༡
ཡབ་ཀྱི་མིག་ཆུ   ཡུམ་གྱི་རྔུལ་ཆུ
ཁྲག་གིས་བཏུམས་པའི་མ་ཎི་ཡིག་དྲུག
མངོན་སུམ་གྱི་བར་དོ   ཐ་སྙད་ཀྱི་བར་དོ
རླངས་འཁོར་གྱི་དུང་བརྡས་དཀྲོག་གིན་པའི
རི་སྤྱང་དག་གིས   ཁ་བའི་ཐང་དང་ཤེལ་གྱི་རི་བོ་ཧྲུག་ཆག་ཏུ་བཏང་ཤུལ་ན
མི་རབས་གསུམ་པས  ཨ་རག་འཐུང་བཞིན   འཁྲིག་པ་སྤྱོད་ཀྱིན
ཞེ་སྡང་ལྟ་བུའི་བསང་ཕུད་ཀྱིན  
རུལ་མྱགས་སུ་གྱུར་བའི་སྐད་ཆ་བཤད་ཀྱིན
རང་ཉིད་ཚུད་པའི་སྐྱེས་ཕོ་མོ་ཚོའི་ཀླད་པ་དཀྲུག་གིན་ཡོད
རྣམ་ཤེས་པགས་པ་ལྟར་བཤུས་རྗེས་ཀྱི་ལུས་པོ་གཉོར་གྱིན་ཡོད
གང་ས་གང་ལ   བྲང་ངོས་སུ    སྒལ་གཞུང་དུ
འདོམས་སུ  དབྱངས་ཅན་མའི་རྒས་གཉེར་གྱི་སྲུབས་སུ
ཉི་འོད་ཀྱི་གསེང་དུ  ཆང་ཁང་དུ   མགྲོན་ཁང་དུ
སྨད་ཚོང་མ་སངས་རྒྱས་སྒྲོལ་མའི་སྐྲ་གསེབ་ཏུ
རྩྭ་དང་ཆུ་ཡི་ཁོང་བར 
ཤ་ཚོན་པོ་དང་གློག་དམར་བོའི་ནང་དུ
ཆུང་མའི་མཆུ་སྒྲོས་དང་དཔོན་པོའི་མདུན་དུ
སྙན་ངག་འབྲི་བཞིན་ཡོད    མི་རབས་གསུམ་པས
སྙན་ངག་རྡུལ་ཕྲ་རབ་དང་འདྲ་བ་འབྲི་བཞིན་ཡོད

