ཕར་ལ་བཏེགས་པའི་སེམས་པ་དེ །།
རླུང་དང་སེར་བུས་བཅོམ་ནས་ཐལ །།
ལག་པས་སྐྱོར་བའི་སེམས་པ་འདི །།
ག་པར་འཇོག་དགོས་འཕྱང་མོ་ཉུག །
རླུང་བུའི་ངོ་གདོང་བཙན་པོ་འདིས །།
ཤ་རུས་སྒྲོམ་བུ་གཏོར་ནས་ཐལ །།
སློག་པ་མཐུག་པོའི་ཡོལ་བ་ལ ། །
སེམས་པ་བརླན་ནས་གང་དུ་འགྲོ །
དུས་རླུང་བསེར་བུ་ལྡང་ཙ་ན །།
རྒོད་པོའི་གཤོག་པ་བཏེགས་ནས་ཐལ །།
ནམ་མཁའ་སྔོན་པོའི་ལྡང་ཁང་དུ །།
ཚེ་སྲོག་དམར་བོ་འབེན་དུ་བཙུགས །།
ཁེར་རྐྱང་བུ་ཡི་མཐའ་འཁོར་ན །།
སྦྲང་མའི་ཚོགས་ཀྱིས་བསྐོར་ཞིང་འཁོར །།
ལྷིང་འཇགས་དཀྲོགས་པའི་སུན་སྣང་ཞིག །
སེམས་པ་དམར་བོའི་གསེབ་ཏུ་ཟུག །
ཀི་རིང་བཏབ་པའི་རྗེས་ཤུལ་དུ །།
དམར་བོ་ཁྲག་གིས་མཆོད་པ་ཞིག །
གསང་བའི་ངང་ལས་རྒོལ་བ་ན །།
ཕ་ཡུལ་ཕྱོགས་ཀྱི་སེམས་པ་བོར །།
ཆུང་མའི་གདོང་གི་དཀར་ནག་ལས །།
འཇིག་རྟེན་སྣང་བར་ཞེན་པ་ལོག །
བརྩེ་བའི་མདུད་རྒྱ་གྲོལ་བའི་གཉེན །།
སེམས་ཀྱི་རྨུ་ཐག་གཅིག་པོར་སྦྲེལ །།
རྨ་རྒྱལ་སྤོམ་རིའི་སྲོག་གི་གཉེན །།
རྒྱུས་མེད་ས་མཐའ་འགྲིམས་ནས་ཐལ །།
ཁེར་རྐྱང་ལོ་ཟླའི་གསེབ་ཅིག་ན །།
མགྲིན་པའི་གད་རྒྱངས་རི་ལ་བཞག །
རླུང་གི་རེག་བྱ་ཚོར་བའི་ཉིན །།
ལུས་ཀྱིས་འདར་སིག་ཐེངས་འགར་མྱོང་ །།
བདེ་མོའི་ཐང་གི་རྨི་ལམ་དེ །།
འཇའ་བཞིན་གར་སོང་འཕྱང་མོ་ཉུག །
ཆུང་མའི་རུམ་ཁ་དྲོན་པོ་ན །།
བརྩེ་བའི་མདུད་རྒྱ་དམ་གྱིས་འཁྱིལ །།
གཉིས་སྦྱོར་ལས་ཀྱི་མྱོང་བྱང་ཞིག །
བརྗེད་མེད་སེམས་ཀྱི་གཤིས་སུ་བསྐྲུན །།
༢༠༠༧ ༥ ༨ཉིན་རྨ་ཆུ་རུ་བྲིས །