དེ་རིང་ཁ་སང་།༼བཅད་མ༽
དེ་རིང་ཁ་སང་ལ།། གོ་རྒྱུ་ཇེ་མང་རེད།།
མ་ཉན་ཉལ་བ་ན།། རྨི་ལམ་ཇེ་འཁྲུག་རེད།།
ས་བདག་རྒན་པོ་དེའི།། སྙིང་ཁམས་འཁྲུག་ཚོད་རེད།།
ཉི་མ་སེར་བོ་དེ།། དམར་པོར་གྱུར་ཚོད་རེད།།
ཉི་མ་སེར་བོ་དེ།། དམར་པོར་གྱུར་ཚོད་རེད།།
དབུལ་བོའི་ཟུངས་ཁྲག་གིས།། ཕྱུག་པོ་རྒྱགས་པོར་ཆགས།།
བླུན་པོའི་དྲང་བདེན་ལས།། མཁས་པས་གཡོ་སྒྱུ་སློབ།།
དེ་རིང་ཁ་སང་ལ།། ཆུ་ནི་རུལ་བ་རེད།།
མཁའ་ནི་བཙོག་པ་རེད།། ས་ནི་ཚ་བ་རེད།།
སེམས་ཀྱི་དམྱལ་བ་ན།། ལས་མཁན་འཚང་ཁ་རྒྱག།
སྡིག་པའི་རྐང་ལག་གིས།། སྡིག་པ་ར་ཙ་འཁྲབ།།
རྣམ་ཤེས་ཁྲི་འབུམ་ནི།། གནས་ཡུལ་མེད་པར་འཁྱམ།།
ཁང་སྟོང་ཁྲི་འབུམ་ནི།། འགྲུལ་བ་མེད་པར་ལུས།།
དེ་རིང་ཁ་སང་ལ།། མི་ཡི་གྲོག་ཚང་དེ།།
སློག་མཁན་མང་པོ་འདུག། རྒྱུ་རྐྱེན་ཆ་མ་འཚལ།།
དཔྱོད་པའི་ཁབ་རྩེ་དེ།། རྣོ་ཙམ་ཡོད་ནའང་།།
སྲ་མོ་མི་འདུག་པས།། ཀུན་གྱི་ལག་ནས་ཆག།
མཆུ་ཏོའི་རྩོད་པ་དེས།། མཁའ་དང་བར་སྣང་གང་།།
སྨྲ་མཁན་ནད་པ་དག། དོང་དང་ཕུག་པར་འཚང་།།
དེ་རིང་ཁ་སང་ལ།། དམ་པ་ཉུང་བ་སྟེ།།
དམ་པའི་སྐྱི་ལྤགས་ཤིག། གཙོ་བོར་དབང་ཚོད་རེད།།
འཁོར་འབངས་ཉམ་ཐག་དག། རང་གི་མལ་ཐུལ་ནང་།།
མི་འཛུལ་ཀ་མེད་དེ།། འབུ་དང་ག་ཞས་དཀྲོགས།།
གཉིད་ལས་སད་པ་ན།། ལག་པ་སྟོང་བ་དག།
སྡོང་བོའི་ཡལ་ཀ་བཞིན།། ཁྱོད་ལ་དམ་དུ་འཁྲིལ།།
2010/10/1
རྩོམ་ཁུངས། ངེད་དྲ་བ།