ཟླ་བདུན་པ།
ཟླ་བདུན་པ
བར་སྣང་ནས་ལྷུང་འོངས་པའི གཏུབ་གྲི་ཞིག་དང་འདྲ་བར
དོན་སྙིང་མེད་པའི་ཉིན་གུང་གི་དུས་ཚོད་ལྷག་མ་དག
དུམ་བུ་གཉིས་སུ་གཏུབ
དུམ་བུར་བཅད་པའི་སིལ་ཏོག་ཚ་ལུ་མ་ཞིག་གི་ཁུ་བ
ཉིན་གུང་གི་སྒྲོག་ཙེའི་ངོས་སུ་འཐོར་བ་བཞིན
སེར་མདོག་གི་ཉི་འོད་དྭངས་མོ་ངའི་སྒོ་ཁྱམས་སུ་སིལ་བུར་འཐོར་ཞིང
ངང་གིས་འཁྱིལ་བྱུང
དེའི་དབང་གིས ཁང་མིག་ཆུང་ངུ་འདི་ནི་སྒོ་ངའི་སྦུབས་སུ་སྦྲུམ་པའི
ཚེ་སྲོག་གི་ནང་སྙིང་སེར་བོ་དེ་དང་འདྲ་བར
འགུལ་ཙམ་འགུལ་ཙམ་གྱི་དུས་ཚོད་ཀྱི་མིག་འབྲས་ཟུང་གཅིག་གིས
ད་དུང་ཡང་ཟུམ་པ་མེད་པར་སུ་ཞིག་གི་ཤ་དྲོད་ལ་སྒུགས་འདུག
གསེར་རྩི་བསྒོས་པའི་མཛུབ་དཀྲིས་ཆུང་ངུ་ཞིག་ནས་མགོ་བརྩམས་ཏེ
གཟིམ་ཁྲིའི་སྒང་གི་འཁུན་སྒྲ་དང་རྔུལ་ཆུས་འཚོས་པའི་སྔས་འགྲམ་ནས
རྟོག་འཆར་བཞིན་བཀྲམས་ཆོག་པའི་ཉིན་གུང་གི་སྐར་ཚོགས་ཀློང་དུ་མཆེད
བུ་མོ་དེ སྔར་ནས་སྨིན་ཟིན་པའི་ཁམ་བུ་དམར་པོ་དེ
ངའི་ཡུལ་གྱར་བ་རྨི་ལམ་གྱི་བྱེ་ཐང་སྒྲོལ་བའི་བཏུང་ཆུ་མངར་མོ་དེ
ཟླ་བདུན་པ
དེ་རིང་གི་མིག་ཆུའི་ཀློང་ན་འདར་བའི་རི་དྭགས་རྨས་མ
ཁེར་རྐྱང་གི་ནགས་ཚལ་ལས་བུད་དེ་རྫ་སྒང་གི་རྐང་ལམ་འགྲིམས་མཁན
སྒེའུ་ཁུང་གི་གླེགས་བུའི་བར་ན་འཁྱམས་པའི་འབུ་སྦྲང་ཕོ་མོ
ཉིན་གུང་གི་མཁའ་མཐར་དཔྱངས་པའི་ཟླ་བ་ཕྱེད་པ
ངར་ལྕགས་ལས་གྲུབ་པའི་གྲུ་གཟིངས་ཆེན་པོའི་ནང་རིམ་དུ
ཁྱེད་ཀྱི་མཆུ་སྒྲོས་དྲོན་མོ་སྔར་ལྟར་སྦྱོར་སྲིད་དམ
ཡུན་རིང་གི་སྐོམ་གདུང་འཁུར་བའི་བརྩེ་དུང་འདིའི་བྲང་ཁར
སོ་སྒྲ་དང་སིད་སྒྲ་ལྷན་དུ་སྒྲོགས་པའི་གཙང་ངོགས་སུ་སླེབས་བྱུང
ཝུ་བ་དང་ཐིགས་པ་མཉམ་དུ་འབྱིན་པའི་གཟིངས་གྲུ་ལས་བབས་བྱུང
མཆོད་ཁང་དཀར་པོ ཆང་ཁང་དམར་པོ ཟླུམ་ཞིང་མཁྲེགས་པའི་བརླ
སྐར་འོད་བཞིན་འཚེར་བའི་མིག་གི་མདའ་མོ
ཆ་མི་མཉམ་པའི་ཤ་མདོག་དང ཆ་མི་མཉམ་པའི་མཛུབ་མོ
ཁྱེད་ཀྱི་དྲན་ཤེས་ཀློང་དུ་སིམ་པའི་རྩི་རྐང་ཅིག་གི་རྩ་བ
ཟླ་བདུན་པ་ནི་སྙན་ངག་ཅིག་ཡིན
ལྗང་མདོག་གི་ལོ་མ་ཞིག་ནས་མགོ་བརྩམས་ཏེ
ཡལ་ག་དང་རྩ་རྐང་བརྒྱུད་ནས དལ་བ་དལ་བུར་འབུས་ཀྱིན་ཡོད
བཙས་མ་ཐག་པའི་བྱིས་པ་ཞིག་གི་ངུ་སྐད་ཇི་བཞིན
ཁྱེད་ཁོ་ནས་ད་གཟོད་དེ་དག་གི་དོན་སྙིང་རྟོགས་ནུས
ད་དུང ཡོད་ཚད་རྔམ་ཟ་བྱེད་མཁན་གྱི་མཆེ་བ་དང
འཁྲིག་སྤྱོད
དམར་པོ སེར་བོ ལྗང་གུ﹍﹍
རྩོམ་ཁུངས། ངེད་དྲ་བ།