།།

ལྕགས་ལོང་སྒྲིམ་མ་འགྲོལ་ལ་བཏང་།།

ཁ་བགད་ནས་ཚིག་གསུམ་བཤད་ལ་རྩེ།།

 

༤༥གསེར་སེར་བོས་བརྡུངས་པའི་ཨ་བཞིའི་མཁར།།

དུང་དཀར་བོ་བརྡུངས་པའི་གྲུ་བཞིའི་མཁར།།

ཨ་བཞི་གྲུ་བཞིའི་མཁར་ནང་ན།།

མཇལ་མ་མྱོང་སངས་རྒྱས་སྟོང་སྐུ་སྣང་།།

མཇལ་ཐུབ་ན་ད་ཐེངས་མཇལ་ལ་འགྲོ།།

མཇལ་མ་ཐུབ་ཕྱག་གསུམ་འཚལ་ལ་འགྲོ།།

 

ལྕགས་སྔོན་མོས་བརྡུངས་པའི་ཨ་བཞིའི་མཁར།།

དངུལ་དཀར་བོས་བརྡུངས་པའི་ཡང་བཞིའི་མཁར།།

ཨ་བཞི་ཡང་བཞིའི་མཁར་ནང་ན།།

གོན་མ་མྱོང་གོས་ཆེན་གསེར་མ་སྣང་།།

གོན་ཐུབ་ན་ད་ཐེངས་གོན་ན་འགྲོ།།

གོན་མ་ཐུབ་གོང་བཤེར་རྒྱག་ག་འགྲོ།།

 

གཡུ་བྱི་རུས་བརྡུངས་པའི་ཨ་བཞིའི་མཁར།།

ཚོན་དམར་བོས་བརྡུངས་པའི་ཡང་བཞིའི་མཁར།།

ཨ་བཞི་ཡང་བཞིའི་མཁར་ནང་ན།།

རྩེ་མ་མྱོང་ཆུང་འདྲིས་རོགས་ལོ་སྣང་།།

རྩེ་ཐུབ་ན་ད་ཐེངས་རྩེ་ཡ་འགྲོ།།

རྩེ་མ་ཐུབ་ཚིག་གསུམ་བཤད་ལ་འགྲོ།།

 

 

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།