———རང་གི་བུ་བསྟན་འཛིན་རང་གྲོལ་ལ་ཕུལ་བ།

དམར་འབྱར་བྱིས་པའི་རོ་ཀོག་ཆུང་ཆུང༌།།

ཨ་ཕའི་ལག་ལ་ཐོག་མར་བཞག་དུས།།

གདོང་དང་ལུས་པོའི་གཉེར་མའི་གསེང་ན།།

བ་སྤུའི་མགོ་བོ་གཟེངས་སེ་འདུག་པ།།

དམར་འབྱར་བྱིས་པའི་ལུས་པོ་འདི་ཉིད།།

ལོ་ལོན་ཞིག་ལ་གཡར་བ་མིན་ནམ།།

བརྩེ་བའི་རྩ་བ་སྙིང་ལ་མ་ཟུག།

རེ་བའི་འདུན་པ་ཁོག་ལ་མ་སྐྱེ།།

ཟླ་གཅིག་ཟླ་གཉིས་རིམ་གྱིས་སོན་ཐལ།།

གཅིན་དང་སྐྱག་པ་རུམ་ལ་བཏང་ཐལ།།

ཚུར་ལ་སྡུག་གི་ཆད་པ་བཅད་ཀྱང༌།།

ཕར་ལ་དུངས་པའི་ས་བོན་འཐོར་སོང༌།།

སྐབས་འགར་འཛུམ་ཙམ་འཛུམ་ཙམ་བྱེད་དུས།།

ལྷག་ཏུ་དུངས་པ་ཆེ་རུ་སྐྱེད་ཡོང༌།།

ཉིན་དང་ཟླ་བ་རེ་རེ་འདས་དུས།།

འཛུམ་དང་དགོད་སྒྲ་སྙིང་དུ་སྡུག་པ།།

སེའུ་བཅུ་ཡི་མགོ་བོ་འབུས་བྱུང༌།།

ཤ་དང་ཤེད་ཀྱི་རྩ་བ་རྒྱས་བྱུང༌།།

མི་ཡི་གཟུགས་ཀྱི་གཞོན་ཤ་དར་བས།།

ཨ་ཕའི་མིག་ལ་ལྷག་ཏུ་མཛེས་སོང༌།།

ལྡབ་ལྡིབ་ངག་འདི་རྣ་ལ་སྙན་པ།།

གཅིན་སྐྱག་པང་དྲི་སྣ་ལ་ཞིམ་པ།།

ཅི་འདོད་ལུས་ཀྱི་འགུལ་སྟངས་འདི་ཡང༌།།

ཨ་ཕའི་མིག་ལ་ལྷག་ཏུ་མཛེས་པ།།

ཨ་ཕའི་ལོ་ལོའི་སེམས་ཁམས་འདི་ལ།།

ད་དུང་སླད་མེད་རང་གཤིས་གྲུབ་ཡོད།།

ཨ་ཕའི་རེ་བ་དེ་ལ་བཅོལ་ཡོད།།

ཨ་ཕའི་ཕུགས་བསམ་དེ་ལ་གཏད་ཡོད།།

ཨ་ཕའི་རང་གཤིས་ཁྱོད་ལ་ལྡན་ན།།

ཨ་ཕའི་རེ་བ་དེ་ཀས་འགྲུབ་པ།།

རྒྱ་མིན་བོད་མིན་རང་གཤིས་ཚ་བོ།།

ཨ་ཕའི་བུ་ཡིས་རྒྱན་དུ་མ་འཛིན།།

ལོ་གསུམ་ལོ་བཞི་ལོན་པའི་རྗེས་ལ།།

རྒྱ་སྐད་བོད་སྐད་འདྲེས་མ་བཤད་ནས།།

སྟོད་ཐུང་ཆ་རིག་མ་རིག་གྱོན་ནས།།

ཨ་ཕའི་སེམས་ཁ་དཀྲུགས་པ་མ་གནང༌།།

བོད་ཡིག་ཟེར་དུས་མགོ་བོ་ན་བའི།།

ས་འདིའི་བོད་པའི་བུ་གུ་རྣམས་ལྟར།།

ཕ་རྒྱུད་དམ་པའི་རང་གཤིས་བོར་ན།།

ཨ་ཕ་དེ་ལས་སྐྱོ་བ་མི་འདུག།

བོད་ཡིག་ཁྱ་མ་ཁྱོག་ཅིག་བྲིས་ནས།།

བོད་སྐད་འདའ་མ་འདར་ཞིག་བཤད་ནས།།

ད་དུང་བོད་པའི་རིག་གཞུང་གླེང་དུས།།

ཨ་ཕ་ཁོ་ནག་གཏིང་ནས་ཆད་འགྲོ།།

ཨ་མའི་བུ་ལ་ཡོན་ཏན་ཡོད་ན།།

དགའ་ལྡན་གསེར་ཁྲི་སྟོང་བ་ཡིན་པའི།།

བསླབ་བྱ་མ་བརྗེད་ཡིད་ལ་ཟུངས་ཞེས།།

ཨ་ཕས་ཡང་ཡང་ཁྱོད་ལ་སྐྱོན་ནོ།།