༅༅།།གཉུག་མ་མཐའ་བྲལ་གྱི་གནས་ལུགས་ཆེན་པོ།།ཇི་བཞིན་རྗེན་པ་རུ་སྟོན་པའི་བླ་མ།།འབྲལ་མེད་སྙིང་དབུས་ཀྱི་ཐིག་ལེར་བཞུགས་ནས།།འོད་གསལ་ཡེ་ཤེས་ཀྱི་སྣང་བ་སྩོལ་ཤོག།ཟབ་མོ་གསང་ཆེན་གྱི་ཐེག་པའི་དགོངས་བཅུད།།བློ་བྲལ་རིག་སྟོང་གི་ཡེ་ཤེས་ཆེན་པོ།།རྩོལ་མེད་རང་བཞག་ཏུ་ལྟ་བའི་མན་ངག།ཤིན་ཏུ་རྣམ་འབྱོར་གྱི་ཁྱད་ཆོས་ཁོ་ན།།སྤྲོས་པའི་གྲྭ་ཟུར་དང་མཛའ་བ་མིན་པའི།།སྟོང་ཆེན་བརྗོད་བྲལ་གྱི་ཀུན་ཟླུམ་ཐིག་ལེ།།རང་གནས་ཡེ་ཤེས་ཀྱི་སྙིང་པོར་བཅས་པ།།ཟུང་འཇུག་འོད་གསལ་དེ་ངོ་མཚར་ཆེའོ།།མཚན་འཛིན་གཉིས་སྣང་གི་དྲ་བ་སྟུག་པོ།། བློ་འདས་ཡེ་ཤེས་ཀྱི་རལ་གྲིས་བཅད་པས།།ཞེན་འཛིན་དམིགས་གཏད་ཁོ་སྐྱེ་སྙམ་མི་འདུག།ནམ་མཁའ་རྡུལ་བྲལ་གྱི་ཀློང་ལྟར་འདུག་གོ།སྣ་ཚོགས་རྣམ་རྟོག་གི་ན་བུན་ལང་ལོང་།།སྲོང་བསྒྱུར་སྦྱོང་བྱེད་གྱི་རྩོལ་བ་མེད་ཀྱང་།།རྒྱ་ཡན་ཅོག་བཞག་ལ་ཅི་བདེར་བསྒྱུར་བས།།ཀློང་ཆེན་ཡེ་གྲོལ་གྱི་གཤིས་སུ་དེངས་སོང་།།མི་དགེའི་རྣམ་རྟོག་ལ་སྤང་རྒྱུ་ཅི་ཡོད།།ཤར་ཚད་ཡེ་ཤེས་ཀྱི་རོལ་མོར་འདུག་པ།།དགེ་བའི་རྣམ་རྟོག་ལ་བསྒྲུབ་རྒྱུ་ཅི་ཡོད།།བློས་བྱས་ཡིད་དཔྱོད་ཀྱི་འཆིང་བར་འདུག་པ།།སྡུག་བསྔལ་ངན་པ་ལ་དོགས་རྒྱུ་ཅི་ཡོད།།སྡུག་བསྔལ་རིག་སྟོང་གི་རང་རྩལ་ཡིན་པ།།དགའ་བདེའི་ཚོར་བ་ལ་རེ་རྒྱུ་ཅི་ཡོད།།དགའ་བདེ་ཐ་མལ་གྱི་སྣང་ཚུལ་ལགས་པ།།འཇུར་དྲན་ཨ་འཐས་ཀྱིས་བཅིངས་བ་མ་ཡིན།།འཁྲུལ་བ་རྒྱ་འབྱམས་སུ་ལྷོད་པ་མ་ཡིན།།རང་འགྲོས་བཅོས་སླད་དང་བྲལ་བའི་དགོངས་ཀློང་།།མཉམ་རྫོགས་ཟང་ཐལ་གྱི་ཉམས་མྱོང་ངོ་མཚར།།ཚོགས་དྲུག་ཡུལ་སྣང་གི་སྒྱུ་མའི་གྲོང་ན།།ཀུན་བྱེད་གླང་བོ་ཁོ་ཅི་བདེར་ཡན་ཚེ།།རང་གྲོལ་རྗེན་མེད་ཀྱི་ལྟད་མོ་ཆེ་བས།།སྤང་གཉེན་འདོར་ལེན་གྱི་ངལ་དུབ་མི་དགོས།།དེ་སླད་རྡོ་རྗེ་ཡི་མཆེད་པོ་ཁྱོད་ཀྱང་།།སྟོང་སྒོམ་མུན་ཅན་གྱི་བསླུ་བྲིད་བོར་ལ།།ཡོད་མེད་ཡིན་མིན་གྱི་མཚན་མ་ཞི་བའི།།གདོད་མའི་ནང་དབྱིངས་དེར་མྱུར་དུ་ཕེབས་སོང་།།
འཇིགས་མེད་པས་སོ།།