༄༅།།ཀ་ཁའི་ལྷུ་རྐང་འདི་ནས་འགྲིག་ཐལ་ཞེས།།

        ཁ་ནས་གང་བྱུང་རྩོམ་དུ་འཛིན་མཁན་ཚོས།།

        ག་ལེར་དཔྱད་པ་ཅུང་ཙམ་གཏང་ཤེས་ན།།

        ང་ཡིས་སྡིགས་དམོད་དེ་འདྲ་གཏོང་དགོས་མེད།།

        ཅ་ཅོའི་གཏམ་ཚོགས་གནས་ལུགས་ཡིན་མདོག་གིས།།

        ཆ་ཡོད་མདུན་ནས་གླེན་རྟགས་བསྟན་ནའང་།།

        ཇ་ཆང་ཙམ་ཞིག་རོལ་བྱེད་ཁོ་ན་ལས།།

        ཉ་ཉོག་སེལ་བའི་རྒྱུ་རུ་ཅི་ལ་འགྱུར།།

        ཏ་ཐཱ་ག་ཏའི་གསུང་རབ་སྣ་ཚོགས་པ།།

        ཐ་མ་ཁ་ཡི་དུ་བས་སྤུར་བཞིན་དུ།།

        ད་ནས་བཟུང་སྟེ་གསར་བརྗེ་བྱ་ཟེར་བས།།

        ན་ཆུང་འགའ་ཞིག་འདུར་དུ་བཅུག་མོད་ཀྱང་།།

        པ་ཐུར་ལྟ་བུའི་མཚན་ཉིད་མཁན་པོ་དང་།།

        ཕ་དང་མ་ལ་བརྩེ་བའི་བདག་ཉིད་ཅན།།

        བ་གླང་མིར་ཁྱུར་འཇུག་པའི་སློབ་དཔོན་དག།

        མ་འགྲིག་ཟེར་བཞིན་ནོངས་པ་ཆེན་པོས་བཞུགས།།

        ཙ་རི་བསྐོར་ན་བྱིན་པ་ན་བྱེད་ཟེར།།

        ཚ་གྲང་གཉིས་ཀྱི་དམྱལ་བ་མེད་དོ་སྨྲ།།

        ཛ་ལང་སྤྱོད་པར་མི་ཡི་ཆོས་སུ་བསྒྲགས།།

        ཝ་མ་ཝོ་ལེར་སྡོམ་ཚིག་མང་པོ་བཀོད།།

        ཞྭ་གོས་ལྷམ་སོགས་འཚོ་ཚིས་འགྲུབ་པ་དང་།།

       ཟ་བྱེད་སོ་ལ་རྣོ་ངར་ལྡན་པའི་ཕྱིར།།

       འ་ཅག་རང་ལས་གཞན་ལ་མི་སེམས་ན།།

       ཡ་རབས་སྤྱོད་པ་དེས་ཀྱང་ཅི་ལ་ཕན།།

       ར་དང་ལུག་གིས་ལྷས་ར་ཁེབས་པ་དང་།།

       ལ་ལུང་ཐམས་ཅད་ནོར་གྱིས་བཀང་བ་ཡི།།

       ཤ་ཁྲག་ཚིལ་གྱིས་བཏུམས་པའི་སྦྱོར་བ་ཡིས།།

       ས་སྟེང་འདི་ཉིད་བརླག་ནས་ཚར་ལ་ཉེ།།

       ཧ་ཅང་བདེན་པའི་བདག་ཅིག་ཡོད་གྱུར་ན།།

       ཧ་ཤང་རྣམས་ཀྱི་བསྟན་པ་རྒུད་ནས་ཐལ།།

       ཨ་ལ་དེ་འདྲ་མ་ཡིན་འཇིག་རྟེན་འདིར།།

       ཨ་མ་ལྟ་བུའི་ཆོས་ཤིག་མཁོ་ནས་འདུག།

རྩོམ་ཁུངས། ངེད་དྲ་བ།