ནམ་རྒྱུན   མི་རབས་གསུམ་པ
རེ་སྦྲ་སྨུག་པོའི་ཁོང་གསེང་ཉི་ཟེར་ཕྲ་མོས་དབྲལ་བ་ཇི་བཞིན
གཟིག་མོ་ནགས་ལས་ཤོར་བ་ཇི་བཞིན
ཐོག་དམར་བོས་བྲག་དམར་གཏོར་བ་ཇི་བཞིན
རང་གི་ལང་ཚོ་ལས་ལམ་ལ་ཆས་དུས
གཞུང་ལས་ཁང་ནང་གི   ཆུ་རྒོད་ཀྱིས་ལྒང་བུ་ཡོངས་སུ་གང་བའི
བོད་མི་ལས་བྱེད་པ་རྩོད་པར་དགའ་བ་ཚོས
ཁོ་ཚོ་ནི་ཁྱི་རེད  ཁོ་ཚོ་ནི་འདྲེ་རེད
ཁོ་ཚོ་ནི་ཅི་ཡང་མ་རེད 
ཁོ་ཚོ་དོན་གྲུབ་རྒྱལ་གྱི་བ་སྤུའི་བུ་ག་ལའང་མི་དོ་ཟེར
ཨ་ཨ   འགྲམ་ལྕག་གིས་བཟོས་པའི་གནས་ལུགས
        སྒྲུབ་བྱེད་ལ་ཁྱེར་ཡོང་བའི་མནའ་ཚིག
        དམར་གསོད་ལ་གོམས་པའི་ལག་པ
        འོལ་ཚོད་ཀྱིས་སྤུངས་པའི་གཞུང་ལུགས
        ཚ་བས་ངར་བའི་ཁྲིད་སྟེགས
འདི་དག་ཐལ་རྡུལ་བཞིན་དྭངས་པའི་རྗེས་སུ
མི་རབས་གསུམ་པ་བྱིས་པ་ཚོའི་ཆེད་དུ་ཉི་མ་བཞིན་འཆར་ཞིང
མི་རབས་གསུམ་པས  སྙན་ངག་གི་ཆེད་དུ་ཚེ་འཕོ་བའི་སྟ་གོན་ཡང་གྲུབ་ཟིན
                                 ༢
དབྱར་ཁ  ཆར་ཆུ་མོད་པའི་དུས་ཚིགས
འོན་ཏེ་མི་རབས་གསུམ་པའི་མིག་ཆུར་ཐན་པ་བྱུང
དགུན་ཁ ལྷགས་རླུང་རུས་པར་ཟུག་པའི་དུས་ཚིགས
འོན་ཏེ་མི་རབས་གསུམ་པའི་ཁྲག་རྩས་མེ་སྟག་གཙུབས
སྟོན་ཁ རྩྭ་མགོའི་ཉི་འོད་འཐོར་བའི་དུས་ཚིགས
འོན་ཏེ་མི་རབས་གསུམ་པའི་གླུ་སྒྲས་སྤྲིན་དཀར་སྲེག
དཔྱིད་ཁ མེ་ཏོག་འཛུམ་བཞད་གྲོལ་བའི་དུས་ཚིགས
འོན་ཏེ་མི་རབས་གསུམ་པའི་སེམས་ཁ་འཁྱག་པས་བཟུང
གདོད་ནས་མ་བཅོས་པའི་རང་བྱུང་གི་ཆོས་ཉིད་དེ
སྲང་ལམ་གྱི་རས་ཧྲུལ་ཞིག་ལྟར་རླུང་གིས་ཁུར་ནས
ཁྱོད་ཀྱི་སྒེའུ་ཁུང་གི་ཐེམ་པར་དལ་བུར་ལྷུང་དུས
བརྩེ་སེམས་ཀྱིས་སྨྱོས་པའི་མི་རབས་གསུམ་པ་ཚོས
གྲོང་ཁྱེར་གྱི་སྒལ་གཞུང་དུ་མེ་བཙའ་འཇོག་ཅིང
སྤང་ལྗོངས་ཀྱི་བར་སྣང་ལ་སྙན་ངག་སྤུར
སྙན་ངག་ལས་འཐོར་བའི་བྱ་སྤུ་དང་འོད་ཁྱིམ
མཐོ་ས་ནས་མཐོ་སར་ཁྱེར་ཏེ་སྟོང་བོའི་ངོ་བོར་ཐིམ
དེ་ནི་ཁྱོད་ཀྱིས་འདོད་ཆགས་དང་བཅས་པའི་མིག་གིས་འཛིན་ཐབས་བྲལ་ཞིང
གཏི་མུག་དང་བཅས་པའི་པར་ཆས་ཀྱིས་ཀྱང་ལེན་ཐབས་བྲལ་ལོ

ཁ་གཡང་དང་བསྟོད་ཚིག་གིས་བཟོས་པའི་འོ་མར་རུལ་བས
འགྱིག་གི་མཆོད་མེ་དག་ལ་མེ་ཁ་གསོ་དུས
མེ་ལྕེབས་ཀྱི་གཤོག་རྩེར་འགོས་པའི་ཚིག་རྒྱན་དག
མུན་པ་མཐུག་པོའི་ཁོང་གསེང་ནས་ག་ལེར་འཚིག
གཞོབ་དྲི་དེ་དབྱངས་ཅན་ལྷ་མོའི་དངོས་གྲུབ་ལ་འཁྲུལ་མཁན་ནི
མི་རབས་གསུམ་པ་མ་ཡིན་ཏེ མི་རབས་གསུམ་པའི་ཁ་སྤྲོད་དུ་སྡོད་པའི
པར་ཤིང་ལྟ་བུའི་རྒན་པོ་དག་གོ

ཧོལ་རྒྱུགས་དང་ཕྱོགས་ལྷུང་གིས་གྲུབ་པའི་མཇུག་མ་རིང་བོས
ཁྲོན་པའི་ཟླ་བ་སེར་བོ་ལེན་པར་རྩོམ་དུས
ཤིང་ཕྲན་གྱི་ཡལ་ཀར་ཁེན་པའི་ཆུ་ཐིགས་དག
མཚན་མོ་རིང་བོའི་མིག་ཀོང་ནས་དལ་བུར་ཟགས
ཅལ་སྒྲ་དེ་སྐྱེས་བུ་དམ་པའི་རྡོག་སྒྲ་ལ་འཁྲུལ་མཁན་ནི
མི་རབས་གསུམ་པ་མ་ཡིན་ཏེ མི་རབས་གསུམ་པའི་ཁ་སྤྲོད་དུ་སྡོད་པའི
ཁྲམ་པ་ལྟ་བུའི་བྱིས་པ་དག་གོ

