གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ནུབ་བྱང་མི་རིགས་སློབ་ཆེན་ནས་སྐབས་ལྔ་བའི་སྒྲོལ་མའི་དུས་སྟོན་ཚོགས་པ།

2013-05-17 11:54:00 དཔལ་མོ། ཀློག་གྲངས། མཆན ཡོད།

 
   ཟླ ༥བའི་ཚེས༡༢ཉིན་ལ། ནུབ་བྱང་མི་རིགས་སློབ་ཆེན་གྱི་སྐྱེས་མ་ཚོས་རྩ་འཛུགས་དང་མདོ་འཛིན་ བྱས་ཏེ་ལན་གྲུ་ནས་མ་ཡུམ་གྱི་དུས་ཆེན་དང་སྐབས་ལྔ་བའི་སྒྲོལ་མའི་དུས་སྟོན་མཉམ་དུ་བསྡུས།
  སྤྱིར་ན་ཟླ ༥བའི་ཚེས༡༢ཉིན་ནི་སྤྲོ་ཚོགས་ལ་རོལ་བའི་སྐལ་བཟང་ཞིག་མིན་མོད། ད་ལོརཉིན་དེ་ནི་གཅིག་ན་མ་ཡུམ་གྱི་དུས་ཆེན་ལ་ཁེལ་ཡོད་པ་དང༌། གཉིས་ན་གཟའ་ཉི་མ་ཡིན་པ། གསུམ་ན་སྒྲོལ་མའི་དུས་སྟོན་གྱི་རྒྱུན་མ་ཆད་པར་བདེ་ལེགས་ངང་སྐྱོང་རྒྱུའི་དགོས་པ་བཅས་ལ་དམིགས་ནས་ཉིན་དེར་ཚོགས་པ་ཡིན།
  ཐེངས་འདིའི་དུས་ཆེན་ལ་ནུབ་བྱང་མི་རིགས་སློབ་ཆེན་གྱི་སྐྱེས་མ་དགེ་རྒན་དང་ལས་བཟོ་བ་ཉི་ཤུ་ལྷག་དང༌། ལན་གྲུ་གྲོང་ཁྱེར་ན་ཡོད་པའི་བོད་མོ་སྐོར་ཞིག་ཞུགས་ཡོད། སྐྱེས་མ་ཚོར་དུས་སྟོན་འདི་ལ་སྔོན་དང་མི་འདྲ་བའི་ཐུན་མོང་གི་བསམ་ཚུལ་ཞིག་ཡོད་པ་ནི་དུས་སྟོན་འདི་ཅིས་ཀྱང་རྒྱུན་སྐྱོང་བའི་དགོས་པ་ཡོད་པ་དེ་ཡིན།
 
དང་པོ། དགོས་པ་དང་དམིགས་ཡུལ་ནི།
༡ དུས་སྟོན་འདི་ལབ་དང་ཉོག་གཏམ་ཁོ་ནར་རོལ་རྒྱུ་ཞིག་མིན་པར་གླུ་དང་ལ་གཞས། ཁེད་དང་གཏམ་དཔེ། གར་དང་རྩེད་མོ་སོགས་སྐད་ཡིག་དང་དམངས་སྲོལ་རིག་གནས་ཀྱི་རྒྱུད་འཛིན་རྒྱུར་དམིགས་པ།
༢ བོད་མོ་ཚོ་ལྷན་དུ་འཛོམས་པའི་གོ་སྐབས་བསྐྲུན་ཏེ་རྗེས་སུའང་དུས་རྒྱུན་ཕན་ཚུན་ལ་འབྲེལ་འདྲིས་དང་སྐྱིད་སྡུག་གང་ཡོད་ན་མཉམ་དུ་འཁུར་རྒྱུར་དམིགས་པ།
༣ བྱིས་པ་ཚོའང་ངེས་པར་ཞུགས་ཏེ་མ་ཡུམ་རྣམ་པས་གླུ་ལེན་གར་རྩེད་བྱེད་པའི་ཁྲོད་ཁོ་ཚོར་བོད་སྐད་དང་དམངས་སྲོལ་རིག་གནས་ལ་བག་ཆགས་འཇོག་པར་ཁོར་ཡུག་བསྐྲུན་པར་དམིགས་པ།
༤  རྒྱལ་སྤྱིའི་མ་ཡུམ་དུས་ཆེན་དང་མཉམ་དུ་རོལ་ཚེ་བདེ་འཇགས་དང་བདེ་སྐྱིད་ཡོང་བར་དམིགས་པ་བཅས་ཡིན།
 
གཉིས་པ།  དུས་སྟོན་གྱི་རྩ་དོན་གཏན་ལ་ཕབ་པ་ནི།
༡  དུས་སྟོན་འདི་ལོ་རེའི་མ་ཡུམ་དུས་ཆེན་གྱི་ཉིན (སྤྱི་ཟླ་ལྔ་བའི་ནང་) ལ་འཚོགས་རྒྱུ།
༢  ཉིན་དེར་ཚོགས་ཞུགས་པ་ཚང་མས་བོད་ལྭ་གོན་རྒྱུ་དང་བྱིས་པ་ཚོས་ཀྱང་ངོ༌། །
༣  བོད་མོ་སུ་ཡིན་ཡང་དུས་སྟོན་འདི་གཙིགས་སུ་བཟུང་སྟེ་འགན་འཁྲིར་ལྟ་རྒྱུ།  
༤  དུས་སྟོན་གྱི་ནང་དོན་ངེས་པར་རང་གི་སྐད་ཡིག་དང་རིག་གནས་ལ་སྦྲེལ་རྒྱུ།
༥  ལོ་རེར་སྐྱེས་མ་གཉིས་རེས་རྩ་འཛུགས་བྱས་ཏེ་དུས་སྟོན་འཐུས་ཚང་ཡོང་བར་འགན་འཁུར་རྒྱུ།
གསུམ་པ། ཐེངས་འདིར་མངོན་པའི་དུས་སྟོན་གྱི་བརྗོད་བྱ་ནི།
༡ རྒན་བཀུར་གཞོན་སྐྱོང་དང་ཕན་ཚུན་རོགས་རམ་བྱེད་པའི་འདུ་ཤེས་སླར་སོས་པ།
༢ དམངས་གླུ་དང་ལ་གཞས་ལེན་མཁན་ཇེ་མང་ལ་སོང་བ།
༣ བོད་ལྭ་གོན་པ་རྣམས་གར་དང་ཤོམ་དུ་སོང་བས་བོད་ལྭ་གོན་མེད་པ་རྣམས་ལ་རྡུང་རྡེག་ཐེབས་པ།
༤ བྱིས་པ་ཚོ་དགའ་ལྷང་ལྷང་ངང་གླུ་གར་གྱི་ཁོར་ཡུག་ལ་རོལ་བ་བཅས་སོ། །
 


 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།