བསྐྱུར་ན་འབྲི་འདུན་ཆེ་བའི་རོལ་རྩེད་འདི།།
བྲིས་ན་རྩོམ་པར་དཀའ་བའི་འཚོ་བ་ཞིག།
རུས་ཀོག་འབྱུང་གཞིའི་རྫས་ལ་འཐིམ་དགོས་ཀྱང་།།
ན་ཟུག་མེད་པའི་སྙན་ངག་ཅི་ལ་འབྲི།།
དོན་གྱི་གཟས་ས་དམངས་ཀྱི་ཆེད་དུ་སྟེ།།
ཚིག་གི་མདའ་འདི་མཐོ་བའི་ཁྲི་ལ་འཕེན།།
མཐོན་པོ་དག་གི་ངོ་སོ་མ་ལོན་ཀྱང་།།
ཁ་ཡག་ངོ་བསྟོད་གཏམ་གྱིས་ཅི་ཞིག་ནུས།།
མགྲིན་པའི་རྒྱུ་ལས་ཤག་ཤག་མ་བབས་ཀྱང་།།
བཤང་བའི་མདོ་རུ་ལྗན་ལྗིན་བབས་པ་ཡང་།།
སྲོག་གི་རླངས་པ་ཐོལ་ཐོལ་འཕྱུར་བདེན་ན།།
རང་གི་ཚོད་ཀྱི་སྟག་ཅིག་ཅི་ལ་མིན།།
ཕྱི་ན་ཤ་རྒོད་འཁྲིགས་པའི་ཚིག་ཀྱང་མེད།།
ནང་ན་དྲོད་བཞིན་འབར་བའི་དོན་ཡང་མེད།།
མིང་དང་ཁེ་གྲགས་དེ་ལས་གཞན་མེད་ན།།
ཤོག་བུའི་སྟག་ཅེས་སུ་ཞིག་སྨད་མི་འགྱུར།།
ཁྲོས་ན་འགལ་གྱིས་དོགས་པའི་སྐྲག་སྣང་མེད།།
དགྱེས་ན་ཁོང་འཛུམ་འཆོར་བའི་ངོ་དགའ་མེད།།
མཁས་པ་འགའ་ཡི་ཐུགས་དང་འགལ་ན་ཡང་།།
རང་ལ་རང་ཚིགས་ལྡན་ན་ཅིས་མི་ཆོག།
འགན་ཁུར་མེད་པའི་དོན་ཡང་འདི་ལ་མེད།།
གསར་རྙིང་རྩོད་པའི་ཕྱོགས་ཞེན་དེ་ཡང་བྲལ།།
བསམ་གཞིག་འོ་མ་བསྲུབ་ལས་ཐོན་པ་ཡིས།།
སྙན་ངག་དེ་ཚོ་འཚོ་བའི་མར་ལོ་ཡིན།།
རྗོད་བྱེད་ལོ་མའི་ཤམ་བུ་ཤིག་ཤིག་གཡོ།།
བརྗོད་བྱ་འབྲས་བཟང་དུད་པའི་རྩེ་དགའ་དགོད།།
གོ་དོན་གཉིས་འགྲིག་འོ་མའི་མངར་ཇ་དེ།།
སུ་ཡིས་བཏུང་ན་ལུས་སེམས་མགུ་མི་འགྱུར།།
མཁས་པ་མཁྲེགས་འཛིན་ཅན་གྱི་ལག་ཆ་མིན།།
དཔོན་པོ་ཐོབ་རྟགས་ཅན་གྱི་ཁྲིམས་ཤིང་མིན།།
རང་གི་སྐད་ཆ་རང་གིས་སྨྲས་ཆོག་པ།།
འདི་ལ་ཚེ་གཅིག་མདུན་ལམ་སུས་མི་གཏོད།།
བྲིས་པས་འཛད་མེད་འཚོ་བའི་གླུ་ཚིག་འདི།།
རྣོ་སྨྱུག་ལྡེམ་པ་ཕྲ་མོའི་རྟར་དྲངས་ཏེ།།
རིགས་གྱུར་རྣ་བའི་དཔྱིད་དུ་བརྡུངས་པ་ལ།།
དགའ་སྐྱོའི་མིག་ཟུང་མི་གཏོད་རང་དབང་ཅི།།