མེ་ཏོག་རྐང་དང་བོ་མོ།
མིན།  བདག་གི་མཛའ་བཤེས་རྣམ་པ་ཚོ།  ང་ནམ་ཡང་དཀའ་ཐུབ་པ་ཞིག་བྱེད་རྒྱུ་མིན།
ཁྱོད་ཚོས་ཅི་ཞིག་བཤད་ཀྱང་བཤད།
གལ་ཏེ་མོས་ང་དང་མཉམ་དུ་དཀའ་ཐུབ་ཀྱི་སྡོམ་ཁྲིམས་མ་བཞེས་ན་ནི་ང་ནམ་ཡང་དཀའ་ཐུབ་པ་ཞིག་བྱེད་རྒྱུ་མིན།

གལ་ཏེ་བདག་ལ་བསིལ་གྲིབ་སྟུག་པའི་གྲིབ་འོག་ཅིག་དང་།
ང་དང་མཉམ་དུ་དཀའ་ཐུབ་ལ་སྡོད་མཁན་ཞིག་མ་རྙེད་པ་ཡིན་ན་ང་རང་དཀའ་ཐུབ་པ་ཞིག་བྱེད་རྒྱུ་མིན་ཞེས་སེམས་ཐག་ཆོད་པ་ཡིན།

མིན།  བདག་གི་མཛའ་བཤེས་རྣམ་པ་ཚོ།
གལ་ཏེ་ནགས་ཚལ་གྱི་བསིལ་གྲིབ་སྟུག་པོ་དེར་བདག་གིས་སུ་ཞིག་གི་དགོད་སྒྲའི་བྲག་ཆ་ཐོས་རྒྱུ་མེད་པ་དང་།
 གལ་ཏེ་སུ་ཞིག་གི་གེ་ས་རིའི་མདོག་ཅན་གྱི་སཱ་རས་རླུང་ཁྲོད་དུ་ལྷབ་ལྷུབ་སྐྱོད་པ་མ་སྲིད་པ;
བརྒྱ་ལ་སྒྲ་ཤིན་ཏུ་མཉེན་པའི་གསང་གཏམ་ཤབ་ཤུབ་ཀྱི་སྒོ་ནས་ས་དེའི་ལྷིང་ཇེ་འཇགས་སུ་གཏོང་རྒྱུ་མ་སྲིད་ན།

ང་རང་རང་ཁྱིམ་དང་ཁ་བྲལ་ཏེ་དབེན་འཇགས་ཀྱི་ནགས་ཚལ་དུ་གནས་རྒྱུ་མིན་ལ།
དཀའ་ཐུབ་པ་ཞིག་ནམ་ཡང་བྱེད་རྒྱུ་མིན།


            མེ་ཏོག་རྐང་གཉིས་པ་མོ།
ཀྱེ།  བདག་ཉིད་ཆེན་པོ།  ཉེས་ཅན་འདི་གཉིས་གུ་ཡངས་སུ་གཏོང་རོགས།
དིང་གི་དཔྱིད་རླུང་རབ་ཏུ་བཟི་སྟེ་གཡུག་གིན་འདུག,
ཐལ་རྡུལ་དང་ལོ་མ་རྙིད་པ་དག་འཁུར་གྱིན་འདུག,
དེ་དག་དང་ལྷན་དུ་ཁྱེད་ཀྱི་ཁྲིད་ཚན་ཡང་བརླག་སོང་།
ཡབ་ཆེན་ལགས།  མི་ཚེ་ལ་སྙིང་བོ་མི་འདུག་ཅེས་མ་གསུངས་རོགས།
རྒྱུ་མཚན་ནི་བདག་ཅག་གིས་འཆི་བ་དང་ལྷན་དུ་ཞི་མོལ་བྱས་ཟིན་ལ།
ད་དུང་དུས་ཡུན་ཐུང་ཐུང་ཞིག་གི་རིང་ལ་ངེད་གཉིས་ལ་འཆི་མེད་ཀྱི་གོ་འཕང་ཐོབ་པར་བྱས་ཡོད།


བརྒྱ་ལ་རྒྱལ་བོའི་དམག་དཔུང་ཐོན་ཏེ་ངེད་གཉིས་ལ་ཤུགས་ཀྱིས་རྒོལ་འཛིང་བྱེད་ན་ཡང་།
 ངེད་གཉིས་ཀྱིས་སྐྱོ་བའི་ཉམས་དང་བཅས་ཏེ་མགོ་བོ་གཡུག་ཞོར་འདི་སྐད་དུ།
སྤུན་མཆེད་ཚོ།  ཁྱོད་ཚོས་ངེད་ཅག་གི་ལྷིང་འཇགས་དཀྲོག་གིན་འདུག
གལ་སྲིད་ངེད་ཅག་དང་ལྷན་དུ་ཅ་ཅོའི་རྩེད་མོ་འདི་ངེས་པར་རྩེ་རྒྱུ་ཡིན་ན་ནི།
སོང་ཞིག   རང་རང་གི་མཚོན་ཆ་ས་གཞན་ཞིག་ཏུ་བརྡབས་རོགས་ཞེས་བརྗོད་ཆོག
རྒྱུ་མཚན་ནི་དུས་ཡུན་ཐུང་ཐུང་ཞིག་གི་རིང་ལ་ངེད་གཉིས་ལ་འཆི་མེད་ཀྱི་གོ་འཕང་ཐོབ་པར་བྱས་ཡོད་པས་ཡིན།


གལ་ཏེ་སྙིང་ཉེ་བའི་མི་རྣམས་ཕེབས་ཏེ་ངེད་གཉིས་བསྐོར་བར་བྱས་ན་གུས་འདུད་དང་བཅས་མངོན་པར་དགའ་བར་བྱས་ཏེ་འདི་སྐད་དུ།
  ཁྱད་དུ་འཕགས་པའི་བསོད་ནམས་འདི་བདག་ཅག་ལ་མཚོན་ན་ཁ་སྐྱེངས་བྱེད་ཅིག་རེད།
 ངེད་གཉིས་གནས་སའི་མཐའ་མེད་པའི་ནམ་མཁར་དགོད་བྲོ་བ་ཞིག་ལ་བར་སྟོང་ཁྱོན་ནས་མི་འདུག
རྒྱུ་མཚན་ནི་དཔྱིད་དུས་ཀྱི་མེ་ཏོག་ཚོགས་འཚང་ཁ་ཤིག་ཤིག་ཐོན་བྱུང་ལ།
བྲེལ་འཚུབ་ཆེ་བའི་སྦྲང་མའི་གཤོག་པ་དག་ཀྱང་ཕན་ཚུན་གཙུབས་བརྡར་བྱེད་ཀྱིན་འདུག
ངེད་གཉིས་ཀྱི་དག་ཞིང་ཆུང་ཆུང་སྟེ།
གང་དུ་འཆི་བ་མེད་པའི་ངེད་གཉིད་ཁོ་ན་གནས་ས་དེ་དགོད་བྲོ་བ་ཞིག་ལ་ཧ་ཅང་དོག་པོ་འདུག་ཅེས་བརྗོད་ཆོག
        ༼ཟླ་བ་གཞོན་ནུས་བསྒྱུར༽

རྩོམ་ཁུངས། ངེད་དྲ་བ།