དུས་རབས་ཀྱི་ཟློས་གར་ཁང་ཆེན་དེ་རུ
མི་རྣམས་རིན་གོང་དམན་པའི་སྤ་སེ་ཐོགས་ནས་ལྟད་མོ་ལྟ་བར་ཡོང་དུས
མི་རབས་གསུམ་པས་མདོ་འཛིན་པ་དང་ཨ་ཙ་ར་མེད་པའི
བརྩེ་དུང་གི་གཏམ་རྒྱུད་འཁྲབ  མཚོན་དོན་དང་བརྗོད་སྙིང་མེད་པའི
གཅེར་བུའི་ལུས་པོ་ངོམ མཆོད་བྱ་དང་མཆོད་ཡུལ་མེད་པའི
སྙན་ངག་གི་མཆོད་གསོལ་བྱེད
མི་རྣམས་ཀྱི་དགོད་སྒྲ་ཟློས་གར་ཁང་ཆེན་དེ་རུ
འབུ་སྦྲང་འགའ་དང་ལྷན་ཅིག་བཙོན་དུ་ཚུད་ཅིང
སྐབས་འགར་འདྲེ་སྲིན་འཁྱམ་པོ་ཞིག་ལྟར་སང་སང་གྲགས
                                ༣
གཡུ་ཡི་གཞོང་བ་ཞིག་གས་ཆག་སུ་སོང་བ་ཇི་བཞིན
ཁྱོད་ཀྱི་སྤང་ལྗོངས་གྱོ་མོ་དང་རྫ་ཆག་གིས་གང་ཞིང
བདག་གི་ནམ་མཁའ་དུ་སྤྲིན་ནག་པོས་བསྒྲིབས
རྒྱ་གླ་བ་ཞིག་དང་འདྲ་བའི་སྐྱེས་པོ་ཞིག་མིག་དང་ཁ
སྐྲ་དང་བྲང་ཁ་བཅས་ཐལ་རྡུལ་སྐྱ་བོས་གཡོགས་ཏེ
ཅི་ཞིག་ལ་སྐྲག་པ་བཞིན་བྲོས་ནས་ཡོང
དེའི་རྗེས་ན མི་རེ་རེས་ལག་ཏུ་ཆང་ཕོར་རེ་ཐོགས་ཤིང
བུད་མེད་རེས་ཕྲུ་གུ་རེ་ཁྲིད་ནས་འོངས་དུས
ལོ་རྒྱུས་ཀྱི་དེབ་ཐེར་ངོས་ནས་དུས་རབས་ཉེར་གཅིག་པ་མངོན་ཡོང་བ་ལས
མི་རབས་གསུམ་པ་མངོན་མི་འོངས་ཏེ
ཁོ་ཚོས་སྙན་ངག་ལས་བླངས་པའི་ལྕགས་སྒྲོག་དག་གིས
རང་ཉིད་དམ་དུ་བཅིངས་ནས
དེའི་ལྡེ་མིག་ཁྱོད་ལ་གཏད་ཟིན

ཀྱེ་གྲྭ་བ ལྡེ་མིག་ཁྱོད་ལ་གཏད་ཟིན  ཀྱེ་བུད་མེད ལྡེ་མིག་ཁྱོད་ལ་གཏད་ཟིན

ཁོ་ཚོས་མེ་ལོང་སིལ་བུར་བཅག་ནས་རང་ལུས་ལ་ལྟ་བཞིན་ན་རེ
"སྙན་ངག་ནི་རྒྱན་ཆ་མ་ཡིན་པར་ཚེ་སྲོག་ཡིན་པས
ངེད་ཅག་ད་ལྟ་སྙན་ངག་ཏུ་གྱུར་ཟིན
གནའ་བོའི་ཅོང་སྒྲ་དེ་རླངས་འཁོར་གྱི་དུང་བརྡ་ཞིག་ཡིན་པའི་དབང་དུ་བཏང་ན
ད་ལྟ་ངེད་ཅག་གིས་ཀྱང་འཕྲུལ་ཆས་ཀྱི་མི་ཞིག་ལྟར་དེ་ལ་རྡུང་ག་རྒྱག་ཆོག"

ད་ལྟ གནས་མོ་འཁྱམས་ཟིན ཤིང་ཁང་བརྡིབས་ཟིན
འཇག་རྩྭའི་གསེབ་ཀྱི་བྱེ་མའི་བུ་གར
བརྩེ་དུང་གི་གཏམ་རྒྱུད་དག་དལ་མོར་ཐིམ
ཚ་འཁྲུལ་གྱིས་ཟིན་པའི་ས་གཞི་འདི
ཚ་འཁྲུལ་གྱིས་ཟིན་པའི་མི་རབས་གསུམ་པ་དང་མཚུངས་ཏེ
སྟབས་ཉེས་ན ཆུ་ཐིགས་པ་གཅིག་འཐོབ་པའི་ཕྱིར་ཏུ
རང་སྲོག་མི་གཅོད་པའི་ངེས་པའང་བྲལ་ལོ
                   

རྩོམ་ཁུངས། མཆོད་མེའི་པོད་ཁུག